Te u fakaʻaongaʻi fēfē ʻa e ngaahi talanoá ke akoʻi e niʻihi kehé kau ki he lakanga fakataulaʻeikí?

ʻE lava ke tokoniʻi ʻe he ngaahi talanoá ʻetau faiakó mo puke e tokanga ʻa kinautolu ʻoku tau akoʻí. ʻOku ʻomi ʻe he ngaahi talanoá kiate kitautolu ha ngaahi sīpinga māʻoniʻoni mo fakamahinoʻi ʻa e ngaahi tāpuaki ʻoku maʻu mei he muimui ʻi he ngaahi akonaki ʻa Sīsū Kalaisí. ʻOku lahi ha ngaahi talanoa ʻi he folofolá, ʻi he lea ʻa e kau palōfita moʻuí, pea mei heʻetau moʻuí, ʻe lava ke tau fakaʻaongaʻi ke akoʻi ʻaki e niʻihi kehé kau ki he lakanga fakataulaʻeikí.

Teuteuʻi fakalaumālie koe

Ko e hā ha ngaahi meʻa ne ke aʻusia kuó ne fakamālohia hoʻo fakamoʻoni ki he lakanga fakataulaʻeikí? Ko e hā ha ngaahi talanoa mei he folofolá mo e lea ʻa e kau palōfita moʻuí kuo tokoni atu ke mahino ʻa e mālohi ʻo e lakanga fakataulaʻeikí?

Ko e hā ha ngaahi aʻusia kuo maʻu ʻe he toʻu tupú mo e lakanga fakataulaʻeikí? Ko e hā ha ngaahi talanoa fekauʻaki mo e lakanga fakataulaʻeikí ʻe tokoni ke fakamālohia ʻenau ngaahi fakamoʻoní?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻe tokoni ke mahino ki he toʻu tupú ʻa e founga hono fakaʻaongaʻi ʻo e ngaahi talanoá ke akoʻi ʻaki e niʻihi kehé kau ki he lakanga fakataulaʻeikí?

Luke 10:1 (Ko hono fakanofo ʻe he Fakamoʻuí ʻa e kau fitungofulú)

Ngāue 3:1–9 (Ko hono fakamoʻui ʻe Pita ha tangata pipikí)

Ngāue 8:14–24 (Ko e feinga ʻa Simone ke maʻu ʻaki ha paʻanga e lakanga fakataulaʻeikí)

3 Nīfai 18:1–9 (Ko hono fakahoko ʻe Sīsū ʻa e sākalamēnití)

Dieter F. Uchtdorf, “Ko e Fakamātoato Moʻoní,” Ensign pe Liahona, Mē 2015, 80–83

David A. Bednar, “Ko e Ngaahi Mālohi ʻo e Langí,” Ensign pe Liahona, Mē 2012, 48–51

L. Tom Perry, “Ko e Lakanga Fakataulaʻeiki ʻo ʻĒloné,” Ensign pe Liahona, Nōvema 2010, 91–93.

Vitiō: “Sanctify Yourselves,” “A Wartime Miracle”

Ko e faiako ‘i he founga ‘a e Fakamo‘uí

Naʻe vahevahe ʻe he Fakamoʻuí ha fanga kiʻi talanoa faingofua, ngaahi tala-fakatātā, mo ha ngaahi sīpinga moʻoni ʻi he moʻuí naʻe ʻuhinga kiate kinautolu naʻá Ne akoʻí. Ko e hā ha ngaahi talanoa te ke lava ʻo vahevahe mo e toʻu tupú ke tokoni ke mahino kiate kinautolu ʻa e mālohi ʻo e lakanga fakataulaʻeikí? Ko e hā ha ngaahi talanoa ʻoku ʻilo ʻe he toʻu tupú ʻe tokoni kiate kinautolu ʻi hono akoʻi ha niʻihi kehe kau ki he lakanga fakataulaʻeikí?

Fai hano fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fai hano fakafehokotaki ʻe he toʻu tupú ʻa e ngaahi meʻa ʻoku nau ako ʻi ha ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Te ke tokoniʻi fēfeeʻi kinautolu ke nau fakatokangaʻi hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi ʻa e toʻu tupú ke nau vahevahe ʻa e founga ʻoku nau fakaʻaongaʻi ai ʻa e meʻa ʻoku nau akó ʻi heʻenau ako fakatāutahá, ako fakafāmilí, ʻi he seminelí, pe ngaahi kalasi kehe ʻi he siasí.
Kole ki he toʻu tupú ke nau vahevahe ha ngaahi meʻa ne nau aʻusia kuó ne fakamālohia ʻenau fakamoʻoni ki he lakanga fakataulaʻeikí. Fakakaukau ke ke vahevahe ha meʻa pē ʻaʻau ne ke aʻusia. Fehuʻi ki he toʻu tupú pe ko e hā ʻoku hoko ai hono vahevahe ʻo e ngaahi talanoá ko ha founga lelei ki hono akoʻi ʻo e niʻihi kehé ki he lakanga fakataulaʻeikí.

Ako fakataha

‘E tokoni ‘a e ngaahi ʻekitivitī takitaha ʻi laló ke mahino ki he toʻu tupú ‘a e founga hono fakaʻaongaʻi ʻo e ngaahi talanoá ke akoʻi e niʻihi kehé ʻo kau ki he lakanga fakataulaʻeikí. Muimui ʻi he fakahinohino ʻa e Laumālie Māʻoniʻoní, fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Fakaafeʻi ʻa e toʻu tupú ke nau fakakaukau naʻe kole ange ke nau fai ha malanga ʻi he houalotu sākalamēnití fekauʻaki mo e lakanga fakataulaʻeikí. Kole ange ke nau kumi ha talanoa ʻi he folofolá ʻokú ne akoʻi ʻo kau ki he lakanga fakataulaʻeikí ʻe lava ke nau fakakau ʻi heʻenau malangá (hangē ko e sīpinga ʻo ha fakamoʻui pe fakahoko ʻo e ngaahi ouaú). Kapau ʻe fie maʻu, te nau lava ʻo fakaʻaongaʻi ʻa e ngaahi potufolofola ʻoku fokotuʻu atu ʻi he fokotuʻutuʻu ko ʻení. Poupouʻi kinautolu ke nau fai ʻa e talanoa ʻoku nau maʻú ki he toenga ʻo e kalasí pea mo fakamatalaʻi ʻa e meʻa ʻoku akoʻi mai ʻe he talanoá fekauʻaki mo e lakanga fakataulaʻeikí mo e founga te nau fakaʻaongaʻi ai ia ʻi heʻenau malangá.
Vahe ki he toʻu tupu takitaha ke lau ha talanoa kau ki he lakanga fakataulaʻeikí mei he konifelenisi lahí (hangē ko e talanoa ki he ngaahi kolo Potekini ʻi he lea ko ia ʻa Palesiteni Tieta F. ʻUkitofa “Ko e Fakamātoato Moʻoní,” talanoa fekauʻaki mo e tamai ʻa ʻEletā Tēvita A. Petinā ʻi he lea ko ia ʻa ʻEletā Petinā “Ko e Ngaahi Mālohi ʻo e Langí,”pe ngaahi talanoa mei he fakamoʻoni ʻa ha ʻetivaisa ʻi he Lakanga Taulaʻeiki Faka-ʻĒloné ʻi he lea ʻa ʻEletā L. Tomu Peulí “Ko e Lakanga Fakataulaʻeiki ʻo ʻĒloné”). Kole ki he toʻu tupú ke nau fakamatalaʻi fakanounou ʻa e talanoa ne nau laú pea fakamatalaʻi ʻa e meʻa ʻokú ne akoʻi kau ki he lakanga fakataulaʻeikí. Ko e hā ha ngaahi faingamālie ʻe ala maʻu ʻe he toʻu tupú ke akoʻi ai ha niʻihi kehe kau ki he lakanga fakataulaʻeikí ʻo fakaʻaongaʻi ʻa e ngaahi talanoa ko ʻení?
Huluʻi ha foʻi vitiō ʻe taha pe fakatouʻosi ʻoku fokotuʻu atu ʻi he fokotuʻutuʻu ko ʻení. ʻEke ki he toʻu tupú pe ko e hā ʻoku akoʻi mai ʻe he ngaahi talanoá kau ki he lakanga fakataulaʻeikí. Fakaafeʻi ʻa e toʻu tupú ke nau vahevahe ʻa e vitioó mo ha taha ʻoku nau ʻiloʻi ʻe lava ke fakamālohia ʻe he pōpoakí. Poupouʻi kinautolu ke nau fokotuʻu mai ha ngaahi founga te nau lava ai ʻo vahevahe ʻa e foʻi vitioó mo ha kaungāmeʻa pe mēmipa ʻo e fāmilí, pea tuku ki he toʻu tupú ha faingamālie ke nau vahevahe ai ʻenau ngaahi aʻusiá ʻi ha kalasi he kahaʻú.

Kole ki he toʻu tupú ke nau vahevahe e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau?ʻOku mahino kiate kinautolu ʻa e founga te nau lava ai ʻo fakaʻaongaʻi ʻa e ngaahi talanoá ke akoʻi ʻaki ha niʻihi kehe kau ki he lakanga fakataulaʻeikí? ʻOku toe ʻi ai nai mo haʻanau ngaahi fehuʻi kehe?ʻE ʻaonga nai ke tuku ha taimi lahi ange ki he tefito ko ʻení?

Ngaahi taueki ako folofola ʻo e ongoongoleleí

Ko hono kumi ʻo e ngaahi tefitoʻi moʻoní. Ko e tefitoʻi moʻoní ko ha moʻoni taʻengata ʻokú ne tataki ʻetau ngaahi ngāué. Ko e taimi ʻe niʻihi ʻoku fakamatalaʻi mahinongofua ia ʻi he ngaahi folofolá pe ngaahi lea ʻa e kau palōfitá, pea ko e taimi ʻe niʻihi ʻoku fakahuʻuhuʻu mai ia ʻi he ngaahi talanoá pē sīpingá.ʻI he ʻuluaki ʻekitivitī ʻo e konga ko ʻení, ʻoku fakaafeʻi ai e toʻu tupú ke nau kumi ha talanoa ʻokú ne fakatātaaʻi mai e ngaahi tefitoʻi moʻoni fekauʻaki mo e lakanga fakataulaʻeikí. Tokoniʻi kinautolu ke nau feinga ke ʻiloʻi ʻa e ngaahi tefitoʻi moʻoni ko ʻení ʻaki haʻanau ʻeke ha ngaahi fehuʻi hangē ko e: “Ko e hā ʻoku ou ako mei he folofolá ʻokú ne tokoni ke mahino kiate au ʻa e tefitoʻi moʻoni ko ʻení? ʻOku ʻi ai ha meʻa heni ʻokú ne akoʻi au ke u toe hangē ange ai ko e Fakamoʻuí?” Poupouʻi kinautolu ke vakai ki ha ngaahi tefitoʻi moʻoni ʻi heʻenau ako fakatāutaha mo fakafāmili ʻa e ongoongoleleí.

Fakaafeʻi ke ngāue

ʻEke ki he toʻu tupú pe ko e hā ha meʻa kuo ueʻi kinautolu ke fai ko e tupu mei he meʻa ne nau ako he ʻaho ní. Poupouʻi kinautolu ke nau ngāueʻi e ngaahi ongo ko ʻení. Fekumi ki he Laumālié ʻi hoʻo fakakaukauʻi ʻi he faʻa lotu e founga ke ke muimuiʻi ai iá.