Ko e hā ha ngaahi moʻoni fakalaumālie te u lava ‘o ako mei he ngaahi ouau ‘o e ongoongoleleí?
Ko e ngaahi ouaú ko ha ngaahi ngāue toputapu, mo fakaʻeiʻeiki ia ‘oku fakahoko ‘i he mafai ‘o e lakanga fakataulaʻeikí. ‘Oku fakataipe ‘e he ngaahi ouaú ‘a e ngaahi moʻoni ‘o e ongoongoleleí pea akoʻi mai kiate kitautolu ‘a e palani ‘o e fakamoʻui ‘a e Tamai Hēvaní mo e Fakalelei ‘a Sīsū Kalaisí. ‘Oku toe akoʻi mai ‘e he ngaahi ouaú, ko hai kitautolu, pea fakamanatuʻi mai kiate kitautolu hotau fatongia ki he ‘Otuá. ‘Oku tokoniʻi kitautolu ‘e heʻetau ako ki he ngaahi ‘uhinga fakataipe ‘o e ngaahi ouaú ke mahino kakato ange kiate kitautolu ‘a e ongoongoleleí, mo fakamālohia ‘etau tui kia Sīsū Kalaisí.
Teuteuʻi fakalaumālie koe
Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa ‘e ako ‘e he toʻu tupú mei he fakataipe ‘o e ngaahi ouau ‘o e ongoongoleleí?
Luke 22:19–20; 3 Nīfai 18:1–11 (‘Oku fakafofongaʻi ‘e he sākalamēnití ‘a e sino mo e taʻataʻa ‘o e Fakamoʻuí)
Loma 6:3–6; T&F 76:51 (‘Oku fakataipe ‘e he papitaiso ‘i he fakaukú ‘a e pekia mo e toetuʻu ‘a Kalaisí mo hotau fanauʻi foʻou fakalaumālié)
T&F 84:19–22 (ʻOku fakahā mai ‘a e mālohi ‘o e anga faka-ʻOtuá ‘i he ngaahi ouau ‘o e lakanga fakataulaʻeikí)
Boyd K. Packer, “Ko e Temipale Māʻoniʻoní,” Ensign pe Liahona, ‘Okatopa. 2010, 29–35
Dennis B. Neuenschwander, “ Ko e Ngaahi Ouaú mo e Ngaahi Fuakavá,” Ensign, Aug. 2001, 20–26
“Manatuʻi ʻa e Fakamoʻuí mo ʻEne Fakaleleí,” Tuʻu Maʻu ʻi he Tuí (2004), 177-78
“Ngaahi Ouaú,” Tuʻu Maʻu ʻi he Tuí (2004), 136–37
ʻAi ke fakafehokotaki
Lolotonga e ngaahi fuofua miniti ʻo e kalasi kotoa pē, tokoni ke ʻai ke fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:
-
Fakaafeʻi ha toʻu tupu pē kuó ne maʻu ha faingamālie ke ne fakamatalaʻi ha moʻoni fakatokāteline ki hano kaungāmeʻa, ke ne vahevahe mo e kalasí ʻa e meʻa naʻá ne aʻusiá.
-
Fehuʻi ki he toʻu tupú pe ‘oku ‘i ai ha taha ‘iate kinautolu pe ko ha taha ‘o honau fāmilí naʻá ne toki maʻu pē ha ouau (hangē ko e papitaisó, fakanofo ki he lakanga fakataulaʻeikí, pe ngaahi ouau ‘o e temipalé). Poupouʻi kinautolu ke nau vahevahe ha ngaahi meʻa ne nau aʻusia. Ko e hā ha meʻa naʻa nau mahuʻingaʻia ai ‘i he ouaú?
