Te u fakahaaʻi fēfē ʻeku ʻofá kiate kinautolu ʻoku ou akoʻí?

Naʻe ʻofa ʻa Sīsū Kalaisi ʻiate kinautolu naʻá Ne akoʻí. Naʻá Ne lotua kinautolu mo maʻu e ngaahi faingamālie ke fakahaaʻi ai ʻEne ʻofá. Te tau lava ke fakatupulaki e ʻofa kiate kinautolu ʻoku tau akoʻí ʻaki haʻatau lotua kinautolu mo ngāue taʻe siokita maʻanautolu. ʻI he taimi ʻoku ongoʻi ai ʻe he niʻihi ʻoku tau akoʻí ʻoku tau ʻofa moʻoni ʻiate kinautolú, ʻoku molū leva honau lotó, pea nau tali lelei ange e ngaahi moʻoni ʻoku tau akoʻí.

Teuteuʻi fakalaumālie koe

Kuo tākiekina fēfē koe ʻe ha faiako naʻá ne fakahaaʻi ʻene ʻofa ʻiate koé? Kuó ke fakatupulaki fēfē ha ʻofa kiate kinautolu ʻokú ke akoʻí?

Ko e hā ha ngaahi feituʻu faka-Siasi ʻe lava ke maʻu ai ʻe he toʻu tupú ha ngaahi faingamālie akoʻi? Ko e hā ha ngaahi momeniti akoʻi kehe te nau maʻu ʻi heʻenau moʻuí? ʻOku tokoniʻi fēfē e toʻu tupú ke nau hoko ko ha kau faiako lelei ange ʻi heʻenau ako ke ʻofa ʻiate kinautolu ʻoku nau akoʻí?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa te ne tokoniʻi e toʻu tupú ke mahino kiate kinautolu e mahuʻinga ke ʻofa ʻiate kinautolu ʻoku nau akoʻí?

Sione 13:34 (ʻOku totonu ke tau ʻofa he niʻihi kehé ʻo hangē ko hono ʻofaʻi kitautolu ʻe Sīsū Kalaisí)

Mōsaia 28:1–3; ʻAlamā 17:21–39; 20:21–27 (ʻOku fakahaaʻi ʻe ʻĀmoni e ʻofa ki he kau Leimana ʻokú ne akoʻí)

Molonai 7:45–46 (ʻOku tau hoko ko ha meʻa noa pē ʻi he ʻikai maʻu e ʻofá)

Thomas S. Monson, “ Ko Ha Ngaahi Sīpinga ʻo Ha Kau Faiako Maʻongoʻonga,” Ensign pe Liahona, Sune 2007, 74–80

Vitiō: “ʻOfa ʻi he Niʻihi ʻOkú ke Akoʻí”

Ko e faiako ‘i he founga ‘a e Fakamo‘uí

Naʻe ʻofa ʻa Sīsū Kalaisi ʻiate kinautolu naʻá Ne akoʻí. Naʻá Ne lotua kinautolu pea hokohoko atu ʻene tokoniʻi kinautolú. Te ke fakahaaʻi fēfē hoʻo ʻofá ki he toʻu tupu ʻokú ke akoʻí?

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau ako mei ha ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi e toʻu tupú ke nau vahevahe mo ha mēmipa ʻe taha he kalasí ha potufolofola ne nau toki lau kimuí ni ʻi heʻenau ako fakatāutahá. ʻOku ʻi ai nai haʻanau ngaahi fehuʻi kau ki he ngaahi meʻa ʻoku nau akó?
ʻEke ki he toʻu tupú pe te nau lava fēfē ke tala e taimi ʻoku ʻofa ai ha faiako ʻiate kinautolú. Ko e hā ʻoku mahuʻinga ai ke fakahaaʻi ʻe he faiakó ʻene ʻofá? Kuo fakahaaʻi nai ʻe he toʻu tupú haʻanau ʻofa ki ha taha ne nau akoʻi? Lau e Sione 13:34, pea aleaʻi e ngaahi founga ne fakahaaʻi ai e ʻofa ʻa e Fakamoʻuí kiate kinautolu naʻá Ne akoʻí.

Ako fakataha

ʻE tokoni e ngaahi ʻekitivitī takitaha ko ʻení ke mahino ki he toʻu tupú e anga hono ʻofaʻi ʻa kinautolu ʻoku nau akoʻí ʻi ha founga faka-Kalaisi. Muimui ʻi he ueʻi ʻa e Laumālié ʻo fili ha ʻekitivitiī ʻe taha pe lahi ange ʻe ngāue lelei taha ki hoʻo kalasí:

Fakaafeʻi e toʻu tupú ke lau e Molonai 7:45, kumi e ngaahi foʻi lea mo e kupuʻi lea ʻokú ne fakamatalaʻi ha taha ʻokú ne maʻu e ʻofá, mo fakamatalaʻi e ngaahi ʻulungaanga leleí ʻi he lea pē ʻanautolu (kapau ʻe fie maʻu, tokoniʻi ke nau fakaʻuhingaʻi ha faʻahinga lea foʻou). Fakaafeʻi e toʻu tupu takitaha ke ne fili ha taha ʻo e ngaahi lea pe kupuʻi leá pea fakamatalaʻi e founga ʻene fekauʻaki mo e akoʻí. Kole ke nau fakakaukau ki ha ngaahi tūkunga ʻoku nau akoʻi ai ha niʻihi kehe—ʻi ʻapisiasi mo ha ngaahi momeniti akoʻi kehe (ʻi ʻapi, he ʻapiakó, pea ʻi he moʻui fakaʻahó). Ko e fē ha ngaahi ʻulungaanga ʻi he Molonai 7:45 te nau loto ke fakatupulaki ke tokoniʻi ai kinautolu ke nau hoko ko ha kau faiako lelei angé? Fakaafeʻi ha niʻihi ʻo e toʻu tupú ke vahevahe ʻenau fakakaukaú.
Kole ki he toʻu tupú ke nau lau e konga ʻoku ui ko e “ʻOku Monūʻia Lahi Hake ʻa e Foaki Atú ʻi he Maʻu ʻa e Foaki Maí” mei he lea ʻa Palesiteni Tōmasi S. Monisoní “Ko ha Ngaahi Sīpinga ʻo ha Kau Faiako Maʻongoʻonga,” pe huluʻi e foʻi vitiō ko e “ʻOfa ʻi he Niʻihi ʻOkú ke Akoʻí.” Kole ki he toʻu tupú: Ko e hā ha meʻa ne fai ʻe he kau faiako he ngaahi sīpinga ko ʻení ke fakahaaʻi ai ʻenau ʻofa he niʻihi ne nau akoʻí? Ko e hā ha ngaahi faingamālie ʻoku maʻu ʻe he toʻu tupú ke nau fai ai e akoʻí (ʻi he feituʻu ʻo e Siasí mo ha ngaahi momeniti akoʻi kehe)? Fakaafeʻi e toʻu tupú ke nau palani ha ngaahi founga te nau lava ʻo fakahaaʻi ai ʻenau ʻofá ʻi heʻenau hoko ko ha kau faiakó. Fakaafeʻi ha niʻihi ʻo e toʻu tupú ke nau vahevahe ʻenau palaní ki he kalasí.
Fakaʻaliʻali ha fakatātā hono hanga ʻe ʻĀmoni ʻo maluʻi e fanga sipi ʻa Lamonaí (Tohi Fakatātā ʻo e Ongoongoleleí,78), pea fakaafeʻi ha mēmipa ʻo e kalasí ke ne toe fai e talanoá (vakai, ʻAlamā 17:21–39). Kole ki ha niʻihi ʻo e toʻu tupú ke nau lau e Mōsaia 28:1–3, ʻo kumi e tali ki he fehuʻi “Ko e hā e meʻa naʻá ne ueʻi ʻa ʻĀmoni mo hono ngaahi tokouá ke nau loto ke akoʻi e ongoongoleleí ki he kau Leimaná?” Kole ki he toenga ʻo e toʻu tupú ke nau lau e ʻAlamā 20:21–27, pea kumi e tali ki he fehuʻi “Ko e hā e ola e ʻofa ʻa ʻĀmoni he tamai ʻa e Tuʻi ko Lamonaí?” Fakaafeʻi ke nau vahevahe e meʻa ʻoku nau ʻiló, pea kole ke nau fakakaukau ki ha ngaahi meʻa pau te nau lava ʻo fai ke muimui ai he sīpinga ʻa ʻĀmoní.

Kole ki he toʻu tupú ke nau vahevahe e meʻa naʻa nau ako he ʻaho ní. ʻOku mahino nai kiate kinautolu e founga ke fakahaaʻi ai ʻenau ʻofá kiate kinautolu ʻoku nau akoʻí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tefito ko ʻení?

Fakaafeʻi ke ngāue

Poupouʻi e toʻu tupú ke nau fakakaukau ki he kakai ʻoku nau akoʻí. Fakaafeʻi ke nau fili ha meʻa te nau fai ke fakahaaʻi ai ʻenau ʻofa he kakai ko iá.