Mosaea 25

Folasaga

E pei ona tusia i le Mosaea 25, sa malaga atu le nuu o Limae ma e na mulimuli ia Alema i Saraemila ina ia faatasi ai ma le saogalemu i lalo o le taitaiga a le Tupu o Mosaea. A o o mai faatasi nei vaega o sa Nifae, sa latou iloa le agalelei o le Atua ma Lona mana e laveai ai i latou. Sa latou faatuina foi se Ekalesia soofaatasi. A o e suesue i le lesona lenei, e te ono manuia mai le mafaufau e uiga i le ala ua e vaaia ai le agalelei o le Atua i lou olaga ma faamanuiaga o le auai i le Ekalesia moni a Iesu Keriso.

Mosaea 25:1–13

O i latou na faapotopoto i Saraemila sa faatasia ma ta’ua ai o sa Nifae

Faitau le tala lenei e uiga i se tamaitai talavou sa puipuia e ala i le faalogo i le Agaga a o i ai i se savaliga sopo ma lana vaega o Tamaitai Talavou:

“O le matou toe foiga, sa ou i ai i se vaega na tuai teisi, e toalima teine ma le matou taitai. Sa latou pisi lava e tapue ata, o lea na ou filifili ai ou te muamua a’u ia. A o faaifo mai la’u savali, sa ou faalogona se povi [sa tagi e pei o le a pe]. Sa fai mai se leo o le lapataiga, e malosi ae le leoa, ‘Toe foi.’ Na toeitiiti lava a ou le amanaiaina, ae na toe oo mai foi. O le taimi lenei na ou faalogo ma toe foi atu i le vaega. Ina ua amata ona matou savavali mai i lalo, sa matou vaaia ni povi pulu tetele lanuuli se lua sa savavali topetope atu ma le feita agai i luga o le mauga. O le povi aupito lapoa sa amata ona asuasu le palapala a o sioa atu ia i matou. … Sa matou matuai fefe lava, ae sa faalavelave i ai le matou taitai perisitua, ma sa mafai ona matou feae’i ma le saogalemu i luga o se pa.

“A o matou toe ulu atu i le tolauapiga, sa ou iloaina ana ou le faalogo i le lapataiga mai le Agaga, semanu ou te matuai lavea tigaina lava pe oti foi. Sa ou iloa e alofa patino le Tama Faalelagi ia te ‘au ma na faasaogalemuina a’u. Ou te matuai faafetai i le Alii mo lena lapataiga. O lenei aafiaga na faamalosia ai la’u molimau ma aumaia ia te a’u le alofa faateleina mo le Alii” (Marissa W., “Turn Back,” New Era, Nov. 2010, 47).

E faapefea ona fesoasoani le faalogo atu po o le faitau e uiga i aafiaga o isi tagata, lea e faaalia ai le agalelei ma le mana o le Atua i o tatou olaga, e faamalosia oe?

A o toe faatasi le nuu o Limae ma le nuu o Alema ma le nuu o Saraemila, sa faitau atu e le Tupu o Mosaea a latou faamaumauga i tagata uma (tagai Mosaea 25:1–6). Sue i le Mosaea 25:7 mo le ala na tali atu ai le nuu o le Tupu o Mosaea a o latou faalogologo i tala o taualumaga a le Atua ma nei tagata.

Mo fuaiupu taitasi e fa i le Mosaea 25:8–11, tusi i lau api talaaga mo le suesueina o tusitusiga paia le tali a tagata ina ua latou faalogo i le tala e uiga i o latou uso. Mo se faataitaiga, i le Mosaea 25:8, ina ua latou vaaia i latou o e na laveai mai i le nofo pologa ia sa Lamana, sa “faatutumulia [tagata] i le olioli tele lava.”

Fuafua e tusi le mataupu faavae lenei i le avanoa autafa o au tusitusiga paia i talane o le Mosaea 25:8–11: O le suesueina o faamaumauga o taualumaga a le Atua ma isi, e mafai ai ona tatou lagona le olioli ma le faafetai mo le agalelei o le Atua.

Mafaufau i ni punavai o i ai e mafai ona e aoao ai e uiga i isi o e na i ai aafiaga i le agalelei o le Atua. O nei punavai e ono aofia ai tusitusiga paia, talafaasolopito o le Ekalesia, mekasini a le Ekaleseia, lauga o konafesi aoao, a oe lava faamaumauga o talafaasolopito o aiga, sauniga molimau, ma le Aoga Sa ma vaega a le au perisitua po o Tamaitai Talavou. Mafaufau i se taimi na e aoao ai e uiga i le agalelei o le Atua mai nei punavai. Ona mafaufau loloto lea i au tali i fesili nei:

Pe na ou maua se aafiaga lea na fesoasoani ai le iloa e uiga i le agalelei o le Atua i isi, ou te lagona ai le olioli po o le loto faafetai?
O a ni isi o taunuuga mamao pe afai ou te suesue e le aunoa i aafiaga o le agalelei o le Atua i Ana taualumaga ma isi—pe o totonu o tusitusiga paia po o isi punavai?

I le aluga o le vaiaso a sau, ia fuafua e suesue se punavai e tasi e te mafaufau i ai mo se tala o le agalelei o le Atua e faapea ona faatumulia ai oe i le maofa, ofo, olioli po o le faafetai. E mafai ona tusi i lau api talaaga mo le suesueina o tusitusiga paia, e uiga i mea na e aoaoina ma le ala na e aafia ai. E mafai foi ona e faaaogaina lenei tala i se afiafi faaleaiga e aoao ai lou aiga e uiga i le agalelei o le Atua, pe e mafai foi ona e faasoaina atu le tala i lau vasega seminare po o se uo foi.

Mosaea 25:14–24

Ua faatu e Alema ekalesia a le Atua i le laueleele atoa o sa Nifae

Ina ua uma ona tautala atu Mosaea ma faitau atu faamaumauga i le nuu, sa tautala atu Alema ia i latou. Faitau le Mosaea 25:14–16, ma faailoa le mea na aoao mai e Alema. Tusi tali i fesili nei i totonu o le tusi lesona:

E faapefea ona avea le mea na aoao atu e Alema, ma se aotelega talafeagai o aafiaga o le nuu o Limae, faapea foi ma e na mulimuli i a Alema?
Aisea e te manatu ai o le a taua i tagata le faalogo i upu a Alema ina ua uma ona latou faalogo i le talafaasolopito o le nuu o Senifa?

A o le’i faaauau atili lau faitau i le Mosaea 25, mafaufau i se taimi na e auai ai i se uarota po o se paranesi a le Au Paia o Aso e Gata Ai e ese mai i lau lava uarota po o le paranesi. Mafaufau i ni mea e tutusa ai e te matauina i le va o lau uarota po o le paranesi ma le uarota po o le paranesi na e asiasi i ai.

Faitau le Mosaea 25:17–22, ma vaai pe na faapefea ona taitai le Ekalesia i totonu o sa Nifae i le vaitaimi o Alema. O le ta’ua o “ekalesia” i le Mosaea 25:21 e tutusa lava ma le ala tatou te ta’ua ai uarota ma paranesi i le Ekalesia i aso nei. E pei foi ona i ai i aso o Alema, e valaauina e le Atua ia taitai e taitaia Lana Ekalesia i aso nei.

I le Mosaea 23:16 e te aoao ai o Alema “sa avea ma o latou faitaulaga sili” ma “na faavaeina la latou Ekalesia” (Mosaea 23:16). Sa faamalamalama mai e Peresitene Iosefa Filitia Samita: “O le tino autu o sa Nifae, i lalo o le Tupu o Mosaea lona lua, sa tumau lava le maopoopo i le laueleele o Saraemila. O le faamatalaga o loo ta’u mai e faapea o Alema na faavaeina la latou ekalesia, e faatatau i na o le au sulufai lava na sosola ese mai le nuu muamua o le tofi o sa Nifae. I le aluga o le taimi sa latou maua ai lo latou ala e toe foi atu i le tino autu o le Ekalesia ma na faauuina ai Alema e fai ma faitaulaga sili i le Ekalesia i la laueleele atoa na nofoia e sa Nifae” (Answers to Gospel Questions, comp. Joseph Fielding Smith Jr., 5 vols. [1957–66], 3:39-40).

