Te u akoʻi fēfē ha niʻihi kehe ki he founga hono fai e ngāue hisitōlia fakafāmilí?
Kuo hanga ʻe he ʻEikí ʻo teuteu ha ngaahi tekinolosia fakaofo ʻi hotau kuongá ke tau lava ai ʻo ʻilo ki heʻetau ngaahi kuí mo fakahoko e ngaahi ouaú maʻanautolu ʻi he temipalé. ʻI he founga tatau pē, kuó Ne teuteu e toʻu tupu ʻo e toʻutangatá ni ke nau malava ‘o ʻilo e founga hono fakaʻaongaʻi ʻo e ngaahi fakatekinolosia ko ʻení koeʻuhí ke nau lava ʻo tokoni ki he ngāue mahuʻingá ni. Makehe mei he fakatotolo ki he hisitōlia hotau fāmili tonú, te tau lava ʻo tokoni ki he niʻihi kehe ʻoku ʻikai ke nau maheni mo e ngaahi maʻuʻanga tokoni ʻo e hisitōlia fakafāmilí. Te tau tokoni kiate kinautolu ʻi he foungá ni ke nau ongoʻi ʻa e laumālie ʻo e ngāue mahuʻingá ni mo tokoni ʻi hono ʻomi ʻo e fakamoʻuí ki heʻenau ngaahi kui kuo pekiá.
Teuteuʻi fakalaumālie koe
Ako ʻi he faʻa lotu ʻa e ngaahi maʻuʻanga tokoni ʻi laló. ʻOkú ke ongoʻi ko e hā te ne ueʻi fakalaumālie ʻa e toʻu tupú ke nau tokoni ke ako lahi ange ʻa e niʻihi kehé honau hisitōlia fakafāmilí?
T&F 128:16–18 (ʻOku faʻu ʻe he ngaahi ouau maʻá e pekiá ha fehokotaki mālohi ʻi he ngaahi toʻutangatá)
T&F 138:46–48 (ʻE fakahoko ha ngāue maʻongoʻonga ʻi he ngaahi temipalé ʻi hotau kuongá)
Russell M. Nelson, “Ngaahi Toʻu Tangata Fehokotaki ʻi he ʻOfá,” Ensign pe Liahona, Mē 2010, 91–94
David A. Bednar, “ʻE Liliu ʻa e Loto ʻo e Fānaú,” Ensign pe Liahona, Nōvema 2011, 24–27
ʻAi ke fakafehokotaki
Lolotonga e ngaahi fuofua miniti ʻo e kalasi kotoa pē, tokoni ke ʻai ke fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:
-
Fakaafeʻi e toʻu tupú ke nau fakamatalaʻi ha ngaahi aʻusia ne nau maʻu ʻi hono fakaʻaongaʻi ha meʻa ne nau ako ʻi ha lēsoni ki muʻa.
-
Fakaafeʻi e toʻu tupú ke nau fakamatalaʻi ha ngaahi aʻusia ʻi haʻanau tokoniʻi ha taha ke ne ʻilo e founga fakaʻaongaʻi ʻo e tekinolosiá (hangē ko ha komipiuta, telefoni toʻotoʻo, pe ha meʻangāue pehē). Vahevahe ange ʻa e fakamatala ko ʻeni meia ʻEletā Tēvita A. Petinaá: “Kuo mou ako ke ʻave (text) e ngaahi pōpoakí ʻi hoʻomou ngaahi telefoni toʻotoʻó mo tweet ke toe vave mo fakalakalaka ange e ngāue ʻa e ʻEikí—kae ʻikai ke fetuʻutaki vave ange mo homou ngaahi kaungāmeʻá” (“ʻE Liliu ʻa e Loto ʻo e Fānaú,” Ensign pe Liahona, Nōvema 2011, 26). Ko e hā ha ngaahi founga ʻoku pehē ʻe he toʻu tupú te nau lava ʻo fakaʻaongaʻi ai ʻenau maheni mo e tekinolosiá ke tokoniʻi e niʻihi kehé ke nau fai e ngāue hisitōlia fakafāmilí?
