Ko e hā ha founga ʻe lava ke u fakaʻaongaʻi lelei ai e ngaahi fehuʻí ʻi heʻeku faiakó?

Naʻe faʻa fai ʻe Sīsū Kalaisi, ko e Faiako Tuʻukimuʻá ha ngaahi fehuʻi mo poupouʻi e kakaí ke nau fakalaulauloto mo fakahoko e ngaahi tefitoʻi moʻoni naʻá Ne akoʻí. Naʻe hanga ʻe Heʻene ngaahi fehuʻí ʻo ueʻi e fakakaukaú, siviʻi e moʻui ʻa ha taha, mo fai ha tukupā. Ke tokoniʻi kinautolu ʻoku tau akoʻí, te tau lava ʻo fai ha ngaahi fehuʻi te nau tokoniʻi e niʻihi kehé ke nau fakakaukau, aleaʻi mo fakaʻaongaʻi e ngaahi tefitoʻi moʻoni ʻo e ongoongoleleí.

Teuteuʻi fakalaumālie koe

Ne fēfē haʻo sio ki hono ngāue ʻaki ʻe he kau faiako leleí e ngaahi fehuʻí ke tokoniʻi e niʻihi kehé ke nau fakalaulauloto mo fakaʻaongaʻi e ongoongoleleí? ʻOkú ke ngāue ʻaki fēfē e fehuʻí he taimi ʻokú ke faiako aí?

Ko e hā e meʻa ʻoku fie maʻu ʻe he toʻu tupú ke mahino kiate kinautolu kau ki hono fai e ngaahi fehuʻi te nau tokoniʻi kinautolu ke nau hoko ai ko ha kau faiako lelei angé?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa te ne ueʻi fakalaumālie e toʻu tupu ʻokú ke akoʻí?

Mātiu 7:7–11 (‘Oku fai ʻe he Fakamoʻuí ha ngaahi fehuʻi ke tokoni kiate kitautolu ʻi hono fakaʻaongaʻi e tefitoʻi moʻoni ʻo e lotú)

Mātiu 16:13–17 (‘Oku fai ʻe he Fakamoʻuí ha ngaahi fehuʻi ne fakaafeʻi ai ʻa Pita ke ne fakamoʻoni)

Mātiu 16:24–26 (ʻOku fai ʻe he Fakamoʻuí ha ngaahi fehuʻi ʻoku toe fakatupu fakakaukau lahi ange)

ʻAlamā 5:14–30 (ʻOku ngāue ʻaki ʻe ʻAlamā e fehuʻí ke akoʻi ʻaki e kau Nīfaí)

Dieter F. Uchtdorf, “ʻOku Maʻu ʻa e Manavaʻofá ʻe he Kau Manavaʻofá,” Ensign pe Liahona, Mē 2012, 70–77

Vitiō: “Ko e Ngaahi Meʻá ʻo Hangē ko Honau Anga Moʻoní”

Ko e faiako ‘i he founga ‘a e Fakamo‘uí

Naʻe fai ʻe he Fakamoʻuí ha ngaahi fehuʻi kiate kinautolu naʻá Ne akoʻí, ‘o fakatupu ai haʻanau fakakaukau pea ongo moʻoni. Koeʻuhí ko ʻEne ʻofá, naʻa nau ongoʻi malu ʻi hono vahevahe ʻenau ngaahi fakakaukaú mo ʻenau ngaahi ongo fakatāutahá. Te ke fakatupu fēfē ha ʻātakai ʻi hoʻo kalasí ke ongoʻi fiemālie ai e toʻu tupú ke tali e ngaahi fehuʻí?

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau ako mei ha ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi e toʻu tupú ke vahevahe haʻanau aʻusia he lolotonga ʻo e uiké ʻa ia naʻe toe lahi ai e mahino ne nau maʻu ki ha meʻa ʻoku nau ako ʻo kau ki he ngaahi ʻulungaanga faka-Kalaisí.
ʻI ha uike kimuʻa he kalasí, kole ki he toʻu tupú ke nau fakatokangaʻi e ngaahi fehuʻi ʻoku fai ange ʻe heʻenau kau faiakó (ʻi he seminelí, ʻi he akó, pe ʻi he ngaahi kalasi ʻi ʻapisiasí). Kole ke nau aleaʻi ʻi he kalasí e ngaahi founga kehekehe ʻoku fakaʻaongaʻi ai ʻe heʻenau kau faiakó e fehuʻí. Ko e hā e meʻa ne nau sio ʻoku ola leleí? Ko e hā ʻoku hoko ai hono fai ha ngaahi fehuʻí ko ha konga mahuʻinga ia ʻo e akoʻí?

Ako fakataha

ʻE tokoni e ngaahi ʻekitivitī takitaha ko ʻení ke mahino ki he toʻu tupú e founga ki hono ngāue ʻaki lelei e ngaahi fehuʻí ʻi heʻenau akoʻi e niʻihi kehé. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ngāue lelei taha ki hoʻo kalasí:

Fakaafeʻi e toʻu tupu takitaha ke ne lau ha taha ʻo e ngaahi potufolofola ʻoku hiki atu he fokotuʻutuʻu ko ʻení pea feinga ke ʻilo e ngaahi fehuʻi naʻe fai ʻe he Fakamoʻuí ʻi he ngaahi potufolofola ko iá. Ko e hā naʻá Ne fai ai e ngaahi fehuʻí ni? Naʻe meimei kehe fēfē e ngaahi aʻusia fakafaiakó kapau naʻe ʻikai ke fai ʻe he Fakamoʻuí ha ngaahi fehuʻi ʻi he ngaahi tūkunga ko ʻení? Ko e hā ʻoku hoko ai hono fai e fehuʻí ko ha founga lelei ia ki hono akoʻi e niʻihi kehé? Fakaafeʻi e toʻu tupú ke nau fakakaukau ki he ngaahi faingamālie te nau lava ʻo faiako ai (ko ha faiako fakaʻapi, lea he houalotu sākalamēnití, efiafi fakafāmili ʻi ʻapí, ʻi ha ngaahi feituʻu kehe, pea mo e alā meʻa pehē). ʻE fakatupulaki fēfē ʻe he ngaahi fehuʻí ʻenau faiakó ʻi he ngaahi tūkunga ko ʻení?
Fakaafeʻi e toʻu tupú ke nau lau e ʻAlamā 5:14–30, sio he vitiō “Ko e Ngaahi Meʻá ʻo Hangē ko Honau Anga Moʻoní,” pe vakaiʻi e lea ʻa Palesiteni Dieter F. Uchtdorf “ʻOku Maʻu ʻa e ʻAloʻofá ʻe he Kau Manavaʻofá.” Kole ke nau hiki ha niʻihi ʻo e ngaahi fehuʻi naʻe ngāue ʻaki ʻe ʻAlamā, ʻEletā Petinā, pe Palesiteni ʻUkitofa ʻi heʻenau faiakó. ʻOku tokoni fēfē e ngaahi fehuʻí ni ki heʻetau akó? Fakaafeʻi e toʻu tupú ke nau fakakaukau ki ha ngaahi founga te nau ngāue ʻaki ai e ngaahi fehuʻí he taimi ʻe toe kole mai ai ke nau fai ha leá.

Kole ki he toʻu tupú ke nau vahevahe e meʻa naʻa nau ako he ʻaho ní. ʻOku mahino nai kiate kinautolu e anga hono ngāue ʻaki e fehuʻí ʻi heʻenau faiakó? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tefito ko ʻení?

Fakaafeʻi ke ngāue

ʻEke ki he toʻu tupú e meʻa ʻoku nau ongoʻi mo ueʻi ke nau faí makatuʻunga he meʻa ne nau ako he ʻaho ní. Poupouʻi ke nau ngāueʻi e ngaahi ongo ko ʻení. Fakakaukauʻi ha ngaahi founga te ke lava ʻo muimuiʻi ai.