Ako fakataha
‘E lava ‘e he ngaahi ‘ekitivitī takitaha ‘i laló ‘o tokoniʻi ‘a e toʻu tupú ke nau ‘iloʻi ‘a e ngaahi moʻoni fakalaumālie ‘i he ngaahi ouau ‘o e ongoongoleleí. ʻI hoʻo muimui ki he ueʻi ʻa e Laumālie Māʻoniʻoní, fili ha ʻekitivitī ʻe taha pe lahi ange ʻe lelei taha ki hoʻo kalasí:
-
Vahevahe ‘a e kalasí ki ha kulupu ʻe ua. Vahe ki he kulupu ‘e taha ke nau ako ki he meʻa ‘oku fakataipe ‘e he papitaisó, pea vahe ki he kulupu ‘e tahá ke nau ako ki he meʻa ‘oku fakataipe ‘e he sākalamēnití, ‘o ngāue ʻaki ‘a e ngaahi potufolofola mo e ngaahi maʻuʻanga tokoni kehé (hangē ko ia ‘oku fokotuʻu atu ‘i he fokotuʻutuʻu ko ‘ení). Ko hā ha meʻa ‘oku akoʻi ‘e he ongo ouau ko ‘ení kiate kinautolu ‘o kau ki he Fakaleleí? Kole ki he kulupu takitaha ke nau akoʻi ‘a e meʻa kuo nau akó ki he toenga ‘o e kalasí. Te nau lava ‘o ngāue ʻaki ‘a e fakatātā fika 103–4 mo e 107–8 ‘i he Tohi Fakatātā ‘o e Ongoongoleleí. Fehuʻi ki he toʻu tupú pe ʻe tākiekina fēfē ‘enau fakakaukaú mo honau lotó ‘e he mahino kiate kinautolu ‘a hono fakataipe ‘o e ngaahi ouau ko ‘ení, pea mo ‘enau kau ka hoko ki he ngaahi ouaú.
-
Fakaafeʻi ‘a e toʻu tupú ke nau lau ‘a e konga ‘o e lea ‘a ‘Eletā Tēnisi B. Niuenisuenitā “Ko ha Founga ke ‘Iloʻi ai ‘a e ‘Otuá” ‘a ia ko e konga ‘o ‘ene leá ko e “Ko e Ngaahi Ouaú mo e Ngaahi Fuakavá,” pea kumi e ngaahi tali ki he fehuʻi “Ko e hā ha meʻa ‘oku akoʻi mai kiate kitautolu ‘e he ngaahi ouaú ‘o kau ki he ‘Otuá?” Kole ange ke nau vahevahe e meʻa ʻoku nau maʻú. Poupouíʻi kinautolu ke nau fehuʻi hifo kiate kinautolu, ‘i heʻenau kau pe mamata ki hano fakahoko ha ouau, pea nau hiki ‘enau ngaahi fakakaukaú mo e ngaahi meʻa naʻa nau ongoʻí ke nau vahevahe ‘i ha kalasi he kahaʻú.
-
Ko e hā ha ngaahi moʻoni pe ngaahi tefitoʻi moʻoni taʻengata ‘e niʻihi ‘oku akoʻi mai kiate kitautolu ‘e he ‘Eikí ‘i he ouau ‘o e papitaisó mo e sākalamēnití? Poupouʻi ‘a e tou tupú ke nau kumi e ngaahi tali ki he fehuʻi ko ‘ení mei he ngaahi potufolofola ‘oku ‘oatu ‘i he fokotuʻutuʻu ko ʻení pe ko e ngaahi fakamatala ki he papitaisó mo e sākalamēnití ‘i he Tuʻu Maʻu ‘i he Tuí.
Kole ki he toʻu tupú ke nau vahevahe e meʻa naʻa nau ako he ʻaho ní. Ko e hā ha ngaahi ongo pe ueʻi ʻoku nau maʻu? ‘Oku mahino nai kiate kinautolu ‘a e founga ke nau maʻu ai ‘a e ngaahi moʻoni fakalaumālié ‘i he ngaahi ouau ‘o e ongoongoleleí? ʻOku toe ʻi ai mo haʻanau ngaahi fehuʻi kehe? ʻE ʻaonga nai ke toe fakamoleki ha taimi lahi ange ʻi he kaveingá ni?
Fakaafeʻi ke ngāue
-
Fokotuʻu ange ke ʻalu e toʻu tupú ki ha papitaiso mo ha hilifakinima ‘oku ‘amanaki ke fai. ‘E anga-fēfē hano takiekina ‘e he meʻa kuo nau ako he ‘aho ní ‘a e anga ‘o ‘enau fakakaukau ki he papitaisó? Fekauʻaki mo hono maʻu ‘o e sākalamēnití?
-
Fai hoʻo fakamoʻoni fekauʻaki mo e mālohi ‘o e ngaahi ouau ‘o e ongoongoleleí.