Folasaga i le Alema
Aisea e Suesue ai Lenei Tusi?
Pe a suesue i le tusi a Alema, o le a e aoao e uiga ia Iesu Keriso ma le alaga tatau o Lana Togiola ma le Toetu i le ata o le fiafia a le Tama Faalelagi. O le a e aoao foi e uiga i le mana o le afioga a le Atua e faatoilalo ai faitaulaga pepelo, aoaoga faavae sese, agasala, feitagai, ma le liliuese a o taitaiina tagata taitasi e maua se liliuga tele o o latou loto ma le toe fanau fouina. O le a faagaeetia oe pe a e faitau e uiga i taumafaiga faafaifeautalai a atalii o Mosaea ma le liliu mai ma le faatuatua o tagata o Amona, po o Aneti-Nifae-Liae. E le gata i lea, a o e suesue i mataupu o lo o auiliili ai taua i le va o sa Nifae ma sa Lamana, e mafai ona e aoao mataupu faavae o le a taitaiina oe i taimi faigata o loo e ola ai ma fesoasoani e puipuia oe i ou taua faaletagata lava ia ma le fili.
O Ai na Tusia Lenei Tusi?
Sa tuufaatasia ma otootoina e Mamona talafaamaumau mai papatusi tetele a Nifae e fatuina ai le tusi a Alema. O lenei tusi ua faaigoa ia Alema, o le atalii o Alema ma e masani ona taua o Alema le Itiiti. I lea taimi sa pulea ai e le Tupu o Mosaea le nofoaiga a faamasino i sa Nifae, na avea Alema ma faamasino sili muamua ma sa sui foi i lona tama o se faitaulaga sili mo le Ekalesia (tagai Mosaea 29:42). Mulimuli ane ua faamavae mai lona tofi o se faamasino sili ina ia tuuto atu o ia lava i le “faiva paia o le faitaulaga sili” ma “molimau i afioga a le Atua i tagata” i le nuu atoa o sa Nifae (Alema 4:20; 5:1). Sa faaaoga e Mamona talafaamaumau o le talaiga a Alema (Alema 1–44) ma tusitusiga a ona atalii o Helamana (Alema 45–62) ma Sepulona (Alema 63) e tusia ai le tusi a Alema.
O Anafea ma o Fea na Tusia ai?
O talafaamaumau muamua na faaaogaina e avea ma punavai mo le tusi a Alema na foliga mai na tusia i le va o le 91 T.L.M. ma le 52 T.L.M. Na otooto e Mamona na talafaamaumau i taimi i le va o le T.L.M. 45 ma le T.L.M. 385. Sa le i faamauina e Mamona le mea sa iai o ia ina ua ia faia lana otootoga.