ʻOku fengāueʻaki fakataha fēfē ʻa e kau maʻu lakanga fakataulaʻeikí mo e houʻeiki fafiné ke langa ʻa e puleʻanga ʻo e ʻOtuá?
ʻOku mahuʻinga ʻa e houʻeiki fafiné ʻi heʻenau kaungā ngāue mo e kau maʻu lakanga fakataulaʻeiki ʻo e ʻOtuá ʻi he tokoni ki he Tamai Hēvaní ʻi hono fakahoko ʻo e moʻui taʻe-faʻa-mate mo e moʻui taʻengata ʻa e tangatá. ʻE fealēleaʻaki fakataha ʻa e kau maʻu lakanga fakataulaʻeikí mo e houʻeiki fafiné ke tāpuekina e moʻui ʻa e fānau ʻa e ʻOtuá ʻi he malumalu ʻo e fakahinohino ʻa kinautolu ʻoku nau maʻu ʻa e ngaahi kī ʻo e lakanga fakataulaʻeikí. ʻE lava ke hoko ʻeni ʻi he ngaahi fakataha alēlea fakauōtí mo e fakasiteikí, ʻi he fāmilí, pea ʻi ha ngaahi tūkunga lahi kehe.
Teuteuʻi fakalaumālie koe
Ko e fē ha taimi naʻá ke mamata ai ki ha ngāue fakataha ʻa ha kau maʻu lakanga fakataulaʻeiki mo e houʻeiki fafiné ke langa ʻa e puleʻanga ʻo e ʻOtuá? Ko e hā ha ngaahi meʻa naʻá ke aʻusia te ke lava ʻo vahevahe mo e toʻu tupú?
Ko e hā ʻoku mahuʻinga ai ke ʻilo ʻe he toʻu tupú e founga fengāueʻaki fakataha ʻa e houʻeiki fafiné mo e kau maʻu lakanga fakataulaʻeikí ʻi he Siasi ʻo e ʻEikí? Ko e hā ha ngaahi faingamālie ʻoku maʻu ʻe he kau talavoú mo e kau finemuí he taimí ni ke nau ngāue fakataha ai? Ko e hā ʻoku fie maʻu ke mahino kiate kinautolu ʻi heʻenau tokoniʻi ʻa e niʻihi kehé he taimi ní mo teuteu ki he ngāue ʻi he kahaʻú?
ʻI hoʻo teuteú, ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. ʻOkú ke pehē ko e hā ʻe ʻaonga ki he toʻu tupu ʻokú ke akoʻí?
“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129 (ʻOku ngāue fakataha ʻa e husepānití mo e uaifí ko e kaungā-ngāue tuʻunga tatau ʻi hono tokangaʻi hona fāmilí; vakai, palakalafi 6 mo e 7)
Russell M. Nelson, “Ko ha Tautapa ki Hoku Tuofāfiné,” Ensign pe Liahona, Nov. 2015, 95–98
Quentin L. Cook, “ʻOku Fakaofo e Houʻeiki Fafine ʻo e Siasí!” Ensign pe Liahona, Mē 2011, 18–21
“Ngaahi Tāpuaki ʻo e Lakanga Fakataulaʻeikí maʻá e Kakai Kotoa pē: Ko ha Fehokotaki mo e Lakanga Fakataulaʻeikí He ʻIkai Lava ke Veteki,” Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá (2011), 147–65
Vitiō: “The Errand of Angels,” “Sustaining Each Other in the Home”
Ko e faiako ‘i he founga ‘a e Fakamo‘uí
Naʻe fakaafeʻi ʻe he Fakamoʻuí Hono kau muimuí ke nau fakamoʻoni, pea ʻi heʻenau fai iá, naʻe ongo ʻa e Laumālié ki honau lotó. Te ke poupouʻi fēfē ʻa e toʻu tupu ʻokú ke akoʻí ke nau fefakamoʻoniʻaki kau ki hono moʻoni ʻo e ongoongoleleí?
