ʻOku tokoniʻi fēfē ʻe he tauhi ʻo e ngaahi fekaú ʻeku malava ke ako ʻa e ongoongoleleí?
ʻOku fie maʻu ʻe he ako ʻo e ongoongoleleí e ueʻi ʻa e Laumālie Māʻoniʻoní. ʻE lava ke fakamāmaʻi ʻe he Laumālie Māʻoniʻoní e mahino ʻoku tau maʻú mo fakamoʻoniʻi ʻa e ngaahi moʻoni ʻo e ongoongoleleí. Koeʻuhí ke tau taau mo Hono ivi takiekiná, kuo pau ke tau talangofua ki he ngaahi fekaú. ʻI heʻetau talangofua ki he ngaahi tefitoʻi moʻoni ʻoku tau akó, ʻoku tau teuteuʻi ai kitautolu ke maʻu ha moʻoni ʻe taha mei he ʻEikí.
Teuteuʻi fakalaumālie koe
Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻe tokoni ke mahino ki he toʻu tupú e founga ʻoku tokoniʻi ai ʻe he tauhi ʻo e ngaahi fekaú ʻenau malava ke ako e ongoongoleleí?
Taniela 1 (Naʻe tāpuekina ʻa Taniela mo hono kaungā-tangatá ʻi heʻenau talangofuá ʻaki ha poto mo ha mahino); vakai foki ki he vitiō “Naʻe Foaki ʻe he ʻOtuá ʻa e Potó Kiate Kinautolu”
Sione 7:17 (Kapau te tau fai e finangalo ʻo e ʻOtuá, te tau ʻilo ʻa e akonakí)
2 Nīfai 28:30; T&F 42:61; 50:24 (Kapau te tau tokanga ki he ʻEikí, te tau maʻu ha maama mo ha ʻilo lahi ange)
T&F 76:5–10 (ʻOku fakaʻapaʻapaʻi ʻe he ʻEikí kinautolu ʻoku tauhi kiate Iá)
Thomas S. Monson, “ʻOku ʻOmi ʻe he Teuteú ʻa e Ngaahi Tāpuakí,” Ensign mo e Liahona, Mē 2010, 65.
Henry B. Eyring, “Ko ha Fakamoʻoni Moʻui,” Ensign pe Liahona, Mē 2011, 125–28
Richard G. Scott, “Founga Hono Maʻu ʻo e Fakahā mo e Tataki Fakalaumālie Ki Hoʻo Moʻui Fakatāutahá,” Ensign pe Liahona, Mē 2012, 45–47
ʻAi ke fakafehokotaki
Lolotonga e ngaahi fuofua miniti ʻo e kalasi kotoa pē, tokoni ke ʻai ke fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:
-
Fehuʻi ki he toʻu tupú pe ʻoku ʻi ai haʻanau ngaahi fehuʻi pe fakamatala fekauʻaki mo e meʻa ʻoku nau ako ʻi heʻenau ngaahi kalasi kehé. Fakaafeʻi kinautolu ke nau fakamatalaʻi ha ngaahi aʻusia pe ngaahi ongo fakatāutaha ne nau maʻu tuʻunga ʻi heʻenau akó.
-
Hiki ʻi he palakipoé, “ʻOku tokoniʻi fēfē ʻe he talangofuá ʻeku malava ke ako ʻa e ongoongoleleí?” Tuku ki he toʻu tupú ha ngaahi miniti siʻi ke nau fakalaulauloto ai ki he fehuʻí ni, pea toki kole ange ke nau fakamatalaʻi ʻenau ngaahi fakakaukaú. Poupouʻi kinautolu ke nau kei fakakaukau pē ki he fehuʻí ʻi he lolotonga ʻo e lēsoní.
Ako fakataha
ʻE tokoni ʻa e ngaahi ʻekitivitī takitaha ʻi laló ke mahino ki he toʻu tupú e founga ʻoku tokoniʻi ai ʻe he talangofua ki he ngaahi fekaú ʻa ʻenau malava ke ako e ongoongoleleí. Muimui ʻi he fakahinohino ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:
-
ʻOange ki he kalasí ha tatau ʻo e ʻuluaki palakalafi ʻe 11 ʻo e lea ʻa Palesiteni Tōmasi S. Monisoni “Oku ʻOmi ʻe he Talangofuá ʻa e Ngaahi Tāpuakí,” pea fakaafeʻi kinautolu ke nau tohi ha fanga kiʻi sētesi ʻokú ne fakanounouʻi e tefitoʻi pōpoaki ʻa Palesiteni Monisoní. ʻI hono vahevahe mai ʻe he kalasí ʻenau sētesí, poupouʻi kinautolu ke nau vahevahe atu mo e ʻuhinga ʻoku nau ongoʻi ai ʻoku mahuʻinga e pōpoaki ni ki he toʻu tupú he ʻaho ní.
