Ko e hā ha ngaahi faingamālie ke ako mo faiako ai ʻi he ʻapí?

Ko e ʻapí ʻa e feituʻu lelei taha ki hono ako, akoʻi, pea mo fakahoko ai e ngaahi tefitoʻi moʻoni ʻo e ongoongoleleí. Kuo ʻosi tapou ʻa e kau palōfita ʻo e Ngaahi ʻAho Kimui Ní ki he ngaahi fāmilí ke nau fakamuʻomuʻa taha pē ʻa e lotu fakafāmilí, efiafi fakafāmili ʻi ʻapí, ako ʻo e ongoongoleleí mo e ngaahi fakahinohinó, pea mo e ngaahi ʻekivitī fakafāmili ʻoku langaki moʻuí.

Teuteuʻi fakalaumālie koe

Ko e hā ha ngaahi meʻa ne ke aʻusia ʻi hono ako mo akoʻi ʻo e ongoongoleleí ʻi homou ʻapí? Ko e hā ha meʻa te ke lava ʻo vahevahe mo e toʻu tupú?

Te ke fakaʻaiʻai fēfē ʻa e toʻu tupú ke poupouʻi hono ako ʻo e ongoongoleleí ʻi honau ʻapí? Ko e hā ha ngaahi tāpuaki naʻe talaʻofa te ne ala ueʻi fakalaumālie kinautolu?

Ngāue ʻaki e ngaahi maʻuʻanga tokoni ʻi laló ke teuteuʻi ʻa e toʻu tupú ke nau akoʻi mo ako ʻa e ngaahi moʻoni ʻo e ongoongoleleí ʻi honau ʻapí. ʻE tokoni atu hoʻo ngaahi aʻusiá ke ke akoʻi lelei ʻa e toʻu tupú. Fakakaukauʻi pe ʻe anga fēfē ha tokoni atu ʻa e ngaahi ʻekitivitī ʻi he fokotuʻutuʻu ko ʻení ʻi hoʻo palani ha ngaahi founga ke poupouʻi ai ʻa e toʻu tupú.

Mōsaia 4:14–15; T&F 68:25–28 (ʻOku ʻa e mātuʻá ʻa e fatongia ke akoʻi e ongoongoleleí ki heʻenau fānaú)

Valeri V. Cordon, “ Ko e Lea Fakafonua ʻo e Ongoongoleleí, ”Ensign pe Liahona, Mē 2017, 55–57

M. Russell Ballard, “Ngaahi Fakataha Alēlea Fakafāmilí,” Ensignpē Liahona, Mē 2016, 63-65

Quentin L. Cook, “Ko e ʻEikí Ko ʻEku Maama,” Ensign pe Liahona, Mē 2015, 62 – 66

“Efiafi Fakafāmili ʻi ʻApí,” Tuʻu Maʻu ʻi he Tuí (2004), 14–15

“Lotu Fakafāmilí,” Tuʻu Maʻu ʻi he Tuí, 107

“Mahuʻinga ʻo e Ako Folofola Fakaʻahó,” Tuʻu Maʻu ʻi he Tuí, 67–68

“Ko e ʻApí mo e Siasí” Tohi Tuʻutuʻuni Fika 2: Ko Hono Puleʻi ʻo e Siasí (2010), 1.4

Vitiō: “A Heaven-Inspired Program”

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke ʻai ke fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi e toʻu tupú ke nau vahevahe ʻa e anga ʻo ʻenau fakaʻaongaʻi e meʻa ne nau ako he lolotonga ʻo e kalasi he uike kuo ʻosí.
Kole ki he toʻu tupú ke nau fakakaukauloto ko ha mātuʻa kinautolu. Ko e hā ha ngaahi fatongia ʻoku nau maʻu ki heʻenau fānaú? Kole ki ha mēmipa ʻo e kalasí ke ne hiki kinautolu ʻi he palakipoé, pea fakaafeʻi ʻa e toʻu tupú ke nau kumi ki ha ngaahi fatongia lahi ange ʻi he Mōsaia 4:14–15 mo e Tokāteline mo e Ngaahi Fuakava 68:25–28. Ko e hā ha ngaahi faingamālie ʻoku maʻu ʻe he mātuʻá ke fakahoko ai e ngaahi fatongia ʻoku fakamatalaʻi ʻi he ngaahi veesi ko ʻení? Ko e hā ʻe lava ke fai ʻe he toʻu tupú ke nau tokoni aí?