Fai hano fakafehokotaki
Lolotonga e ngaahi fuofua miniti ʻo e kalasi kotoa pē, tokoni ke fai hano fakafehokotaki ʻe he toʻu tupú ʻa e ngaahi meʻa ʻoku nau ako ʻi ha ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Te ke tokoniʻi fēfeeʻi kinautolu ke nau vakai ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:
-
Fakaafeʻi ʻa e toʻu tupú ke nau vahevahe haʻanau aʻusia kimuí ni mai naʻá ne fakapapauʻi kiate kinautolu hono moʻoni ʻo ha meʻa kuo nau ako ʻi he lotú pe ʻiate kinautolu pē.
-
Hiki ʻa e tefito ʻo e lēsoní ʻi he palakipoé. Fakaafeʻi ʻa e mēmipa takitaha ʻo e kalasí ke ne hiki ha tali ki he fehuʻí. Hili ia pea kole ange ke nau ngāue tauhoa pea fakatahaʻi ʻena ongo talí ke sētesi pē ʻe taha. Fakaafeʻi kinautolu ke nau vahevahe ʻenau sētesí mo e kalasí.
Ako fakataha
ʻE tokoni ʻa e ngaahi ʻekitivitī takitaha ʻi laló ke mahino ki he toʻu tupú e founga ʻo e fengāueʻaki fakataha ʻa e houʻeiki fafiné mo e kau maʻu lakanga fakataulaʻeikí ke langa ʻa e puleʻanga ʻo e ʻOtuá. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:
-
Fakaafeʻi ʻa e toʻu tupú ke nau lau ʻa e lea ʻa Palesiteni Russell M. Nelson, ʻo kamata mei he palakalafi hongofulú. Ko e hā ʻa e fakamoʻoni kuo nau mamata ki ai ki hono fakahoko ʻo e kikite ʻa Palesiteni Kimipoló? Ko e hā ʻa e meʻa ʻe lava ke fai ʻe he toʻu tupú, ʻa tangata mo fafine fakatouʻosi, ke tokoni ke fakahoko ʻa e kikité ni? Fakaʻaiʻai ʻa e toʻu tupú ke nau toe vakaiʻi ʻa e toenga ʻo e lea ʻa Palesiteni Nalesoní, pea fekumi ai ki ha ngaahi founga ʻe lava ke ngāue fakataha ʻa e houʻeiki fafiné mo e kau maʻu lakanga fakataulaʻeikí. Fakakaukau ke fakaafeʻi ʻa e kau mēmipa ʻi he kalasí ke vahevahe ʻenau ngaahi ongo fekauʻaki mo e ivi tākiekina ʻa ha kakai fafine māʻoniʻoni ʻaki ʻenau faitohi ʻo fakamālō ki he kakai fafine ʻi heʻenau moʻuí pe ʻi hano fokotuʻu ha fakamatala ʻi he mītia fakasōsialé.
-
Vahevahe ʻa e vahe 8 ʻo e Ngaahi ʻOfefine ʻi Hoku Puleʻangá ki ha fanga kiʻi konga iiki ʻe lava ke lau ʻe he toʻu tupú ʻi he lolotonga ʻo e kalasí, pea tufa ke nau takitaha e konga. Fakaafeʻi kinautolu ke nau kumi ha lea pe talanoa ʻokú ne fakahaaʻi e founga ʻo e fengāueʻaki fakataha ʻa e kau maʻu lakanga fakataulaʻeikí mo e houʻeiki fafiné ke langa e puleʻanga ʻo e ʻOtuá. Fakaafeʻi ʻa e toʻu tupú ke nau vahevahe ʻenau leá pe talanoá mo e kalasí. Ko e hā mo ha ngaahi talanoa tatau ʻe lava ke vahevahe ʻe he toʻu tupú mei ha meʻa ne nau aʻusia?
-
ʻI hono fakangofua ʻe he pīsopé, fakaafeʻi ha kau fafine mo ha kau maʻu lakanga fakataulaʻeiki tokosiʻi ʻoku ʻi ai hanau ngaahi uiuiʻi he uōtí ke nau vahevahe mo e kalasí e ngaahi meʻa ne nau aʻusia ʻi he ngāue fakataha ʻi he Siasí. Ne feʻaongaʻaki fēfē e ngaahi meʻa ne nau aʻusiá mo ʻenau ngaahi fakakaukaú? Fakaafeʻi ʻa e toʻu tupú ke nau vahevahe ʻa e meʻa kuo nau aʻusiá.
-
Fakaafeʻi ʻa e toʻu tupú ke nau lau ʻa e konga ʻoku ui ko e “Fatongia ʻo e Houʻeiki Fafiné ʻi he Siasí” mei he lea ʻa ʻEletā Kuenitini L. Kukí “ʻOku Fakaofo e Houʻeiki Fafine ʻo e Siasí!” Kole ange ke nau fevahevaheʻaki ʻa e meʻa ʻoku nau akó. ʻE fēfē hano ngāue ʻaki ʻe he toʻu tupú e pōpoaki ʻa ʻEletā Kukí ke tokoni ke mahino ki he niʻihi kehé hono mahuʻinga ʻo e houʻeiki fafiné ʻi he Siasí?
-
Huluʻi ʻa e vitiō “The Errand of Angels” pe ko e ngaahi ʻuluaki miniti ʻo e “Ward Council Model,” pea kole ki he toʻu tupú ke nau vahevahe ha faʻahinga ʻilo ne nau maʻu fekauʻaki mo e founga ʻo e fengāueʻaki fakataha ʻa e kakai fefiné mo e kau maʻu lakanga fakataulaʻeikí. Poupouʻi ʻa e toʻu tupú ke nau vahevahe ha ngaahi founga ne nau mamata ai ʻi he langa ʻe he houʻeiki fafine mo e houʻeiki tangata ʻi honau fāmilí mo e uōtí ʻa e puleʻanga ʻo e ʻOtuá. ʻE fakaʻaongaʻi fēfē ʻe he kau talavoú mo e kau finemuí ʻa e meʻa ʻoku nau ako mei he ngaahi vitiō ko ʻení ʻi heʻenau ngāue fakataha ʻi he Siasí?
-
Fakaafeʻi ʻa e toʻu tupu takitaha ke ne lau fakalongolongo ʻa e palakalafi 6 mo e 7 ʻo e “Ko e Fāmilí: Ko ha Fanongonongo ki Māmani” pea feinga ke ne ʻilo e ngaahi founga ʻoku fengāueʻaki fakataha ai ʻa e houʻeiki tangatá mo e houʻeiki fafiné ke fakahoko ʻa e palani taʻengata ʻa e ʻOtuá. Kole ki he toʻu tupú ke nau vahevahe ʻa e meʻa ʻoku nau maʻú. Ko e fē ha taimi kuo nau mamata ai ʻi ha sīpinga ʻo e muimui ʻa e husepānití mo e uaifí ʻi he ngaahi tefitoʻi moʻoni ʻi he fanongonongo ʻo e fāmilí? Ko e hā te nau lava ʻo fai he taimí ni ke nau teuteu ai ke maʻu ʻa e faʻahinga feohi fakafāmili ʻoku fakamatalaʻi ʻi he fanongonongo ʻo e fāmilí?
Kole ki he toʻu tupú ke nau vahevahe e meʻa ne nau ako he ʻaho ní. ʻOku mahino nai kiate kinautolu e founga ʻo e ngāue fakataha ʻa e kakai tangatá mo e kakai fefiné ʻi he Siasí? Ko e hā ha ngaahi ongo pe ngaahi fakakaukau ʻoku nau maʻu? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tefito ko ʻení?
Tokoni fakafaiako
“ʻE lava hoʻo teuteu fakalaumālié ʻo tokoni lahi ki he ʻātakai ʻo e akó. ʻI he taimi ʻokú ke mateuteu fakalaumālie aí, te ke lava ʻo ohi mai ʻa e laumālie ʻo e nongá, ʻofá, mo e ʻapasiá. ʻE ongoʻi malu ange hoʻo kau akó ʻi heʻenau fakalaulauloto mo aleaʻi e ngaahi meʻa ʻoku taʻengata honau mahuʻingá” (ʻOku ʻIkai ha Ui ʻe Mahuʻinga Ange ʻi he Faiakó [1999], 89).
Fakaafeʻi ke ngāue
Fehuʻi ki he toʻu tupú pe ko e hā ha meʻa kuo ueʻi kinautolu ke fai ko e tupu mei he meʻa ne nau ako he ʻaho ní. Poupouʻi kinautolu ke nau ngāueʻi e ngaahi ongo ko ʻení. Fekumi ki he Laumālié ʻi hoʻo fakakaukau ʻi he faʻa lotu e founga ke ke muimuiʻi ai iá.