Iunite 1: Aso 2

O Le Ata o le Faaolataga

Folasaga

Ua saunia e lo tatou Tama Faalelagi mo i tatou, Lana fanau, se fuafuaga ua faamoemoe e taitaia i tatou i le fiafia faavavau ma le faaeaga. E totonugalemu i Lana fuafuaga le Togiola a Iesu Keriso. E faatoilalo e le Togiola aafiaga o le Pau ma mafai ai e i tatou ona salamo ma faamamaina mai a tatou agasala ina ia tatou maua le olioli i lenei olaga ma le faavavau.

O le a tuuina atu e lenei lesona se otootoga puupuu o le ata o le faaolataga a le Tama Faalelagi. O le a mafai ona fesoasoani e te iloa ai pe faapefea e upumoni o le talalelei o le a e aoaoina i lenei tausaga ona fesootai ma isi ma lou faamoemoega i le lalolagi. Ao faateleina lou malamalama i le ata o le faaolataga, o le a faateleina lou faatuatua i le Atua ma Lona Alo, o Iesu Keriso, faapena foi ma lou mafaia ona faataunuu lau vaega o le fuafuaga. O le ata o le faaolataga o “le atoatoaga o le talalelei a Iesu Keriso, sa fuafuaina e aumaia le tino ola pea ma le ola e faavavau o le tagata. E aofia ai le Foafoaga, Pau, ma le Togiola, faatasi ai ma tulafono uma faale-Atua, sauniga, ma aoaoga faavae. O lenei fuafuaga ua mafai ai ona faaeaina tagata uma ma ola faavavau ai ma le Atua” (Taiala i Tsuitusiga Paia, “Fuafuaga o le Togiola,” scriptures.lds.org).

E Fesoasoani le Fuafuaga Tatou te Malamalama ai i lo Tatou Faamoemoega i le Olaga Nei

O le ata o le faaolataga a lo tatou Tama Faalelagi e talia le tele o fesili na mafaufauina e le tele o tagata i nisi taimi i o latou olaga. Pe na e mafaufauina ea ni fesili e pei o: “O fea na ou sau ai?” “Aisea ua ou i ai iinei?”“O fea ou te alu i ai pe a uma lenei olaga?”

Ae tatou te lei fananau mai i le lalolagi, sa tatou nonofo i le afioaga o lo tatou Tama Faalelagi o Ana fanau agaga.O i tatou o Ana fanau moni lava, ma e alofa o Ia ia i tatou. O Lana ata o le faaolataga o le ala mo i tatou taitoatasi e avea ai faapei o Ia ma olioli i Ana faamanuiaga uma lava. Na tatou malamalama ma taliaina Lana fuafuaga ae tatou te lei o mai i le lalolagi.

O le Tusi a Mamona o loo faia se vaega taua i lo tatou malamalama i le ata o le faaolataga. Na faaaogaina e perofeta o le Tusi a Mamona faaupuga eseese e faamatala ai le fuafuaga.

1. Faitau mau nei, ma faailoa mai igoa ua faaaogaina mo le fuafuaga a le Tama Faalelagi i fuaiupu taitasi. Tusi i lau api talaaga mo le suesueina o tusitusiga paia, le igoa i autafa o le mau fesootai. O le igoa muamua ua faailoaina mo oe.

   1. 2 Nifae 9:6— “O le fuafuaga alofa mutimutivale a le Foafoa silisiliese”

   2. 2 Nifae 11:5

   3. Alema 12:25

   4. Alema 24:14

   5. Alema 42:8.

   6. Alema 42:15

O upu e pei o le alofa mutimutivale, laveaiina, faaolaina, fiafia, ma le togiolaina ua faamamafaina le aoaoga faavae o le fuafuaga a le Tama Faalelagi ua fuafuaina e aumaia i Lana fanau le faaolataga faavavau ma le fiafia.

Api Talaaga mo le Suesueina o Tusitusiga Paia

I lou aafiaga i lau suesuega i le aiga o le a e maua ai le avanoa e tali ai fesili ma faasoa ou manatu i lou faiaoga i se api talaaga mo le suesueina o tusitusiga paia. O le faamaumauina o ou mafaufauga ma lagona, e faapea foi le tusiaina o tali i fesili mai le tusi lesona, e mafai ona valaaulia faaaliga e fesoasoani e te malamalama ai i mau faapitoa. Ave lau api o talaaga mo le suesueina o tusitusiga paia i lau vasega faale-vaiaso ina ia e saunia e talanoaina mea na e aoaoina ma faaali i lou faiaoga galuega na e faia.

2. Tali le fesili lenei, i lau api o talaaga mo le suesueina o tusitusiga paia: E faapefea ona faia se eseesega i lou olaga i le iloaina o loo i ai se fuafuaga a le Tama Faalelagi mo lou fiafia ma le faaeaga?

O le Matafaioi a le Faitalia ma le Pau o Atamu ma Eva i le Ata o le Faaolataga

O Atamu ma Eva o fanau muamua a le Tama Faalelagi na o mai i lenei lalolagi. Na Ia tuuina i laua i le Faatoaga o Etena ma tuu atu ia i laua lo laua faitalia—“o le malosi ma le avanoa … e filifili ai ma galulue ai mo i la’ua lava” (Taiala i Tusituaiga Paia, “Faitalia,” scriptures.lds.org). Na Ia poloaiina i laua e aua le aai i le fua o le laau e iloa ai le lelei ma le leaga. O le usitaia o lenei poloaiga o lona uiga o le mafai lea ona laua tumau i le faatoaga, ma o le a le mafai ona la alualu i luma e ala i lo la’ua iloa o le faafeagai i le olaga faaletino. O le a la le iloa le olioli aua o le a la le iloaina le faanoanoa ma le tiga.

Faitau le 2 Nifae 2:17–20 ma vaai po o le a le mea na tupu ia Atamu ma Eva ina ua la filifili e soli le poloaiga a le Atua. I le avanoa ua saunia, faamatala le mea na filifili Atamu ma Eva e fai ma aafiaga e lua o lena filifiliga—e ta’ua soo lava o le Pau—na oo ia i laua:

Faitau le 2 Nifae 2:22–26 ma faailoa mai nisi o taunuuga o le filifiliga na faia e Atamu ma Eva. Faailoga i au tusitusiga paia nisi upumoni ua e aoaoina i taunuuga o le Pau.

3. Faauma i lau api o talaaga mo le suesueina o tusitusiga paia, lenei parakalafa i le faamatalaina o taunuuga o le Pau o Atamu ma Eva ia te oe lava ia. Faaaofia ai manatu e uiga i filifiliga, faitalia, tino faaletino, oti, fanau, ma le agasala.

   “Ona o le solitulafono a Atamu ma Eva, ua ou i ai foi i se tulaga pau ma …”

O Le Matafaioi a le Togiola a Iesu Keriso i le Ata o le Faaolataga

O le agasala ma le oti e tuueseeseina i tatou mai le afioaga o lo tatou Tama i le Lagi. E le mafai ona tatou toe foi atu i le afioaga o le Atua e aunoa ma le fesoasoani paia. E tatau ona tatou malamalama i le matafaioi a Iesu Keriso ma Lana Togiola i le ata o le faaolataga ina ia tatou maua ai le faatuatua ia te Ia ma mulimuli i le fuafuaga a le Tama Faalelagi. Suesue le Mosaea 3:17–19, saili fuaitau e faamatala ai pe faapefea ona faatoilalo e le Togiola a Iesu Keriso aafiaga o le Pau ma fesoasoani ia i tatou e maua le fiafia ma toe foi i lo tatou Tama Faalelagi. Fai se aotelega o nei fuaiupu i au lava upu:

O se mataupu faavae ua matou aoaoina o le: O Iesu Keriso o le tagata sili ona taua i le ata o le faaolataga, ma o Lana Togiola e faataunuu ai le fuafuaga mo fanau uma a le Atua.

4. Faitau mau nei: 2 Nifae 2:8; Mosaea 3:7–11; 16:4–8; Alema 34:9, 15–16; Mamona 9:13–14. Tusi se parakalafa i lau api talaaga mo le suesueina o tusitusiga paia, e faamatala ai le mea o loo aoao mai ai e le matafaioi o le Togiola a Iesu Keriso i le ata o le faaolataga. Atonu e te manao e vase fuaitau e taua ia te oe.

O Lo Tatou Tiutetauave i le Ata o le Faaolataga

Ua saunia e le Tama Faalelagi Lana fuafuaga atoatoa e aumai ai lo tatou fiafia faavavau ma le faaeaga faatasi ma Ia ma e pele ia i tatou. Ua faataunuuina e Iesu Keriso Lana matafaioi i le fuafuaga, i le faatoilaloina o le oti ma mafai ai e i tatou ona faatoilalo le agasala ma toe foi e mau faatasi ma lo tatou Tama i le Lagi. Ae ui i lea, e le aveesea ai lo tatou tiutetauave i le fuafuaga.

5. Tusi i lau api talaaga mo le suesueina o tusitusiga paia, Nisi o ou tiutetauave i le ata o le faaolataga, ma lisi mea ua aoaoina mai e mau taitasi nei e uiga i o tatou tiutetauave patino e valaaulia le mana o le Togiola i o tatou olaga ma auai atoatoa i faamanuiaga o le ata o le faaolataga:

   1. 2 Nifae 2:25–27

   2. Mosaea 3:12–13

   3. Alema 12:24–25, 32–34

   4. 3 Nifae 27:13–14, 20–22, 27

O nei mau e mafai ona fesoasoani tatou te malamalama ai a o tatou filifili e ola i le talalelei a Iesu Keriso ma mulimuli i le fuafuaga a le Atua, ua tatou saunia e maua le ola faavavau e ala atu i le Togiola a le Faaola.

6. Faapea ua fesiligia oe e lauga i le lotu e uiga i le ata o le faaolataga. I le faaaogaina o mea na e aoaoina mai mau atofaina i luga, tusi i lau api talaaga mo le suesueina o tusitusiga paia mea o le a e fai atu e uiga i o tatou tiutetauave patino i le fuafuaga a le Tama Faalelagi.

Mafaufau loloto i mea e mafai ona e faia e sili atu ai lou faataunuuina o ou tiutetauave i le fuafuaga a le Tama Faalelagi ma valaaulia le mana o le Faaola i lou olaga. Mafaufau e faasoa atu ou manatu i se tasi o ou matua, se uso, po o se uo mamae.

E Maua i le Ata o le Faaolataga Tali ma le Taitaiga

O se malamalama i le ata o le faaolataga e mafai ona taitaia oe pe a fai filifiliga ma sailia tali i fesili o feagai ma oe po o isi.

7. Tali i lau api talaaga mo le suesueina o tusitusiga paia, se tasi o fesili nei e ala i le tauina mai pe faapefea e le malamalama i le ata o le faaolataga ona maua ai le taitaiga ma tali:

   1. E faapefea ona aafia ou lagona i lou lava taua, i le iloaina o oe o se atalii po o se afafine moni o le Atua?

   2. Pe faapefea ona e tali atu i se tasi e fai mai, “O lo’u olaga—o le a ou faia le mea ou te manao e fai”?

   3. E mafai faapefea e le malamalama i le ata o le faaolataga ona fesoasoani i se tasi e faatoilalo lagona faapea, o le olaga ua na o se mauaina o le fiafia ma faataunuu o tatou manaoga mo le fiafia?

   4. E mafai faapefea ona e faaaoga lou malamalama i le ata o le faaolataga e fesoasoani i se tasi o loo aafia i tofotofoga ma lagona faapea ona e le alofa le Atua ia te ia?

O le malamalama i le ata o le faaolataga e mafai ona fesoasoani e te usitai ai i poloaiga a le Atua aua ua faamalamalama mai ai pe aisea e tatau ai ona tatou usitai i ai (tagai i le Alema 12:32).

8. Faitau le 2 Nifae 2:25, ma otooto le faamoemoega o le ata o le faaolataga i le taliina o fesili nei i lau api o talaaga mo le suesueina o tusitusiga paia: O a ni auala ua aumaia ai e le ata o le faaolataga le olioli ia te oe ma lou aiga?

9. Tusi le fuaitau lea i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le lesona o le “Ata o le Faaolataga” ma faamaeaina i le (aso).

   Fesili, manatu, ma vaaiga faaopoopo, ou te fia faasoa i lou faiaoga: