Iunite 29: Aso 4
Eteru 3
Folasaga
Sa fetalai mai le Alii i le uso o Iareto, “O le a se mea tou te mananao ia ou faia ina ia outou maua se malamalama i totonu o o outou vaa?” (Eteru 2:23). O le tali atu, sa saunia ma le faaeteete e le uso o Iareto ni tamai maa e 16 ma tatalo faamaulalo ina ia pai atu le Alii ia i latou “ina ia susulu atu i le pogisa” (Eteru 3:4). Ona o le malosi o le faatuatua o le uso o Iareto, sa ia vaai i le tamatamaiaao o le Faaola ao pai atu le Faaola i maa. Ona faaali mai lea o le Alii o Ia Lava i le uso o Iareto ma poloaiina o ia e tusi mea sa ia vaaia ma faalogo i ai.
Eteru 3:1–20
Sa pai atu le Alii i maa ina ia maua le malamalama mo vaa a sa Iareto, ma sa Ia faaalia o Ia Lava i le uso o Iareto
O a nisi faataitaiga o mea sa e tatalo faamaoni i ai po o isi foi tagata talavou? Filifili se tasi o mea nei, ma tusi iinei:
A o e suesue i le faataitaiga o le uso o Iareto i le Eteru 3, tagai mo ni tala o le a fesoasoani ia te oe po o se uo ina ia maua le fesoasoani mai le Alii.
Mafaufau i le tatalo a le uso o Iareto i le Alii e uiga i le tuuina mai o le malamalama mo vaa ma le tali a le Alii ia te ia. Toe iloilo le Eteru 2:22–3:1. Ona tusi lea o se faaupuga mo ata taitasi nei lea e faamatalaina le mea sa faia e le uso o Iareto e avea o sana vaega i le foiaina o le faafitauli o le le maua o se malamalama.
-
Tusi i totonu o lau api talaaga mo le suesueina o tusitusiga paia le mea e faagaeetia ai oe e uiga i taumafaiga a le uso o Iareto i le mauaina o le malamalama i totonu o vaa. E ui lava sa tele taumafaiga sa oo i ai le uso o Iareto, mafaufau po o le a le lelei o ana maa mu i le maua ai o se malamalama e aunoa ma le fesoasoani a le Alii.
Faitau le Eteru 3:2–5, ona fai lea o le mea lenei:
-
Faailoa mai ma maka fuaitau o loo faaalia mai ai sa lotomaualalo le uso o Iareto ma sa iloa lona faalagolago atu i le Atua. Atonu e aoga le iloa o le fuaitau “o o matou natura ua matou leaga ai pea e le aunoa” o loo faasino lea i lo tatou tulaga agasala i le fogaeleele. Ona o le Pau o Atamu, ua aveesea mai ai i tatou faaletino mai le Atua. Ua feagai foi i tatou ma le agasala. A aunoa ma se fesoasoani faalelagi, e le mafai ona tatou toe foi atu i le afioaga o le Atua.
-
Faailoa mai po o le a le mea sa talosaga atu le uso o Iareto i le Alii e fai.
-
Faailoa mai pe faailoga le mea sa molimau le uso o Iareto na te iloa e uiga i le Atua.
-
-
O le a se faamaoniga e mafai ona e maua i le Eteru 3:1–5 sa faatuatua le uso o Iareto e mafai ona fesoasoani le Alii ia te Ia e foia Lana faafitauli?
-
E faapefea ona fesoasoani lana faataitaiga ia te oe ia iloa ai lou faalagolago atu i le Alii ao e ole atu mo Lana fesoasoani?
-
Faitau le faamatalaga lenei mai ia Elder Jeffrey R. Holland o le Korama a Aposetolo e Toasefululua, lea e faamamafa mai ai le faatuatua o le uso o Iareto: “E moni e lagona e le Atua, faapea ma le tagata faitau, se mea matua mataina lava i le tulaga le sala faatamaitiiti ma le naunautaiga o le faatuatua o lenei tamalii. ‘Faauta, Le Alii e, e mafai ona e faia lenei mea’ [Eteru 3:5]. Masalo e le o toe i ai se laina e tasi ma le malosi o le faatuatua na talanoaina e alii i tusitusiga paia. … Po o le a lava le le mautonu o le perofeta e uiga i lona lava tomai, e leai sona le mautonu e uiga i le mana o le Atua” (“Rending the Veil of Unbelief,” in Nurturing Faith through the Book of Mormon: The 24th Annual Sidney B. Sperry Symposium [1995], 12).
Faitau le Eteru 3:6, ma mafaufau pe o le a se tulaga semanu e oo i ai e pei o le tulaga na faamatalaina i lenei mau.
Faitau le Eteru 3:9, ma vaavaai mo le mafuaaga na finagalo ai le Alii e pai atu i maa ma pe aisea na mafai ai ona vaai le uso o Iareto i le tamatamaiaao o le Alii.
Faamaea le faamatalaga o le mataupu faavae lenei e tusa ai ma mea ua uma ona e aoaoina seia oo mai i le taimi lenei i le Eteru 3: A o tatou valaau atu ma le faamaualalo i le Alii, o le a Ia tali mai ia i tatou e tusa ai ma o tatou ma Lona finagalo.
-
-
Faasino i le mea sa e tusia i le amataga o lenei lesona e uiga i le mea sa e tatalo ai po o isi tagata talavou. E faapefea ona faaalia e se tasi le faatuatua i le Alii ao ia sailia le fesoasoani ma le taitaiga a le Alii i lea tulaga?
-
O le a se mea sa tupu i lou olaga na taitai atu ai oe ina ia iloa le moni o le mataupu faavae afai tatou te valaau faamaulalo atu i le Alii, o le a Ia tali mai ia i tatou e tusa ai mo lo tatou faatuatua ma Lona finagalo?
-
Faaaoga sina taimi ma iloilo ma le filemu po o le a le tele o lou faatuatua i le Alii. Faitau le Eteru 3:9–12, ma tagai ma faailoga mea e faamaonia ai le faatuatua sa i ai o le uso o Iareto i le Alii.
Toe iloilo le Eteru 3:11, ma mafaufau pe ua lava lou faatuatua i le Alii e tautino atu ai ina ia talitonu ma mulimuli i le mea o le a Ia faaalia ia te oe e oo lava i le taimi ae Na te lei faaalia mai.
Faitau le faamatalaga lenei mai ia Elder Jeffrey R. Holland, ma vase lalo o le mea e tatau ona tatou faia e faatino ai le faatuatua e pei o le uso o Iareto: “O le faatuatua sauniuni e maua mai i aafiaga ua tuanai—ua iloaina, e saunia se faavae mo le talitonuga. Ae o le faatuatua faaola e tatau ona masani ona faatinoina agai i aafiaga i le lumanai—e le iloaina, lea e saunia se avanoa mo vavega. … O le faatuatua e pei o le uso o Iareto, e muamua i le vavega ma le malamalama. E tatau ona ia talitonu ao lei fetalai mai le Atua. E tatau ona ia galue ao lei manino mai le tomai e faamaea ai lena galuega. E tatau ona ia muai tautino atu i le aafiaga atoa e oo lava i le vaega muamua o lona iloaina. O le faatuatua o le malie lea i ai ma le atoatoa—ma i se taimi i luma mai—i soo se tulaga e ono manaomia e le Atua i le lumanai lata mai ma mamao” (Christ and the New Covenant: The Messianic Message of the Book of Mormon [1997], 18–19).
Mafaufau e uiga i aafiaga o le uso o Iareto, e amata mai i le Olo o Papelu. O a ni aafiaga atonu na fesoasoani e faateleina ai lona faatuatua i le Alii? O le a sou manatu i le ala na saunia ai o ia e nei aafiaga e faatino “se faatuatua tele faapea” (Eteru 3:9) i lena taimi?
-
-
O le a se aafiaga i lou olaga na faateleina ai lou faatuatua i le Alii?
-
Na faapefea ona saunia oe e lena aafiaga ina ia faaaoga le faatuatua sili atu i le lumanai?
-
Faitau le Eteru 3:13–20, ma tagatagai mo le faamanuiaga na maua e le uso o Iareto ona o lona faatuatua. O le a se mea na aoaoina e le uso o Iareto e uiga i le Faaola mai lenei aafiaga ofoofogia? O se isi mataupu faavae taua e mafai ona e aoaoina mai le Eteru 3 o le mea lenei: A o tatou faatino le faatuatua i le Alii, o le a tatou latalata atili ia te Ia. Atonu e te manao e tusi lenei mataupu faavae i totonu o au tusitusiga paia i talaane o le Eteru 3:11–20.
Na tuuina mai e Elder Jeffrey R. Holland ni ona manatu faaalia i le Eteru 3:15–16 ma le le mautonu e ono tulai ae mai lena aafiaga:
“[O se] mataupu lea e manaomia ai se manatu faaalia puupuu e pogai mai le fetalaiga a le Alii ‘E lei sau lava i ou luma se tagata ma se faatuatua tele faapea e pei ona e sau; aua a na le faapea po ua le mafai ona e vaai i lou tamatamailima.’ Ma mulimuli ane, ‘Ou te lei faaalia au lava i se tagata o se na ou foafoaina, ona e leai se tagata sa talitonu mai ia te au e pei ona e talitonu mai.’ [Eteru 3:9, 15.]
“O le faamoemoega mo le le mautonu iinei e sau mai le iloaina o le toatele (ma masalo o tagata uma) o perofeta autu na soifua i luma atu o le uso o Iareto sa vaai i le Atua. O le a faapefea la ona tatou faamatalaina le fetalaiga a le Alii? …
“O lenei mataupu ua faatele ona talanoaina e tusitala a le Au Paia o Aso e Gata Ai, ma e tele isi faamatalaga e ono i ai, soo se faamatalaga e tasi—po o faamatalaga uma lava—e mafai ona aumaia le malamalama i le upumoni sili ona tele o lenei fuaitau. Ae ui i lea, a aunoa ma se faaaliga faaopoopo po o se faamalamalamaga i le mataupu, soo se matematega lava ua pau lava lena ma e le lava ma e le o atoa. …
“O nisi e talitonu o le uiga o le fetalaiga a le Alii e lei faaalia lava ia muamua i se tagata i le tulaga lena po o le sili atu. O lenei manatu o loo fautua mai o le faaali mai o tagata paia i perofeta na muamua atu e lei i ai lena ‘atoatoa,’ e lei aveeseina ai lava muamua le ufimata ina ia tuuina mai se faaaliga atoa o le natura ma le tulaga o Keriso. …
“O se faamalamalamaga mulimuli—ma e tusa ai ma le faatuatua o le uso o Iareto le finau malosi silisili—o lenei, na fai atu Keriso i le uso o Iareto, ‘Ou te lei faaalia au lava i se tagatai lenei uiga, e aunoa ma la’u filifiliga, e uunaia tau lava o le faatuatua o le vaai.’ Ona o se tulafono, o perofeta e valaaulia i le mafutaga a le Alii, e poloaiina e ulufale i lana mafutaga e ia lava ia ma na o lana lava pule. O le uso o Iareto, i le isi itu, na foliga mai na faamalosia ia lava ia i le ufimata, e le o se malo le amanaia ae masalo o le mea moni lava o se malo e lei valaaulia. Na fetalai mai Ieova, ‘E lei sau lava i ou luma se tagata ma se faatuatua tele faapea e pei ona e sau; aua a na le faapea po ua le mafai ona e vaai i lou tamatamailima. … e leai se tagata sa talitonu mai ia te au e pei ona e talitonu mai.’ E manino lava na faafesootaia e le Alii le faatuatua maoae ma lenei faaaliga maoae. Afai ana le tulaga ese le faaaliga, o lona uiga la o le faatuatua ma o le ala na maua ai le faaaliga lena na matua lemafaamatalaina lava.Pau lava le ala e mafai ona matuai mataina ai le faatuatua o lona malosiaga lea na ave ai le perofeta, e lei valaaulia, i le mea na mafai ona o i ai isi tagata i le na o le poloaiina mai le Atua e mafai ai” (Christ and the New Covenant, 20–23).
Eteru 3:21–28
Ua poloaiina e le Alii le uso o Iareto e tusi ia mea sa ia vaai i ai ma ia faamaufaailogaina i lana talafaamaumau
Faitau le Eteru 3:25–26, ma faailoa mai po o a isi mea sa faaali e le Alii i le uso o Iareto. E pei ona faamaumauina i le Eteru 3:21–24, 27–28, sa poloaiina e le Alii le uso o Iareto e tusi ia mea sa faaali atu ia te ia i se faaaliga ma ia faamaufaailogaina. Sa fetalai atu foi le Alii o le a Ia saunia se ala mo tusitusiga a le uso o Iareto ina ia faaliliuina i le lumanai. O se tasi o auala na faataunuuina ai lenei valoaga o le taimi lea na faaliliuina ai e le Perofeta o Iosefa Samita le tusi a Eteru mai papatusi auro o se vaega o le Tusi a Mamona ma faia ia maua e tagata uma le talafaamaumau a sa Iareto e faitau i ai.
Mafaufau loloto pe mafai faapefea ona e faaaogaina mea sa e aoaoina i le aso ma po o le a le mea e mafai ona e faia e faailoa atu ai lou faatuatua i le Alii. Ao e faatinoina le faatuatua ia Iesu Keriso, o le a liligi ifo e le Atua faamanuiaga i ou luga, e pei ona Ia faia i le uso o Iareto.
-
Ua ou suesueina le Eteru 3 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: