ʻE lava fēfē ʻe he Tohi ʻa Molomoná ʻo tokoniʻi au ke fakamālohia ʻeku tui ki he Fakalelei ʻa Sīsū Kalaisí?

Ko e tefitoʻi taumuʻa ʻo e Tohi ʻa Molomoná ke fakalotoa e kakai kotoa pē ko Sīsū ʻa e Kalaisí. ʻOkú ne akoʻi “kuo pau ke [tau] haʻu kiate Ia pe ʻe ʻikai fakamoʻui ʻa [kitautolu]” (1 Nīfai 13:40). ʻOku hā ai ha ngaahi sīpinga lahi ʻo ha kau ākonga faivelenga naʻe tui kia Sīsū Kalaisi pea nau maʻu e ngaahi tāpuaki ʻo ʻEne Fakaleleí. Naʻe fakamoʻoniʻi mālohi ʻe he kau palōfita ʻo e Tohi ʻa Molomoná ʻa e Fakamoʻuí, koeʻuhí ke tau “ ʻilo ki he tupuʻanga ʻa ia te [tau] lava ke sio ki ai ke maʻu ai ha fakamolemole ʻo [ʻetau] ngaahi angahalá” (2 Nīfai 25:26).

Teuteuʻi fakalaumālie koe

Kuo ʻomi fēfē koe ʻe he Tohi ʻa Molomoná ke ke ofi ange kia Sīsū Kalaisi? Ko e hā e niʻihi ʻo e ngaahi potufolofola ʻi he Tohi ʻa Molomoná kuó ne fakamālohia hoʻo fakamoʻoni ki he Fakamoʻuí?

Kuo fakamālohia fēfē nai ʻe he Tohi ʻa Molomoná e tui ʻa e toʻu tupu ʻokú ke akoʻí? Te nau lava fēfē ʻo fefakamālohiaʻaki ʻenau tui kia Sīsū Kalaisí ʻi heʻenau fakaʻaongaʻi e Tohi ʻa Molomoná?

ʻI hoʻo ako ʻi he faʻa lotu e folofolá, fakatautefito ki he Tohi ʻa Molomoná, ʻokú ke ongoʻi ko e hā e meʻa ʻe tokoni ki he toʻu tupú ke fakamālohai ʻenau tui kia Sīsū Kalaisí?

Peesi talamuʻakí mo e talateu ki he Tohi ʻa Molomoná

2 Nīfai 25:26 (ʻOku malanga e kau Nīfaí mo tohi ʻo kau kia Kalaisi ke fakamālohia e tui ʻa ʻenau fānaú)

3 Nīfai 27:13–14 (ʻOku fakamoʻoniʻi ʻe he Fakamoʻuí ki he kau Nīfai ʻa Hono misiona fakalangí)

Neil L. Andersen, “Ko e Tohi ʻa Molomoná: Ko Hono Fakamālohia ʻEtau Tui kia Sīsū Kalaisí,” Ensign pe Liahona, ʻOka. 2011, 39–45

Vitiō: “Talateu ki he Tohi ʻa Molomoná”

Ko e faiako ‘i he founga ‘a e Fakamo‘uí

Naʻe hoko ʻa Sīsū ko ha sīpinga mo ha faiako kiate kinautolu naʻá Ne akoʻí, ʻi he tūkunga hono kotoa. Naʻá Ne akoʻi kiate kinautolu ʻa e founga ʻo e lotú, akoʻí, ʻofá, mo e tokoní ʻaki ʻa ʻEne founga moʻuí. ʻE lava fēfē ke ueʻi ʻe hoʻo sīpingá e toʻu tupu ʻokú ke akoʻí? Ko e hā ha ngaahi aʻusia fakatāutaha te ke lava ʻo vahevahe ke tokoni ke ʻiloʻi ʻe he toʻu tupú e founga kuo fakamālohia ai ʻe he Tohi ʻa Molomoná hoʻo tui kia Sīsū Kalaisí?

Fai hano fakafehokotaki

Lolotonga e ngaahi ʻuluaki miniti ʻo e kalasi kotoa pē, tokoni ki he toʻu tupú ke nau fakafehokotaki e ngaahi meʻa ʻoku nau ako ʻi he ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne nau aʻusia mo honau ngaahi kaungāmeʻá). Te ke lava fēfē ʻo tokoniʻi kinautolu ke nau sio ki he mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Ko e hā ha ngaahi meʻa ne nau aʻusia ʻo ngalingali te ne fakamālohia e ngaahi meʻa ʻoku nau ako ʻo kau kia Sīsū Kalaisi mo e Fakaleleí?
ʻAi e toʻu tupú ke nau pehē pē ʻoku fehuʻi ange ʻe hanau kaungāmeʻa pe ko e kau Kalisitiane koā e kau Māmongá. Fakatukupaaʻi kinautolu ke fakaʻaongaʻi ha ngaahi potufolofola mei he Tohi ʻa Molomoná (hangē ko e ngaahi potufolofola ʻoku ʻoatu he fokotuʻutuʻu ko ʻení) ke tali ʻaki e fehuʻí ni.

Ako fakataha

ʻE lava e ngaahi ʻekitivitī takitaha ʻi laló ʻo tokoni ke mahino ki he toʻu tupú e founga ʻe lava ke fakamālohia ai ʻe he Tohi ʻa Molomoná ʻa ʻenau tui kia Sīsū Kalaisí. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻomou kalasí:

Tohiʻi he palakipoé “ ʻE lava fēfē ʻe he Tohi ʻa Molomoná ʻo tokoniʻi au ke fakamālohia ʻeku tui ki he Fakalelei ʻa Sīsū Kalaisí?” Vahevahe e kalasí ki ha fanga kiʻi kulupu iiki, pea vahe ki he kulupu takitaha ke nau lau ha konga ʻo e fakamatala ʻa ʻEletā Neil L. Andersen “Ko e Tohi ʻa Molomona: Ko Hono Fakamālohia ʻEtau Tui kia Sīsū Kalaisí.” Fakaafeʻi kinautolu ke kumi e ngaahi tali ki he fehuʻi he palakipoé. Poupouʻi e kulupu takitaha ke fakahā ʻenau talí ki he kalasí, fakataha mo ha fakamoʻoni fakafolofola mei he konga ne vahe kiate kinautolú ʻoku nau mahuʻingaʻia aí.
Huluʻi e vitiō ko e “Talateu ki he Tohi ʻa Molomona.” Fakaafeʻi e toʻu tupú ke nau ngāue tautau toko ua ke palani haʻanau foʻi vitiō nounou pē ʻanautolu ʻo vahevahe ai hono takiekina ʻe he Tohi ʻa Molomoná ʻa ʻenau fakamoʻoni ki he Fakamoʻuí mo ʻEne Fakaleleí. ʻE anga fēfē haʻanau fakamatalaʻi e Tohi ʻa Molomoná? Ko e hā e ngaahi veesi pe ngaahi talanoa te nau vahevahé? Poupouʻi kinautolu ke fakakaukauʻi ha ngaahi founga ʻe lava ke nau vahevahe ai e vitioó mo ha niʻihi kehe.
Kapau ʻe maʻu ha ngofua mei he pīsopé pea fakaafeʻi ha taha ului foʻou ke vahevahe e meʻa naʻá ne aʻusia ʻi heʻene maʻu ha fakamoʻoni ki he Tohi ʻa Molomoná. Kole ange ke ne haʻu kuó ne mateuteu ke vahevahe ha niʻihi ʻo e ngaahi potufolofola ʻoku manako taha ai ʻi he Tohi ʻa Molomoná ʻoku kau ki he Fakalelei ʻa Sīsū Kalaisí. Ne ʻomi fēfē ia ʻe he Tohi ʻa Molomoná ke ne ofi ange ki he Fakamoʻuí? Naʻá ne tokoniʻi fēfē ia ke toe mahino lelei ange Hono misioná? Fakaafeʻi e kau mēmipa ʻo e kalasí ke vahevahe ʻenau ngaahi fakamoʻoní mo e ngaahi potufolofola mei he Tohi ʻa Molomoná ʻoku nau manako taha ai kau kia Sīsū Kalaisí.
ʻAi ke fakakaukau fakataha e kalasí ki ha ngaahi sīpinga ʻo ha kakai ʻi he Tohi ʻa Molomoná naʻa nau fakatomala pea maʻu ha fakamolemole ʻo ʻenau ngaahi angahalá (hangē ko ʻAlamā ko e Siʻí, ʻĪnosi, pe Tuʻi ko Lamōnaí). Lau e niʻihi ʻo ʻenau ngaahi talanoá ʻi he Tohi ʻa Molomoná. Ko e hā ʻoku akoʻi mai ʻe he ngaahi meʻa ko ʻeni ne nau aʻusiá ʻo kau ki he Fakaleleí?

Kole ki he toʻu tupú ke vahevahe e meʻa ne nau ako he ʻaho ní. ʻOku mahino nai kiate kinautolu e founga ʻe lava ke fakamālohia ai ʻe he Tohi ʻa Molomoná ʻenau tui ki he Fakaleleí? Ko e hā e ngaahi ongo ʻoku nau maʻú? ʻOku ʻi ai nai haʻanau toe ngaahi fehuʻi kehe? ʻE ʻaonga nai ke fakamoleki ha taimi lahi ange ʻi he tefitó ni?

Tokoni fakafaiakó

“Fai hoʻo fakamoʻoní ʻi ha faʻahinga taimi pē ʻe ueʻi ai koe ʻe he Laumālié, kae ʻikai ʻi he fakaʻosinga pē ʻo e lēsoní. ʻOange ha ngaahi faingamālie kiate kinautolu ʻokú ke akoʻí ke fai ʻenau fakamoʻoní” (ʻOku ʻIkai ha Ui ʻe Mahuʻinga Ange ʻi he Faiakó [1999], 50).

Fakaafeʻi ke ngāue

Fakaafeʻi e toʻu tupú ke fakaʻaongaʻi e Tohi ʻa Molomona ke fakamālohia ʻenau tui kia Sīsū Kalaisí. ʻOange hanau faingamālie ʻi he ngaahi kalasi he kahaʻú ke vahevahe e ngaahi potufolofola ʻoku nau maʻu ʻi he Tohi ʻa Molomoná ʻa ia ʻoku nau fakamoʻoniʻi ʻa Sīsū Kalaisi mo ʻEne Fakaleleí.
Fai hoʻo fakamoʻoní ko e Tohi ʻa Molomoná ko ha fakamoʻoni ia ʻe taha ʻo Sīsū Kalaisi.