1 Ndipo tsopano zidachitika kuti ndidalandira kalata kuchokera kwa Amoroni, mfumu, kunena kuti ngati ndingapereke akaidi ankhondo amene ife tidawatenga kuti iyeyo adzapereka mzinda wa Antipara kwa ife.

2 Koma ndidatumiza kalata kwa mfumuyo, kuti ife tidali otsimikiza kuti ankhondo athu adali okwanira kulanda mzinda wa Antipara ndi ankhondo athuwo; ndipo pakupereka akaidi athu m’malo mwa mzinda tiyenera kudziyesa ife tokha opanda nzeru, ndipo kuti ife tidzapereka akaidi athu posinthanitsana basi.

3 Ndipo Amoroni adakana kalata yangayo, pakuti iye sadafune kusinthanitsa akaidi; kotero tidayamba kukonzekera kukamenyana ndi mzinda wa Antipara.

4 Koma anthu a Antipara adachokamo mu mzindawo, ndipo adathawira ku mizinda yawo ina, imene iwo adali nayo, kukailimbitsa; ndipo motero mzinda wa Antipara udagwera m’manja mwathu.

5 Ndipo motero chidatha chaka cha makumi awiri ndi zisanu ndi zitatu cha ulamuliro wa oweruza.

6 Ndipo zidachitika kuti kumayambiliro kwa chaka cha makumi awiri ndi chisanu ndi chinayi, tidalandira thandizo lachakudya, ndiponso chiwonjezero ku ankhondo athu, kuchokera ku dziko la Zarahemula, ndi kuchokera ku maiko ozungulira, kufikira chiwerengero cha zikwi zisanu ndi chimodzi, pamodzi ndi ana makumi asanu ndi limodzi a ana a Aamoni, amene adabwera kudzaphatikizana ndi abale awo, kagulu kanga ka zikwi ziwiri. Ndipo tsopano taona, ife tidali amphamvu, inde, tidalinso ndi chakudya chochuluka chobweretsedwa kwa ife.

7 Ndipo zidachitika kuti chidali chokhumba chathu kumenya nkhondo ndi akhondo amene adaikidwa kuti ateteze mzinda wa Kumeni.

8 Ndipo tsopano taona, ndikuonetsera iwe kuti posakhalitsa tidakwaniritsa chokhumba chathu; inde, ndi ankhondo athu amphamvu, kapena ndi gawo la ankhondo athu amphamvu, tidazungulira, mu usiku, mzinda wa Kumeni, pafupi iwo asadalandire chakudya.

9 Ndipo zidachitika kuti tidamanga misasa mozungulira mzindawo kwa mausiku ambiri; koma tidagonera pa malupanga athu, ndi kuyang’anira, kuti Alamani asabwere pa ife mu usiku ndi kutipha, zimene adayeserapo kwa nthawi zambiri; koma monga nthawi zambiri pamene iwo adayesera izi mwazi wawo udakhetsedwa.

10 Patapita nthawi zakudya zawo zidafika, ndipo iwo adali pafupi kulowa mzindawu mu usiku. Ndipo ife, m’malo mokhala Alamani, tidali Anefi; kotero, tidawatenga iwo ndi chakudya chawo.

11 Ndipo ngakhale Alamani atadulidwa ku chithandizo chawo mu njira imeneyi, iwo adali otsimikizabe kuteteza mzindawo; kotero kudakhala kofunikira kwambiri kuti ife titenge zakudyazo ndi kuzitumiza ku Yudeya, ndi akaidi ku dziko la Zarahemula.

12 Ndipo zidachitika kuti masiku ambiri sadathe Alamani asadayambe kutaya chiyembekezo chonse cha chithandizo; kotero iwo adausiya mzindawo m’manja mwathu; ndipo motero ife tidakwaniritsa zolinga zathu potenga mzinda wa Kumeni.

13 Koma zidachitika kuti akaidi athu adali ochuluka kwambiri mokuti, posatengera za kukula kwa chiwerengero chathu, tidakakamizika kugwiritsa ntchito mphamvu zathu zonse kuwasunga, kapena kungowapha.

14 Pakuti taona, iwo adathawa m’khwimbi lochuluka, ndipo adamenya ndi miyala, ndi zibonga, ndi chinthu china chilichonse chimene adapeza m’manja mwawo, kufikira kuti ife tidapha opitilira zikwi ziwiri a iwo potsatira kudzipereka kwawokha ukaidi wa nkhondo.

15 Kotero kudakhala kofunikira kwa ife, kuti tithetse miyoyo yawo, kapena kuwalondera iwo, lupanga m’manja, kupita ku dziko la Zarahemula; ndiponso chakudya chathu sichidali chokwanira kwa anthu athu, osatengera icho chimene tidatenga kuchokera kwa Alamani.

16 Ndipo tsopano, mu nyengo yovuta imeneyo, idakhala nkhani yaikulu kudziwa zokhudzana ndi akaidi ankhondowa; komabe, tidakonza zowatumiza ku dziko la Zarahemula; kotero tidasankha gawo la anthu athu, ndi kuwapatsa ulamuliro pa akaidi athuwo kuti apite ku dziko la Zarahemula.

17 Koma zidachitika kuti mawa lake adabwelera. Ndipo tsopano taona, sitidafunse iwo zokhudzana ndi akaidiwo; pakuti taona, Alamani adali pa ife, ndipo adabwelera mu nyengo yake kudzatipulumutsa ife kuti tisagwere m’manja mwawo. Pakuti taona, Amoroni adatumiza ku chithandizo chawo chakudya chatsopano komanso anthu ankhondo ochuluka.

18 Ndipo zidachitika kuti anthuwo amene ife tidatumiza ndi akaidi adafika mu nyengo yake kudzawazonda, pamene adali pafupi kutigonjetsa ife.

19 Koma taona, kagulu kanga ka zikwi ziwiri ndi makumi asanu ndi limodzi kadamenya mwaukali; inde, adali olimba pamaso pa Alamani, ndipo adapereka imfa kwa onse amene adatsutsana nawo.

20 Ndipo pamene otsalira a ankhondo athu adali pafupi kupereka mpata kwa Alamani, taona, zikwi ziwiri ndi makumi asanu ndi limodziwa adali wolimba ndi wosachita mantha.

21 Inde, ndipo iwo adamvera ndi kutsata kuchita liwu lilironse la lamulo mwa ndendende; inde, ndipo ngakhale molingana ndi chikhulupiliro chawo zidachitika kwa iwo; ndipo ndidakumbukira mawu amene iwo adanena kwa ine kuti azimayi awo adawaphunzitsa.

22 Ndipo tsopano taona, adali ana angawa, ndi anthu enawo amene adasankhidwa kuti aperekeze akaidi, kwa amene ife chipambanochi chadzera; pakuti adali iwowa amene adawamenya Alamani; kotero iwo adathamangitsidwa kubwelera ku mzinda wa Manti.

23 Ndipo ife tidatenga Kumeni mzinda wathu, ndipo tonse sitidawonongedwe ndi lupanga; komabe, tidavutika m’kutaika kwakukulu.

24 Ndipo zidachitika kuti potsatira kuthawa kwa Alamani, ndidapereka mwachangu malamulo kuti anthu anga amene adavulazidwa achotsedwe kuchokera pakati pa akufa, ndi kuchititsa kuti mabala awo asamalidwe.

25 Ndipo zidachitika kuti adalipo mazana awiri, kuchokera kwa zikwi ziwiri ndi makumi asanu ndi limodzi anga, amene adakomoka chifukwa cha kutaya mwazi; komabe, molingana ndi ubwino wa Mulungu, ndi mu kudabwitsika kwathu kwakukulu, ndiponso chisangalalo cha ankhondo onse, kudalibe munthu m’modzi wa iwo amene adawonogedwa; inde, ndipo ngakhale padalibe munthu m’modzi pakati pawo amene sadalandile mabala ambiri.

26 Ndipo tsopano, kusungidwa kwawo kudali kodabwitsa kwa ankhondo athu onse, inde, kuti iwo apulumutsidwe pamene padali chikwi cha abale athu amene adaphedwa. Ndipo ife mwachilungamo tikuziyika izo ku mphamvu yodabwitsa ya Mulungu, chifukwa cha chikhulupiliro chawo chachikulu mu icho chimene iwo adaphunzitsidwa kuti achikhulupilire—kuti kudali Mulungu wolungama, ndipo aliyense amene sadakaikire, kuti iwo atetezedwe ndi mphamvu yake yozizwitsa.

27 Tsopano ichi chidali chikhulupilro cha iwo amene ine ndayankhula; iwo ali achichepele, ndipo maganizo awo ali okhazikika, ndipo amaika chikhulupiliro chawo mwa Mulungu mosalekeza.

28 Ndipo tsopano zidachitika kuti titamaliza motere kusamalira anthu athu ovulala, ndi kukwilira akufa athu ndiponso akufa Achilamani, amene adali ambiri, taona, tidafunsa kwa Gidi zokhudzana ndi akaidi amene iwo adayamba kupita nawo ku dziko la Zarahemula.

29 Tsopano Gidi adali mkulu wa ankhondo pa gulu lomwe lidasankhidwa kuti awalondele iwo kudzikolo.

30 Ndipo tsopano, awa ndiwo mawu amene Gidi adanena kwa ine: Taona, ife tidayamba kupita ku dziko la Zarahemula ndi akaidi athu. Ndipo zidachitika kuti tidakumana ndi akazitape a ankhondo athu, amene adatumizidwa kukasunzumira ku msasa wa Alamani.

31 Ndipo iwo adafuula kwa ife, nati—Taonani, ankhondo Achilamani akugubira kufupi ndi mzinda wa Kumeni; ndipo taonani, iwo adzagwera pa iwo, inde, ndipo adzawononga anthu athu.

32 Ndipo zidachitika kuti akaidi athu adamva kufuula kwawoko, kumene kudachititsa iwo kupeza chilimbikitso; ndipo adayamba kutipandukira ife.

33 Ndipo zidachitika chifukwa cha kupandukira kwawoko ife tidachititsa kuti malupanga athu agwe pa iwo. Ndipo zidachitika kuti adathamangira pa malupanga athu muchigulu, potero, chiwerengero chambiri cha iwo chidaphedwa; ndipo otsalirawo adaphwasula ndi kuthawa kwa ife.

34 Ndipo taona, pamene iwo adathawa ndipo ife sitikadatha kuwapeza iwo, tidayamba kuguba ndi liwiro kupita ku mzinda wa Kumeni; ndipo taona, tidafika mu nthawi yake kuti tithandizire abale athu mukutetezera mzindawo.

35 Ndipo taona, tidapulumutsidwanso kuchoka m’manja mwa adani athu. Ndipo lodala ndi dzina la Mulungu wathu; pakuti taona, ndi iye amene adatipulumutsa ife; inde, amene wachita chinthu chachikuluchi kwa ife.

36 Tsopano zidachitika kuti pamene ine, Helamani, ndidamva mawu amenewa a Gidi, ndidadzadzidwa ndi chisangalalo chachikulu chifukwa cha ubwino wa Mulungu pakutiteteza ife, kuti tisawonongeke; inde, ndipo ndikukhulupilira mizimu ya iwo amene aphedwa yalowa mu mpumulo wa Mulungu wawo.