-
Lau fakakalasi ʻa e Taniela 1 pe mamata ʻi he vitiō “Naʻe Foaki ʻe he ʻOtuá ʻa e Potó Kiate Kinautolu.” Naʻe fakahaaʻi fēfē ʻe Taniela mo hono ngaahi kaungāmeʻá ʻenau talangofuá? Naʻe tāpuekina fēfē kinautolu? Ko e hā ha ngaahi tūkunga ʻoku fehangahangai mo e toʻu tupú ʻoku tatau mo ia ne hoko kia Tanielá? Fakaafeʻi ʻa e toʻu tupu takitaha ke ne laukonga fekauʻaki mo ha taha kehe ʻi he folofolá naʻe tāpuakiʻi ʻaki e ʻiló mo e mahinó koeʻuhí ko ʻene talangofuá (hangē ko Nīfai ʻi he 1 Nīfai 4 pe Siosefa Sāmita ʻi he Siosefa Sāmita—Hisitōlia 1:11–17). Kole ange ke nau hiki ha fakamatala nounou ʻo e meʻa ne nau laú pea akoʻi e toenga ʻo e kalasí ki he anga hono tāpuakiʻi e taha ne nau filí ʻaki e ʻiló tuʻunga he talangofuá.
-
Fakaafeʻi e toʻu tupu takitaha ke ne fili ha taha ʻo e ngaahi potufolofola ko ʻení: Sione 7:17; 2 Nīfai 28:30; T&F 50:24. Kole ki he toʻu tupú ke nau lau ʻenau potufolofolá pea fakalaulauloto pe ko e hā ʻokú ne akoʻi ange fekauʻaki mo e talangofuá mo e ako ʻo e ongoongoleleí. Hili ia pea fakaafeʻi kinautolu ke nau kumi ha taha ʻi he kalasí naʻá ne fili ha potufolofola kehe peá na fevahevaheʻaki e meʻa ne na akó.
-
ʻOange ki he toʻu tupú ha meʻahulu ʻoku ʻikai ngāue, pea fakaafeʻi kinautolu ke nau vakaiʻi ke fakapapauʻi e ʻuhinga ʻoku ʻikai ulo aí. Vahevahe e fakamatala ko ʻeni mei he lea ʻa ʻEletā Lisiate G. Sikoti “Founga Hono Maʻu ʻo e Fakahā mo e Tataki Fakalaumālie ki Hoʻo Moʻui Fakatāutahá”: “Kuo pau ke maʻa fakaeʻatamai mo fakaesino ha taha kae lava ke ueʻi fakalaumālie ia ʻe he ʻEikí. ʻOku falala ʻa e ʻEikí ki ha taha ʻoku talangofua ki Heʻene ngaahi fekaú. [ʻOku maʻu ʻe he taha fakafoʻituitui ko iá] ʻEne ueʻi fakalaumālié ʻo ʻilo e meʻa ke faí pea mo e mālohi fakalangí ʻo ka fie maʻu mo malava ke fai ia. … ʻOku fakapapauʻi mai ʻe heʻetau talangofuá, he taimi ko ia ʻe fie maʻu aí, te tau lava ʻo taau ke maʻu e mālohi fakalangi ke fakahoko ʻaki ha taumuʻa kuo fokotuʻu ʻi ha tataki fakalaumālie” (peesi 47). ʻOku fakatātaaʻi fēfē ʻe he meʻahulu maumaú ʻa e ngaahi tefitoʻi moʻoni ʻoku akoʻi ʻe ʻEletā Sikoti he fakamatala ko ʻení? Fakaafeʻi ʻa e toʻu tupú ke nau fakakaukauʻi ʻa e meʻa kuo pau ke nau fai ke “falala ai ʻa e ʻEikí” kiate kinautolu mo maʻu ha fakahā meiate Ia. Kole ki hanau niʻihi tokosiʻi ke nau vahevahe ʻenau ngaahi fakakaukaú.
-
Fakaafeʻi e toʻu tupú ke nau lau ha konga ʻo e lea ʻa Palesiteni Henelī B. ʻAealingí “Ko ha Fakamoʻoni Moʻui,” ʻi he palakalafi ʻoku kamata ʻaki e “[Ko ia, kuo ʻosi tō ha tenga ʻo e tuí]…” ʻo aʻu ki he palakalafi ʻoku kamataʻaki e “[Ne u ongoʻi ʻenau fiefiá ….]” Naʻe tokoni fēfē e talangofua ʻa Palesiteni ʻAealingí ki hono fakamālohia ʻene fakamoʻoní? Ko e hā ha ngaahi meʻa pau ʻe lava ke fai ʻe he toʻu tupú ke muimui ʻi he sīpinga ʻa Palesiteni ʻAealingí?
Kole ki he toʻu tupú ke nau vahevahe e meʻa naʻa nau ako he ʻaho ní. ʻOku mahino nai kiate kinautolu e founga ʻoku tokoniʻi ai ʻe he tauhi ʻo e ngaahi fekaú ʻenau malava ke ako ʻa e ongoongoleleí? Ko e hā ha ngaahi ongo pe fakakaukau ʻoku nau maʻu? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha toe taimi lahi ange ki he tefito ko ʻení?
Fakaafeʻi ke ngāue
Kole ki ha niʻihi tokosiʻi ʻo e toʻu tupú ke nau fakamatalaʻi fakanounou e meʻa ne nau ako he ʻaho ní ki he fekauʻaki ʻo e tauhi e ngaahi fekaú mo e ako ʻo e ongoongoleleí. Fakaafeʻi ke nau fakakaukauʻi ha meʻa te nau lava ʻo fai pe taʻofi ke tokoni ʻi hono fakaleleiʻi ʻa e malava ke akoʻi kinautolu ʻe he Laumālie Māʻoniʻoní. Poupouʻi kinautolu ke nau hiki ʻenau ngaahi fakakaukaú ʻi heʻenau tohinoa fakatāutahá.