Te u lava fēfē ʻo hoko ko ha faiako lelei ange?

Ko e faiako leleí ko ha konga mahuʻinga ia hono langa e puleʻanga ʻo e ʻEikí, pea ʻoku tau maʻu kotoa ha ngaahi faingamālie ke faiako. Neongo ʻoku ngali he ʻikai ke tau maʻu ha uiuiʻi pau ke faiako, ʻoku tau maʻu ha ʻū faingamālie ke faiako ʻi hotau ngaahi fāmilí pea ʻi heʻetau hoko ko e ngaahi kaungāʻapi mo e ngaahi kaungāmeʻá. Te tau lava ʻo hoko ko ha kau faiako lelei ange ʻaki haʻatau vakaiʻi moʻoni hotau ngaahi mālohingá mo hotau ngaahi vaivaí, fekumi ʻi he loto fakatōkilalo ki he tokoni ʻa e ʻEikí, mo feinga faivelenga ke fakatupulaki ʻa e ngaahi ivi mo e ngaahi ʻulungaanga ʻoku mahuʻinga taha ʻi he akoʻi ʻo e ongoongoleleí.

Teuteuʻi fakalaumālie koe

Kuo tāpuekina fēfē koe ʻe he kau faiako leleí? Ko e hā kuó ke fai ke ke hoko ai ko ha faiako lelei angé?

Ko e hā ha ngaahi faingamālie kuó ke ʻoange ki he toʻu tupú ke nau faiako ai? Ko e hā honau mālohinga pe vaivaiʻanga heʻenau hoko ko e kau faiakó?

Ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā ʻe tokoni ke mahino ki he toʻu tupú e founga te nau lava ai ʻo hoko ko ha kau faiako lelei angé?

ʻEta 12:27 (ʻE tokoni ʻa e ʻEikí ke tau ʻai e ngaahi meʻa vaivaí ke mālohi)

T&F 42:14 (Kuo pau ke tau maʻu e Laumālié ke faiako)

T&F 88:78 (Akoʻi faivelenga)

Robert D. Hales, “‘Haʻu ʻo Muimui ʻIate Au ʻo ʻOfa mo Tokoni Faka-Kalisitiane,” Ensign pe Liahona, Nov. 2016, 22–24

“Talateu: Ko e Faiako ʻi he Founga ʻa e Fakamoʻuí,” Ko e Faiako ʻi he Founga ʻa e Fakamoʻuí (2016), 4–5

“Ko e Fakalakalaka ʻo Hangē ko ha Faiako Anga Faka-Kalaisí: Ko ha Vakaiʻi Fakaekita,” Faiako ʻi he Founga ʻa e Fakamoʻuí (2016), 37

David M. McConkie, Ko e Faiako ʻAki e Mālohi mo e Mafai ʻo e ʻOtuá,Ensign pe Liahona, Nōvema 2013

“Ko Hono Akoʻi ʻo e Ongoongoleleí,” Tuʻu Maʻu ʻi he Tuí (2004), 86–89.

Ko e Faiako ‘i he Founga ‘a e Fakamo‘uí

Naʻe ʻoange ʻe he Fakamoʻuí ki Heʻene kau ākongá ha ngaahi fatongia mahuʻinga ke faiako, tāpuakiʻi, mo tokoni ki he kakai kehé. ʻE tāpuekina fēfē ʻa e toʻu tupú ʻi heʻenau maʻu e ngaahi faingamālie ke akoʻi e niʻihi kehé ki he meʻa ʻoku nau akó?

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau ako mei he ngaahi tūkunga kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Kole ki he toʻu tupú ke nau fakamatala nounou ki ha efiafi fakafāmili ʻi ʻapi, semineli, pe lēsoni he Siasí ne nau saiʻia taha aí.
Fakaafeʻi ʻa e toʻu tupú ke nau fakakaukau ki ha faiako ne nau saiʻia taha ai naʻá ne fakalotoa kinautolu ke moʻui ʻaki e ongoongoleleí. Ko e hā e meʻa ne fai ʻe he faiako ko ʻení ke hoko ko e faiako leleí? Ko e hā hano ngaahi ʻulungaanga lelei ʻe fie faʻifaʻitaki ki ai e toʻu tupú? Kole ki he to‘u tupú ke nau lau ʻa e konga ‘oku ui ko e “Ko e Founga Faiako ʻa e Fakamoʻuí” ‘i he peesi 4 ʻo e Ko e Faiako ʻi he Founga ʻa e Fakamoʻuípea fekumi ki he ngaahi ʻulungaanga ʻo e kau faiako anga faka-Kalaisí. ʻOku tokoni fēfē e kau faiako lelei ʻo e ongoongoleleí ki hono langa e puleʻanga ʻo e ʻOtuá?

Ako fakataha

ʻE tokoni ʻa e ʻekitivitī takitaha ʻi laló ki he toʻu tupú ke nau ʻilo e founga te nau lava ai ʻo hoko ko ha kau faiako lelei ange. Muimui ʻi he fakahinohino ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Vahevahe ʻa e kalasí ki ha kulupu ʻe tolu, pea kole ki he kulupu takitaha ke nau lau ha taha ʻo e ngaahi potufolofola ko ʻení: ʻEta 12:27; T&F 42:14; T&F 88:78. Kole ange ke nau fakakaukauloto mo aleaʻi e meʻa ʻoku akoʻi ʻe he ngaahi potufolofolá ni fekauʻaki mo e hoko ko ha kau faiako lelei angé. Poupouʻi kinautolu ke nau kumi ʻa e ngaahi potufolofola ʻi he futinouti ʻo e ngaahi veesi ko ʻení ke nau maʻu ha ʻilo lahi ange ki he hoko ko e kau faiako lelei angé, pea kole ange ke nau vahevahe e meʻa ne nau maʻú. Fakaafeʻi ʻa e toʻu tupú ke nau lau ʻa e konga ʻoku ui “Ko Hono Akoʻi ʻo e Ongoongoleleí” ʻi he Tuʻu Maʻu ʻi he Tuí (86–89) pea hiki ha lisi ʻo ha ngaahi founga te nau lava ai ʻo faivelenga ange ko ha kau faiako.
Fakaafeʻi ʻa e toʻu tupú ke nau kumi mo lisi ʻi he palakipoé ʻa e ngaahi tefitoʻi moʻoni mahuʻinga ʻe ono ʻo e faiakó ʻi he konga III ʻo e lea ʻa ʻEletā Dallin H. Oaks ko e “Akoʻi ʻo e Ongoongoleleí.” Kole ange ke nau vakaiʻi e tuʻunga lelei ʻo ʻenau fakaʻaongaʻi e ngaahi tefitoʻi moʻoni ko ʻení ʻi heʻenau faiakó. Fakaafeʻi kinautolu ke nau fili ha taha ʻo e ngaahi tefitoʻi moʻoni ko ʻeni ʻoku nau fie ʻilo lahi ange ki aí pe fakaleleiʻi e anga ʻo ʻenau faiakó. Kole ange ke nau ako ʻa e tefitoʻi moʻoni ʻi he lea ʻa ʻEletā ʻOakesí pea vahevahe e meʻa ne nau akó mo e meʻa ʻoku nau palani ke fai ke fakaʻaongaʻi ai e tefitoʻi moʻoni ko ʻení ʻi ha taimi te nau toe akoʻi ai ha niʻihi kehe.
Fakaafe‘i ʻa e kau mēmipa ‘o e kalasí ke fakakakato ʻa e “Ko e Fakalakalaka ʻo Hangē ko ha Faiako Anga Faka-Kalaisí: Ko ha Vakaiʻi Fakaekita” ʻi he peesi 37 ‘o e Ko e Faiako ʻi he Founga ʻa e Fakamoʻuí. Kole ange ke nau aleaʻi e meʻa ne nau ako ʻi heʻenau fanga kiʻi kulupú pea vahevahe mo e fanga kiʻi kulupu kehé e ngaahi tefitoʻi meʻa mahuʻinga ʻo ʻenau fealēleaʻakí. Kole ki he toʻu tupú ke nau fakakaukau ki ha aʻusia kimuí ni ne nau maʻu ʻi heʻenau faiakó (hangē ko ʻení, ʻi he efiafi fakafāmili ʻi ʻapí, ʻi ha kalasi he lotú, pe ʻi heʻete hoko ko ha faiako fakaʻapí). Fakaafe‘i ʻa e to‘u tupu takitaha ke nau faʻu ha palani ke fakalakalaka ange ai ʻenau hoko ko ha faiako ʻo e ongoongoleleí.
Hiki ʻi he palakipoé, “Ko e hā te u lava ʻo fai ke u hoko ai ko ha faiako lelei ange?” Fakaafe‘i e toʻu tupú ke nau lau ‘a engaahi palakalafi ʻe tolu ʻoku kamata ʻaki ʻa e kupuʻi lea “feako‘i[ʻaki] e tokateline ‘o e puleʻangá” ‘i he lea ʻa ‘Eletā Robert D. Hales ko e “ʻ ʻHaʻu, ʻo Muimui ʻIate Au ʻo ʻOfa mo Tokoni Faka-Kalisitiane.” ʻE lava foki ke nau lau ʻa e “Talateu: Ko e Faiako ʻi he Founga ʻa e Fakamoʻuí” ‘i he Faiako ʻi he Founga ‘a e Fakamoʻuí.Fakaafe‘i kinautolu ke nau kumi ha ngaahi tali ki he fehuʻi ko ‘ení mo vahevahe e meʻa ne nau ma‘ú. Te nau fakaʻaongaʻifēfē ʻa e ngaahi meʻa kuo nau akó ki heʻenau founga fakafaiakó?
Fakaafeʻi ʻa e toʻu tupú ke nau lau ʻa e “Ngaahi Founga ʻo e Faiakó ʻi he Tuʻu Maʻu ʻi he Tuí pea lisi ʻi he palakipoé ʻa e ngaahi founga fakafaiako te nau maʻu aí. Ko e fē ha taimi kuo fakatokangaʻi ai ʻe he toʻu tupú hano fakaʻaongaʻi e ʻū founga ko ʻení? Kole ki he toʻu tupu takitaha ke ne fili ha taha ʻo e ngaahi tefito ʻo e tuí pea tuku ha ngaahi miniti siʻi he kalasí ke teuteu ke akoʻi ia ki ha kulupu ʻo ha longaʻi fānau, ʻo fakaʻaongaʻi ha taha ʻo e ngaahi founga he palakipoé. Kole ki he toʻu tupú ke nau vahevahe e meʻa ne nau teuteú.

Kole ki he toʻu tupú ke nau vahevahe e meʻa ne nau ako he ʻaho ní. ʻOku mahino nai kiate kinautolu e founga te nau lava ai ʻo hoko ko ha kau faiako lelei angé? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he kaveingá ni?

Fakaafeʻi ke ngāue

Fakaafeʻi ‘a e toʻu tupú ke nau vahevahe ha faʻahinga meʻa naʻa nau ongoʻi lolotonga e kalasí. Ko e hā te nau fai ke nau lelei ange ai heʻenau hoko ko e kau faiakó? Poupouʻi kinautolu ke nau vahevahe ʻenau ngaahi aʻusiá ʻi ha kalasi he kahaʻú.