Kilisimasi: Te u lava fēfē ʻo vahevahe ʻeku fakamoʻoní ko Sīsū Kalaisí ko e ʻalo Ia ʻo e ʻOtuá?

Ko e Kilisimasí ko ha taimi ia ke manatu ki he ʻaloʻi ʻo e Fakamoʻuí pea mo fakafoʻou ʻetau houngaʻia ki he ngaahi meʻaʻofa lahi ʻo ʻEne moʻui haohaoá mo e feilaulau fakaleleí. ʻI he fakamatala ʻa e folofolá ki Hono ʻaloʻi maí, ʻoku tau maʻu ai ha ngaahi sīpinga ʻo e tuʻunga fakaākongá—meia Samuela ko e tangata Leimaná, ʻa ia naʻá ne kikite ʻi he loto-toʻa ʻo kau ki Heʻene hāʻele maí, ki he kau Nīfaí ʻi heʻenau sio fakamamaʻu ki he fakaʻilonga ʻo Hono ʻaloʻi maí, ki he kau tauhisipí ʻi heʻenau vahevahe e pōpoaki kuo ʻaloʻi mai ʻa e ʻalo ʻo e ʻOtuá, pea ki he kau tangata poto ne nau sio ki hono fakahoko ʻo e kikití mo e fononga ki ha feituʻu mamaʻo ke vakai ki he Tuʻi ʻo e kau Siú. Hangē ko e Kāingalotu faivelenga ʻo e kuonga muʻá, ʻoku tau ongoʻi ʻa e holi ke vahevahe mo e niʻihi kehé ʻa ʻetau fakamoʻoni kia Sīsū Kalaisí pea mo e “ngaahi ongoongo lelei ʻo e fiefia lahi” ʻoku tau maʻu ʻi Heʻene ongoongolelei kuo toe fakafoki maí (Luke 2:10).

Teuteuʻi fakalaumālie koe

Ko e hā ha ngaahi potufolofola pe akonaki ʻa e kau palōfita ʻo e ngaahi ʻaho kimui ní kuó ne fakamālohia hoʻo fakamoʻoni ki he tuʻunga faka-ʻOtua ʻo Sīsū Kalaisí? Kuo tākiekina fēfē hoʻo moʻuí ʻe he fakamoʻoni ko ʻení? Ko e fē ha taimi kuó ke fakaʻaongaʻi ai ʻa e ngaahi folofola pe akonaki ko ʻení ke tokoniʻi ha niʻihi kehe ke fakamālohia ʻenau fakamoʻoní?

Ko e fē ha taimi kuó ke fanongo ai ki he toʻu tupú ʻoku nau fakamoʻoni ʻo kau ki he Fakamoʻuí? Ko e hā te ke lava ʻo fai ke poupouʻi kinautolu ke nau vahevahe ʻenau fakamoʻoní pea mo e niʻihi kehé?

Ako ʻi he faʻa lotu ʻa e ngaahi maʻuʻanga tokoni ʻi laló. Ko e hā ha meʻa ʻokú ke ongoʻi te ne ueʻi e toʻu tupú ke fai ʻenau fakamoʻoni fekauʻaki mo e Fakamoʻuí?

Mātiu 2; Luke 2 (Kuo aloʻi ʻa Sīsū Kalaisi)

Hilamani 14 (Kikiteʻi ʻe he tangata Leimana ko Samuelá ʻa e ʻaloʻi ʻo Sīsū Kalaisí)

3 Nīfai 1:4–22 (Fakamoʻoniʻi ʻe he kau Nīfaí ʻa e fakaʻilonga ʻo hono ʻaloʻi ʻo Kalaisí)

Henry B. Eyring, “Ko e Meʻaʻofa Haohaoá,” mei he Pōpoaki Faka-Kilisimasi mo e Kau Palestienisī ʻUluakí ʻo e 2012

“Ko e Kalaisi Moʻuí: Ko e Fakamoʻoni ʻa e Kau ʻAposetoló,” Ensign, Apr. 2000, 2–3.

