Mga Buhat 8

Pasiuna

Ang pagpanggukod batok sa Simbahan didto sa Jerusalem miresulta nga nagkatibulaag ang mga miyembro sa Simbahan sa tibuok Judea ug Samaria. Si Felipe nangalagad sa Samaria, diin daghang mga tawo ang midawat sa ebanghelyo ni Jesukristo. Human gitugyan nilang Pedro ug Juan ang gasa sa Espiritu Santo ngadto sa bag-ong mga kinabig, usa ka salamangkero nga ginganlan og Simon misulay sa pagpalit sa priesthood. Dayon ang Dios migiya ni Felipe ngadto sa usa ka opisyal nga Etiopianhon nga gitudloan ni Felipe mahitungod ni Jesukristo ug gibunyagan.

Sa kinatibuk-an niini nga leksyon mahimo kang mogamit sa Bible Maps, nu. 13, “Ang Misyonaryo nga mga Panaw ni Apostol Pablo,” ug makita ang lain-laing mga siyudad ug mga dapit nga imong nabasahan.

Mga Buhat 8:1–25

Si Felipe nangalagad sa Samaria, diin si Simon ang salamangkero misulay sa pagpalit sa priesthood

Kon nakadawat ka og dakong kantidad sa kwarta, unsa nga butang kaha ang imong paliton?

Ang ubang mga tawo naghunahuna nga bisan unsa mapalit sa kwarta. Hinoon, pipila ka bililhong mga butang sa kinabuhi dili mapalit. Samtang magtuon ka sa Mga Buhat 8, pangitaa ang usa ka gasa gikan sa Dios nga dili mapalit.

Sa Mga Buhat 7 imong makat-unan ang mahitungod sa kamatayon sa tinun-an nga si Esteban sa mga kamot sa mga tinggukod. Basaha ang Mga Buhat 8:1–5, nga mangita unsay gihimo sa mga miyembro sa Simbahan isip resulta sa pagpanggukod batok sa Simbahan sa Jerusalem. Ang pulong pagtaral sa bersikulo 3 nagpasabut nga gipugos sa pagguyod.

Timan-i ang pangalan nga Felipe sa bersikulo 5. Si Felipe mao ang usa sa pito ka mga tinun-an nga gi-orden sa pagtabang sa Napulog Duha ka mga Apostoles sa pagpangalagad sa mga panginahanglan sa Simbahan (tan-awa sa Mga Buhat 6:5).

Tan-awa ang “Kinatibuk-ang Pagpasabut sa Mga Buhat sa mga Apostoles” ang graphic anaa sa Unit 17: Leksyon sa Day 1, ug basaha ang sugo sa Manluluwas ngadto sa Iyang mga Apostoles nga narekord sa Mga Buhat 1:8. Sumala sa Mga Buhat 8:5, giunsa pagtabang ni Felipe nga matuman kining sugoa?

Basaha ang Mga Buhat 8:6–8, nga mangita kon sa unsa nga paagi ang mga Samarianhon mitubag sa pagsangyaw ni Felipe ug sa mga milagro nga iyang gihimo.

Basaha ang Mga Buhat 8:9–11, ug bantayi sa unsa nga paagi gihulagway si Simon, usa ka tawo niana nga siyudad.

Unsay impluwensya ni Simon diha sa mga tawo?

Si Elder Bruce R. McConkie sa Korum sa Napulog Duha ka mga Apostoles mipasabut sa salamangka nga maoy “paggamit sa gahum nga naangkon gikan sa panabang o pagkontrol sa dautan nga mga espiritu” (Mormon Doctrine, 2nd ed. [1966], 747).

Ang pulong nga gipahibulong, sumala sa paggamit sa Mga Buhat 8:11, nagpasabut nga natingala.

Basaha ang Mga Buhat 8:12–13, nga mangita kon sa unsang paagi si Simon mitubag sa pagsangyaw ni Felipe.

Sumala sa bersikulo 13, sa unsa nga paagi naapektahan si Simon sa “mga milagro ug mga ilhanan” nga iyang nakita?

Sa Mga Buhat 8:14–16 makat-unan nato nga si Pedro ug si Juan miadto sa Samaria human makadungog nga ang mga tawo didto midawat sa pulong sa Dios. Nag-ampo sila nga ang nakabig nga mga Samarianhon modawat sa gasa sa Espiritu Santo.

Basaha ang Mga Buhat 8:17, nga mangita kon unsay gibuhat ni Pedro ug Juan alang sa bag-ong mga miyembro sa Simbahan sa siyudad sa Samaria.

Kini nga asoy naghulagway sa mosunod nga doktrina: Ang gasa sa Espiritu Santo itugyan human sa bunyag pinaagi sa pagpandong sa mga kamot pinaagi sa gitugutan nga mga tighupot sa priesthood.

Basaha ang Mga Buhat 8:18–19, nga mangita sa gitanyag ni Simon ngadto kang Pedro.

Kon ikaw pa ang naa sa lugar ni Pedro, unsa kahay imong itubag ni Simon?

Basaha ang Mga Buhat 8:20–24, nga mangita kon unsay gitudlo ni Pedro ngadto ni Simon mahitungod sa pagdawat sa priesthood.

Ang priesthood dili mapalit og kwarta. Tungod kay ang priesthood iya sa Dios, matugyan lamang kini sumala sa Iyang kabubut-on. Ang Dios miestablisar sa paagi diin mahimong maangkon ang priesthood (tan-awa sa Mga Artikulo sa Hugot nga Pagtuo 1:5).

Sumala sa Mga Buhat 8:21–23, nganong si Simon dili pa makadawat sa priesthood? Sa unsang mga paagi sa imong hunahuna nga ang kasingkasing ni Simon “dili matarung sa atubangan sa Dios” (Mga Buhat 8:21)? Tan-awa sa Alma 41:11 para masabtan unsay gipasabut sa “mapait nga apdo” (Mga Buhat 8:23).

Kini nga asoy nagtudlo sa mosunod nga kamatuoran: Ang priesthood itugyan sumala sa kabubut-on sa Dios ug sumbanan sa katakus.

Tubaga ang mosunod nga mga pangutana diha sa imong scripture study journal:
1. Ngano sa imong hunahuna nga importante nga makahibalo nga ang priesthood itugyan lamang diha sa indibidwal sumala sa kabubut-on sa Dios ug sumbanan sa katakus?
2. Basaha ang Doktrina ug mga Pakigsaad 121:36–42. Unsa ang mga baruganan nga ang priesthood gamiton? Unsay mahitabo sa mga lalaki nga mosulay sa paggamit sa priesthood “bisan unsa nga matang sa pagkadili matarung” (D&P 121:37)?

Sa Mga Buhat 8:25 atong makat-unan nga silang Pedro ug Juan misangyaw sa ebanghelyo sa daghang mga balangay sa Samarianhon.

Mga Buhat 8:26–40

Si Felipe mitudlo ug mibunyag sa usa ka Ethiopian nga opisyal

Hunahunaa ang mga sitwasyon diin ikaw nagkinahanglan o magkinahanglan og usa ka tawo nga mogiya kanimo. Sa imong scripture study journal, ilista ang pipila ka mga sitwasyon diin ikaw mahimong giya sa usa ka tawo. (Hunahunaa ang mga destinasyon o mga hilisgutan nga imong nahibaloan o mga talento nga imong napalambo.)

Samtang magtuon ka sa nahibilin sa Mga Buhat 8, pangitaa ang importante nga paagi diin mahimo kang usa ka giya alang sa uban.

Basaha ang Mga Buhat 8:26, nga mangita kon kinsa ang nagsugo ni Felipe nga mopanaw ngadto sa Gaza. (Mahimo nimong pangitaon ang Gaza diha sa map 4, “Palestine at the Time of Jesus, sa Ang Giya ngadto sa mga Kasulatan.”)

Basaha ang Mga Buhat 8:27–28, nga mangita sa tawo nga nahimamat ni Felipe diha sa dalan.

Unsay gibuhat niining opisyal nga Etiopiahanon sa iyang karwahe? (Tingali makatabang nga makahibalo nga si Esaias mao ang Griyego nga porma sa Isaias.)

Basaha ang Mga Buhat 8:29–35, nga mangita kon unsay nahitabo tali ni Felipe ug sa opisyal nga Etiopiahanon.

Ikonsiderar ang pagmarka sa bersikulo 29 kinsa ang nag-aghat ni Felipe sa pag-adto sa karwahe sa Etiopiahanon nga opisyal. Mahimo usab nga imong markahan ang anaa sa bersikulo 31 unsay gisulti sa Etiopianhon nga opisyal nga iyang gikinahanglan aron makasabut sa mga sinulat ni Isaias. Ikonsiderar ang pagsulat sa Isaias 53:7–8 isip usa ka cross-reference sa imong kasulatan tupad sa Mga Buhat 8:32–33.

Gamita ang mga pulong nga giya, mga aghat, ug mga oportunidad sa pagkompleto sa mosunod nga baruganan nga atong makat-unan gikan sa kasinatian ni Felipe: Samtang maminaw kita ____________________ sa Dios, kita makadawat ____________________ sa pagtabang ____________________ sa uban ngadto ni Jesukristo.

Si Elder Jeffrey R. Holland sa Korum sa Napulog Duha ka mga Apostoles mitudlo mahitungod sa kaimportante sa pagtabang sa paggiya sa uban ngadto sa Manluluwas: “Alang sa matag usa nato sa ‘pagduol ngadto kang Kristo’ [D&P 20:59], sa pagtuman sa Iyang mga sugo ug pagsunod sa Iyang ehemplo balik ngadto sa Amahan sa pagkatinuod mao ang labing taas ug labing balaan nga katuyoan sa tawo. Aron sa pagtabang sa uban nga makahimo usab niana——motudlo, moawhag, ug mogiya kanila sa mainampoong paagi sa paglakaw sa dalan sa katubsanan usab——sa pagkatinuod kana siguro mao ang ikaduhang pinakamahinungdanon nga buluhaton sa atong kinabuhi. Tingali maong si Presidente David O. McKay sa makausa miingon, ‘Walay mas dako nga responsibilidad ang anaa ni bisan kinsa nga lalaki [o babaye] kay sa mahimong magtutudlo sa mga anak sa Dios’ [sa Conference Report, Okt. 1916, 57]” (“A Teacher Come from God,” Ensign, Mayo 1998, 25).

Pagpili og usa o daghan sa mosunod nga mga sitwasyon:

Sitwasyon 1: Usa ka batan-ong lalaki nga imong higala nahisakop sa laing Kristiyano nga simbahan. Usa ka adlaw atol sa tingpaniudto, naaghat ka sa pagpakigsulti niya mahitungod sa Simbahan.

Sitwasyon 2: Samtang naglakaw pauli gikan sa eskwelahan, nakakita ka og batan-ong babaye nga naghilak. Nakaila ka niya nga miyembro sa inyong ward nga wala na magsimba sulod sa daghang mga tuig. Naaghat ka sa pagpakigsulti kaniya. Samtang naningkamot ka sa paghupay niya, iyang gisulti ang iyang mga hagit ug nangutana, “Nganong dili man lang ko magmalipayon?”

Sitwasyon 3: Ang inahan sa usa ka batan-ong lalaki nga nakonektar nimo sa social media bag-o lang namatay. Naaghat kamo sa pagtubag sa mosunod sa bag-o lang niyang gi-post: “Gibati karon nga nag-inusara. Naglaum nga dunay makasabut.”

Sa imong scripture study journal, isulat unsay imong isulti ug buhaton sa pagtabang nga magiyahan kini nga tawo ngadto ni Jesukristo. Sa imong paghulagway ilakip ang mga tubag sa mosunod nga mga pangutana:
1. Unsa nga mga kamatuoran sa ebanghelyo ang imong ipakigbahin sa pagtabang og giya niini nga tawo ngadto ni Jesukristo?
2. Unsa ang usa ka kasulatan nga tingali imong madapit kini nga tawo sa pagtuon?
3. Unsay imong gusto nga ipabuhat niini nga tawo?

Basaha ang Mga Buhat 8:36–40, nga mangita unsay nahitabo isip resulta sa pagtudlo ni Felipe sa Etiopiahanon nga opisyal bahin ni Jesus.

Tubaga ang usa o daghan sa mosunod nga mga pangutana diha sa imong scripture study journal:
1. Kanus-a ug giunsa nimo pagtabang og giya ang usa ka tawo ngadto ni Jesukristo?
2. Kanus-a ug giunsa sa usa ka tawo sa pagtabang og giya nimo ngadto ni Jesukristo?

Sa imong pagsugod sa imong adlaw uban sa personal nga pag-ampo, tinguhaa ang giya sa Espiritu Santo sa pag-aghat kanimo. Dayon, samtang nanisikay-sikay ka sa imong adlaw, paminaw sa mga pag-aghat gikan sa Dios nga makatabang nimo sa paggiya sa uban ngadto ni Jesukristo.

Isulat ang mosunod sa ubos sa imong mga assignment karong adlawa diha sa imong scripture study journal:

Akong natun-an ang Mga Buhat 8 ug nahuman kini nga leksyon sa (petsa).

Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: