Iunite 28: Aso 1

4 Nifae 1

Folasaga

Ina ua mavae le asiasiga ma le talaiga a Iesu Keriso i Amerika, sa faaaoga e tagata Ana aoaoga ma olioli i le 200 tausaga o le lotogatasi, tamaoaiga, ma le fiafia. Ae peitai, mulimuli ane, na amata ona faamaualuluga ma faateleina le amioleaga o tagata. E lei umi ae ua toe vaeluaina foi le au sa Nifae ma sa Lamana, ma ina ua mavae le 300 tausaga, ua amioleaga uma sa Nifae ma sa Lamana, ma na o ni nai tagata amiotonu na totoe.

4 Nifae 1:1–18

Na liua ma aafia tagata uma i le filemu ma le fiafia.

tamaitai talavou e toatolu o loo ataata

O le a se mea e fesoasoani ina ia e fiafia moni ai?

O le a sou manatu i le eseesega i le va o mea e aumaia ia te oe le fiafia le tumau ma mea e mafai ona taitaiina atu ai i le fiafia tumau? Faitau le 4 Nifae 1:16 e maua ai le mea na tusia e Mamona e uiga i tagata ina ua mavae ona asiasi le Faaola ia i latou. Atonu e te manao e faailoga le fuaitau “e moni e le mafai ona i ai o ni tagata e sili atu ona fiafia.”

1. Tusi le ulutala E Le mafai Ona I Ai o Ni Tagata e Sili Atu Ona Fiafiai lau api talaaga mo le suesueina o tusitusiga paia, ma tusi se lio i lalo ifo, e pei ona faaalia mai i le siata lenei. (O le a e tusitusia ni mea i totonu ma autafa o le lio.) Faitau le 4 Nifae 1:1–2, ma tagai mo mea na faia e tagata na maua ai lo latou fiafia. Lisi mea na e mauaina i totonu o le lio.

lio

Talu ai sa faaaogaina e tagata ia aoaoga a le Faaola, sa latou “liliu…uma i le Alii” (4 Nifae 1:2) ma faamanuiaina i le fiafia sili.

Na faamatalaina e Elder Richard G. Scott o le Korama a Aposetolo e Toasefululua le auala e fesootai faatasi ai le liua ma le fiafia. Ao e faitauina ana upu, vase le uiga o le ia liua:

“O lou fiafia nei ma le faavavau e faalagolago i le tulaga o lou liua ma le suiga na ia aumaia i lou olaga.E faapefea la ona e liua moni lava?Na faamatala e Peresitene [Marion G.] Romney laasaga e tatau ona e mulimuli ai:

“‘O le avea ma tagata o le Ekalesia ma le liua e le o ni faaupuga e tutusa.O le liua ma le mauaina o se molimau e le faapea foi o le mea lava e tasi.O se molimau e oo mai pe afai e tuuina mai e le Agaga Paia i lē e saili ma le filiga se molimau i le mea moni.O se molimau faamaniti-loto e faamanaina ai le faatuatua.O lona uiga, na te uunaia le salamo ma le usiusitai i poloaiga.O le liua o le fua po o le taui o le salamo ma le usiusitai’ [i le Conference Report, Konafesi a le Eria i Kuatemala 1977, 8–9].

“I se faaupuga faigofie, o le liua moni o le fua lea o le faatuatua, salamo, ma le tumau i le usiusitai. …

“O le liua moni e fua mai ai fua o le fiafia tumau lea e mafai ona olioli ai e tusa lava pe vevesi le lalolagi ma o le toatele o tagata e leai se fiafia o maua” (“O Le Liua Atoatoa e Aumaia ai le Fiafia,” Liahona, Me 2002, 25–26).

2. Faitau le 4 Nifae 1:2–3, 5, 7, 10–13, 15–18, ma vaavaai mo upu ma fuaitau ia e faamatalaina le mea na oo i ai tagata aua sa liua tagata uma i le Alii. I lau api talaaga mo le suesuega o tusitusiga paia, tusi nisi o upu ma fuaitau nei faataamilo i fafo o le lio lea na e tusiaina i le galuega ua mavae.

E mafai ona tatou aoao mai lenei periota o le fiafia ma le tamaoaiga uigaese i totonu o sa Nifae lea a liua se vaega o tagata i le Alii, e aumaia le lotogatasi ma le fiafia. Atonu e te manao e tusi lenei mataupu faavae i au tusitusiga paia e latalata i le 4 Nifae 1:16 po o lau api talaaga mo le suesueinao tusitusiga paia.

Mafaufau loloto po o le a sou manatu o le a le tulaga e oo i ai pe a faapea o tagata uma lava o siomia ai oe na liua moni i le Alii?

3. Tali fesili nei, i lau api talaaga mo le suesueina o tusitusiga paia:

   1. O a faamanuiaga e te manatu o le a oo mai i lou aiga pe afai e ola tagata uma o lou aiga faapei o tagata o i le 4 Nifae?

   2. Mafaufau i se taimi o lou olaga sa faamanuia ai oe i le avea ai ma se vaega o se faalapotopotoga sa tuufaatasia i le amiotonu—faapei o lou aiga, korama po o le vasega, po o se vaega o uo. O le a se mea e te manatu na fesoasoani i lenei vaega ina ia tuufaatasia i le amiotonu? O a ni faamanuiaga sa maua e oe ma i latou sa tou faatasi?

4 Nifae 1:19–49

E toe foi mai le amioleaga ma salalau atu seia oo ina na o ni nai tagata amiotonu o le a totoe

O le a se mea e te manatu e mafai ona faataumaoia se nuu fiafia e pei o tagata o loo faamatalaina i le 4 Nifae?

4. Tusi le ulutala “Faataumaoia o se Nuu Fiafia” i totonu o lau api talaaga mo le suesueina o tusitusiga paia, ma tusi se lio i lalo ifo, e tutusa ma lau siata i le galuega muamua. Faitau le 4 Nifae 1:20, 23–24, ma vaavaai mo le mea na amata ai ona faataumaoia le fiafia ma le filemu o tagata. Lisi mea na e mauaina i totonu o le lio.

Atonu e te manao e tusi le faamatalaga lenei mai ia Peresitene Henry B. Eyring o le Au Peresitene Sili i totonu o au tusitusiga paia i talaane o le 4 Nifae 1:24 po o i lau api talaaga mo le suesueina o tusitusiga paia: “O le faamaualuga o le fili sili lea o le lotogatasi” (“E Fusia o Tatou Loto ia Tasi,” Ensign po o le Liahona, Nov. 2008, 70). O a auala e te manatu ai o le faamaualuga o le fili o le lotogatasi?

O le faamatalaga lenei mai ia Peresitene Dieter F. Uchtdorf o le Au Peresitene Sili e aumaia se malamalamaaga i le faamaualuga. Vase lalo o fuaitau lea e faamatala mai le mafuaaga e matua faataumaoia le faamaualuga.

“O le faamaualuga o le agasala … aua e na te foafoaina le ita po o le feitagai ma tuua ai tatou e faasagatau i le Atua ma o tatou uso a tagata. I lona natura, o le faamaualuga o se agasala o le faatusatusaga, aua e masani lava ona amata i le ‘Vaai i lo’u maoae tele ma mea maoae ua ou faia,’ ma e masani lava ona foliga mai e faaiu i le faapea ‘O le mea lea, E sili atu ai au nai lo oe.’

“Pe a faatumulia o tatou loto i le faamaualuga, ua tatou faia se agasala matautia, aua ua tatou solia poloaiga sili e lua [tagai Mataio 22:36–40].Nai lo le tapuai atu i le Atua ma alofa atu i o tatou tuaoi, ae ua tatou faailoa atu le mea moni lava o loo tatou tapuai ma alofa i ai—o le foliga lea tatou te vaaia i le faata” (“O Le Faamaualuga ma le Perisitua,” Ensign po o le Liahona, Nov. 2010, 56).

5. Faitau le 4 Nifae 1:25–27, 30–35, 38–45, ma vaavaai mo upu ma fuaitau ia e faamatalaina ia aafiaga o le faamaualuga i totonu o le nuu. Tusi upu ma fuaitau nei faataamilo i fafo o le lio i totonu o lau api talaaga mo le suesueina o tusitusiga paia mo le galuega 4.

O se tasi o upumoni e mafai ona tatou aoao mai nei mea na tutupu e faapea o le agasala o le faamaualuga e fatuina le fevaevaeai ma taitai atu ai i le amioleaga sili atu. Atonu e te manao e tusi lenei fuaitau i totonu o au tusitusiga paia. E mafai faapefea e le faamaualuga o se tagata e toatasi pe toalua ona aafia ai le fiafia o se vaega atoa?

Mafaufau po o ai i vaaiga nei e ono le lelei le aafiaga i le faamaualuga o se tagata e toatasi:

• O se tagata o le vasega o Tamaitai Talavou e le manao e faalogo i le lesona na saunia e lana faiaoga e uiga i faamanuiaga e oo mai i le usiusitai i le Upu o le Poto. Na te lagona e le manaomia ona toe aoao atu o ia e uiga i le Upu o le Poto ma amata ona pisa ma musu e auai i le vasega.

• E taufaalili pe faamaasiasi soo e se uo se isi tagata o le vaega ona e faaalia i le auala e faia ai ofu o lena tagata le le tele o ni ana tupe.

6. Mafaufau loloto pe i ai pe leai foi ni vaega o le faamaualuga i lou lava olaga. Atonu e aoga le toe iloilo o le faamatalaga a Peresitene Uchtdorf ao e mafaufau loloto. Mafaufau i le mea e mafai ona e faia e tetee atu ai i le faamaualuga ma saili se fesoasoani i le faateleina o le lotogatasi ma le amiotonu i lou aiga, korama, vasega, po o se vaega o uo. Tusi ou mafaufauga ma sini i totonu o lau api talaaga mo le suesueina o tusitusiga paia.

7. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 4 Nifae 1 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: