ʻE founga fēfē haʻaku tokoni ke mahino ki he niʻihi kehé ʻeku ngaahi tuʻunga moʻuí?

ʻE faʻa fehuʻi mai ʻe he kakai kehé fekauʻaki mo ʻetau ngaahi tuʻunga moʻuí. Te tau lava ʻo mateuteu ke tali ʻenau ngaahi fehuʻí mo fakamoʻoni ki he ngaahi tāpuaki ʻoku maʻu ʻi he talangofua ki he ngaahi fekau ʻa e ʻOtuá. Te tau lava ʻi he foungá ni ke hoko ko ha maama ki he māmaní.

Teuteuʻi fakalaumālie koe

Ko e hā ha ngaahi fehuʻi kuo fai atu ʻe ha niʻihi kehe fekauʻaki mo hoʻomou tuʻunga moʻuí? Kuó ke tokoniʻi fēfē ke mahino kiate kinautolu e ʻuhinga ʻokú ke moʻui fakatatau ai mo e ngaahi tuʻunga moʻui ko iá?

Ko e hā ha ngaahi tuʻunga ʻoku fehangahangai mo e toʻu tupú kuo pau ke nau fakamatalaʻi ai ʻenau tuʻunga moʻuí ki ha niʻihi kehe? Ko e hā ʻe ala faingataʻa ai ʻeni he taimi ʻe niʻihi kiate kinautolú? Ko e hā te ke lava ʻo fai ke tokoni ʻi hono teuteuʻi kinautolu ki he ngaahi tūkunga ko ʻení?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻe tokoni ke mahino ki he toʻu tupú ʻa e founga ke tali ʻaki e ngaahi fehuʻi fekauʻaki mo e ngaahi tuʻunga moʻui ʻo e Siasí?

Loma 1:16; 2 Tīmote 1:7–8; 2 Nīfai 8:7 (ʻOua naʻá ke maaʻi e ongoongolelei ʻo Sīsū Kalaisí)

1 Tīmote 4:12 (Hoko ko e faʻifaʻitakiʻanga ‘o e kakai tuí)

3 Nīfai 11:29 “Ko e laumālie ʻo e fakakikihí … ʻoku ʻo e tēvoló ia”

T&F 11:21; 84:85; 100:5–8 (ʻE tokoni e ʻEikí ke tau ʻilo e meʻa ke lea ʻakí)

Thomas S. Monson, “ʻOku ʻOmi ʻe he Teuteú ʻa e Ngaahi Tāpuakí,” Ensign pe Liahona, Mē 2010, 65.

“Talangofuá,” Tuʻu Maʻu ʻi he Tuí (2004), 185–86

Ko Hono Tali e Ngaahi Fehuʻi ʻo e Ongoongoleleí

Ko e faiako ‘i he founga ‘a e Fakamo‘uí

Naʻe ʻafioʻi ʻe he Fakamoʻuí Hono kau muimuí, meʻa ʻoku nau mahuʻingaʻia aí, pea mo ʻenau ngaahi ʻamanakí mo e fakaʻamú. Te ke lava fēfē ʻo ʻilo ʻa e toʻu tupu ʻokú ke akoʻí? ʻE tokoniʻi fēfē ʻe he meʻá ni e founga hoʻo akoʻi kinautolú?

ʻAi ke fakafehokotaki

Vakai ki he ngaahi fakakaukau ki he akó mo e akoʻí.

Lolotonga e ngaahi fuofua miniti ʻo e kalasi kotoa pē, tokoni ke ʻai ke fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

• Kole ki he toʻu tupú ke nau fakamatalaʻi ha aʻusia ne nau maʻu kimuí ni naʻá ne fakamālohia ha faʻahinga meʻa ʻoku nau ako ki ai he ongoongoleleí.

• Fakaafeʻi ʻa e toʻu tupú ke nau ʻai ha lisi ʻo ha ngaahi fehuʻi ʻoku fai ange honau ngaahi kaungāmeʻá pe kau mēmipa ʻo e fāmilí fekauʻaki mo e ngaahi tuʻunga moʻui pe ngaahi fekau ʻa e ʻEikí. Naʻe fakamatalaʻi fēfē ʻe he toʻu tupú ʻenau ngaahi tuʻunga moʻuí? Ko e hā ha meʻa ʻoku nau fakaʻamu ne kehe ʻenau fakahokó?

Ako fakataha

Vakai ki he ngaahi fakakaukau ki he akó mo e akoʻí .

ʻE tokoni ʻa e ngaahi ʻekitivitī takitaha ʻi laló ki he toʻu tupú ke nau ako e founga ke fakamatalaʻi ai ʻenau ngaahi tuʻunga moʻuí ki he niʻihi kehé. ʻI hoʻo muimui ki he ueʻi ʻa e Laumālie Māʻoniʻoní, fili ha ʻekitivitī ʻe taha pe lahi ange ʻe lelei taha ki hoʻo kalasí: Tuku ha taimi ke ako fefakamatalaʻaki ai ʻe he toʻu tupú ʻenau ngaahi tuʻunga moʻuí.

• ʻOmi ki he kalasí ha ngaahi tatau ʻo e New Era pe Liahoná. Fakaafeʻi ʻa e toʻu tupú ke nau kumi ʻi he ngaahi makasiní ni ha ngaahi talanoa ʻoku kau ki ha kakai ne nau taukaveʻi pe fakamatalaʻi ʻenau ngaahi tuʻunga moʻuí ki ha niʻihi kehe. Kole ange ke nau vahevahe e meʻa ʻoku nau ʻilo mei he ngaahi talanoa ko ʻení. (ʻI he lolotonga ʻo e uike kimuʻa pea fai e kalasí, mahalo te ke fie maʻu ke kumi ʻi ha ngaahi makasini ʻe niʻihi ʻo e Siasí ke maʻu ai ha tatau ʻo ha ngaahi fakamatala ʻoku ngali mahuʻinga moʻoni tautefito ki he toʻu tupu ʻokú ke akoʻí.) ʻOku ʻi ai nai ha ngaahi aʻusia tatau ʻa e toʻu tupú mei heʻenau moʻuí ʻe lava ke nau vahevahe? Ko e hā ʻoku nau ako mei he ngaahi aʻusia ko ʻení ʻe lava ke tokoni ʻi haʻanau fakamatalaʻi ʻenau ngaahi tuʻunga moʻuí ki he niʻihi kehé?

• Tufa ki he toʻu tupú takitaha ha tatau ʻo e lea ʻa Palesiteni Tōmasi S. Monisoni ko e “ʻOku ʻOmi ʻe he Teuteú ʻa e Ngaahi Tāpuakí.” Kole ki he kau mēmipa ʻo e kalasí ke nau vakaiʻi vave ʻa e leá, ʻo kumi ʻa e ngaahi tuʻunga moʻui ʻo e Siasí ʻokú ne fakamatalaʻí (hangē ko e teunga tāú, faitotonú, mo e Lea ʻo e Potó). Fakaafeʻi e toʻu tupu takitaha ke ne fili ha taha ʻo e ngaahi tuʻunga moʻui ko ʻení, lau e meʻa ne fakamatala ʻe Palesiteni Monisoni kau ki aí, pea vahevahe mo e kalasí e anga hono fakamatalaʻi ʻe Palesiteni Monisoni e tuʻunga moʻui ko iá mo ha toe meʻa pē ne nau maʻu ʻe lava ke nau fakaʻaongaʻi ke tokoniʻi ke mahino lelei ange ki he niʻihi kehé ʻa e tuʻunga moʻui ko ʻení.

• Kole ki he mēmipa takitaha ʻo e kalasí ke ne lau ha taha ʻo e ngaahi potufolofola ʻi he fokotuʻutuʻu ko ʻení. Fakaafeʻi e toʻu tupú ke nau kumi ha ngaahi foʻi lea mo ha ngaahi kupuʻi lea ʻoku nau fakahaaʻi e tuʻunga ʻoku totonu ke ʻi ai hotau lotó ʻi he taimi ʻoku tau fakamatalaʻi ai ʻetau ngaahi tuʻunga moʻuí ki he niʻihi kehé. Fakapapauʻi ʻoku maʻu ʻe he toʻu tupu takitaha ha tatau ʻo e Ki Hono Fakamālohia ʻo e Toʻu Tupú. Kole ange ke nau fili ha taha ʻo e ngaahi tuʻunga moʻui ʻi he kiʻi tohí, lau ia, mo palani e meʻa te nau ala lea ʻakí kapau ʻe kole ange ha kaungāmeʻa ke nau fai ha faʻahinga meʻa ʻokú ne maumauʻi ʻa e tuʻunga moʻui ko iá. ʻE founga fēfē ha tokoni ʻa e toʻu tupú ke mahino ki honau ngaahi kaungāmeʻá ʻa e ʻuhinga ʻoku nau fili ai ke moʻui fakatatau mo e ngaahi tuʻunga moʻui ʻa e ʻEikí?

• Fakaafeʻi ʻa e toʻu tupú ke nau lau ʻa e palakalafi ua ʻo e “Talangofuá” ʻi he Tuʻu Maʻu ʻi he Tuí (peesi 185–86). Te nau fakaʻaongaʻi fēfē ʻa e fakamatala ʻi he palakalafi ko ʻení ke tali ʻaki ki ha kaungāmeʻa ʻokú ne pehē ʻoku fuʻu mātuʻaki fakapōpula ʻa e ngaahi fekaú? Ko e hā ha ngaahi potufolofola, ngaahi sīpinga, pe ngaahi aʻusia fakatāutaha te nau lava ʻo vahevahe mo honau kaungāmeʻá ke tokoni ke mahino ki ai e ngaahi taumuʻa ʻo e ngaahi fekau ʻa e ʻOtuá?

Ka hili e kau ʻa e toʻu tupú ʻi ha ʻekitivitī ʻe taha pe toe lahi ange ko ʻení, ʻoange ha taimi ke nau ako fakamatalaʻi ai ʻenau ngaahi tuʻunga moʻuí. Hangē ko ʻení, te nau lava ʻo fakatātaaʻi ha ngaahi tūkunga te nau ala fehangahangai mo ia, pe te nau hiki ʻa e founga te nau lava ai ʻo tokoniʻi honau ngaahi kaungāmeʻá ke mahino ʻa e ʻuhinga ʻoku nau fili ai ke moʻui ʻaki e ngaahi tuʻunga moʻui ʻa e ʻEikí.

Kole ki he toʻu tupú ke nau vahevahe e meʻa naʻa nau ako he ʻaho ní. ʻOku nau ʻilo nai e founga ke tokoniʻi ai e niʻihi kehé ke mahino ʻenau ngaahi tuʻunga moʻuí? Ko e hā haʻanau ngaahi ongo pe fakakaukau? ʻOku ʻi ai nai haʻanau ngaahi toe fehuʻi kehe? ʻE ʻaonga nai ke toe tuku ha taimi lahi ange ki he tefito ko ʻení?

Tokoni fakafaiakó

“Ko e meʻa ʻokú ke tokanga taha ki aí ko hono tokoniʻi ʻo e niʻihi kehé ke ako e ongoongoleleí, kae ʻikai ke ke ʻai ke nau mālieʻia ʻi hoʻo fai lēsoní. ʻOku kau heni hano ʻoange ha ngaahi faingamālie ki he kau akó ke nau feakoʻiʻaki” (ʻOku ʻIkai ha Ui ʻe Mahuʻinga Ange ʻi he Faiakó [2000], 71).

Vitiō: “Tali e Fehuʻi ha Mēmipa ʻo e Kalasí”

Mamata kahi ange

Fakaafeʻi ke ngāue

Vakai ki he ngaahi fakakaukau kehe ki he akó mo e akoʻí .

Fakaafeʻi e toʻu tupú ke nau fakakaukau ki ha tuʻunga te nau fehangahangai mo ia ʻa ia kuo pau ke nau maʻu ai ha faingamālie ke fakamatalaʻi ʻenau ngaahi tuʻunga moʻuí ki he niʻihi kehé. ʻE tokoniʻi fēfē kinautolu heʻenau ngaahi aʻusia ʻi he lēsoni ʻo e ʻaho ní ke nau fakahoko lelei ʻeni?