Toetuʻú: Te u vahevahe fēfē ʻeku fakamoʻoni ki he Toetuʻu ʻa Sīsū Kalaisí?

ʻI he Sāpate Toetuʻú, ʻoku tau fakamanatua fakataha mo e kau Kalisitiane kehé, ʻa e meʻa mahuʻinga taha naʻe hoko ʻi he hisitōlia ʻo e māmaní—ʻa e Toetuʻu ʻa Sīsū Kalaisí. Naʻá Ne motuhi ʻa e “ngaahi haʻi ʻo e maté, koeʻuhi ke ʻoua naʻa ikuna ʻa e faʻitoká, pea ke folo hifo ʻa e mamahi ʻo e maté ʻi he ngaahi ʻamanaki ki he nāunaú” (ʻAlamā 22:14). Naʻe hoko ʻEne Toetuʻú ko e tumutumu ia ʻo ʻEne feilaulau fakaleleí, ʻa ia naʻá Ne ikunaʻi ai ʻa e angahalá mo e maté maʻa e faʻahinga kotoa pē ʻo e tangatá. ʻI he taimi ʻoku tau vahevahe ai ʻetau fakamoʻoni ki he Toetuʻu ʻa e Fakamoʻuí, te tau lava ʻo tokoniʻi ʻa e niʻihi kehé ke maʻu ʻa e nongá mo e ʻamanaki leleí.

Teuteuʻi fakalaumālie koe

Ko e hā e ngaahi potufolofola pe akonaki ʻa e kau palōfita ʻo e ngaahi ʻaho kimui ní kuo nau fakamālohia hoʻo fakamoʻoni ki he Toetuʻu ʻa Sīsū Kalaisí? Kuo takiekina fēfē ʻe he fakamoʻoni ko ʻení ʻa hoʻo moʻuí? Ko e fē ha taimi kuó ke fakaʻaongaʻi ai e ngaahi potufolofola pe akonaki ko ʻení ke tokoniʻi e niʻihi kehé ke fakamālohia ʻenau fakamoʻoní?

Ko e fē ha taimi kuó ke fanongo ai ki he fakamoʻoni ʻa e toʻu tupú ki he Fakamoʻuí? Ko e hā te ke lava ʻo fai ke ueʻi fakalaumālie kinautolu ke nau vahevahe ʻenau ngaahi fakamoʻoní mo e niʻihi kehé?

Ako ʻi he faʻa lotu ʻa e ngaahi maʻuʻanga tokoni ʻi laló. Ko e hā ʻokú ke ongoʻi te ne fakalotoa e toʻu tupú ke nau fai ha fakamoʻoni ki he Toetuʻu ʻa e Fakamoʻuí?

Luke 24; Sione 20 (ʻOku toetuʻu ʻa Sīsū Kalaisi)

3 Nīfai 11:1–17 (ʻOku hā e Fakamoʻui kuo toetuʻú ki he kau Nīfaí)

T&F 76:22–24; Siosefa Sāmita—Hisitōlia 1:16–17 (Ko e fakamoʻoni ʻa Siosefa Sāmita ki he Fakamoʻui kuo toetuʻú)

Thomas S. Monson, “Kuó Ne Toe Tuʻu!” Ensign pe Liahona, Mē 2010, 87–90

D. Todd Christofferson, “Ko e Toetuʻu ʻa Sīsū Kalaisí,” Ensign pe Liahona, Mē 2014

“Ko e Kalaisi Moʻuí,” Ensign, Apr. 2000, 2–3

Ngaahi Vitioó: “Koeʻuhí ko Ia” “ʻOkú Ne Moʻui - Kātoangaʻi e Toetuʻú he ʻOku Moʻui ʻa Sīsū Kalaisi”, “The Prince of Peace: Find Lasting Peace through Jesus Christ”

Ko e faiako ‘i he founga ‘a e Fakamo‘uí

Naʻe ngāue ʻaki ʻe he Fakamoʻuí e folofolá ke faiako mo fakamoʻoni fekauʻaki mo Hono misioná. Naʻá Ne akoʻi e kakaí ke nau fakakaukau ki he folofolá pea fakaʻaongaʻi ia ke maʻu ai e tali ki heʻenau ngaahi fehuʻi ʻanautolu peé. Te ke lava fēfē o tokoniʻi ʻa e toʻu tupú ke nau ʻiloʻi ʻa e ngaahi fakamoʻoni mālohi ʻoku ʻi he folofolá?

ʻAi ke fehokotaki

Lolotonga e ngaahi fuofua miniti ʻo e kalasi kotoa pē, tokoni ke fehokotaki ʻe he toʻu tupú ʻa e ngaahi meʻa naʻa nau ako ‘i he ngaahi tūkunga kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne nau aʻusia mo honau kaungāmeʻá). Te ke tokoniʻi fēfē kinautolu ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi e toʻu tupú ke nau vahevahe ʻa e anga ʻo ʻenau fakaʻaongaʻi e meʻa ne nau ako mei he kalasí ʻi he uike kuo ʻosí ʻi he lolotonga ʻa e uiké.
Kole ki he toʻu tupú ke nau vahevahe ha meʻa ne nau aʻusia ʻi he taimi ne fakamālohia ai kinautolu ʻe ha fakamoʻoni ʻa ha taha kia Sīsū Kalaisí.

Ako fakataha

ʻE tokoni e ngaahi ʻekitivitī takitaha ʻi laló ke ueʻi fakalaumālie e toʻu tupú ke nau vahevahe ʻenau fakamoʻoni ki he Toetuʻú mo e niʻihi kehé. Muimui ki he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Huluʻi e ngaahi vitiō ʻoku ʻoatu ʻi he fokotuʻu ko ʻení, pea fakaafeʻi e toʻu tupú ke nau fevahevaheʻaki ʻenau ngaahi fakakaukau mo e ngaahi ongo kau ki he Fakamoʻuí. Poupouʻi e toʻu tupú ke vahevahe ha taha ʻo e ngaahi vitioó ni mo e kau mēmipa honau fāmilí, kaungāmeʻá mo e niʻihi kehé. ʻI ha kalasi he kahaʻú, fakaafeʻi kinautolu ke nau fakamatala fekauʻaki mo ʻenau ngaahi aʻusia ʻi hono vahevahe ʻo e ngaahi pōpoaki ko ʻení, kau ai e ngaahi tali naʻa nau maʻú.
Fakaafeʻi e toʻu tupú ke nau kumi mo vahevahe e potufolofola (hangē ko e ngaahi fokotuʻu ʻoku ʻoatu ʻi he fokotuʻutuʻu ko ʻení) ʻa ia te nau fakaʻaongaʻi ke tokoniʻi e niʻihi kehé ke fakamālohia ʻenau fakamoʻoni ki he Toetuʻu ʻa Sīsū Kalaisí. Poupouʻi e toʻu tupú ke nau hiki ha lisi ʻo e ngaahi potufolofola ʻoku vahevahe ʻi he kalasí ke nau lava ʻo toe vakai kiate kinautolu.
Fakaafeʻi e toʻu tupú ke nau lau ʻa e “Ko e Kalaisi Moʻuí” pe ko e taha ʻo e ngaahi lea ʻo e konifelenisi lahí ʻoku fokotuʻu atu ʻi he fokotuʻutuʻu ko ʻení, pea kumi ki he ngaahi fakamatala ʻoku nau ongoʻi ʻoku ʻi ai ha fakamoʻoni mālohi ki he Toetuʻu ʻa e Fakamoʻuí. Kole ange ke nau fevahevaheʻaki ʻa e fakamatala ko ia ʻoku nau maʻú pea fakamatalaʻi e ʻuhinga ʻoku mahuʻinga mālie aí. Fakaafeʻi e toʻu tupú ke nau aleaʻi e ʻuhinga ʻoku nau ongoʻi ai ʻoku mahuʻinga ke ʻi ai ha kau palōfita moʻui mo e kau ʻaposetolo ʻoku nau maʻu ʻa e fakamoʻoni ki he Toetuʻú. Fai hoʻo fakamoʻoni ki he Toetuʻú, pea fakaafeʻi e toʻu tupú ke nau fai e meʻa tatau.
ʻOange ki he toʻu tupú ha taimi ke nau hiki ha ngaahi founga ʻe tolu pe lahi ange ʻoku fakahoko ai ʻe he Toetuʻu ʻa Sīsū Kalaisí ha faikehekehe ʻi heʻenau moʻuí. Fakaafeʻi kinautolu ke nau vahevahe e meʻa kuo nau hikí. ʻOange kiate kinautolu ʻa e ngaahi tatau ʻo e lea ʻa ʻEletā D. Toti Kulisitofasoni “Ko e Toetuʻu ʻa Sīsū Kalaisí,” pea kole ange ke nau kumi ha ngaahi meʻa kehe te nau lava ʻo tānaki ki heʻenau lisí. Fakaafeʻi kinautolu ke nau fakakaukau ki ha taha ʻoku fie maʻu ke ne ʻilo ki he Toetuʻu ʻa e Fakamoʻuí, pea poupouʻi kinautolu ke nau fakapapauʻi e founga te nau fakahā ai ʻenau fakamoʻoní ki he tokotaha ko iá.

Kole ki he toʻu tupú ke nau vahevahe ʻa e meʻa naʻa nau ako he ʻaho ní. ʻOku tākiekina nai kinautolu ke vahevahe ʻenau fakamoʻoni ki he Toetuʻú mo e niʻihi kehé? Ko e hā haʻanau ngaahi ongo pe fakakaukau? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he kaveingá ni?

Fakaafeʻi ke ngāue

ʻEke ki he toʻu tupú pe ko e hā ha meʻa kuó ne ueʻi kinautolu ke fai koeʻuhí ko e meʻa ne nau ako ‘i he ʻaho ní. Poupouʻi kinautolu ke nau ngāueʻi ‘a e ngaahi ongo ko ʻení. Fakakaukauʻi ha ngaahi founga te ke lava ʻo muimuiʻi ai.