ʻE tokoniʻi fēfē au ʻe hono ako ʻo e folofolá ke u ʻilo ai ki he Tamai Hēvaní?
Ne ʻosi fakahā ʻe he kau palōfitá ʻi he ngaahi kuongá e ngaahi moʻoni ʻo kau ki he natula ʻo e ʻOtuá. Te tau lava ke ako kau ki he ngaahi ʻulungaanga ʻo e Tamai Hēvaní mo fakatupulaki ʻetau tuí mo e fakamoʻoní, ʻi heʻetau ako faivelenga ki heʻenau ngaahi fakamoʻoní he folofolá. Ko e lelei ange e e mahino kiate kitautolu e natula ʻo ʻetau Tamai Hēvaní, ko e lelei ange ia e mahino kiate kitautolu ʻa e meʻa fakalangi te tau malava ʻi heʻetau hoko ko ʻEne fānau fakalaumālié.
Teuteuʻi fakalaumālie koe
Kuo fakamālohia fēfē hoʻo tui ki he Tamai Hēvaní mo hoʻo fakamoʻoni kiate Iá ʻi hoʻo ako folofola fakatāutahá? Ko e hā e ngaahi founga kuó ke fakaʻaongaʻi ki hono ako e folofolá ʻa ia ʻe lava ke ʻaonga ki he toʻu tupú?
Ko e hā ʻoku mahuʻinga ai ke ʻilo pea mahino ki he toʻu tupú e ʻulungaanga ʻo e Tamai Hēvaní? Ko e hā e ngaahi folofola ʻokú ke ongoʻi ʻe ʻaonga taha kiate kinautolú?
ʻI hoʻo ako ʻi he faʻa lotu e ngaahi folofolá mo e ngaahi maʻuʻanga tokoni kehé ni, kumi ha ngaahi kupuʻi folofola pe fakamatala ʻe lava ke fakaʻaongaʻi ʻe he toʻu tupú ke nau ako lahi ange ai ki he natula ʻo e Tamai Hēvaní.
ʻAmenai 1:17; Mōsaia 1:3–7; ʻAlamā 37:8–9 (ʻOku tokoniʻi kitautolu ʻe he folofolá ke mahino e natula ʻo e ʻOtuá)
T&F 1:37–39; 18:34–36 (ʻOku lava ke tau fanongo ki he leʻo ʻo e ʻOtuá ʻi he ngaahi folofolá)
Ko e Fakahinohino ki he Ngaahi Folofolá, “ʻOtuá”
D. Todd Christofferson, “Ko e Tāpuaki ʻo e Folofolá,” Ensign pe Liahona, Mē 2010, 32–35; vakai foki, foʻi vitiō “The Blessings of Scripture”
Ko e Faiako ‘i he Founga ‘a e Fakamo‘uí
Ne ngāue ʻaki ʻe he Fakamoʻuí e folofolá ke akoʻi mo fakamoʻoniʻi Hono misioná ʻi he palani ʻa e Tamaí. ʻE lava fēfē ke ke tokoniʻi e toʻu tupú ke nau ako ke fakaʻaongaʻi e folofolá ke nau ako lahi ange ai ki heʻenau Tamai ʻi Hēvaní?
ʻAi ke fakafehokotaki
Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau akó ʻi he ngaahi tūkunga kehekehe (hangē ko e ako fakatāutahá, seminelí, ngaahi kalasi kehe ʻa e Siasí pe meʻa ne nau aʻusia mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:
-
Fakaafeʻi ha taha ʻo e kau talavou ʻi he kalasí ke ne vahevahe ki he kau finemuí e meʻa naʻá ne ako ʻo kau ki he Toluʻi ʻOtuá mei ha fakataha fakakōlomu ʻo e Lakanga Taulaʻeiki Faka-ʻĒloné ne toki fai. Fakaafeʻi ha finemui ke ne vahevahe ki he kau talavoú ha meʻa naʻá ne ako mei heʻene kalasi ʻi he Kau Finemuí.
-
Kole ki he toʻu tupú ke nau fakalaulauloto ki he fehuʻi “Ko e hā e meʻa ʻoku hoko kiate kinautolu ʻoku ʻikai maʻu pe ʻikai fakaʻaongaʻi e folofolá?” Fakaafeʻi ke nau kumi ha ngaahi tali ki he fehuʻí ni ʻi heʻenau lau ha taha ʻo e ngaahi folofola ne fokotuʻu mai ʻi he fokotuʻutuʻu ko ʻení pe konga ʻoku ui ko e “ʻOku Tokoni Lahi ʻa e Folofolá ki Heʻetau Manatú” ʻi he lea ʻa ʻEletā D. Toti Kulisitofasoni “Ko e Tāpuaki ʻo e Folofolá.” Kole ke nau vahevahe e meʻa ne nau ʻiló.
Ako fakataha
ʻE tokoni e ʻekitivitī takitaha ʻi laló ki he toʻu tupú ke mahino e founga ki hono fakaʻaongaʻi ʻenau folofolá ke fakalahi ai e mahino ʻoku nau maʻu ki he Toluʻi ʻOtuá. ʻI hoʻo muimui ki he ueʻi ʻa e Laumālie Māʻoniʻoní, fili ha ʻekitivitī ʻe taha pe lahi ange ʻe ʻaonga taha ki hoʻo kalasí, ʻi haʻo muimui ki he ueʻi ʻa e Laumālie Māʻoniʻoní:
-
Fakaafeʻi e toʻu tupú ke nau hiki he palakipoé ha niʻihi ʻo e ngaahi moʻoni ʻoku nau ʻilo kau ki he ʻOtuá. Fehuʻi ange pe naʻe anga fēfē ʻenau ako ki he ngaahi moʻoni ko iá. Fakaʻaliʻali kiate kinautolu e founga ke fakaʻaongaʻi ai e Ko e Fakahinohino ki he Ngaahi Folofolá ke kumi e ngaahi folofola ʻoku akoʻi ai e ngaahi moʻoni ki he ʻOtuá ne nau hikí (hangē ko ʻení, te nau lava ke fekumi ki he “ʻOfa ʻa e ʻOtuá” pe “Toluʻi ʻOtuá”). Fakaafeʻi kinautolu ke nau hiki he palakipoé e ngaahi maʻuʻanga tokoni ʻoku nau maʻú. Poupouʻi e toʻu tupú ke nau vahevahe ha ngaahi moʻoni kehe ʻoku nau ako kau ki he Tamai Hēvaní ʻi heʻenau lau e ngaahi potufolofolá ni pea hiki ia ʻi he palakipoé. Ko e hā ʻoku mahuʻinga ai e folofolá ʻi hono tokoniʻi kitautolu ke mahino e ʻOtuá?
-
Fili ha vahe pe kupu mei he folofolá, pea fakaʻaliʻali ki he toʻu tupú e meʻa te nau lava ke ako kau ki he Tamai Hēvaní mei he vahe ko iá. Hangē ko ʻení, te ke lava ke fakaʻaliʻali kiate kinautolu e founga ʻoku akoʻi ai ʻe he 1 Nīfai 1 kau ki Hono nāunaú (vakai, veesi 8–9) mo ʻEne ʻaloʻofá (vakai, veesi 14, 20). Tuku ha taimi he kalasí ki he toʻu tupú ke nau lau ha vahe pe kupu he folofolá pea feinga ke fakatokangaʻi ha faʻahinga meʻa pē ʻoku nau ako kau ki he Tamai Hēvaní heʻenau laukongá. Mahalo te ke loto ke fokotuʻu atu e ngaahi kupuʻi folofolá ni: ʻĪsaia 55; 2 Nīfai 26:23–33; Mōsaia 2:19–25; Tokāteline mo e Ngaahi Fuakava 1:17–39. ʻE lava ke nau fakahoko fakafoʻituitui ʻeni, fakakulupu, pe kalasí kotoa. Kole ki he toʻu tupú ke nau fevahevaheʻaki e meʻa ʻoku nau ʻiló.
-
Fakaafeʻi e toʻu tupú ke nau lau fakafoʻituitui e konga ko e “ʻOtua, Toluʻi ʻOtuá” ʻi he Ko e Fakahinohino ki he Ngaahi Folofolá pea hiki ha meʻa ʻe taha ʻoku nau ako kau ki he ʻOtua ko e Tamaí mei he meʻa ne nau laú. Poupouʻi ke nau kumi mo ha toe ngaahi folofola ʻoku fekauʻaki mo e meʻá ni. Ko ʻenau ʻosi kotoa pē he laú, pea fakaafeʻi takitaha e kau mēmipa ʻo e kalasí ke nau kumi ha taha ʻi he kalasí naʻá ne tohi ʻe ia ha meʻa ʻoku kehe, pea kole ke nau fevahevaheʻaki e meʻa ne nau akó (kau ai e ngaahi folofola ne nau ʻiló). Vahevahe e founga ne ke ʻilo ai ki he Tamai Hēvaní ʻi hono lau e folofolá, pea fakaafeʻi ha niʻihi tokosiʻi mei he toʻu tupú ke nau vahevahe e ngaahi meʻa ne nau aʻusiá.
Kole ki he toʻu tupú ke nau vahevahe e meʻa ne nau ako he ʻaho ní. Ko e hā ha ngaahi ongo pe ueʻi ʻoku nau maʻu? ʻOku mahino nai kiate kinautolu e ʻoku tokoniʻi kinautolu ʻi hono ako e folofolá ke nau ʻilo ai ki he Tamai Hēvaní? ʻOku toe ʻi ai mo haʻanau ngaahi fehuʻi kehe? ʻE ʻaonga nai ke toe fakamoleki ha taimi lahi ange ʻi he kaveingá ni?
Tokoni Fakafaiako
“ʻOku faʻa hā ʻi ha lēsoni ha ngaahi nāunau ʻoku lahi ange he meʻa te ke lava ke akoʻi he taimi ʻoku tuku atú. ʻI he ngaahi meʻa peheé, ʻoku totonu ke ke filifili e nāunau ʻe tokoni taha ki hoʻo kau akó” (ʻOku ʻIkai ha Ui ʻe Mahuʻinga Ange ʻi he Faiakó [1999], 115).
Fakaafeʻi ke ngāue
Poupouʻi e toʻu tupú ke nau fakaʻaongaʻi e meʻa ne nau ako he ʻaho ní ke fakatupulaki ʻaki ʻenau ako folofola fakatāutahá. ʻI he ngaahi lēsoni he kahaʻú, fakaafeʻi ke nau vahevahe ha faʻahinga fakakaukau ne nau maʻu mei heʻenau ako ʻo kau ki he Tamai Hēvaní.