Ako fakataha

ʻE tokoni e ngaahi ʻekitivitī takitaha ʻi laló ki he toʻu tupú ke nau teuteu mo kumi ha ngaahi faingamālie ke ako mo akoʻi e ongoongoleleí ʻi honau ʻapí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

ʻI hano fakangofua ʻe he pīsopé, fakaafeʻi ha taha ʻi homou uōtí ʻa ia kuó ne ako ha lea mo e anga fakafonua foʻou ke nau haʻu ki he kalasí pea lea ki he toʻu tupú fekauʻaki mo e meʻa kuo nau aʻusiá. Kimuʻa he kalasí, kole ki he tokotahá ke ne lau ʻa e talanoa fakatātā fekauʻaki mo e mole ‘a e lea ʻa ʻEletā Valeri V. Cordon ʻa ia naʻá ne fakaʻaongaʻi ʻi he ʻuluaki palakalafi ʻe ono ʻo ʻene leá “Ko e Lea Fakafonua ʻo e Ongoongoleleí. ” Kole ki he tokotaha ko iá ke ne vahevahe e founga ne tatau ai ʻene aʻusiá mo e talanoa fakatātā ʻa ʻEletā Kōtoní. Vahevahe ʻa e toʻu tupú ki ha kulupu ʻe tolu pea ʻoange ki he kulupu takitaha ha taha ʻo e konga ʻokú ne fakamatalaʻi e ngaahi founga ke fakatolonga e lea ʻo e ongoongoleleí ʻi ʻapí. Fakaafeʻi ʻa e ngaahi kulupú ke vahevahe e meʻa ne nau akó mo e ngaahi founga ke nau lava ʻo fakatolonga ai e lea ʻo e ongoongoleleí ʻi honau ʻapí he taimí ni.
Fakaafeʻi e mēmipa kotoa e kalasí ke lau e lea ʻa ʻEletā M. Russell Ballard “Ngaahi Fakataha Alēlea Fakafāmilí,” ʻo fekumi mo maakaʻi hifo e ngaahi faleʻi ʻoku kaunga kiate kinautolu ko e fānau ʻi he fāmilí. Fakaafeʻi e toʻu tupú ke vahevahe e meʻa naʻa nau ako ʻi heʻenau lau e leá. Ko e hā ha faleʻi ʻa ʻEletā Pālati fekauʻaki mo e tekinolosiá? ʻE poupouʻi fēfē ʻe he toʻu tupú ʻenau mātuʻa mo e toenga e fāmilí ʻi he ngaahi fakataha alēlea fakafāmilí? Te ke malava ʻo fakaafeʻi e toʻutupú ke fakatātaaʻi hono fakahoko e fakataha alēlea fakafāmilí ke fakaʻaliʻali ai e fakataha alēlea fakafāmilí.
Fakaafeʻi e toʻu tupú ke nau lau e konga ʻoku ui ko e “Ko e Hā e Taimi ʻi ʻApí” ʻi he lea ʻa ʻEletā Quentin L. Cook “Ko e ʻEikí Ko ʻEku Maama.” Ko e hā ʻoku ako ʻe he toʻu tupú mei he sīpinga ʻa Voni Kimipolo mo hono fāmilí ʻi he talanoá? Ko e hā kuo ako ʻe he toʻu tupú mei heʻenau mātuʻá? Te nau tokoniʻi fēfē ʻa e ako mo faiako ʻi honau ʻapí?
Huluʻi ʻa e foʻi vitiō “A Heaven-Inspired Program,” pea kole ki he toʻu tupú ke nau kumi pe ko e hā ha ngaahi fakatuʻutāmaki ʻi he māmaní ʻe lava ʻo maluʻi kinautolu mei ai pea mo e ngaahi mālohi ʻe ala maʻu ʻe he fakafoʻituituí mo e ngaahi fāmili ʻoku nau ako fakataha ʻa e ongoongoleleí. Fakaafeʻi ʻa e toʻu tupú ke nau lau ʻa e “Efiafi Fakafāmili ʻi ʻApí” ʻi he Tuʻu Maʻu ʻi he Tuí pea teuteu ha kiʻi fakamatala nounou ki ha lēsoni efiafi fakafāmili ʻi ʻapi ʻi ha tefito te nau fili. Fakaafeʻi ʻa e toʻu tupú ke nau feakoʻiʻaki ʻa e ngaahi lēsoni ʻoku nau teuteú ʻi ha kalasi he kahaʻú.
Lau fakakalasi ʻa e palakalafi hono fitu ʻo e “Ko e Fāmilí: Ko Ha Fanongonongo ki Māmani.” Fakaafeʻi ʻa e toʻu tupú ke nau hiki ʻi he palakipoé ʻa e ngaahi tefitoʻi moʻoni ʻoku fakavaʻe ai ʻa e ngaahi fāmili leleí. Kole ki he toʻu tupú ke nau vahevahe ha ngaahi ʻekitivitī fakafiefia ʻoku nau manako ke kau ai mo honau fāmilí. Fakaafeʻi kinautolu ke nau fakamatalaʻi ha ngaahi moʻoni pe ngaahi tefitoʻi moʻoni ʻo e ongoongoleleí kuo nau ako ʻi heʻenau kau he ngaahi ʻekitivitī ko ʻení. Hangē ko ʻení, ʻe lava ke akoʻi ʻe haʻanau teuteu fakataha ha meʻatokoni ʻa e tokoní mo e ʻofá, pe ʻe lava ʻe he kau fakataha ʻi ha sipotí ʻo akoʻi ʻa e kātakí mo e vilitakí. Poupouʻi ʻa e toʻu tupú ke nau palani ha ngaahi ʻekitivitī fakafiefia maʻa honau fāmilí pea aleaʻi mo kinautolu ʻene fekauʻaki ʻa e ngaahi ʻekitivitī ko ʻení mo e ongoongoleleí.
Tokoniʻi e toʻu tupú ke nau fakakaukau ki ha ngaahi meʻa ʻe lava ke fakaʻaongaʻi ʻe he kakaí ke poupouʻi ʻaki honau fāmilí ke nau kau ʻi he lotu fakafāmilí mo e ako folofolá. Aleaʻi ha ngaahi tāpuaki ʻoku maʻu ʻe he ngaahi fāmilí mei he ngaahi ʻekitivitī ko ʻení ʻE lava ʻe he toʻu tupú ʻo lau ʻa e “Lotu Fakafāmilí” mo e “Mahuʻinga ʻo e Ako Folofola Fakaʻahó” ʻi he Tuʻu Maʻu ʻi he Tuí ki ha ngaahi fokotuʻutuʻu. Fakatātaaʻi e founga ʻe lava ke lea ai ha taha ʻo e toʻu tupú ki ha mātuʻa ʻo poupouʻi ʻa e lotu fakafāmilí mo e ako folofola maʻu peé. Fakaafeʻi e toʻu tupú ke nau vahevahe ha ngaahi aʻusia ne hoko ʻi heʻenau lotu fakafāmilí mo e ako folofolá.