Ako fakataha
ʻE tokoni ʻa e ngaahi ʻekitivitī takitaha ʻi laló ki he toʻu tupú ke nau ako e founga hono tokoniʻi e niʻihi kehé ke nau kau he ngāue hisitōlia fakafāmilí. ʻI hoʻo muimui ki he ueʻi ʻa e Laumālie Māʻoniʻoní, fili ha ʻekitivitī ʻe taha pe lahi ange ʻe lelei taha ki hoʻo kalasí:
-
Fakaafeʻi ʻa e toʻu tupú ke nau lau ʻa e konga ʻoku ui “Ko ha Fakaafe ki he Toʻu tangata Kei Tupu Haké” ʻi he malanga ʻa ʻEletā Tēvita A. Petinā ko e “ʻE Liliu ʻa e Loto ʻo e Fānaú.” Kole ange ke nau kumi e ngaahi konga ʻi he malangá ʻoku fakaafeʻi ai ʻe ʻEletā Petinā ʻa e toʻu tupú ke nau tokoniʻi e niʻihi kehé ʻi he ngāue hisitōlia fakafāmilí. Ko e hā e ongo ʻa e toʻu tupú fekauʻaki mo e ngaahi fakaafe ko ʻení? Mou ʻai fakakalasi ha lisi ʻo ha ngaahi founga ʻe lava ke tali ʻaki ʻe he toʻu tupú ʻa e ngaahi fakaafe ʻa ʻEletā Petinaá, pea fakaafeʻi kinautolu ke nau fili ha meʻa mei heʻenau lisí te nau lava ʻo fakahoko fakakalasi.
-
Fakaafeʻi ʻa e toʻu tupú ke nau fakakaukauloto ʻoku nau tokoniʻi ha taha naʻe teʻeki ai ke ne fai ʻa e hisitōlia fakafāmilí kimuʻa. Vahevahe ʻa e malanga ʻa ʻEletā Lāsolo M. Nalesoni ko e “Ngaahi Toʻu Tangata Fehokotaki ʻi he ʻOfá” ki he toʻu tupú, pea kole ke nau takitaha lau ʻenau kongá, mo kumi ʻa e ngaahi meʻa te nau lava ʻo vahevahe mo e taha ʻoku nau tokoniʻi fekauʻaki mo e ngāue hisitōlia fakafāmilí. Ko e hā ha ngaahi potufolofola te nau lava ʻo vahevahe? (Ke maʻu ha ngaahi sīpinga, vakai ki he ngaahi potufolofola ʻoku lisi ʻi he fokotuʻutuʻu ko ʻení.) Kole ke nau fakamatalaʻi e meʻa ʻoku nau maʻú mo fakakaukau ki ha taha te nau lava ʻo tokoniʻi ke kamata ngāue ki he hisitōlia fakafāmilí.
Kole ki he toʻu tupú ke nau vahevahe e meʻa naʻa nau ako he ʻaho ní. ʻOku mahino nai kiate kinautolu e founga hono tokoniʻi e niʻihi kehé ke fai e ngāue hisitōlia fakafāmilí? Ko e hā ha ngaahi ongo pe ueʻi ʻoku nau maʻu? ʻOku toe ʻi ai mo haʻanau ngaahi fehuʻi kehe? ʻE ʻaonga nai ke toe fakamoleki ha taimi lahi ange ʻi he tokāteliné ni?
Fakaafeʻi ke ngāue
ʻEke ki he toʻu tupú pe ko e hā ha meʻa kuo ueʻi kinautolu ke fai, koeʻuhí ko e meʻa ne nau ako he ʻaho ní. Poupouʻi kinautolu ke nau ngāueʻi ‘a e ngaahi ongo ko ʻení. Fakakaukauʻi ha ngaahi founga ke muimuiʻi ai.