Vitiō: “Ko Ia ʻa e Meʻaʻofá”, “Kuo ʻAloʻi e Fakamoʻuí—Vitiō Faka-Kilisimasi”, “Fakamaama ʻa e Māmaní: ʻAho ʻe 25 ʻo e Tokoní”

Ngaahi Fakataha Lotu Faka-Kilisimasi ʻa e Kau Palesitenisī ʻUluakí

Ko e faiako ‘i he founga ‘a e Fakamo‘uí

Naʻe fakaʻaongaʻi ʻe he Fakamoʻuí ʻa e folofolá ke faiako mo fakamoʻoni fekauʻaki mo ʻEne misioná. Naʻá Ne akoʻi e kakaí ke nau fakakaukau ki he folofolá pea fakaʻaongaʻi ia ke maʻu ai e tali ki heʻenau ngaahi fehuʻi ʻanautolu peé. Te ke lava fēfē o tokoniʻi ʻa e toʻu tupú ke nau ʻiloʻi ʻa e ngaahi fakamoʻoni mālohi ʻoku ʻi he folofolá?

Fakafehokotaki

Lolotonga e ngaahi fuofua miniti ʻo e kalasi kotoa pē, tokoniʻi ‘a e toʻu tupú ke nau fakatokangaʻi ‘a e fehokotaki ʻa e ngaahi meʻa naʻa nau ako ‘i he ngaahi tūkunga kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne nau aʻusia mo honau kaungāmeʻá). Te ke tokoniʻi fēfē kinautolu ke sio ki he felāveʻi ʻa e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi e toʻu tupú ke nau vahevahe ʻa e anga ʻo ʻenau fakaʻaongaʻi e meʻa ne nau ako mei he kalasí ʻi he uike kuo ʻosí ʻi he lolotonga ʻa e uiké.
Kole ki he toʻu tupú ke nau vahevahe ʻa e founga ʻoku nau fakamanatu e ʻaloʻi ʻo e Fakamoʻuí. Ko e hā e ngaahi tala-tukufakaholo ʻokú ne tokoniʻi kinautolu ke nau ofi ange ki he Kalaisí?

Ako fakataha

ʻE tokoni e ʻekitivitī takitaha ʻi laló ke ueʻi fakalaumālie e toʻu tupú ke nau vahevahe ʻenau fakamoʻoni kia Sīsū Kalaisí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

ʻOku fakahoko ʻe he Kau Palesitenisī ʻUluakí ha ngaahi lea ʻi he taʻu kotoa ʻi he Fakataha Lotu Faka-Kilisimasi ʻa e Kau Palesitenisī ʻUluakí. Fili ha lea pe ko ha hiva pea mei ha fakataha lotu kimuí ni mai ke vahevahe mo e kalasí. Ko e hā ha ngaahi talanoa pea mei he leá te ke fie vahevahe mo e niʻihi kehé? ʻOku tokoni fēfē ʻa e ngaahi talanoa ko ʻení ke tau akoʻi fekauʻaki mo e ʻuhinga totonu ʻo e Kilisimasí pea mo hotau Fakamoʻui ko Sīsū Kalaisí? Fakaafeʻi ʻa e kalasí ke nau vahevahe ʻi he mītia fakasōsialé pe ko e kau mēmipa honau fāmilí ha meʻa naʻa nau ako mei he lea ʻi he fakataha lotú.
Huluʻi ha taha ʻo e ngaahi vitiō ʻoku fokotuʻu atu ʻi he fokotuʻutuʻu ko ʻení, pea fakaafeʻi e toʻu tupú ke nau vahevahe mo e niʻihi kehé ʻenau ngaahi fakakaukaú mo e ngaahi ongo kau ki he Fakamoʻuí. Fai hoʻo fakamoʻoní ki he faka-ʻotua ʻa e Fakamoʻuí, pea fakaafeʻi e toʻu tupú ke nau fai e meʻa tatau. Poupouʻi e toʻu tupú ke nau vahevahe ha taha ʻo e ngaahi vitiō ko ʻení ʻi ha efiafi fakafāmili ʻi ʻapí pe ʻi he mītia fakasōsialé. ʻI ha kalasi he kahaʻú, fakaafeʻi kinautolu ke nau fakamatala fekauʻaki mo ʻenau ngaahi aʻusia ʻi hono vahevahe ʻo e ngaahi pōpoaki ko ʻení.
Toe vakaiʻi faka-kalasi ʻa e fakamatala ki he ʻaloʻi ʻo e Fakamoʻuí, ʻi he Fuakava Foʻoú mo e Tohi ʻa Molomoná fakatouʻosi, ʻaki ʻa hono lau fakataha ʻo e ngaahi potufolofola ʻoku hiki atu ʻi he lēsoni ko ʻení. Ko e hā ʻoku maʻu ʻe he toʻu tupú mei he ngaahi folofola ko ʻení ʻokú ne ueʻi kinautolu ke nau vahevahe ʻenau fakamoʻoní ki he niʻihi kehé, ʻo hangē ko ia ne fai ʻe he tangata Leimana ko Samuelá pea mo e kau tauhisipí? Ko e hā mo ha toe ngaahi fakakaukau kehe ʻoku nau maʻu? Fakaafeʻi e toʻu tupú ke nau fakalaulauloto mo aleaʻi ha ngaahi founga te nau lava ʻo vahevahe ʻenau fakamoʻoni kia Sīsū Kalaisí lolotonga e faʻahitaʻu Kilisimasi ko ʻení.
Hivaʻi fakataha ʻa e ngaahi hiva toputapu ʻo e Kilisimasí, pea fakaafeʻi e toʻu tupú ke nau talanoa ki he ngaahi pōpoaki mei he ngaahi hivá ʻokú ne ueʻi fakalaumālie kinautolu. Ko e hā ha ngaahi potufolofola te nau lava ke vahevahe fekauʻaki mo e ngaahi himi ko ʻení? Kapau ʻe feʻunga, te ke lava ʻo kumi ha faingamālie ke hivaʻi fakakalasi ha hiva faka-Kilisimasi ki he kakai ʻi he koló.

Kole ki he toʻu tupú ke nau vahevahe ʻa e meʻa naʻa nau ako he ʻaho ní. ʻOku nau ongoʻi ha ueʻi fakalaumālie ke vahevahe ʻenau fakamoʻoni kia Sīsū Kalaisí mo e niʻihi kehé? Ko e hā ha ngaahi ongo pe fakakaukau ʻoku nau maʻu? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke fakamoleki ha taimi lahi ange ʻi he kaveingá ni?

Tokoni fakafaiakó

“ʻI heʻetau akoʻi e ongoongoleleí, ʻoku totonu ke tau 'iloʻi ʻi he loto fakatōkilalo ko e faiako moʻoní ʻa e Laumālie Māʻoniʻoní. Ko ha faingamālie lelei ia ke tau hoko ko ha ngaahi meʻangāue ʻo fakafou ʻi ha taha ʻoku lava ke akoʻi, fakamoʻoniʻi, mo tataki fakalaumālie ʻe he Laumālie Māʻoniʻoní” (ʻOku ʻIkai Ha Ui ʻe Mahuʻinga Ange ʻi he Faiakó [2000], 45).

Fakaafeʻi ke ngāue

ʻEke ki he toʻu tupú e meʻa ʻoku nau ongoʻi mo ueʻi ke nau faí makatuʻunga he meʻa ne nau ako he ʻaho ní. Poupouʻi ke nau ngāueʻi e ngaahi ongo ko ʻení. Fakakaukauʻi ha ngaahi founga te ke lava ʻo muimuiʻi ai.