Tusi ni tali pupuu i fesili nei, i lau api o talaaga mo le suesueina o tusitusiga paia:
1. O a ni auala na foliga ai le Ekalesia i sa Nifae ma le Ekalesia i aso nei?
2. Aisea e te manatu ai e taua le valaauina o taitai e Alema, o le na i ai le pule mai le Atua?
3. Aisea e taua ai i taitai ona aoao ia upumoni e tasi i tagata uma o le Ekalesia i le lalolagi atoa?

A o e faitau i le Mosaea 25:23–24, vaai mo fasifuaitau e faamatala ai i latou o e na auai i le Ekalesia a Keriso e faamatala ai foi tagata o le Ekalesia a le Alii i aso nei. O le mataupu faavae e tasi tatou te aoao mai i nei fuaiupu o le: A o tatou tauaveina i o tatou luga le suafa o Iesu Keriso ma ola ai, o le a liligi mai e le Alii Lona Agaga i o tatou luga.

Tali fesili nei, i lau api o talaaga mo le suesueina o tusitusiga paia:
1. E faapefea ona faatatau ia fasifuaitau i le Mosaea 25:23–24 o loo faamatala ai tagata sa Nifae o le Ekalesia i tagata o le Ekalesia i aso nei?
2. E mafai faapefea e le manatua ua e tauaveina i ou lava luga le suafa o Iesu Keriso, ona faia se eseesega i ou manatu ma filifiliga e te faia i aso uma?

Matau i le Mosaea 25:24 “sa liligi mai e le Alii lona Agaga i luga” o Lona nuu. Sa faamamafa mai e Elder Joseph B. Wirthlin o le Korama a Aposetolo e Toasefululua le taua o le meaalofa o le Agaga Paia mo tagata o le Ekalesia:

“O le meaalofa o le Agaga Paia, le aia tatau lea e maua ai le Agaga Paia e avea ma se soa tumau, e mauaina lea i le na o tulaga lava o le faatuatua ia Keriso, salamo, papatiso i le faatofuina, ma le faaee atu o lima o auauna faauuina ma tuuina atu le Perisitua Mekisateko. O le meaalofa sili lea ona taua lea e na o tagata tauaogaina lava o le Ekalesia a le Alii o loo mauaina.

“… O le punavai o le molimau ma meaalofa faaleagaga. E faamalamalamaina ai le mafaufau, e faatumuina ai o tatou loto i le olioli, e aoaoina ai i tatou i mea uma, ma aumaia mea ua galo ia i tatou ina ia manatuaina. O le Agaga Paia na te “faaali ia i [tatou] mea uma e tatau ona [tatou] faia’ [2 Nifae 32:5]” (“O Le Meaalofa E Le Matatalaina,” Ensign po o le Liahona, Me 2003, 26).

Tali fesili nei, i lau api talaaga mo le suesueina o tusitusiga paia:
1. O a ni auala e fesoasoani ai ia te oe lou auai i le Ekalesia a Iesu Keriso e lagona ai le Agaga?
2. O a ni mea e mafai ona e faia e faateleina ai lou faamaoni ma amioga amiotonu ina ia mafai ona e lagonaina le latalata atili atu i le Agaga?

Saili mo se avanoa e faasoa atu ai i se tasi le ala ua faamanuiaina ai lou olaga i le meaalofa o le Agaga Paia. O faamanuiaga ua e maua e ala mai i le Agaga Paia e mafai ona faateleina a o e taumafai ia agavaa mo Lana mafutaga.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mosaea 25 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: