Iunite 21: Aso 4
Alema 59–63
Folasaga
Sa tusia e Helamana se tusi i le Taitaiau o Moronae, e tau atu ia te ia taumafaiga a le vaegaau ma talosaga atu mo se fesoasoani mai le malo o sa Nifae. Sa fiafia le Taitaiau o Moronae e aoao e uiga i manuia a Helamana, ae sa ita i le malo ona o le le manatu e auina atu ni fesoasoani. Sa tusi atu e le Taitaiau o Moronae se tusi otegia i le faamasino sili o Paorana. I lana tali, sa tau atu e Paorana le fouvale e agai atu i le malo. Sa savali Moronae mo lana fesoasoani ma faatoilaloina le au fouvale. O lea sa mafai ai e vaegaau a sa Nifae ona autasi e faatoilaloina sa Lamana. Ina ua mavae le 14 tausaga o le taua, na toe i ai foi le filemu i sa Nifae, ma faatagaina Helamana ma ona uso e taulai atu i le atiaeina o le Ekalesia.
Alema 59
Na vaivai le uumau a sa Nifae, ma sa faanoanoa le Taitaiau o Moronae ona o le amioleaga o tagata
Ina ua maua e le Taitaiau o Moronae se tusi mai ia Helamana o faamatala ai le manuia o lana vaegaau, sa fiafia Moronae ma ona tagata. Ona tusi atu lea o Moronae ia Paorana, o le taitai o sa Nifae i Sara’emila, ma talosaga atu ia te ia e auina atu ni faamalosiauga ma mea e manaomia ia Helamana. Ae sa le i auina atu ni faamalosiauga. O lea, ina ua osofaia e sa Lamana le aai o Nifaea, sa faamalosia le sosola ese o tagata o Nifaea ma na pulea e sa Lamana le aai.
Faitau le Alema 59:9–12 e iloa ai le tali atu a Moronae i le manumalo o sa Lamana. Mafaufau e faailoga i au tusitusiga paia le fasifuaitau lenei i le Alema 59:9: “na faigofie ona taofia le aai mai le pau atu i lima o sa Lamana nai lo le toe aumaia mai ia i latou.” Mai lenei fasifuaitau, e mafai ona tatou aoao ai i lenei mataupu faavae: E faigofie ma lelei ona tumau i le faatuatua nai lo le toe foi i le faatuatua ina ua uma ona faaseseina.
-
Suesue le fasifuaitau sa e faailogaina i le Alema 59:9 ma le mataupu faavae o le lotoa i le palakalafa na muamua atu. Tali le fesili lenei, i lau api talaaga mo le suesueina o tusitusiga paia:
-
O le a le mea e faigofie ai le aloese mai vaisu o fualaau faasaina nai lo le manumalo mai se vaisu?
-
Aisea e faigofie ai ona faatumauina se molimau nai lo le toe maua mai i le mavae ai o le aveesea.
-
Aisea e faamata faigofie ai i se tagata ona tumau malosi i le Ekalesia nai lo le toe foi mai i le Ekalesia mai le le toaga?
-
Alema 60–62
Ua fesili Moronae ia Paorana e uiga i le mafuaaga o le le manatu mai o le malo
I le mavae ai o le aveina e sa Lamana o le aai o Nifaea, na manatu le Taitaiau o Moronae e tusi se talosaga ia Paorana, o le faamasino sili i Sara’emila. Faitau le Alema 60:17–24, ma vaavaai mo tuuaiga na faia e Moronae e faatatau ia Paorana ma tagata o Sara’emila.
Toe faitau le Alema 60:23 ma maitau le faasino atu a le Taitaiau o Moronae i le faamamaina muamua o “totonu o le ipu”. Sa ia faatatau i le manaomia o le aveesea o le amioletonu mai le malo o sa Nifae ma ona tagata. Ae peitai, o lenei fuaiupu e mafai ona aoga foi i o tatou olaga. Vaai faalemafaufau pe a tuu se eleele po o se palapala i totonu o se ipu. E tusa pe e te fufulua fafo o le ipu, mata e te maua se lagona lelei le inu mai lena ipu?
-
-
Afai tatou te manatu ia i tatou lava o ni “ipu, o le a sou manatu i le uiga o le faamama totonu o le ipu?
-
Aisea e avea ai le faamamaina o totonu o le ipu e fesoasoani ia sili atu lo tatou auaunaga i le malo o le Alii?
-
E pei ona faamaumauina i le Alema 60:33–36, sa tau atu e le Taitaiau o Moronae ia Paorana ina ia faavave ona auina atu ni fitafita ma ni mea e manaomia i lana vaegaau ma le vaegaau a Helamana. Afai e le faia e Pa’orana, na faapea mai Moronae o le a ia taitai atu se vaegaau faamiliteli i Sara’emila ma faamalosia o ia e faia mea nei. Na maua e Paorana le tusi a Moronae ma na vave ona toe tusi atu ia te ia. Faitau le Alema 61:1–5 e iloa ai mea sa tutupu i Sara’emila.
Faitau le Alema 61:9–14, ma mafaufau i le auala na tali atu ai Paorana i tuuaiga a Moronae. Mafaufau e faailoga na faamatalaga e faailoa ai le malosi o uiga o Paorana. Nai lo le ita, na valaaulia e Paorana Moronae e aufaatasi ma ia i le malosi o le Alii e tau ai ma le fili. Faitau le Alema 62:1 e iloa ai le lagona o Moronae ina ua ia maua le tali a Paorana.
Mafaufau e tusi le upumoni lenei i lau api talaaga mo le suesueina o tusitusiga paia: E mafai ona tatou filifili ina ia le tiga i upu ma amioga a isi. Pe a tatou aufaatasi i le amiotonu ma isi, o le a sili atu lo tatou malosi i a tatou taua e faasagatau atu i le tiapolo.
Na aoao mai Elder David A. Bednar o le Korama a Aposetolo e Toasefululua e faapea:
“E ala i le mana faamalosiau o le Togiola a Iesu Keriso, e mafai ai e oe ma au ona faamanuiaina e aloese ma manumalo i le lototiga. ‘Ua tele le filemu o e naunau i lau tulafono: e leai foi se mea e tausuai ai i latou’(Salamo 119:165). …
“… Sa tusi atu Moronae … ia Pa’orana ‘e ala i le tausalaina’ (Alema 60:2) ma tuua’ia malosi o ia i lona le magafagafa, faatamala, ma le le amana’iaina. E ono faigofie ia Pa’orana ona tetee ia Moronae ma lana savali, peitai na filifili o le a le tiga lona loto. …
“O se tasi o faailoga sili o lo tatou matutua faaleagaga, e faaalia lea i le auala tatou te tali atu ai i vaivaiga, o le leai o se poto masani, ma taga e ono faatausuai ai a isi tagata. O se vaega, o se gaoioiga, po o se faamatalaga e ono mafai ona faatausuai, peitai e mafai e oe ma a’u ona filifili e aua ne’i tiga ai —fai atu faatasi ma Pa’orana, ‘e le afaina’ [Alema 61:9]” (“E Leai Foi se Mea e Tausuai ai i Latou,” Ensign po o leLiahona, Nov. 2006, 90–91).
-
E pei ona faamaumauina i le Alema 62, na aumai e le Taitaiau o Moronae lana vaegaau i Sara’emila e fesoasoani ia Paorana e faatoilalo ia tagata-tupu —tagata ua vavaeese o sa Nifae o e na mananao e faia se tupu ma ulufale atu i se faaleleiga ma sa Lamana. Sa taofia e tagata-tupu ia Paorana mai le auina atu o fitafita ma mea e manaomia e fesoasoani ai ia Moronae ma Helamana. Ona tuufaatasia ai lea o au a Moronae ma Paorana ma maua fesoasoani mai isi vaegaau a sa Nifae e tuliesea ai sa Lamana i fafo o le laueleele. I le taimi lea ua toatele sa Lamana ua salamo ma ua faatasi ma tagata o Amona.
Vaai faalemafaufau i nisi o luitau e ono maua i aiga ma tagata taitoatasi i le faaiuga o lenei taua. Faitau le Alema 62:39–41 e iloa ai pe faapefea ona aafia sa Nifae i tofotofoga o le taua. A o e faitau, vaavaai mo upumoni e mafai ona e faailoa mai i nei fuaiupu.
Tusi le mataupu faavae lenei po o le upumoni i lau tusitusiga paia e latalata i le Alema 62: 39–41 po o lau api talaaga mo le suesueina o tusitusiga paia: E mafai ona tatou ola latalata i le Alii i taimi o o tatou tofotofoga.
-
-
Aisea e te manatu ai o nisi tagata e ola latalata i le Alii pe a feagai ma tofotofoga a o isi e liliuese mai ia te Ia?
-
O a mea ua aoao ai oe e mataupu i taua e uiga i le avea ai ma se soo o Iesu Keriso i taimi o faigata po o tofotofoga?
-
Alema 63
E toatele sa Nifae ua malaga atu i laueleele i matu
I le mavae ai o le maliu o Helamana (tagai Alema 62:52), o lona uso o Sepulona ua i ai le tausiga o talafaamaumau paia. Faitau le Alema 63:1–2 e iloa ai le ituaiga tagata na avea ai Sepulona. E pei ona faamaumauina i le Alema 63, ua maliliu Moronae ma Sepulona, ma o le atalii o Moronae, o Moronaea, sa taitaia vaegaau a sa Nifae.
Faitau le Alema 63:10–13. A o le i oti o ia, sa tuuina atu e Sepulona ia Helamana, o le atalii o Helamana, e tausia talafaamaumau paia. Sa tausia e Helamana talafaamaumau ua maea ona tusia ma amata ona tausia talafaamaumau o le a avea ma tusi a Helamana.
Alema 63:5–8 o loo faamaumau ai o le toatele o sa Nifae sa faimalaga i vaa i laueleele i matu ma sa le toe faalogo lava i ai. Ma le isi, o le faaiuga o le Alema 63 ua faaali mai ai ua toe i ai foi le feteenaiga i le va o sa Lamana ma sa Nifae, ma ua faaiu ai le tusi umi ma le musuia a Alema.
-
Ua ou suesueina le Alema 59–63 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: