Ko e hā ʻoku hoko ai e akó ko ha konga mahuʻinga ʻo e palani ʻa e Tamai Hēvaní?

Ko e taha ʻo e ngaahi tefitoʻi ʻuhinga naʻe fekauʻi mai ai kitautolu ʻe he Tamai Hēvaní ki he māmaní ke tau aʻusia e ngaahi meʻa ʻe tokoni ke tau ako ai pea hoko ʻohangē ko Iá. Kapau ʻoku tau talangofua mo akoʻingofua, te Ne tokoni mai ke tau ako ʻe meʻa ʻoku fie maʻu ke tau ʻiló, ko e ʻotu lea ki he ʻotu lea, ʻi he kotoa ʻo ʻetau moʻuí. ʻOku ʻamanaki mai e Tamai Hēvaní te tau fakaʻaongaʻi ʻa e ʻilo ʻoku tau maʻú ke faitāpuekina e niʻihi kehé mo langa hake Hono puleʻangá.

Teuteuʻi fakalaumālie koe

Ko e hā ha ngaahi faingamālie ʻokú ke maʻu ke hokohoko atu ai hoʻo akó? Kuo faitāpuekina fēfē hoʻo moʻuí ʻi hoʻo fai iá?

Te ke tokoni fēfē ke mahino ki he toʻu tupú ʻa hono mahuʻinga ʻo e hokohoko atu e akó he toenga ʻenau moʻuí? Ko e hā te ke lava ʻo fai ke tokoni ai ke nau ʻilo ʻa hono mahuʻinga ʻo e ako fakatuʻasinó mo e ako ki he ongoongoleleí?

Ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā ʻokú ne fakalotoa koe ke ke ako he toenga hoʻo moʻuí?

2 Nīfai 28:27–30; T&F 98:11–12 (Kuo talaʻofa ʻa e ʻEikí ke akoʻi kitautolu ʻi he “ ʻotu lea ki he ʻotu lea” ʻi heʻetau ako pea moʻui ʻaki e meʻa ʻoku tau akó)

ʻAlamā 12:9–11 ;T&F 50:40 (Kapau ʻoku tau talangofua mo akoʻingofua, ʻe kei hokohoko atu ai pē ʻetau akó ʻi he kotoa ʻo ʻetau moʻuí)

T&F 88:77–80 (ʻOku finangalo e ʻEikí ke tau ako koeʻuhí ke tau mateuteu ke fua totonu hotau ngaahi uiuiʻí)

Dieter F. Uchtdorf, “ʻEiki, Ko au Ia?” Ensign pe Liahona, Nōvema 2014, 56-59

Dallin H. Oaks mo Kristen M. Oaks, “Akó mo e Kāingalotu ʻi he Ngaahi ʻAho Kimui Ní,” Ensign pe Liahona, ʻEpe. 2009, 26–31

“Akó,” Ki Hono Fakamālohia ʻo e Toʻu Tupú (2011), 9-10

“Palani ʻo e Fakamoʻuí,” Tuʻu Maʻu ʻi he Tuí (2004), 156–59

Vitiō: “ʻOku Feʻunga Pē Hoʻo ʻIló” (ʻOku akoʻi ʻe ʻEletā Neil L. Andersen ʻoku hoko ʻa e akó ʻi he ʻotu lea ki he ʻotu lea)

Ko e faiako ‘i he founga ‘a e Fakamo‘uí

Naʻe hoko e Fakamoʻuí ko e sīpinga haohaoa ʻo e meʻa kotoa pē naʻá Ne akoʻí. Naʻá Ne akoʻi ʻEne kau ākongá ke lotu ʻaki Haʻane lotu fakataha mo kinautolu. Naʻá Ne akoʻi ke nau ʻofa mo ngāue ʻaki e founga ʻo ʻEne ʻofa mo tokoniʻi kinautolú. Ko e hā ha meʻa te ke lava ‘o fai ke ke hoko ai ko ha faʻifaʻitakiʻanga lelei ki he toʻu tupu ‘okú ke akoʻí?

Fai hano fakafehokotaki

Lolotonga e ngaahi ʻuluaki miniti ʻo e kalasi kotoa pē, tokoni ki he toʻu tupú ke nau fakafehokotaki e ngaahi meʻa ʻoku nau ako ʻi he ngaahi ʻātakai kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne nau aʻusia mo honau ngaahi kaungāmeʻá). Te ke lava fēfē ʻo tokoniʻi kinautolu ke nau sio ki heʻene felāveʻi mo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Ko e hā kuo ako ʻe he toʻu tupú fekauʻaki mo e ngaahi tafaʻaki ʻo e palani ʻo e fakamoʻuí (hangē ko e ngaahi fuakavá, talangofuá, ko e Fakaleleí, pe moʻui hili ʻa e maté?) Ko e hā ʻe lava ke nau fevahevaheʻakí?
Tohiʻi he palakipoé, “Ko e hā ʻoku hoko ai e akó ko ha konga mahuʻinga ʻi he palani ʻa e Tamai Hēvaní?” ʻOange ha taimi lolotonga e lēsoní ke fakalaulauloto ai e toʻu tupú ki he fehuʻí ni pea nau tohi ha ngaahi tali ki ai. Fakaafeʻi kinautolu ʻi he fakaʻosinga ʻo e kalasí ke nau vahevahe e meʻa ne nau tohí.

Ako fakataha

ʻE tokoni e ʻekitivitī takitaha ʻi laló ke ueʻi hake ʻa e toʻu tupú ke nau fie ako he toenga ʻenau moʻuí. Muimui ki he fakahinohino ‘a e Laumālié, ʻo fili ha ‘ekitivitī ‘e taha pe lahi ange ‘e ‘aonga taha ki hoʻo kalasí:

Tohiʻi he palakipoé Ko e hā ʻoku hoko ai e akó ko ha konga mahuʻinga ʻo e palani ʻa e Tamai Hēvaní? Kole ki he toʻu tupú ke nau fakakaukau ki he fehuʻí ni ʻi heʻenau lau e konga “Ko e Moʻui Vakavakaiʻí” ʻi he lea ʻa Palesiteni Dieter F. Uchtdorf ko e “ʻEiki, Ko Au Ia?” ʻOange ha taimi ke nau vahevahe ai ʻenau fakakaukaú. Fakaafeʻi kinautolu ke nau fakamatala ki ha ngaahi liliu kuo nau fai heʻenau moʻuí ko ha ola ʻo ʻenau ako e folofolá pe ngaahi akonaki ʻa e kau palōfita moʻuí.
Kole ki he toʻu tupu takitaha ke ne lau ha taha ʻo e ngaahi potu folofola ʻi he lēsoni ko ʻení ke ʻiloʻi ai e ngaahi tefitoʻi moʻoni ʻo e akó. Fakaafeʻi ia ke ne tā ha kiʻi fakatātā faingofua te ne fakafofongaʻi e ngaahi tefitoʻi moʻoni ʻi he potufolofolá. Kole ki he toʻu tupú ke nau fakaʻaongaʻi ʻenau fakatātaá ke nau feakoʻiʻaki ai e meʻa naʻa nau laú. Ko e hā ʻoku akoʻi mai ʻe he ngaahi potu folofola ko ʻení ʻo kau ki hono mahuʻinga ʻo e ʻilo ki he palani ʻa e Tamai Hēvaní?
Fakaafeʻi ʻa e toʻu tupú ke nau lau e konga ko e “Akó” ʻi he kiʻi tohi Ki Hono Fakamālohia ʻo e Toʻu Tupú, kau ai e ngaahi fakamoʻoni fakafolofolá. Kole ki ha vaheua ʻe taha ʻo e kalasí ke nau kumi e ngaahi meʻa ʻoku finangalo e Tamai Hēvaní ke tau faí, pea kole ki he tafaʻaki ʻe tahá ke nau talamai e ngaahi tāpuaki kuó Ne talaʻofa maí. Fakaafeʻi ke nau vahevahe ʻa e meʻa ne nau maʻú pea nau fili ha meʻa ʻoku fie maʻu ke nau ngāueʻi. Mou aleaʻi mo e kalasí e ngaahi founga ʻe lava ke nau fakalakalaka ai he ngaahi tafaʻaki ko iá pea poupouʻi e toʻu tupú ke nau fokotuʻu ha ngaahi taumuʻa fakatāutaha ke fakaʻaongaʻi ai e faleʻi ʻa e ʻEikí.
Huluʻi e vitiō “Feʻunga Hoʻo ʻIló,” pea fakaafeʻi e toʻu tupú k enau vahevahe atu e meʻa ne nau ako meia ʻEletā Neil L. Andersen ʻo fekauʻaki mo e founga ʻoku tau maʻu ai e ʻiló. Ko e hā te nau leaʻaki ki ha kaungāmeʻa ʻoku faingataʻaʻia ko e ʻikai mahino kiate ai e meʻa kotoa ʻi he ongoongoleleí? Te nau tokoni fēfē ke mahino ki honau kaungāmeʻá ʻa e fatongia ʻo e akó ʻi he palani ʻa e Tamai Hēvaní?
Kole ki he toʻu tupú ke nau lau e “Palani ʻo e Fakamoʻuí” ʻi he Tuʻumaʻu ʻi he Tuí (peesi 156–159), kau ai e ngaahi fakamoʻoni fakafolofolá pea kumi hake ha meʻa ne teʻeki ai ke nau ʻilo. Fakaafeʻi ke nau vahevahe atu e meʻa ne nau akó pea mou aleaʻi e ʻuhinga ʻoku finangalo ai e Tamai Hēvaní ke tau akó.

Kole ki he toʻu tupú ke nau vahevahe ʻa e meʻa naʻa nau ako he ʻaho ní. ʻOku mahino nai kiate kinautolu ʻa hono mahuʻinga ʻo e ako ki he Palani ʻa e Tamai Hēvaní? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Fakaafeʻi ke ngāue

Fakaafeʻi e toʻu tupú ke nau fakakaukau ki ha konga ʻo e palani ʻo e fakamoʻuí te nau fie akoʻi ki hanau kaungāmeʻa pe mēmipa ʻo e fāmilí. Ko e hā te nau lava ʻo fai ke ako ai e tefito ko iá?
Fai hoʻo fakamoʻoní ki he ngaahi tāpuaki ʻoku tau maʻu ʻi heʻetau fekumi ki he ʻiló ʻi he kotoa ʻo ʻetau moʻuí.