Ko e hā ʻoku mahuʻinga ai hono akoʻi ʻo e ongoongoleleí ʻi he palani ʻo e fakamoʻuí?

Ke fakakakato e ngaahi taumuʻa ʻo e palani ʻo e fiefiá, ʻe fie maʻu ke ako ʻe he fānau ʻa e Tamai Hēvaní ʻa e ongoongoleleí.Ko e ʻuhinga ʻeni ʻoku fie maʻu ai ʻe he ʻOtuá ke tau takitaha akoʻi ʻa e ongoongoleleí ki hotau fāmilí, ki he kāingalotu kehe ʻo e Siasí, pea kiate kinautolu kuo teʻeki ai ke nau tali ʻa e ongoongoleleí.

Teuteuʻi fakalaumālie koe

Kuo takiekina fēfē koe ʻe ha faiako ʻo e ongoongoleleí? Ko e hā ho ivi takiekina he niʻihi ʻokú ke akoʻí?

Ko hai mo ha toe taha ʻokú ne akoʻi e toʻu tupu ʻi hoʻo kalasí? Kuo takiekina fēfē nai ʻe he kau faiakó ni e moʻui ʻa e toʻu tupú?

Ko e fē ha taimi ne maʻu ai ʻe he toʻu tupú ha ngaahi faingamālie ke faiako? Kuo nau tokoni fēfē ki he niʻihi kehé?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā e meʻa ʻokú ke ongoʻi ke vahevahe mo e toʻu tupú?

Luke 2:46–52 (Naʻe akoʻi ʻe he Fakamoʻuí e ngaahi moʻoni ʻo e ongoongoleleí ki he niʻihi kehé, ʻi Heʻene kei siʻí); sio foki he vitiō ʻo e Tohi Tapú “Young Jesus Teaches in the Temple”

2 Nīfai 2:8 (ʻOku lahi fau hono mahuʻinga ke fakahā e ngaahi meʻá ni)

T&F 43:8; 88:77–80 (ʻOku fekauʻi kitautolu ʻe he ʻEikí ke tau feakoʻiʻaki)

Vitiō: “ʻOku Tokoni e Akoʻí ki he Fakahaofi Moʻuí”

Fai hano fakafehokotaki

Lolotonga e ngaahi ʻuluaki miniti ʻo e kalasi kotoa pē, tokoni ki he toʻu tupú ke nau fakafehokotaki e ngaahi meʻa ʻoku nau ako ʻi he ngaahi ʻātakai kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne nau aʻusia mo honau ngaahi kaungāmeʻá). Te ke lava fēfē ʻo tokoniʻi kinautolu ke nau sio ki heʻene felāveʻi mo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Muimuiʻi e meʻa ne ako ʻe he toʻu tupú ʻi he Lautohi Faka-Sāpaté he uike kuo ʻosí. Ko e hā e ngaahi founga ne hokohoko atu ʻaki ʻenau akó lolotonga e uiké?
Kole ki he topu tupú ke nau talanoa ki haʻanau aʻusia ʻi hano akoʻi ange ʻe ha taha kiate kinautolu ha meʻa ʻi ha founga naʻe mahuʻingamālie. ʻE lava pē ke ke vahevahe mo ha meʻa naʻá ke aʻusia ʻe koe.
Fakaafeʻi e toʻu tupú ke nau fakamatala ki ha taimi naʻe akoʻi ai e ongoongoleleí kiate kinautolu (hangē ko ʻení, ʻi ʻapi, mo hano kaungāmeʻa, pe ʻi he lotú). Ko e hā ʻoku mahuʻinga ai ʻa e akoʻí ʻi he palani ʻa e ʻOtuá maʻa ʻEne fānaú?

Ako fakataha

ʻE lava e ngaahi ʻekitivitī takitaha ʻi laló ʻo tokoni ke mahino ki he toʻu tupú e mahuʻinga hono akoʻi ʻo e ongoongoleleí ʻi he palani ʻa e Tamai Hēvaní. Muimui ʻi he fakahinohino ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Fakaʻaliʻali ha fakatātā ʻo e Fakamoʻuí ʻokú Ne faiako ʻi he temipalé (vakai, Tohi Fakatātā ʻo e Ongoongoleleí, 34), pea fakaafeʻi e toʻu tupú ke nau lau ʻa e Luke 2:46–52 (pe huluʻi e vitiō “Young Jesus Teaches in the Temple”). Ko e hā e ongoʻi ʻa e Fakamoʻuí, neongo naʻá ne kei siʻí, fekauʻaki mo e mahuʻinga ʻo e akoʻi? Ko e hā mo ha toe meʻa ʻoku akoʻi ai kitautolu ʻe he talanoa ko ʻení fekauʻaki mo e mahuʻinga ʻo e akoʻí ʻi he palani ʻa e Tamai Hēvaní? Kole ki he toʻu tupú ke nau fakakaukauʻi pea hiki ha lisi ʻo e kotoa e ngaahi faingamālie akoʻi ʻoku nau lolotonga maʻú (poupouʻi kinautolu ke nau fakakau e ngaahi tūkunga angamahení, hangē ko e fepōtalanoaʻaki mo e ngaahi kaungāmeʻá). Fakaafeʻi e toʻu tupú ke nau fili ha meʻa mei he lisí pea fakalaulauloto ki he fehuʻi ko ʻení: “Te u tokoni fēfē ke fakahoko e palani ʻa e Tamai Hēvaní ʻi hono ngāue ʻaonga ʻaki ʻa e faingamālie akoʻi ko ʻení?” Kole ange ke nau vahevahe ʻenau ngaahi fakakaukaú.
Huluʻi e vitiō ko e “ʻOku Tokoni e Akoʻí ki he Fakahaofi Moʻuí,” pea kole ki he toʻu tupú ke nau fakakaukau ki ha kau faiako naʻa nau maʻu naʻe ola lelei ʻenau akoʻi e ongoongoleleí, kau ai e mātuʻá mo e kau mēmipa kehe ʻo e fāmilí. Vahevahe kinautolu ke nau tauhoa, pea fakaafeʻi ke nau fevahevaheʻaki e kau faiako naʻa nau fakakaukau ki aí. Ko e hā ne ola lelei ai e akoʻi ʻa e kau faiakó ni? Naʻe tokoni fēfē e kau faiakó ni ke fakahoko e palani ʻa e Tamai Hēvaní? Ko e hā ʻe lava ʻe he toʻu tupú ʻo fai ke muimui ai ʻi heʻenau ngaahi sīpingá?

Kole ki he toʻu tupú ke vahevahe e meʻa naʻa nau ako he ʻaho ní. ʻOku mahino nai kiate kinautolu e fatongia ʻo hono akoʻi ʻo e ongoongoleleí ʻi he palani ʻo e fakamoʻuí? Ko e hā haʻanau ngaahi ongo pe fakakaukau? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteliné ni?

Tokoni fakafaiakó

“Ko e meʻa ʻokú ke tokanga taha ki aí ko hono tokoniʻi e niʻihi kehé ke ako e ongoongoleleí, kae ʻikai ke ke ʻai ke nau mālieʻia ʻi hoʻo fai lēsoní. ʻOku kau heni hano ʻoange ha ngaahi faingamālie ki he kau akó ke nau feakoʻiʻaki” (ʻOku ʻIkai ha Ui ʻe Mahuʻinga Ange ʻi he Faiakó [2000], 71).

Fakaafeʻi ke ngāue

Fehuʻi ki he toʻu tupú pe ko e hā e ngaahi ongo ne nau maʻu he ʻaho ní fekauʻaki mo e akoʻí. Ko e hā ʻe lava ke nau fai ke nau ngāue ai ki he ngaahi ongo ko ʻení?
Fai hoʻo fakamoʻoní ki hono mahuʻinga ʻo e akoʻí.