ʻE lava fēfē ʻe heʻeku falala ki he ʻaloʻofa ʻa e Fakamoʻuí ʻo tokoniʻi au ke u hoko ko ha faiako lelei ange?

ʻI heʻetau ngaahi feinga ke akoʻi e ongoongoleleí, ʻe ʻi ai pē taimi te tau ongoʻi ai ʻoku tau taʻefeʻunga. Ka ʻe lava ke fakalotolahiʻi kitautolu ʻe he talaʻofa ʻa e ʻEikí “ ʻoku feʻunga ʻa ʻeku ʻofá … [ke] liliu ʻa e ngaahi meʻa vaivaí ko e mālohi” (ʻEta 12:27). ʻI heʻetau loto māʻulaló, fakahā hotau ngaahi vaivaí, pea tui kia Sīsū Kalaisí, te Ne fakamālohia kitautolu ke akoʻi ʻEne ongoongoleleí ʻi ha founga ʻoku fakahōifua kiate Ia.

Teuteuʻi fakalaumālie koe

Kuó ke maʻu fēfē ha ngaahi tali ki hoʻo ngaahi fehuʻi kau ki he ongoongoleleí? Ko e hā ha ngaahi founga ako kuo tokoni kiate koe?

Ko e hā ha ngaahi founga ako ʻoku maheni ai e toʻu tupú? ʻOku ʻi ai nai ha founga ako ʻe lava ke akoʻi ʻe ha taha ʻo e toʻu tupú ki he kalasí?

Selemaia 1:5–9; Mōsese 6:31–34 (Kau palōfita ne nau ongoʻi ʻoku ʻikai ke nau feʻunga ka ne nau maʻu ha mālohi mei he ʻEikí)

1 Kolinitō 1:27–31; T&F 1:19–23 (ʻOku malanga ʻaki ʻa e ongoongoleleí ʻe he kau vaivaí mo e kau māʻulaló)

Sēkope 4:7; ʻEta 12:23–29 (ʻOku feʻunga e ʻaloʻofa ʻa e Fakamoʻuí ke fakamālohia e loto fakatōkilaló)

ʻAlamā 17:9–11; 29:9 (ʻE lava ke tau hoko ko ha ngaahi meʻangāue ʻi he toʻukupu ʻo e ʻEikí ke ʻomi ha niʻihi kia Kalaisi)

David A. Bednar, “ʻI he Ivi ʻo e ʻOtuá,” Ensign pe Liahona, Nōv. 2004, 76–78

David M. McConkie, “Ko Hono Ako mo Akoʻi ʻo e Ongoongoleleí,” Ensign pe Liahona, Nōv. 2010, 13–15

Ko e faiako ‘i he founga ‘a e Fakamo‘uí

Naʻe teuteuʻi ʻe he Fakamoʻuí Ia ke Ne faiako ʻaki ʻEne tuku ha taimi ke Ne toko taha ai ʻo lotu mo ʻaukai pea kumi ki he tataki mei Heʻene Tamaí. Te ke lava fēfē ʻo muimui ʻi Heʻene sīpingá ʻi hoʻo teuteu ko ia ke akoʻi e toʻu tupú?

Fai hano fakafehokotaki

Lolotonga e ngaahi ʻuluaki miniti ʻo e kalasi kotoa pē, tokoni ki he toʻu tupú ke nau fakafehokotaki e ngaahi meʻa ʻoku nau ako ʻi he ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne nau aʻusia mo honau ngaahi kaungāmeʻá). Te ke lava fēfē ʻo tokoniʻi kinautolu ke nau sio ki he mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Kole ki he toʻu tupú ke vahevahe e meʻa ne nau ako ki ai ʻo kau ki he Fakaleleí pea ko e hā haʻanau ngaahi fehuʻi fekauʻaki mo e meʻa kuo nau akó.

Ako fakataha

ʻE lava e ngaahi ʻekitivitī takitaha ʻi laló ʻo poupouʻi e toʻu tupú ke nau fakafalala ki he ʻaloʻofa ʻa e Fakamoʻuí ke tokoniʻi kinautolu ke nau hoko ko ha kau faiako lelei ange. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻomou kalasí:

Kole ki he toʻu tupú ke vahevahe ha meʻa ne nau aʻusia ai ha ngāue ke fai ʻa ia naʻe hangē ʻe faingataʻa mo lōmekina ai kinautolú. Ko e hā ha ngaahi ngāue ʻe ala vahe ange he kahaʻú ʻa ia ʻe lava ke nau ongoʻi lōmekina ai? ʻAi ke lau fakataha ʻe he kalasí e ʻuluaki palakalafi ʻe 11 ʻo e lea ʻa ʻEletā David A. Bednar ko e “ʻI he Ivi ʻo e ʻOtuá,” pea kole ki he toʻu tupú ke hiki hake honau nima ʻi heʻenau fanongo pe lau ha meʻa te ne lava ʻo fakaivia pe poupouʻi kinautolu ʻi he taimi ʻoku vahe ange ai ha meʻa ke nau fai pea vahevahe e meʻa naʻa nau ʻiló mo e kalasí. Te nau lava fēfē ʻo fakaʻaongaʻi e meʻa ʻoku nau akó ki he ngaahi faingamālie ʻoku nau maʻu ke akoʻi ʻa e ongoongoleleí ki he niʻihi kehé? Fakakaukau ke vahevahe ha aʻusia fakatāutaha naʻá ke maʻu ai ha mālohi mei he ʻEikí ke fakahoko ha ngāue naʻe ngali faingataʻa.
Kimuʻa pea fai e kalasí, fakaafeʻi ha taha ʻo e toʻu tupú ʻokú ne tā ha faʻahinga meʻalea ke haʻu mo ʻene meʻaleá ki he kalasí (pe ko hano fakaʻaliʻali ha fakatātā ʻo e meʻaleá). Kole ki he toʻu tupú ke fakamatala ki he meʻa ʻokú ne fai ke fakapapauʻi ʻoku ngāue lelei ʻene meʻaleá. Fakaafeʻi e kalasí ke lau ʻa e ʻAlamā 17:9–11 pea fakamatalaʻi e founga ʻoku tatau ai hano fakaʻaongaʻi ʻe ha taha ha meʻalea mo hono fakaʻaongaʻi ʻe he ʻEikí kitautolu ko ha ngaahi meʻangāue ke akoʻi ʻEne ongoongoleleí. Ko e hā ne fai ʻe he ngaahi foha ʻo Mōsaiá ke teuteuʻi ai kinautolu ke nau hoko ko ha ngaahi meʻangāue ʻaonga ʻi he toʻukupu ʻo e ʻEikí? ʻE lava fēfē ke muimui e toʻu tupú ki heʻenau ngaahi sīpingá ʻi heʻenau akoʻí?
Fakaafeʻi e toʻu tupú ke lau e lea ʻa David M. McConkie, “Ko Hono Ako mo Akoʻi ʻo e Ongoongoleleí.” Poupouʻi kinautolu ke hiki he palakipoé ha lisi ʻo e ngaahi meʻa ʻoku talamai ʻe Misa Makongikī ʻoku mahuʻinga ʻi hono ako mo akoʻi ʻo e ongoongoleleí mo e ngaahi meʻa ʻokú ne talamai ʻoku ʻikai mahuʻingá. Poupouʻi kinautolu ke vahevahe e founga ʻoku fakatātaaʻi ʻaki ʻe he ngaahi talanoa ʻa Misa Makongikií e ngaahi meʻa mahuʻinga naʻa nau hiki he palakipoé. Fakaafeʻi e toʻu tupú ke palani ha ngaahi founga ʻe lava ke nau fakaʻaongaʻi ai e meʻa ʻoku nau ako mei he talanoá ke maʻu ha mālohi mei he ʻEikí lolotonga ʻenau akoʻi e niʻihi kehé.
Kole ki he toʻu tupú ke nau pehē pē naʻe vahe ange ʻe he pīsopé ki hanau kaungāmeʻa ke ne akoʻi ha kalasi pe fai ha lea, pea ʻoku ongoʻi ʻe honau kaungāmeʻá ʻokú ne taʻefeʻunga pea ʻikai te ne fie tali e fatongiá. ʻE poupouʻi fēfē ʻe he toʻu tupú honau kaungāmeʻá? Ko e hā ha ngaahi potufolofola te nau lava ʻo fakaʻaongaʻi ke tokoniʻi ʻaki ia? (Hangē ko ʻení, vakai ki he ngaahi potufolofola ʻoku ʻoatu he fokotuʻutuʻu ko ʻení.) Fakaafeʻi kinautolu ke nau fakafaivaʻi e ngaahi potufolofola ko ʻení ke tokoniʻi ʻaki ha taha ʻoku ʻi he tūkungá ni.

Kole ki he toʻu tupú ke vahevahe e meʻa ne nau ako he ʻaho ní. ʻOku mahino nai kiate kinautolu e founga ʻe lava ke tokoniʻi ai kinautolu ʻe he ʻaloʻofa ʻa e Fakamoʻuí ke nau hoko ko ha kau faiako lelei angé? ʻOku ʻi ai nai haʻanau toe ngaahi fehuʻi kehe? ʻE ʻaonga nai hano fakamoleki ha taimi lahi ange ʻi he tefitó ni?

Tokoni fakafaiako

“ ʻOua naʻá ke teitei manukiʻi pe fakaangaʻi ha fehuʻi pe ko ha tali, ka ke fakahaaʻi hoʻo anga fakaʻapaʻapa mo hoʻo ʻofa ʻi hoʻo tali lelei tahá. ʻI he taimi ʻoku ongoʻi ai ʻe he kakaí ʻoku fakamahuʻingaʻi ʻenau ngaahi talí, te nau vahevahe tauʻatāina mai leva ha ngaahi meʻa ne nau aʻusia, ngaahi ongo ʻoku nau maʻú, pea mo ʻenau fakamoʻoní” (ʻOku ʻIkai ha Ui ʻe Mahuʻinga Ange ʻi he Faiakó [1999], 72).

Fakaafeʻi ke ngāue

Fehuʻi ki he toʻu tupú pe ko e hā ha meʻa ʻoku ueʻi kinautolu ke fai ko e tupu mei he meʻa ne nau ako he ʻaho ní. Poupouʻi kinautolu ke nau ngāueʻi e ngaahi ongo ko ʻení. Fakakaukauʻi ʻe ngaahi founga te ke lava ke muimuiʻi ʻakí.
Fakamoʻoni ki he ivi mo e tokoni kuo foaki atu ʻe he ʻEikí ʻi hoʻo ngāue kuo vahe atu ke ke faiako aí.