ʻE mahino fēfē nai kiate au e ngaahi fakataipe ne fakaʻaongaʻi ke akoʻi ʻaki e Hāʻele ʻAngaua Maí?

Ko e taimi ne akoʻi ai ʻe he Fakamoʻuí mo ʻEne kau tamaioʻeikí ʻa e Hāʻele ʻAngaua Maí, naʻa nau fakaʻaongaʻi ha ngaahi fakataipe mo e ngaahi talafakatātā. Te tau lava ʻo fakaloloto e mahino ʻoku tau maʻu ki he ngaahi meʻa ʻoku [fakaiku] ki he Hāʻele ʻAngaua Maí, ʻi heʻetau ako ke fakaʻuhingaʻi e ngaahi ʻuhinga ʻo e ngaahi fakataipe ko ʻení.

Teuteuʻi fakalaumālie koe

Ko e hā ha ngaahi fakataipe mo ha ngaahi talafakatātā ʻi he ngaahi potufolofolá kuo tokoni ke mahino lelei ange ai kiate koe ʻa e Hāʻele ʻAngaua Maí? Kuo ueʻi fēfē koe ʻe he ngaahi fakafehoanaki ko ʻení ke ke teuteu ki he toe foki mai ʻa e Fakamoʻuí?

Ko e hā e ngaahi fakataipe mo e ngaahi talafakatātā ʻo e Hāʻele ʻAngaua Maí ʻe ngali mahuʻinga ki he toʻu tupu ʻokú ke akoʻí? Te ke lava fēfē ʻo tokoniʻi kinautolu ke nau fakatokangaʻi hono fakahoko ʻo e ngaahi kikite ko ʻení ʻi māmaní?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā ʻe tokoni ke mahino ki he toʻu tupú ʻa e ngaahi fakataipe mo e ngaahi talafakatātā fekauʻaki mo e Hāʻele ʻAngaua Maí?

Mātiu 13:24–30; T&F 86:1–7 (Ko e talafakatātā ʻo e uité mo e teá)

1 Tesalonaika 5:2–8; 2 Pita 3:10–14; T&F 106:4–5; Siosefa Sāmita—Mātiu 1:46–48 (ʻE hoko ʻa e Hāʻele ʻAngaua Maí ʻo hangē ha tokotaha kaihaʻa ʻi he poʻulí)

Mātiu 25:1–13; T&F 45:56–57; 63:54 (Ko e talafakatātā ʻo e kau tāupoʻou ʻe toko hongofulú)

T&F 45:34–39; Siosefa Sāmita—Mātiu 1:38–39 (Ko e talafakatātā ʻo e fikí)

Siosefa Sāmita—Mātiu 1:49–54 (ʻOku fakatatau ʻa e Hāʻele ʻAngaua Maí ki ha ʻeiki ʻoku ʻaʻahi ki ha kau tamaioʻeiki angatonu mo ha kau tamaioʻeiki angakovi)

Ongo vitiō: “ʻA Kinautolu ʻOku Potó”, “ʻOua ʻe Puputuʻu”

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau ako ʻi he ngaahi tūkunga kehekehe (hangē ko e ako fakatāutahá, seminelí, ngaahi kalasi kehe ʻa e Siasí pe meʻa ne nau aʻusia mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Kole ki he toʻu tupú ke nau hiki ha lisi ʻo e ngaahi moʻoni e ongoongoleleí ʻoku nau akó pea aleaʻi e anga ʻenau fekauʻakí.

Ako fakataha

ʻE tokoni e ʻekitivitī takitaha ʻi laló ki he toʻu tupú ke mahino ʻa e ngaahi fakataipe ʻoku fakaʻaongaʻi ke akoʻi ʻaki ʻa e Hāʻele ʻAngaua Maí. Muimui ʻi he fakahinohino ʻa e Laumālie Māʻoniʻoní, fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Fakaafeʻi ʻa e toʻu tupú ke nau lau e ngaahi potufolofola ʻi he fokotuʻutuʻu ko ʻení ʻoku nau fakamatalaʻi ʻa e talafakatātā ʻo e kau tāupoʻou ʻe toko hongofulú (pe huluʻi ʻa e vitiō “ʻA Kinautolu ʻOku Potó”). Kole ki he toʻu tupú ke nau tā ha kōlomu ʻe ua ʻi ha laʻipepa pea fakahingoa ʻa e ongo kōlomú ko e “Talafakatātā ʻo e Kau Tāupoʻou ʻe Toko Hongofulú” mo e “Hāʻele ʻAngaua Maí” pea fakakaukau ki he ngaahi fakafehoanaki naʻe fai ʻe he Fakamoʻuí. Fakaafeʻi ʻa e toʻu tupú ke nau hiki e ngaahi konga ʻo e talafakatātaá ʻi he kōlomu ʻuluakí, hangē ko e kau tāupoʻou potó, ʻEiki Taʻané, mo e loló, pea hiki ʻi he kōlomu hono uá ʻa e ngaahi meʻa ʻokú ne fakafofongaʻi ʻa e Hāʻele ʻAngaua Maí. Kapau ʻoku nau fie maʻu tokoni, pea vahevahe ange ʻa e “Ko e Talanoa Fakatātā ʻo e Kau Tāupoʻou ʻe Toko Hongofulú” (Ensign, Māʻasi 2009, 48–49; pe Liahona, Māʻasi 2009, 20–21). Aleaʻi fakataha e meʻa ne nau akó mo e meʻa ne ueʻi kinautolu ke nau fai hili ʻenau ako e talafakatātā ko ʻení.
Kole ki he toʻu tupu takitaha ke nau lau e ngaahi fakamoʻoni fakafolofola ʻoku ʻoatu ʻi he fokotuʻutuʻu ko ʻení ʻa ia ʻoku fakafehoanaki ai e Hāʻele ʻAngaua Mai ʻa Sīsū Kalaisí ki ha taha kaihaʻa ʻi he poʻulí. Kole ki he toʻu tupú ke nau aleaʻi e meʻa ne nau ako kau ki he Hāʻele ʻAngaua Maí. Ko hai ʻe hangē ki ai e Hāʻele ʻAngaua Maí ko ha tokotaha kaihaʻá? Ko e hā ʻoku fakahā mai ʻe he ngaahi potufolofolá te tau lava ʻo fai ke tau mateuteu aí? Fakaafeʻi ʻa e toʻu tupú ke nau fakakaukau ki ha fakafehoanaki pē ʻa nautolu te ne fakamatalaʻi e Hāʻele ʻAngaua Maí pea vahevahe ia mo e kalasí.
Lau ʻe he kalasí ʻa e Siosefa Sāmita—Mātiu 1:49–54. Kole ki he toʻu tupú ke nau aleaʻi e faikehekehe ʻi he ongo tamaioʻeikí. ʻOku tatau fēfē ʻa e kakai ʻe niʻihi ʻi hotau kuongá ni mo e tamaioʻeiki kākaá? Ko e hā e ngaahi nunuʻa e meʻa naʻe fai ʻe he kau tamaioʻeikí? Kole ki he toʻu tupú ke nau fili ha taha ʻo e ngaahi potufolofola ʻi he futinouti ʻo e ʻū vēsí pea lau ia. Fakaafeʻi kinautolu ke nau vahevahe ha ngaahi ʻilo makehe ne nau maʻu fekauʻaki mo ha fakafehoanaki mei hono lau ʻo e toe ngaahi potufolofolá ni.
Kole ki he toʻu tupú ke nau ʻai pē ke pehē naʻe fakahaaʻi ʻe hanau kaungāmeʻa haʻane manavahē ki he ngaahi meʻa ʻe hoko kimuʻa ʻi he Hāʻele ʻAngaua Maí. Ko e hā ha ngaahi lea fakafiemālie te nau lava ʻo fai ki honau kaungāmeʻá? Huluʻi ʻa e vitiō “ʻOua ʻe Puputuʻu,” pea kole ki he toʻu tupú ke nau hiki ha ngaahi meʻa makehe te nau lava ʻo vahevahe mo honau kaungāmeʻá, kau ai e ngaahi potufolofolá. Fakaafeʻi ʻa e toʻu tupú ke nau fakaʻaongaʻi e meʻa ne nau akó ke fakatātaaʻi ʻaki hano fakafiemālieʻi hanau kaungāmeʻa ʻoku hohaʻa ki he Hāʻele ʻAngaua Maí.

Kole ki he toʻu tupú ke nau vahevahe e meʻa ne nau ako he ʻaho ní. Ko e hā haʻanau ngaahi ongo pe fakakaukau? ʻOku mahino nai kiate kinautolu e ngaahi talafakatātā mo e ngaahi fakataipe ki he Hāʻele ʻAngaua Maí? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he kaveingá ni?

Ngaahi taukei ako ʻo e ongoongoleleí

Ko e mahino ʻo e fakataipé. ʻE fie maʻu ke lava ‘a e toʻu tupú ‘o ‘iloʻi ‘a e ngaahi fakataipé, ‘iloʻi e ngaahi konga ‘o e ngaahi fakataipé mo fakaʻuhingaʻi kinautolu, kae mahino ‘a e ngaahi talafakatātaá mo e ngaahi fakataipe ʻi he folofolá. Ko e founga ‘e taha ke ‘iloʻi ai ha fakataipé, ke kumi e ngaahi foʻi lea hangē ko e hangeé, fakatataú, tatau mo e, pe hangē ko iá.ʻE lava leva ʻe he toʻu tupú ke ʻai ha lisi ʻo e ngaahi konga ʻo e fakataipé (hangē ko e loló, ngaahi māmá, kau tāupoʻoú, mo e ʻEiki Taʻané). Te nau lava ‘o fakaʻaongaʻi e ngaahi maʻuʻanga tokoni kehe ‘a e Siasí (hangē ko e ngaahi makasini ‘a e Siasí, ngaahi malanga konifelenisí, mo e ngaahi potufolofola kehé) ke fakaʻuhingaʻi e ngaahi fakataipé, mo fakakaukauʻi e founga ‘oku tokoniʻi ai kinautolu ‘e he fakataipé ke mahino ha tefitoʻi moʻoni ‘o e ongoongoleleí. Poupouʻi kinautolu ke nau fai ‘eni ‘i he taimi kotoa pē ‘oku nau fehangahangai ai mo ha tala fakatātā pe ha fakataipe ‘i heʻenau ako fakatāutaha e ongoongoleleí.

Fakaafeʻi ke ngāue

ʻEke ki he toʻu tupú pe ko e hā ʻoku nau ongoʻi ʻoku ueʻi kinautolu ke nau fai ʻo makatuʻunga he meʻa ne nau ako he ʻaho ní. Poupouʻi kinautolu ke nau ngāueʻi e ngaahi ongo ko ʻení. Ko e hā ha ngaahi faingamālie ʻoku maʻu ʻe he toʻu tupú ke akoʻi ha niʻihi kau ki he ngaahi fakataipe ʻo e Hāʻele ʻAngaua Maí?