Alema 30

Folasaga

Ina ua tuanai le taua tele ma sa Lamana, na oo le filemu i le nuu o Saraemila. I le lotolotoi o lenei taimi o le filemu, o se tasi tagata e igoa ia Kori’oa na amata ona talai atu e faapea e leai se Keriso. O ana aoaoga sese na taitaiina ai i latou e talitonu ia te ia i le agasala. Sa ia lauga e faaleaga i taitai o le Ekalesia, ma folafola atu ua latou aoaoina “uputuu valea” (Alema 30:27). Na aumai Kori’oa i luma o Alema, o le na aoao atu ia te ia o mea uma e molimau ia Keriso. Mulimuli ane, sa ta’uta’u atu e Kori’oa o ana gaoioiga sa taitaiina e le tiapolo.

Alema 30:1–29

O Kori’oa, o le Aneti-Keriso, ua faifai i aoaoga faavae a Keriso

Vaai faalemafaufau i se tasi o saunia se mea’ai mo oe. E foliga ma manogi manaia, ae ina ua e tausami i ai, na e ma’i tigaina lava. Mafaufau mo sina taimi pe faapefea e aoaoga sese ona tutusa ma le ofoina mai o se meaai e foliga manaia ae faalilolilo lona oona.

E le i mamao atu sa e suesue e uiga i le Aneti-Keriso o Serema (tagai Iakopo 7) ma Ne’oa (tagai Alema 1). Ia manatua o se tasi o uiga o le aneti-Keriso o “soo se tasi po o soo se mea e faaa’oa’o pepelo i le fuafuaga moni o le talalelei o le olataga ma tetee faaaliali pe faalilolilo ia Keriso” (Guide to the Scriptures, “Anetikeriso,” scriptures.lds.org). I le aso o le a e aoao ai e uiga i se isi tagata o le sa fai ma fili o Keriso ma o ana aoaoga pepelo na faaseseina ai nisi ma taitai atu ai i latou i le agasala. O le tele o tagata i le lalolagi i aso nei ua faaaoga finauga e tutusa ma Kori’oa e tetee atu ia i latou o loo faaali atu se talitonuga i le Atua.

Ua amata ona talai atu Kori’oa i sa Nifae. Faitau le Alema 30:6, 12, ma vaavaai mo fasifuaitau ua faaalia ai o Kori’oa o le aneti-Keriso.

Faitau i le Alema 30:12–18, ma faafetaui aoaoga sese a Kori’oa ma o latou aafiaga.

O Ni Aoaoga Sese a Kori’oa, o se Aneti-Keriso	Faamatalaga Talafeagai ma Aafiaga o Aoaoga Sese
Alema 30:13–14	Sei vagana ua i ai ni au faamaoniga faaletino o upumoni faalelotu, e le tatau ona e talitonu ia Iesu Keriso po o Lana talalelei. E leai se mea e tau o se faaaliga faaletagata lava ia e ala mai le Agaga Paia.
Alema 30:15	E leai se mea e taua o se agasala. E leai se tulaga faatonuina faalauaitele o mea e sao ma mea sese.
Alema 30:16	E faamanuiaina tagata ona o lo latou lava maelega a i latou lava. E le manaomia le Atua i le soifuaga o le tagata.
Alema 30:17 (“ae e lelei a tagata taitoatasi …”)	O saunoaga a perofeta ma tusitusiga paia e le moni, o lea e le tatau ai ona e talitonu ia latou valoaga.
Alema 30:17 (“soo se mea sa fai e le tagata …”)	E leai se mea e tau o le faamagaloga o agasala. E le manaomia ona saili mo se fesoasoani e ala i le Togiola aua e leai se mea e tau o se Togiola.
Alema 30:18	E leai se olaga pe a mavae le oti, o lea la e le manaomia le popole e uiga i se faamasinoga pe a mavae lenei olaga.

(O tali i lenei gaoioiga faafetaui o loo maua i le faaiuga o lenei lesona.)

Alema 30:18 ua aoao ai le mataupu faavae: E faaaoga e Satani aoaoga faavae sese e maunu ai i tatou ia solitulafono i le agasala.

Na aoao mai e Peresitene Boyd K. Packer, Peresitene o le Korama a Aposetolo e Toasefululua:

“O a tatou amioga ua le pulea atoatoa e o tatou manaoga faalenatura. O le amio e amata mai i talitonuga.

“O talitonuga e fanau mai i aoaoga, po o aoaoga faavae. O aoaoga faavae e mafai ona faaleagaga pe faaletino, lelei pe leaga, moni pe sese foi. …

“O aoaoga moni, ma malamalama i ai, e suia ai le amio” (“Fanau Iti,” Liahona, Ian. 1987, 18).

Filifili se lua pe sili atu o aoaoga sese a Kori’oa o loo lisiina i le gaoioiga o le siata faafetaui. I lau api talaaga mo le suesueina o tusitusiga paia, tusi po o a aoaoga faavae moni ma faamatala pe faapefea e le iloaina o upumoni ona aafia ai ou uiga ma amioga.

Ina ua mavae lona faamanuiaina i le nuu o Saraemila, na malaga atu Kori’oa i le nuu o Seasona e talai atu i tagata o Amona. Faitau le Alema 30:19–20, ma saili pe na latou talia ana aoaoga sese.

O tagata o Amona “e sili atu lo latou popoto nai lo le toatele o sa Nifae” ma “sa ave atu o ia i fafo o le laueleele” (Alema 30:20–21). Mai mea ua e aoao i ai e uiga i tagata o Amona, aisea e te manatu ai sa latou le talitonu ai i aoaoga sese a Kori’oa?

Alema 30:21–29 ua faamatala ai na alu atu Kori’oa i le nuu o Kitiona, “ma sa ia le maua se manuia tele iinei” ” (Alema 30:21). O nisi o finauga a Kori’oa e faasaga atu i le Ekalesia ma ana aoaoga o loo maua i le Alema 30:24, 27, o le lua o ia manatu o: (1) o i latou o e talitonu i le Atua o loo nofopologa ma (2) o mataupu faalelotu e aveesea ai le saolotoga. O nei finauga o loo faaaoga pea e i latou ua tetee i le lotu i aso nei.

Na aoao mai Peresitene Henry B. Eyring o le Au Peresitene Sili e faapea o lo tatou talitonuga i le Atua e aumaia lo tatou saolotoga: “Sa faitio Kori’oa, e pei lava ona faitio sese alii ma tamaitai talu mai le amataga, e faapea, o le taliaina o fautuaga mai auauna a le Atua o le aveesea lea o le aia faaletagata lava ia na tuuina mai e le Atua. Ae sese le faitioga, aua o loo taitaieseina ai le mea moni. A tatou teenaina le fautuaga lea e mai le Atua, tatou te le filifili la ina ia tatou tutoatasi i aafiaga o loo i fafo atu. Tatou te filifili se isi aafiaga. Tatou te teenaina le puipuiga a se Tama Faalelagi e atoatoa Lona alofa, e i ai le mana uma, ma o lona faamoemoega atoa e pei ona i ai i Lona Alo Pele, o le tuuina mai lea ia i tatou o le ola e faavavau, ia tuu mai ia i tatou mea uma o loo ia te Ia, ma toe aumaia i tatou i Lona afioaga o ni aiga i aao o Lona alofa. A teenaina Lana fautuaga, ua tatou filifilia le aafiaga a se isi mana, o lona faamoemoega o le aumaia lea o le faanoanoa ia i tatou ma o ona faamoemoega e inosia lea. Ua ia te i tatou le filifiliga saoloto o se meaalofa lea a le Atua. O le aia lena tatou te filifili ai ina ia tatou saoloto mai aafiaga, o le aia lena e le mafai ona aveesea lea tatou te gauai atu ai poo fea o na mana tatou te filifilia” (“Mauaina o le Saogalemu i Fautuaga,” Liahona, Iulai 1997, 29).

Tusi i lau api talaaga mo le suesueina o tusitusiga paia mea e te fautuaina i se tagata e fai ina ia puipuia mai ai o ia lava mai le talitonu i aoaoga sese e pei o na mea o loo aoao e Kori’oa.

Alema 30:30–60

Ua manao Kori’oa i se faailoga mai ia Alema ma ua taia ma gugu e le mana o le Atua

Mulimuli ane, na aumaia Kori’oa i luma o Alema. Faitau le Alema 30:30–31, ma vaavaai mo tuuaiga na faia e Kori’oa e faasaga atu ia Alema ma isi taitai o le Ekalesia. “Ola faaloloto ai i luga o galuega a tagata” e faauiga faapea ua mauoa Alema ma isi ona o la latou auaunaga i le Ekalesia. Mafaufau i tali o fesili nei:

Mai i ou aafiaga ma ou taitai o le Ekalesia, aisea e sese ai nei tuuaiga?
O le a sou manatu i le ala e te tali atu ai i tuuaiga a Kori’oa pe ana faapea o oe o Alema?

Faitau le Alema 30:32–35, ma iloa ai le tali a Alema ia Kori’oa. Mafaufau e uiga i le auala na e vaaia ai nei upumoni i tali a Alema i soifuaga o i latou o loo taitaia la outou uarota po o paranesi po o isi uso o le Ekalesia e te fiafia i ai.

Afai e tatau ai, valaaulia se uo po o se tagata o le aiga e faitau le Alema 30:37–45 faatasi ma oe. O se tasi o outou e faitaua upu a Alema, ma o isi e [faitaua] upu a Kori’oa. A o faitau toalua e oulua, ia vaavaai mo mea na taua e Alema o faamaoniga o le Atua soifua. (Afai e le talafeagai le i ai o se tasi e faitauina ma oe, vaai faalemafaufau i le felafolafoaiga i le va alii e toalua ao e faitau.)

Faamaea le galuega atofaina lenei i lau api talaaga mo le suesueina o tusitusiga paia:
1. Tusi i lalo se tasi o faamaoniga na faailoa mai e Alema aemaise o se molimau ta’u aogaina ia te oe o loo soifua le Atua ma aisea ua avea ai ma se molimau malosi o Lona soifua.
2. Tusi i lalo nisi faamaoniga e le itiiti ifo ma le tolu ua e vaaia i lou olaga e “iloa ai o loo i ai se Atua” (Alema 30:44), ma faamatala puupuu pe faapefea e nei faamaoniga taitasi ona faamalosia lou talitonuga i le Atua.

O se tasi o aoaoga faavae o loo i le fuaiupu sa e suesue i ai o le: : O mea uma lava ua molimau o le Atua o Le Foafoa Silisiliese. Mafaufau i le mea e tupu i lou faatuatua pe a e filifili e saili mo ma manatua nei faamaoniga ma molimau.

Ia matau mea sa faia e le perofeta o Alema a o felafolafoai o ia ma Kori’oa: sa ia fa’asa’oina aoaoga sese (tagai i le Alema 30:32–35), sa ia molimau i le upumoni (tagai i le Alema 30:37–39), sa ia sii atu le avega o faamaoniga ia Kori’oa (tagai i le Alema 30:40–42), ma sa ia tuuina atu faamaoniga o loo soifua le Atua (tagai i le Alema 30:44). O a ni mea e mafai ona e aoao mai faataitaiga a Alema e uiga i le ala e taulimaina ai i latou o e finau e faasaga i le upumoni?

O nisi o taimi pau lava le puipuiga ua ia i tatou mo e osofaia i tatou o lo tatou faatuatua e faasoa atu a tatou molimau o le upumoni. E leai se mā i le faaaogaina o lenei auala —o Alema, o le perofeta a le Atua, sa ia faaaoga lenei auala ia Kori’oa. Na faamatala mai e Elder Jeffrey R. Holland o le Korama a Aposetolo e Toasefululua: “O le finauga a Kori’oa e matua fou i tagata faitau o aso nei, ae sa faaaoga e Alema se auupega e le faatapulaaina le taimi ma se auupega e le mafuatiaina i lana tali atu —o le mana o le molimau patino faaletagata” (Christ and the New Covenant [1997], 121).

Ata

Alema ma Kori’oa

E ui i le tele o faamaoniga, po o faaaliga, na faasoa atu e Alema ia Kori’oa e faamaonia ai o lo o soifua le Atua, na toe fesili foi Kori’oa mo se isi faailoga ma sa taia ma gugu ai (o lona uiga sa le mafai ona tautala o ia; tagai i le Alema 30:45–50). Faitau i le Alema 30:51–53, vaavaai i mafuaaga na faimai ai Kori’oa sa ia aoao atu mea na ia aoao.

Ina ua le toe aoao atu e Kori’oa mataupu sese, sa ia faapea mai sa ia aoao atu ona manatu sese “aua sa logolelei i le mafaufau faaletino” (Alema 30:53). O le i ai o le “mafaufau faaletino” e faatatau lea i le taulai atu i manaoga faalelalolagi po o le faamalieina o manaoga o le tino. O i latou sa talitonu i aoaoga a Kori’oa na manatu latou te mafaia ona faia manaoga faaletino ma oa o le lalolagi e aunoa ma o le a leai ni taunuuga. O nei manatu na taitai atu ai i se olaga o le agasala (tagai Alema 30:18).

Alema 30:54–59 ua faamatala sa lafoaiina Kori’oa i fafo, na alu atu mai lea fale i lea fale e aisi ai ana mea’ai, ma mulimuli ane ua solia o ia i lalo ma maliu ai. Faitau i le Alema 30:60, ma vaavaai mo se upumoni taua e uiga i mea sa tutupu mulimuli ane ia i latou o e na filifili e mulimuli ia Satani. Faailoga le fasifuaitau lea i au tusitusiga paia: “O le a le lagolagoina e le tiapolo lana fanau [o e mulimuli ia te ia] i le aso gata’aga. (I lenei fuaiupu, o fanau o lona uiga o e mulimuli mai.)

Tali le fesili lenei, i lau api talaaga mo le suesueina o tusitusiga paia:
1. E faapefea e le upumoni sa e faailogaina i le Alema 30:60 ona faailoa mai i le olaga o Kori’oa?
2. Faatusatusa le Alema 30:60 i le Alema 36:3. O a ni faamaoniga ua e vaaia i lou olaga po o olaga o isi e faaalia ai o le a faaauau e le Atua ona lagolagoina i latou o loo taumafai e mulimuli i Ana poloaiga?

Toe iloilo mataupu faavae ma aoaoga faavae moni ua e suesue i ai i lenei aso. Mafaufau i ni auala e mafai ona e aloese mai le faaseseina e aoaoga sese, e faapei o [aoaoga sese] a Kori’oa.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 30 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: