Ko e hā ʻoku akoʻi mai ʻe he folofolá ʻo kau ki he Fakalelei ʻa Sīsū Kalaisí?

Ko e tefitoʻi taumuʻa ʻo e folofolá ke fakamoʻoniʻi ʻa Sīsū Kalaisi, pea tokoniʻi ai kitautolu ke tau haʻu kiate Ia ʻo ʻinasi ʻi Heʻene Fakaleleí. ʻI heʻetau fekumi fakamātoato ʻi he folofolá, te tau ako ai ki he Fakamoʻuí ʻo fakafou ʻi he ngaahi akonakí, ngaahi talanoá, mo e ngaahi fakataipé.

Teuteuʻi fakalaumālie koe

Ko e hā ha ngaahi potufolofola kau kia Sīsū Kalaisi ʻoku mahuʻinga kiate koe? Ko e hā ha ngaahi fakataipe ʻo Sīsū Kalaisi naʻá ke ʻilo ʻi he folofolá? Ko e hā e ngaahi potufolofola kuo tokoni ke mahino lelei ange ai kiate koe ʻa e Fakaleleí?

Naʻe ʻilo fēfē ʻe he toʻu tupu ʻokú ke akoʻí ʻa Sīsū Kalaisi ʻi he folofolá? Ko e hā ha ngaahi fakataipe ʻo Sīsū Kalaisi te ke lava ʻo tokoni ange ke nau kumi?

Ako ʻi he faʻa lotu e ngaahi potufolofolá mo e ngaahi maʻuʻanga tokoni kehe ʻa e Siasí. Ko e hā e meʻa ʻokú ke ongoʻi ke vahevahe mo e toʻu tupú?

Sēnesi 22:1–14 (Ko hono foaki ʻe ʻĒpalahame hono foha ko ʻAisaké ke feifeilaulau ʻakí ko ha fakataipe ia ʻo e feilaulau ʻa e ʻAlo ʻo e ʻOtuá; vakai, Sēkope 4:5)

2 Nīfai 11:4; Mōsese 6:63 (Ko e ngaahi meʻa kotoa pē ʻoku foaki mai ʻe he ʻOtuá ʻokú ne akoʻi mai ʻo kau ki Hono ʻAló)

Mōsaia 13:33–35 (ʻOku fakamoʻoniʻi ʻe he kau palōfita kotoa pē ʻa Sīsū Kalaisi)

Boyd K. Packer, “Ko e ʻUhinga ʻo ʻEtau ʻAmanaki Leleí,” Ensign pe Liahona, Nōvema 2014, 6–8

ʻAi ke mou fetaulaki

Lolotonga e ngaahi ʻuluaki miniti ʻo e kalasi kotoa pē, tokoni ki he toʻu tupú ke nau fakafehokotaki e ngaahi meʻa ʻoku nau ako ʻi he ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne nau aʻusia mo honau ngaahi kaungāmeʻá). Te ke lava fēfē ʻo tokoniʻi kinautolu ke nau sio ki he mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Muimuiʻi e meʻa ne ako ʻe he toʻu tupú lolotonga e Lautohi Faka-Sāpate ʻo e uike kuo ʻosí. Naʻa nau fakaʻaongaʻi fēfē e meʻa ne nau akó lolotonga e uiké?
Fakaafeʻi e toʻu tupú ke vahevahe ha potufolofola ne nau toki lau kimuí ni mai ʻo kau kia Sīsū Kalaisi pe ko ʻEne Fakaleleí.

Ako fakataha

ʻE lava e ngaahi ʻekitivitī takitaha ʻi laló ʻo tokoni ki he toʻu tupú ke nau ako e founga kumi ʻo Sīsū Kalaisi ʻi he folofolá. Muimui ki he fakahinohino ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga ki hoʻo kalasí:

Lau fakataha mo e kalasí ʻa e ʻuluaki palakalafi ʻe nima ʻo e lea ʻa Palesiteni Boyd K. Packer “Ko e ʻUhinga ʻo ʻEtau ʻAmanaki Leleí.” Fakaafeʻi ʻa e mēmipa ʻo e kalasí ke nau kumi ʻi he Fakahinohino ki he Ngaahi Folofolá ki he ngaahi tefito ʻoku kamata ʻaki ʻa e “Sīsū Kalaisí.” Fakaafeʻi kinautolu ke nau lau ha niʻihi ʻo e ngaahi potufolofola ʻoku lisi ʻi he ʻuluʻi tohí ʻoku nau manako ai pea ke nau vahevahe e meʻa ʻe lava ke nau ako fekauʻaki mo e ngaahi fatongia ʻo e Fakamoʻuí mo ʻEne Fakaleleí. Ke kau he ʻekitivitī ko ʻení, te nau lava foki ʻo ako e folofola fekauʻaki mo Sīsū Kalaisi naʻe lave ki ai ʻa Palesiteni Peeka ʻi heʻena leá.
Fakaafeʻi e toʻu tupu takitaha ke haʻu ki he kalasí mo ha potufolofola ʻokú ne manako ai kau kia Sīsū Kalaisi mo ʻEne Fakaleleí. ʻAi ke hiki ʻe he kau mēmipa ʻo e kalasí e ngaahi fakamoʻoni fakafolofolá he palakipoé, pea lau fakataha fakakalasi ia. Kole ki he toʻu tupú ke vahevahe mai hono ʻuhinga ʻoku mahuʻinga ai e ngaahi potufolofolá ni kiate kinautolú? Tokoniʻi kinautolu ke faʻu ha sēini folofola ʻaki e ngaahi potufolofola ko ʻení.
Ako fakataha ha talanoa pe meʻa naʻe hoko ʻi he folofolá ko ha tatau ia ʻo e Fakamoʻuí mo ʻEne Fakaleleí. Kapau ʻe lava pea fakaʻaliʻali ha ngaahi fakatātā ʻo e talanoá (vakai,Tohi Fakatātā ʻo e Ongoongoleleí). Fakaafeʻi e toʻu tupú ke ʻai ke nau ʻiloʻi pe ʻoku fakataipe fēfē ʻe he talanoa pe meʻa ko ia naʻe hokó e misiona ʻo e Fakamoʻuí. ʻOange ha ngaahi faingamālie ke kumi ʻe he toʻu tupú mo ha toe ngaahi talanoa kehe mei he folofolá ʻoku nau akoʻi ʻi he fakataipe ʻa e Fakalelei ʻa Sīsū Kalaisí.
Fakaafeʻi e toʻu tupú ke nau kumi ʻi he Tohi Fakatātā ʻo e Ongoongoleleí ke maʻu ha ngaahi fakatātā ʻo e ngaahi talanoa mei he folofolá ʻe lava ke fakaʻaongaʻi ki hono akoʻi ʻo e Fakaleleí. Hangē ko ʻení, ʻe lava ke fakataipe ʻe he talanoa kia Noá ʻa e founga ʻoku ʻomi ai ʻe he Fakaleleí ʻa e malu mei he lōmaki ʻo e faiangahalá. Poupouʻi kinautolu ke lau e ngaahi potufolofola ʻoku fekauʻaki mo e ngaahi fakatātā ʻoku nau maʻú (ʻoku ʻi he kamataʻanga ʻo e tohí e ngaahi maʻuʻanga tokoní) pea vahevahe e meʻa ʻoku nau ʻilo kau ki he Fakaleleí.
Fakaafeʻi e toʻu tupú ke lau ʻa e Mōsese 6:63 pea lisi e ngaah meʻa “ ʻoku ʻi he langí,” “ ʻi he funga ʻo e māmaní,” pea “ ʻi loto ʻi he māmaní” ʻoku nau fakamoʻoniʻi ʻa Sīsū Kalaisí. Tokoni ange ke nau fakaʻaongaʻi e Fakahinohino ki he Ngaahi Folofolá ke ʻiloʻi e ngaahi potufolofola ʻoku fakatatau ai ʻa Sīsū Kalaisi ki he niʻihi ʻo e ngaahi meʻa ko ʻení (hangē ko ʻení, ʻoku fakatatau ia ki ha maka ʻi he Hilamani 5:12).

Kole ki he toʻu tupú ke nau vahevahe ʻa e meʻa naʻa nau ako he ʻaho ní. ʻOku mahino nai kiate kinautolu e founga ako mei he folofolá ʻo kau kia Sīsū Kalaisi mo ʻEne Fakaleleí? Ko e hā haʻanau ngaahi ongo pe fakakaukau? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke fakamoleki ha taimi lahi ange ʻi he kaveingá ni?

Tokoni fakafaiakó

“ʻOua naʻá ke manavasiʻi he fakalongolongó. ʻOku faʻa fie maʻu ʻe he kakaí ha taimi ke nau fakakaukau mo tali ai e ngaahi fehuʻí pe fakahaaʻi e ongo ʻoku nau maʻú. Te ke lava ʻo kiʻi fakalongolongo hili haʻo fai ha fehuʻi, hili haʻo vahevahe ha meʻa [fakalaumālie] naʻá ke aʻusia, pe ʻi he taimi ʻoku faingataʻa ai ki ha taha ke fakamatalaʻi ʻene fakakaukaú” ( ʻOku ʻIkai ha Ui ʻe Mahuʻinga Ange ʻi he Faiakó [2000], 74).

Fakaafeʻi ke ngāue

Vahevahe ha faʻahinga meʻa kuó ke ako kimuí ni mai ʻi he folofolá ʻo kau kia Sīsū Kalaisi.
Fakaafeʻi e toʻu tupú ke nau vahevahe ha ngaahi ongo ne nau maʻu lolotonga e kalasí. Ko e hā te nau fai ʻi heʻenau ako fakatāutaha ʻo e folofolá ke nofo taha ange ai ʻenau tokangá ʻi he ako kia Sīsū Kalaisí? Poupouʻi kinautolu ke vahevahe e meʻa ʻoku nau ʻiló ʻi he ngaahi kalasi he kahaʻú.