Kole ki he toʻu tupú ke nau vahevahe ʻa e meʻa naʻa nau ako he ʻaho ní. ʻOku mahino nai kiate kinautolu e founga ke teuteu mo kumi ai ha ngaahi faingamālie ke ako mo akoʻi ʻi ʻapí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ki he tefito ko ʻení?

Ngaahi taukei ako ʻo e ongoongoleleí

ʻOku ʻikai hoko fakanatula e ako ʻo e folofolá ki ha tokolahi ʻo e kakaí, ʻo ʻikai toe kehe mei he tā pianó pe tā-valivalí. ʻOku fie maʻu ki hono ako fakalelei ʻo e folofolá ke fakatupulaki ha ngaahi poto fakataukei. ʻE lava ke tokoni ʻa e ngaahi taukei ako ʻo e ongoongoleleí ʻoku fakamatalaʻi hení ki he toʻu tupú ke nau hoko ko ha kau ako faivelenga ʻo e ongoongoleleí. Fakahinohino ange ʻa e ngaahi taukei ko ʻení ki he toʻu tupú, mo poupouʻi ke nau fakaʻaongaʻi kinautolu ʻi heʻenau ako ʻiate kinautolu pē ʻa e ongoongoleleí.

Fakaafeʻi ke ngāue

Fakaafeʻi ʻa e kalasí ke nau fakakaukauʻi ʻa e ngaahi tāpuaki ʻoku maʻu ʻi he taimi ʻoku nau kau ai mo honau ngaahi fāmili he ako ʻo e ongoongoleleí, lotú, ako ʻo e folofolá, efiafi fakafāmili ʻi ʻapí, pe ngaahi ʻekitivitī fakafiefiá.