1 Nifae 18–19

Folasaga

I le mulimuli ai i le taitaiga a le Alii, na faamaeaina e Nifae ma lona aiga le fausiaina o le vaa ma malaga atu loa mo le laueleele o le folafolaga. I le latou faigamalaga, o le toatele i luga o le vaa, na taitaia e Lamana ma Lemuelu, na tetee. O le taunuuga, na le toe galue le Liahona ma sa lamatia ola uma o i latou taitoatasi i le vaa i se afa tele. Ina ua salamo le au faatuiese ma na tatalo Nifae i le faatuatua, na amata ona galue le Liahona ma na faafilemuina e le Alii le afa ma toe taitaia le latou malaga. Ina ua taunuu i le laueleele o le folafolaga, na faamalosiau atu Nifae i lona aiga ia manatua le Faaola ma faatatau tusitusiga paia ia i latou lava. A o e suesueina le 1 Nifae 18–19, faatusatusa aafiaga o Nifae i le feagai ai ma tofotofoga i luitau o le feagai ai ma ou lava tofotofoga. Saili e mulimuli i faataitaiga a Nifae.

1 Nifae 18:1–8

Ua saunia le aiga o Liae e folau atu i le laueleele o le folafolaga

Aisea e taua uma ai le galue ma le filiga ma le saili i le taitaiga mai le Alii? Na faapefea ona faaalia e Nifae nei uiga uma ao fausia le vaa? Faitau 1 Nifae 18:1–8.

Lisi i lau api talaaga mo le suesueina o tusitusiga paia, upu ma fuaitau uma i 1 Nifae 18:1–8 o loo faamatalaina ai le taumafaiga na tuuina atu e Nifae ma lona aiga. Ona faailoa mai lea o upu ma fuaitau o loo faaalia ai le ala na taitaia ma fesoasoani ai le Alii ia i latou. O le a le faia i le va o taumafaiga a Nifae ma le fesoasoani na ia maua mai le Alii?

O aafiaga o Nifae ua faaalia mai ai ia i tatou ina ia faataunuuina poloaiga a le Alii, e manaomia lo tatou sailia o Lana fesoasoani ma tuuina atu la tatou lava taumafaiga.

Mafaufau i se tulaga o loo e i ai nei o loo e manaomia ai le fesoasoani a le Atua. Tusi i lau api talaaga mo le suesueina o tusitusiga paia, le mea e mafai ona e faia e saili ai le taitaiga a le Alii ma le taumafaiga e te manaomia ona fai.

1 Nifae 18:8–25

Na taitaia e Lamana ma Lemuelu se tetee i le vaa lena na faatuai ai le malaga i le laueleele o le folafolaga

Pe afai tatou te oo i ni tofotofoga ma faigata i le olaga, e masani ona mafaufau pe aisea ua tatou feagai ai ma nei faigata. Atonu o oe po o se isi e te masani ai na fesili “Aisea?” i se taimi faigata.

Na faailoa mai e Elder L. Whitney Clayton o le Au Peresitene o Fitugafulu ni pogai se tolu mo faigata tatou te oo i ai. A o faitau, vase lalo o pogai ua ia faamatalaina.

“I se vaaiga lautele, o a tatou avega e oo mai i ni faapogai se tolu. O nisi avega o taunuuga masani ia o tulaga o le lalolagi o loo tatou ola ai. O ma’i, o le atoatoa o le malosi o le tino, o afa, ma mafuie lea e oo mai i lea taimi i lea taimi ma e le ona o so tatou lava faaletonu. …

“O isi avega, e faaee mai i o tatou luga ona o amio le taupulea a isi tagata. O sauaga ma mea ua fai ma vaisu e mafai ona avea ai o tatou aiga ma soo se mea ae le o se lagi i le lalolagi mo tagata taumamaina o le aiga. O le agasala, aganuu sese, amioleaga, ma soligatulafono ua aafia ai tagata o le olaga. E oo lava i amioga e le ogaoga tele e pei o le faitala ma le agaleaga e mafai ona matua mafatia ai isi.

“O a tatou lava mea sese ma faaletonu e mafua ai le tele o o tatou faafitauli ma tuu ai avega mamafa i o tatou lava tauau. O le avega aupito mamafa [faigata] tatou te tuuina i o tatou lava luga o le avega o agasala. Ua tatou iloa uma lava le faanoanoa ma le tiga lea e mautinoa lava e mulimuli mai i lo tatou le tausia o poloaiga” (“Ina ia Mama a Outou Avega,” Ensign po o le Liahona, Nov. 2009, 12–14).

Ina ua amata le folauga a Nifae ma lona aiga i le nuu o le folafolaga, na latou oo i le tele o faigata. A o e suesue 1 Nifae 18, vaavaai mo se tasi o ituaiga puapuaga na talanoaina e Elder Clayton. Faitau 1 Nifae 18:9–11, ma faailoa mai faataitaiga o filifiliga sese na faia e nisi o tagata i le vaa.

E ui e le sese le siva, faalogo i musika, po o le fiafia, ua faailoa mai 1 Nifae 18:9 na latou faia nei mea “ma le le migao tele.” O le upu le migao o lona uiga o le le alofa, amio mataga, po o le tautala le mafaufau. E mafai e Satani ona faaaoga siva, musika, po o le auala tatou te tautala ai e faaleaga ai o tatou loto ma mafaufau, ma avea ma mea tatou te le maua ai le mafutaga ma le Agaga Paia.

E tusa ai ma 1 Nifae 18:10, o le a le mea na fefe Nifae o le a tupu ia i latou na tetee pe a le salamo? .

O le a le mea a Nifae na fai i ai?O le a lau tali pe a fai atu se matua po o se taitai o le Ekalesia ia te oe e sui le musika o loo e faalogologo i ai, le auala o e siva ai, po o le aloese mai le faaaogaina o le gagana masoa? Pe o le a e loto malie ea e faalogo ma ia suia?

Faitau 1 Nifae 18:12–14, 17–19, ma vaavaai mo taunuuga o lo latou tetee. Na faapefea ona puapuagatia Nifae ma isi tagata o le aiga ona o taunuuga o mea na fai e isi? Matau pe na faapefea e mea na fai e le au tetee ona aafia ai le mafaia e le vaega atoa ona maua le taitaiga mai le Alii.

O mea na fai e i latou na tetee ua faaalia mai ai ia i tatou o le agasala e taitai atu i le puapuaga mo i tatou lava ma o nisi taimi e mo isi foi.

O nisi o faaosoosoga masani o loo feagai ma tupulaga i aso nei e aofia ai le le faaaloalo i matua ma taitai, faimamago i le aoga, faitala, ofu le talafeagai, solia o le tulafono o le ola mama, solia o le Upu o le Poto (tapaa, mea inu malolosi, ma fualaau faasaina), ma le matamata i ata leaga. Filifili le lua pe sili atu o na faaosoosoga, ma tusi i lau api talaaga mo le suesueina o tusitusiga paia, pe faapefea e na faaosoosoga taitasi ona aafia ai le aiga ma uo a se tasi ua gauai i le faaosoosoga.

O le vaega o totoe o le 1 Nifae 18 ua aoaoina i tatou i le ala e tali atu ai pe a oo mai faigata, e tusa lava pe oo mai ona o filifiliga sese pe le o tatou na mafua ai. Faitau 1 Nifae 18:15–16, 20–23, ma faailoga fuaitau o loo aoaoina mai ai le mea e fai i tulaga uma na.

E feololo lava aoaoga ma mataupu faavae ua faaalia mai i nei fuaiupu. I le faaiuga o nei fuaitau taitasi, tusi le numera o le fuaiupu po o fuaiupu mai le 1 Nifae 18:15–16, 20–23 e te manatu o loo faaalia ai se faataitaiga o lena upu moni:

E mafai ona tatou vaai i le Atua ma tumau i le faatuatua i taimi o o tatou tofotofoga.
O le tatalo e mafai ona fesoasoani ia i tatou e maua ai le filemu i taimi o o tatou tofotofoga.

Filifili se tasi o fuaiupu na e faaaogaina i le gaoioiga na muamua atu e faapitoa lona taua ia te oe, ma faamatala i lau api talaaga mo le suesueina o tusitusiga paia pe aisea e te fiafia i ai. Faaaofia le mea na e aoaoina mai le fuaiupu ma le mea na ia aoaoina oe e uiga i le tali atu i puapuaga. Afai na e vaai i se faataitaiga o le mea ua aoaoina e lenei fuaiupu i lou olaga po o se isi foi, tusi e uiga i lena mea.

E ui lava i faigata na latou feagai, na iu lava ina taunuu Nifae ma lona aiga i le nuu o le folafolaga. A o e saili i le taitaiga a le Agaga ma galue ma le filiga e mulimuli ai, e mafai foi e oe ona faataunuuina ma le manuia le malaga na auina mai oe e le Alii i le lalolagi e faataunuu.

Na ofoina mai e Elder L. Whitney Clayton lenei molimau:

“Po o a lava avega tatou te feagai i le olaga ona o taunuuga o tulaga faalenatura, o mea sese a isi, po o tatou lava sese ma faaletonu, o i tatou uma lava o fanau a se Tama Faalelagi agalelei o le na auina mai i tatou i lenei lalolagi o se vaega o Lana fuafuaga e faavavau mo lo tatou tuputupu ae ma le alualu i luma. O o tatou aafiaga patino ma tulaga ese e mafai ona saunia ai i tatou e toe foi atu ia te Ia. O faigata ma puapuaga tatou te oo i ai, e tusa lava pe faigata ona tauave, mulimuli, mai se vaaiga faalelagi, o lea na ‘o sina ituaso itiiti lava; ma, afai [tatou] te onosai, o le a faaeaina [tatou] e le Atua i le mea maualuga’ [MF&F 121:7–8]. E tatau ona tatou faia mea uma tatou te mafaia e onosaia ‘lelei’ ai a tatou avega po o le a lava le umi o o tatou ‘ituaso itiiti’ e tauave ai. …

“… Ou te iloa a tatou tausia poloaiga ma feagaiga ma le Atua, e fesoasoani o Ia ia tatou avega. Na te faamalosia i tatou. A tatou salamo, Na te faamagaloina a tatou agasala ma faamanuia i tatou i le filemu o le mafaufau ma le olioli” (“Ina ia Mama a Outou Avega,” 13–14).

1 Nifae 19

Ua faamaumauina e Nifae valoaga e uiga ia Iesu Keriso e faatauanau ai i tatou ia manatua o Ia

Ina ua taunuu i le nuu folafolaina, na vavalo Nifae e uiga i le afio mai o le Faaola ma le ala o le a taliaina ai o Ia e Ona tagata. Faitau 1 Nifae 19:8–10, ma faailoa fuaitau o aoao mai e uiga i le natura ma uiga o Iesu Keriso.

Faamaumau i lau api talaaga mo le suesueina o tusitusiga paia pe faapefea e mea na e aoaoina i le 1 Nifae 19:8–10 ona faateleina lou alofa i le Faaola.

Faaiu le lesona o le aso i le faitauina 1 Nifae 19:18–19, 23 ma vase lalo o mea na manaomia e Nifae e faatauanau ai ona tagata ma e uma e faitau i le Tusi a Mamoan e fai. Vaavaai mo se avanoa i le aso e faasoa atu ai lau molimau i le Faaola i se uo po o se tagata o le aiga, pe fai lau molimau i se nofoaga pei o se Lotu. I le faia o lea, atonu e mafai ona e fesoasoani ia i latou e manatua ma talitonu i lo latou Faaola.

Tusi i lau api talaaga mo le suesueina o tusitusiga paia auala e mafai ona e mulimuli ai i faataitaiga a Nifae i lou olaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 1 Nifae 18 19 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: