Ko e hā ha ngaahi founga lelei ke vahevahe ʻaki e ongoongoleleí ki he niʻihi kehé?

Ko hono vahevahe ʻo e ongoongoleleí ko e fatongia ia ʻo e Kāingalotu kotoa pē. ʻOku totonu ke tau lotua mo kumi ha ngaahi faingamālie ke fakahā ai ki he niʻihi kehé fekauʻaki mo e ongoongolelei kuo toe fakafoki maí. Te tau lava ʻo “nofo teu pē ke talia ʻi he angavaivai mo e manavahē ʻa e tangata kotoa pē ʻe ʻekea ʻa [kitautolu] ki hono ʻuhinga ʻo e ʻamanaki lelei ʻoku ʻiate [kitautolú]” (1 Pita 3:15).

Teuteuʻi fakalaumālie koe

Ko e hā ha ngaahi faingamālie kuó ke maʻu ke vahevahe ai e ongoongoleleí mo e niʻihi kehé? Ko e hā kuó ke fai ke vahevahe ai e ongoongoleleí mo e niʻihi kehé?

Ko e hā ha ngaahi aʻusia ne maʻu ʻe he toʻu tupú ʻi hono vahevahe ʻo e ongoongoleleí? Ko e hā ha ngaahi faingamālie ʻe lava ke maʻu ʻe he tou tupú ke vahevahe ai e ongoongoleleí?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa ʻe tokoni ke mahino ki he toʻu tupú e founga ke vahevahe ai e ongoongoleleí mo e niʻihi kehé?

Mātiu 28:19–20 (Naʻe fekau ʻe he Fakamoʻuí ʻEne kau ākongá ke nau akoʻi e ongoongoleleí ki he puleʻanga kotoa pē)

Loma 1:16 (ʻOku ʻikai maaʻi ʻe Paula e ongoongolelei ʻo Kalaisí)

1 Tīmote 4:12 (Hoko ko e faʻifaʻitakiʻanga ‘o e kakai tuí)

1 Pita 3:15 (Mateuteu ke tali e ngaahi fehuʻi ʻo e ongoongoleleí)

T&F 1:23 (ʻOku malanga ʻaki ʻa e ongoongoleleí ʻe he kau vaivaí mo e kau māʻulaló)

T&F 11:21 (ʻOku totonu ke tau teuteu ke malangaʻi e ongoongoleleí ʻaki ʻetau feinga ke maʻu e folofola ʻa e ʻOtuá)

T&F 33:8–10 (ʻOku totonu ke fakaava hotau ngutú)

T&F 88:81 (ʻOku fekauʻi kitautolu ke tau lea fakatokanga ki hotau kaungāʻapí)

T&F 100:5–8 (ʻE fakahā mai ʻe he Laumālie Māʻoniʻoní e meʻa ke tau lea ʻakí mo fakamoʻoni ki he ngaahi moʻoni ʻo e ongoongoleleí)

Joaquin E. Costa, “Ki he Ngaahi Kaungāmeʻa mo e Fiefanongo ʻo e Siasí,” Ensign pe Liahona, Mē 2017, 112–14

Dieter F. Uchtdorf, “Hono ʻIkai Māʻongoʻonga ko e Palani ʻa Hotau ʻOtuá!”Ensign pe Liahona, Nōvema. 2016, 19-22

Vitiō: “Vahevahe Hoʻo Ngaahi Tuí” “I’ll Go Where You Want Me to Go”

Ko e Faiako ‘i he Founga ‘a e Fakamo‘uí

Naʻe hoko e Fakamoʻuí ko e faʻifaʻitakiʻanga mo e faiako kiate kinautolu naʻá Ne akoʻí. ʻE ueʻi fēfē ʻe hoʻo sīpingá ʻa e toʻu tupú ke nau vahevahe e ongoongoleleí mo honau ngaahi kaungāmeʻá mo e kau mēmipa ʻo e fāmilí?

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau ako mei he ngaahi tūkunga kehekehe (hangē ko e ako fakatāutahá, seminelí, ngaahi kalasi kehe ʻa e Siasí pe meʻa ne nau aʻusia mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi ʻa e toʻu tupú ke nau vahevahe kau ki ha taimi ne nau ako ai ha tefitoʻi moʻoni ʻo e ongoongoleleí mei ha lea pe tōʻonga hanau kaungāmeʻa.
Fakaafeʻi e toʻu tupú ke nau vahevahe ha ngaahi meʻa ne nau aʻusia kimuí ni ʻi heʻenau vahevahe atu ko ia ʻa e ongoongoleleí ‘E lava foki ke ke huluʻi e vitiō “Iʻll go where you want me to go”pe vahevahe ‘a e talanoa ʻi he konga ‘oku ui ko e “Hono ʻIkai Māʻongoʻonga ko e Palani ʻa Hotau ʻOtuá! Ko ha Pōpoaki Angamaheni” mei he lea ʻa Palesiteni Dieter F. Uchtdorf ko e“Hono ʻIkai Maʻongoʻonga ko e Palani ʻa Hotau ʻOtuá!” Ko e hā ʻoku ako ʻe he toʻu tupú mei he ngaahi aʻusia ko ʻení ʻe lava ʻo tokoni ke toe lelei ange ai ʻenau vahevahe e ongoongoleleí?

Ako fakataha

ʻE tokoni e ʻekitivitī takitaha ʻi laló ki he toʻu tupú ke nau ako e founga ke vahevahe lelei ai e ongoongoleleí. Muimui ʻi he fakahinohino ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

ʻI he lea ʻa ʻEletā Joaquin E. Costa ko e “Ki he Ngaahi Kaungāmeʻa mo e Fiefanongo ʻo e Siasí,” naʻá ne talanoaʻi ai ʻene uluí. Ko e hā te tau lava ʻo ako fekauʻaki mo hono vahevahe ʻo e ongoongoleleí, mei he finemui naʻá ne fakafeʻiloaki ʻa ʻEletā Costa ki he ongoongoleleí pea mo e ongo faifekau ne na akoʻi iá? Kole ki he toʻu tupú ke nau ngāue tauhoa ʻo palani ha kiʻi faiva ke fakafofongaʻi e konga ʻa ʻEletā Costa ʻi he talanoa fakauluí, ʻokú ne akoʻi mai ha founga ʻaonga ke vahevahe ʻaki e ongoongoleleí. Ko e hā ha ngaahi founga ʻaonga kehekehe te tau lava ʻo vahevahe ai e ongoongoleleí?
Hiki ʻi he palakipoé ʻa e ongo fehuʻi ko ʻení: “Ko e hā ʻoku totonu ai ke tau vahevahe ʻa e ongoongoleleí?” mo e “Ko e hā e founga ʻoku totonu ke tau vahevahe ʻaki ʻa e ongoongoleleí?” Vahevahe ʻa e toʻu tupú ki ha kulupu ʻe ua pea kole ke nau kumi ha ngaahi potufolofola te ne tali e ngaahi fehuʻi ko ʻení (vakai ki he ngaahi potufolofola ʻoku fokotuʻu atu he fokotuʻutuʻu ko ʻení; kapau ʻe fie maʻu, pea poupouʻi ʻa e toʻu tupú ke nau lau tuʻo lahi ʻa e ngaahi potufolofolá ke fakapapauʻi ʻoku mahino kiate kinautolu ʻa e meʻa ʻoku nau laú). Fakaafeʻi kinautolu ke ke nau vahevahe ʻa e meʻa ne nau maʻú pea hiki ʻenau ngaahi talí ʻi he palakipoé ʻi lalo he fehuʻi totonú. Kole ki he toʻu tupú ke nau fili ha meʻa mei he ngaahi tali ne nau hiki ʻi he palakipoé, te nau feinga ke fakaʻaongaʻi ʻi heʻenau feinga fakataautaha ke vahevahe ʻa e ongoongoleleí.
Huluʻi ʻa e vitiō “Vahevahe Hoʻo Ngaahi Tuí,” pea kole ki he toʻu tupú ke nau vahevahe ha ngaahi founga naʻa nau fakatokangaʻi ʻoku fakaʻaongaʻi ʻe he kakaí ʻa e tekinolosiá ke vahevahe ʻa e ongoongoleleí. Ko e hā mo ha toe ngaahi founga kehe ʻoku nau lava ʻo fakakaukau ki ai? ʻOange ha taimi lolotonga ʻa e kalasí ke nau palani ha ngaahi founga te nau lava ai ʻo fakaʻaongaʻi ʻa e tekinolosiá ke vahevahe ʻa e ongoongoleleí mo honau ngaahi kaungāmeʻá mo e kau mēmipa honau fāmilí.

Kole ki he toʻu tupú ke nau vahevahe e meʻa naʻa nau ako he ʻaho ní. ʻOku mahino nai kiate kinautolu e founga ke vahevahe ʻaki ʻa e ongoongoleleí? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he kaveingá ni?

Fakaafeʻi ke ngāue

Fakaafeʻi ʻa e toʻu tupú ke nau lotua ha ngaahi faingamālie ke vahevahe ai e ongoongoleleí mo e niʻihi kehé ʻo fakaʻaongaʻi e meʻa ne nau ako ʻi he kalasí. Fakaafeʻi ʻa e toʻu tupú ke nau vahevahe ha ngaahi aʻusia ʻi ha kalasi he kahaʻú.