Ko e hā ha meʻa te u lava ʻo ako mei he sīpinga ʻa e Fakamoʻuí ʻo kau ki hono ako ʻo e ongoongoleleí?

ʻI hono ako e ongoongoleleí, pea pehē ki he meʻa kotoa pē, ko Sīsū Kalaisi hotau faʻifaʻitakiʻanga haohaoá. Koeʻuhí he naʻá Ne talangofua kakato mo fakavaivai ki Heʻene Tamaí, naʻá Ne “tupulaki [ʻi he] potó mo e lahí, pea naʻe ʻofeina ia ʻe he ʻOtuá mo e tangatá” (Luke 2:52). Pea hangē pē ko hono maʻu ʻe he Fakamoʻuí ʻa e “ʻaloʻofa hoko mo e ʻaloʻofa” (T&F 93:12), kuo pau ke tau faʻa kātaki he fekumi ki he māmá mo e ʻilo mei he ʻOtuá ʻi heʻetau feinga ke ako e ongoongoleleí.

Teuteuʻi fakalaumālie koe

Ko e hā ha ngaahi ʻulungaanga faka-Kalaisi ʻokú ke ongoʻi ʻoku mahuʻinga ki hono akoʻi e ongoongoleleí? Naʻe tokoniʻi fēfē koe ʻi hono fakatupulaki e ngaahi ʻulungaanga ko ʻení ʻi hoʻo feinga ke ako mo akoʻi e ongoongoleleí?

Ko e hā ha meʻa ʻe mahino ki he toʻu tupú kau ki he Fakamoʻuí ʻa ia te ne tokoniʻi kinautolu ke nau hoko ai ko ha fānau ako lelei ange ʻo e ongoongoleleí?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa te ne ueʻi fakalaumālie e toʻu tupu ʻokú ke akoʻí?

Luke 2:40–52 (Naʻe tupulaki ʻa Sīsū Kalaisi he potó mo e laumālié Heʻene kei tamasiʻí)

Sione 5:30 (Naʻe fekumi maʻu pē ʻa Sīsū Kalaisi ki he finangalo ʻo ʻEne Tamaí)

1 Kolinitō 2:14 (ʻOku ʻikai ke maʻu ʻe he tangata fakakakanó e ngaahi meʻa ʻo e Laumālié)

T&F 1:26–28; 112:10 (ʻE akoʻi kitautolu ʻe he ʻEikí, kapau ʻoku tau angavaivai mo loto ki ai)

T&F 93:11–20 (Te tau lava ke maʻu e ʻaloʻofa hoko mo e ʻaloʻofa ʻo hangē ko e Fakamoʻuí)

T&F 130:18–19 (ʻOku tau maʻu e ʻiló mo e potó makatuʻunga he faivelengá mo e talangofuá)

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau ako mei ha ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi e toʻu tupú ke nau vahevahe ha meʻa ʻoku nau ako kau ki he Fakamoʻuí mei heʻenau ako fakatāutahá. Ko e hā e meʻa ʻoku nau feinga ke fai ke nau hoko ʻo hangē ange ko Iá?
Kole ki he toʻu tupú ke ʻai ha lisi ʻi he palakipoé ʻo e ngaahi ʻulungaanga ʻo Sīsū Kalaisí (ki ha ngaahi fakakaukaú, vakai ki he Malangaʻaki ʻEku Ongoongoleleí,peesi 150). Ko e fē he niʻihi ʻo e ngaahi ʻulungaanga ko ʻení ʻoku ongoʻi ʻe he toʻu tupú ʻe lava ʻo tokoni ke tau hoko ai ko ha kau ako lelei ange ʻo e ongoongoleleí? Kole ke nau fakamatalaʻi ʻenau talí pea ʻomi ha ngaahi sīpinga ʻo e founga naʻe fakahaaʻi ai ʻe he Fakamoʻuí e ngaahi ʻulungaanga ko ʻení.

Ako fakataha

ʻE tokoni e ngaahi ʻekitivitī takitaha ko ʻení ke mahino ki he toʻu tupú e founga hono fakatupulaki e ngaahi ʻulungaanga faka-Kalaisi te nau lava ʻo tokoniʻi kinautolu ke nau hoko ai ko ha kau ako lelei ange ʻo e ongoongoleleí. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ngāue taha ki hoʻo kalasí:

Lau ʻe he kalasí, ha taha pe lahi ange ʻo e ngaahi potufolofolá ni: Luke 2:40–52; Sione 5:30; Tokāteline mo e Ngaahi Fuakava 93:11–20. Fakaafeʻi e toʻu tupú ke nau kumi ʻi he ngaahi veesi ko ʻení ha ngaahi ʻulungaanga lelei ʻo e kau ako leleí naʻe fakaʻaliʻali mai ʻe he Fakamoʻuí. Kole ke nau vahevahe e meʻa ʻoku nau maʻú, fakataha mo e ngaahi ʻulungaanga lelei kehe ʻo e kau ako leleí ʻoku nau loto ke fakatupulaki ʻi heʻenau moʻuí.
Hiki e ngaahi fakafekauʻaki fakafolofola ko ʻení ʻi he palakipoé: Sione 5:30; T&F 1:26–28; 112:10; 130:18–19. Kole ki he toʻu tupu takitaha ke ne fili ha taha ʻo e ngaahi fakafekauʻakí, lau ia, pea kumi he folofolá ha ʻulungaanga ʻo e kau ako leleí. Ko e hā ʻoku mahuʻinga ai e ngaahi ʻulungaanga ko ʻení ki hono ako e ongoongoleleí? Fakaafeʻi e toʻu tupú ke nau palani ha ngaahi founga ʻe lava ke nau ngāue ʻaki ai e ngaahi ʻulungaanga ko ʻení ʻi heʻenau ako e ongoongoleleí.
Fakaafeʻi e mēmipa takitaha ʻo e kalasí ke ne lau ʻo kau ki ha taha ʻo e ngaahi tefitoʻi moʻoni ʻe fā ki hono maʻu ʻo e ʻilo fakalaumālié mei he lea ʻa ʻEletā Lisiate G. Sikoti “Acquiring Spiritual Knowledge.” Kole ki he toʻu tupú ke nau vahevahe e meʻa ʻoku nau ako kau ki he akó mei he pōpoaki ʻa ʻEletā Sikotí. Ne fakaʻaliʻali fēfē ʻe he Fakamoʻuí e ngaahi tefitoʻi moʻoni ko ʻení? Fakaafeʻi ke nau vahevahe e ngaahi founga te nau lava ke fakaʻaongaʻi ai e ngaahi tefitoʻi moʻoni ko ʻení ʻi heʻenau ako e ongoongoleleí.
Fakaafeʻi e toʻu tupú ke nau lau e lea ʻa ʻEletā Lisiate R. Sitoea “Being Teachable.” Kole ke nau fili ha sīpinga mei he folofolá ʻoku fakaʻaongaʻi ʻe ʻEletā Sitoea ʻoku nau saiʻia ai. Fakaafeʻi kinautolu ke nau kumi ha talanoa ʻi he folofolá (ngāue ʻaki e ngaahi fakafekauʻaki ʻi he leá), lau lahi ange kau ki ai, pea vahevahe e meʻa ʻoku nau laú mo e toenga ʻo e kalasí. Ko e hā ʻoku nau ako mei he ongo talanoa ko ʻení ʻo kau ki he akoʻi ngofuá? Ko e hā ha ngaahi sīpinga ʻoku faitatau mei heʻenau moʻuí te nau lava ʻo vahevahe? Te nau muimui fēfē ki he ngaahi sīpinga ko ʻení ʻi heʻenau ako e ongoongoleleí?

Kole ki he toʻu tupú ke nau vahevahe e meʻa naʻa nau ako he ʻaho ní. ʻOku mahino nai kiate kinautolu ko e hoko ko ia ʻo hangē ange ko Kalaisí ʻe lava ke tokoniʻi ai kinautolu ke nau hoko ko ha kau ako lelei ange ʻo e ongoongoleleí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he kaveingá ni?

Ngaahi taukei ako folofola ʻo e ongoongoleleí

Kumi e ngaahi ʻulungaanga ʻo Sīsū Kalaisí. ʻI he ʻuluaki ʻekitivitī he konga ko ʻení, ʻoku fakaafeʻi ai e toʻu tupú ke nau kumi e ngaahi ʻulungaanga ʻo Kalaisí ʻi he folofolá. Poupouʻi e toʻu tupú ke nau fai e meʻá ni he taimi kotoa pē te nau lau ai e folofolá. Te nau lava ke fai e ngaahi fehuʻi hangē “Ko e hā ʻoku ou ako ʻo kau kia Sīsū Kalaisí? Ko e hā ʻoku fie maʻu ke liliu ʻi heʻeku moʻuí ke u hoko ai ʻo hangē ange ko Iá?”

Fakaafeʻi ke ngāue

ʻEke ki he toʻu tupú e meʻa ʻoku nau ongoʻi mo ueʻi ke nau faí makatuʻunga he meʻa ne nau ako he ʻaho ní. Poupouʻi ke nau ngāueʻi e ngaahi ongo ko ʻení. Fakakaukauʻi ha ngaahi founga te ke lava ʻo muimuiʻi ai.