ʻOku tokoniʻi fēfē au ʻe he ngaahi fekaú ke u ako ke tatau ange mo e Tamai Hēvaní?

Ko e ngaahi fekaú ko ha ngaahi fakahinohino ia mei ha Tamai Hēvani ʻofa ke tokoniʻi kitautolu ke tau hoko ʻo tatau ange mo Ia. ʻOku akoʻi mai ʻe he Tamai Hēvaní ʻi he ngaahi fekaú ʻa Hono finangalo kiate kitautolú mo fakahā mai ʻa e founga ke feʻofaʻaki aí mo ikunaʻi ʻa e tangata fakakakanó. ʻOku teuteuʻi kitautolu ʻe he talangofua ki he ngaahi fekaú ke tau foki ki he ʻao ʻo e ʻOtuá pea maʻu ʻa e moʻui taʻengatá. Ko e taimi ʻoku mahino ai kiate kitautolu ʻení, ʻoku tau lau leva e ngaahi fekaú ko ha tāpuaki kae ʻikai ko ha kavenga.

Teuteuʻi fakalaumālie koe

Kuo tupulaki fēfē e mahino kiate koe ʻa e ngaahi fekaú ʻi hoʻo moʻuí? Ko e hā ha ngaahi liliu kuó ke fakatokangaʻi ʻiate koe ʻi hoʻo feinga ke moʻui ʻaki e ngaahi fekaú?

Ko e hā ha ngaahi faingataʻa ʻoku fehangahangai mo e toʻu tupú ʻi heʻenau feinga ke tauhi e ngaahi fekaú? ʻE tāpuekina fēfē kinautolu ʻe he mahino e ngaahi taumuʻa ʻo e ngaahi fekau ʻa e ʻOtuá? Ko e hā ha meʻa te nau lava ʻo ʻilo kau ki he Tamai Hēvaní ʻi heʻenau ako ʻEne ngaahi fekaú?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻe lava ʻo tokoni ke mahino ki he toʻu tupú e ngaahi taumuʻa ʻo e ngaahi fekau ʻa e ʻOtuá?

Teutalōnome 10:12–13; T&F 82:8–10 (ʻOku tokoni e ngaahi fekaú ke mahino e finangalo ʻo e ʻOtuá kiate kitautolú)

Mātiu 22:34–40 (ʻOku fekauʻi kitautolu ke tau ʻofa)

Sione 14:15; 1 Sione 5:1–3 (ʻOku tau talangofua ki he ngaahi fekaú koeʻuhí he ʻoku tau ʻofa he ʻOtuá)

T&F 88:22 (Kuo pau ke tau moʻui ʻaki e fono fakasilesitialé ka tau maʻu e nāunau fakasilesitialé)

T&F 93:20 (Kapau ʻoku tau tauhi e ngaahi fekaú, te tau iku maʻu mei he fonu ʻo e ʻOtuá)

Dieter F. Uchtdorf, “ʻOua Naʻa Ngalo Au,” Ensign pe Liahona, Nōvema 2011, 120–23

D. Todd Christofferson, “‘Ko Kimoutolu ʻOku Ou ʻOfa aí, ʻOku Ou Valokiʻi mo Tauteaʻi,’” Ensign pe Liahona, Mē 2011, 97–100

“Talangofuá,” Tuʻu Maʻu ʻi he Tuí (2004), 185–86

Ko e faiako ‘i he founga ‘a e Fakamo‘uí

Ko e taimi naʻe fakaafeʻi ai ʻe he Fakamoʻuí ʻEne kau ākongá ke nau tauhi e ngaahi fekaú, naʻá Ne fai ia ʻi he ʻofa taʻe-mālualoi. Ko e hā ha ngaahi founga te ke lava ʻo akoʻi ai e toʻu tupú, ʻi he ʻofa, fekauʻaki mo e tauhi e ngaahi fekaú?

ʻAi ke fakafehokotaki

Vakai ki he ngaahi fakakaukau ki he akó mo e akoʻí.

Lolotonga e ngaahi fuofua miniti ʻo e kalasi kotoa pē, tokoni ke ʻai ke fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

• Fakaafeʻi ʻa e toʻu tupú ke nau kumi ha himi ʻoku fekauʻaki mo ha faʻahinga meʻa ne nau ako ki ai kimuí ni mai (fokotuʻu ange ke nau fakaʻaongaʻi ʻa e “Ngaahi Tefito” ʻi he fakahokohoko fakamotuʻa lea ʻi he konga kimui ʻo e tohi himí). Kole ange ke nau talaatu ha ʻotu lea mei he himí mo fakamatalaʻi e founga ʻoku tokoni ai ke mahino kiate kinautolu ha tefitoʻi moʻoni ʻo e ongoongoleleí.

• Fakaafeʻi e toʻu tupú ke nau fakakaukau ʻoku nau lele meʻalele atu ʻi ha hala he moʻungá, ofi ki ha lilifa loloto, ʻoku ʻi ai ha ʻā he tafaʻaki e halá. Kole ke nau aleaʻi mo ha mēmipa ʻe taha ʻo e kalasí ʻa e ongo fehuʻi ko ʻení: ʻOku tatau fēfē e ngaahi fekau ʻa e ʻEikí mo e ʻā he tafaʻakí? ʻOku nau tatau fēfē mo e halá? Fakaafeʻi ke nau fakamatalaʻi ʻenau ngaahi fakakaukaú ki he kalasí.

Ako fakataha

Vakai ki he ngaahi fakakaukau ki he akó mo e akoʻí .

ʻE tokoni ʻa e ngaahi ʻekitivitī takitaha ko ʻení ke mahino ki he toʻu tupú ʻa e anga hono tokoniʻi kitautolu ʻe he ngaahi fekaú ke tau tatau ange mo e Tamai Hēvaní. Muimui ʻi he fakahinohino ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

• Hiki ha ngaahi fakamoʻoni folofola ʻi he palakipoé, ʻe tokoni ke fakamatalaʻi e ʻuhinga ʻoku tau maʻu ai e ngaahi fekaú (kau ai kinautolu he fokotuʻutuʻu ko ʻení mo ha niʻihi te ke lava ʻo fakakaukauʻi). Lau fakakalasi e ngaahi potufolofolá, mo aleaʻi e meʻa ʻoku finangalo e Tamai Hēvaní ke tau ako mei he ngaahi fekaú. Fakaafeʻi e toʻu tupú ke nau fakaʻilongaʻi e ngaahi veesi ko ʻení ʻi heʻenau folofolá pea hiki ʻi he tafaʻakí ha fakamatala nounou ʻo e meʻa ʻoku akoʻi ange ʻe he vēsí. Fakahinohino ki he toʻu tupú e founga ke fakafekauʻaki ai e ngaahi vēsí ʻi heʻenau folofolá.

• Hiki ʻi he palakipoé “Ko e hā ne foaki mai ai ʻe he ʻOtuá e ngaahi fekaú kiate kitautolú?” Fakaafeʻi ʻa e toʻu tupú ke nau lau ʻa e Tokāteline mo e Ngaahi Fuakava 82:8–10 pea vahevahe e ngaahi tali ʻe ala maʻu ki he fehuʻí. ʻEke ki he toʻu tupú ʻa e ʻuhinga ʻoku nau pehē ai ʻoku mahuʻinga ke ʻilo e taumuʻa ʻo e ngaahi fekau ʻa e Tamai Hēvaní. Vahevahe ʻa e palakalafi ʻi he kamataʻanga ʻo e fokotuʻutuʻu ko ʻení pe lau ʻa e konga ʻoku ui ko e “Faá, ʻoua naʻa ngalo e ʻʻuhinga’ ʻo e ongoongoleleí” mei he lea ʻa Palesiteni Tietā F. ʻUkitofa ko e “ʻOua Naʻa Ngalo Au” ke hoko ko ha konga ʻo e fealēleaʻaki ko ʻení.

• Kole ki ha vaheua ʻo e kalasí ke nau lau ʻa e ʻuluaki palakalafi ʻo e lea ʻa ʻEletā D. Toti Kulisitofasoní “‘Ko Kimoutolu ʻOku Ou ʻOfa Aí, ʻOku Ou Valokiʻi mo Tauteaʻi,’” pea kole ki he vaheua ʻe tahá ke nau lau ʻa e palakalafi hono uá. Fakaafeʻi kinautolu ke nau kumi ʻi heʻenau palakalafí ha ngaahi tali ki he fehuʻí “Ko e hā kuo ʻomai ai ʻe he ʻOtuá e ngaahi fekaú kiate kitautolú?” Aleaʻi e meʻa ʻoku nau maʻú. Fakaafeʻi e toʻu tupú ke nau ʻai ha lisi ʻo e ngaahi anga ʻoku maʻu ʻe he ʻOtuá. Hili ia pea kole ange ke nau fakakaukau ki ha ngaahi fekau ʻe lava ʻo tokoni ke nau fakatupulaki e ngaahi ʻulungaanga ko iá mo nau tatau ange mo e Tamai Hēvaní.

• Kole ki he kalasí ke nau hiki ha lisi he palakipoé ʻo e Ngaahi Fekau ʻe Hongofulú (vakai, ʻEkesōtosi 20:3–17) mo ha ngaahi fekau kehe te nau lava ʻo fakakaukau ki ai. Kole ki he toʻu tupú ke nau aleaʻi tauhoa pe fakakulupu iiki ʻa e ʻuhinga ʻoku nau pehē ai naʻe ʻomi ʻe he Tamai Hēvaní e ngaahi fekau takitaha ko ʻeni kiate kinautolú. Hili ia pea fakaafeʻi ke nau lau ʻa e Mātiu 22:34–40 mo aleaʻi e founga ʻe lava ai ʻa e ngaahi fekau takitaha ʻoku ʻi he palakipoé ʻo tokoni ke tau fakatupulaki ʻetau ʻofa ki he ʻOtuá pea mo hotau kaungāʻapí.

Kole ki he toʻu tupú ke nau vahevahe e meʻa naʻa nau ako he ʻaho ní. ʻOku mahino nai kiate kinautolu e anga hono tokoniʻi kitautolu ʻe he tauhi ʻo e ngaahi fekaú ke tau hoko ʻo tatau ange mo e Tamai Hēvaní? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha toe taimi lahi ange ki he tefito ko ʻení?

Ngaahi taukei ako ʻo e ongoongoleleí

Ko hono fakafekauʻaki ʻo e ngaahi vēsí. ʻOku fakaafeʻi e toʻu tupú he ʻuluaki ʻekitivitī ʻo e konga ko ʻení ke nau fakafekauʻaki e ngaahi veesi ʻi heʻenau folofolá, pe hiki ʻi he tafaʻaki ʻo ʻenau ngaahi potufolofolá ʻa e fakamoʻoni folofola ki he ngaahi veesi kehe ʻoku nau akoʻi e ngaahi tefitoʻi moʻoni tataú. ʻE lava ʻo tokoni e taukei ako ko ʻeni ʻo e ongoongoleleí ke nau fakatokangaʻi e fekauʻaki ʻa e ngaahi fakamatala kehekehe ʻi he folofolá. Poupouʻi ʻa e toʻu tupú ke nau fai ʻeni ʻi heʻenau ako fakatāutaha ʻa e folofolá ke fakalahi e mahino ʻoku nau maʻú ki he ngaahi tefito kehe ʻo e ongoongoleleí.

Videos: “ Aleaʻi e Ngaahi Fehuʻí”

Mamata kahi ange

Fakaafeʻi ke ngāue

Vakai ki he ngaahi fakakaukau ki he akó mo e akoʻí .

Kole ki he toʻu tupú ke nau fakalaulauloto ki he meʻa naʻa nau ako he ʻaho ní. ʻOkú ne tokoniʻi fēfē ʻa e anga ʻo ʻenau fakakaukau ki he ngaahi fekau ʻa e ʻOtuá? Te ne tokoniʻi fēfē ʻa e anga ʻo ʻenau fakakaukau ki he talangofua ki he ngaahi fekaú? ʻE tokoni fēfē ia ki he ngaahi fili ʻoku nau faí? Poupouʻi ke nau hiki ʻenau ngaahi fakakaukaú ʻi ha tohinoa.