Iunite 2: Aso 2
1 Nifae 2
Folasaga
E eseese auala e tali atu ai tagata i faaaliga mai le Atua. Na poloaiina Liae e le Alii i se miti e taitai lona aiga i le vao. Na muimui Lamana ma Lemuelu i le poloaiga a le Atua ao sailia e Nifae se molimau mautinoa. O le faatusatusaina o a latou tali eseese o le a fesoasoani ia te oe e filifili ai le ala e faaaoga ai lou faitalia pe a tali atu i le faatonuga a le Alii.
1 Nifae 2:1–7
Ua poloaiina Liae e le Atua e malaga ese atu i le vao
Manatu faapea o oe o Liae ma ua tau atu e le Alii ia te oe ma lou aiga e tuua lou aiga ma meatotino uma. O le a outou savavali mo ni aso ma e mafai ona ave na o ni meaai e manaomia e lou aiga. Mafaufau pe o le a faapefea ona e tali atu i sea ituaiga faatonuga.
Faitau 1 Nifae 2:1–6, ma vaavaai mo le tulaga na oo i ai Liae ma lona aiga ao malaga ese atu i le vao.
Aisea na latou “saili ai e aveese le ola [o Liae]”? (Tagai 1 Nifae 2:1).
O le a le mea na poloaiina e le Alii Liae e fai? (Tagai 1 Nifae 2:2).
O Liae o se faataitaiga o le mataupu faavae o le talalelei faapea pe a tatou faatuatua ma usiusitai, o le a fesoasoani le Alii ia i tatou i taimi o tofotofoga.
-
Tali le fesili lenei i lau api talaaga mo le suesueina o tusitusiga paia e uiga i le 1 Nifae 2:4: O le a se mea e mafai ona e aoao mai filifiliga a Liae i mea e ave ma mea e tuu?
Ina ia fesoasoani e te malamalama atili ai i le tulaga o le malaga a Liae, iloilo le faafanua i le faaiuga o le lesona.
Faitau 1 Nifae 2:7, ma tusi le mea na fai e Liae ina ua tuua ma lona aiga ae malaga atu i le vao. O le a se upu e te ono faaaogaina e faamatala ai se uiga taua na faaalia e Liae?
1 Nifae 2:8–14
Ua muimui Lamana ma Lemuelu i lo la tama
O atalii uma e toafa o Liae na o i le malaga lava lea e tasi, ae na latou faia ma ni uiga faaalia eseese i poloaiga a le Atua.
Suesue 1 Nifae 2:8–10, ma lio upu vaitafe ma le vanu.
-
Faitau le 1 Nifae 2:11–14, ma saili mafuaaga na muimui ai Lamana ma Lemuelu i lo la tama. (Manatua: O le upu ua maaa o lona uiga o le lotomalo ma le faamaualuga.)
O le tasi mafuaaga e faamalosia ai e Satani le muimui ina ia taofia tagata mai le mulimuli i perofeta soifua, taitai musuia, ma matua. Na saunoa Elder H. Ross Workman o le Fitugafulu e uiga i le muimui. Fai mai a ia o le “muimui e aofia ai sitepu e tolu, e tofu tau atu i le isi i se ala e faaifoifo ifo i le lē usitai.”
Muamua, pe a muimui tagata, e faaaoga e i latou a latou lava faaiuga ma amata ona fesiligia aoaoga a perofeta soifua. “Latou te [fesili] muamua i o latou mafaufau ona latou [totoina] lea o fesili i mafaufau o isi.”
Lona lua, ua amata ona latou “faia ni fetuunaiga ma ni ’alofaga mai le le faia o le mea [na] faatonuina ai i latou e fai. … Ona na latou [faia] ai lea o se ’alofaga mo lo latou le usiusitai.
“Na sosoo mai ai ma le laasaga lona tolu: O le faatamala e mulimuli i poloaiga a le Matai [tagai MF&F 58:29]. …
“Ou te valaaulia oe e manatunatu loloto i poloaiga mai perofeta soifua o loo sili ona e atugalu ai. E te fesiligia pe faatatau lena poloaiga ia te oe? O e maua ni ‘alofaga e le mafai ai ona e usitai nei i le poloaiga? Pe e te lagona le le fiafia ia i latou e faamanatu atu ia oe le poloaiga? Po o e faatamala ea i le tausiaina? Faaeteete i mailei a le fili. Faaeteete i le muimui” (“Faaeteete i le Muimui,” Liahona, Ian., 2002, 98–100).
-
1 Nifae 2:16–19
Na saili atu Nifae mo le malamalama mai le Alii
Faitau le 1 Nifae 2:16, 19, ma faailoga le mea na manao ai Nifae ma le mea na ia faia na taitaia ai o ia e talia poloaiga a le Alii mai lona tama. E ui lava e lei muimui Nifae, mafaufau loloto i le mea na ia tusia i le 1 Nifae 2:16 i le faamaluluina e le Alii o lona loto e tau mai ai o le tuua o Ierusalema atonu na faigata foi mo ia.
-
O le mea na oo i ai Nifae ua aoaoina ai i tatou i le mataupu faavae lenei: Pe a tatou valaau i le Atua, e mafai ona Ia faamaluluina o tatou loto ia talitonu i Ana upu.
Faitau le 1 Nifae 2:17–18, ma faailoa mai manaoga ma mea na fai e Nifae ina ua faamaluluina lona loto e le Alii. Mafaufau i mea e mafai ona e aoao mai le eseesega o uiga na faaalia e Nifae, Sama, Lamana, ma Lemuelu. O le upu moni taua lenei e tasi: Pe a tatou faasoa atu mea na tatou aoaoina e ala i le Agaga Paia, e mafai ona talitonu isi ia tatou upu.
-
Mafaufau i se tasi e mafai ona e faasoa i ai se mea na fesoasoani le Agaga e te aoaoina ma lagonaina le moni. Atonu o se uo, se tasi o lou aiga, se taitai o le Ekalesia, po o se faiaoga. Faaaoga le avanoa i lenei vaiaso e talanoa ai ma lena tagata ma faasoa i ai lena molimau.
1 Nifae 2:20–24
Na faamautinoa e le Alii i a Nifae o le a faamanuiaina o ia i lona usiusitai
Faailoa ma faailoga le folafolaga i le 1 Nifae 2:20–21. O lenei folafolaga e 34 taimi o taua ai i le Tusi a Mamona. I lau suesuega o le Tusi a Mamona, o le a e vaaia le faataunuuina atoa o afioga a le Alii ia Nifae. Faaiu le lesona nei i le faitauina o le 1 Nifae 2:22–24.
E faamanuiaina e le Atua i latou e usiusitai ma faatuatua.Mafaufau loloto i le tulaga o loo i ai lou usiusitai i le tausia o poloaiga a le Atua. O le a se isi auala e faateleina ai lou usiusitai? Mulimuli i uunaiga e te maua mai le Agaga.
-
Ua ou suesueina le 1 Nifae 2 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: