Alema 12

Folasaga

O upu a Amoleka i leAlema 11 ua iloa ai e Seseroma lona tausalaina mo le pepelo ma le taufaasese i tagata. Ina ua maea ona saunoa atu Amoleka i tagata o Amonaea, na tulai Alema i o latou luma. Ona o tagata o Amonaea ua amioleaga, na taulai atu Alema i upumoni ina ia fesoasoani ia i latou ia salamo mai le ma’a’a o o latou loto ma isi agasala. Sa ia faamamafa atu mailei a Satani, o le faamasinoga e pauu ai e agasala, ma le fuafuaga o le togiola e ala i le Alo o le Atua ua mafai ai mo i latou ua salamo ona toe foi atu i le afioaga o le Atua.

Alema 12:1–7

Ua faaalia e Alema faamoemoega leaga o Seseroma

Mafaufau i le faaaogaina o se mailei e pue ai se manu: O le lio faapona o le maea ua tuu faataamilo i se fasi meaai. A o a’apa atu le manu i totonu o le lio faapona e aumai le meaai, ona ū ai lea o le mailei, ma maua ai le manu.

Ata

maea ua nonoa i mailei

Toe faamanatu pe sa faapefea ona taumafai Seseroma e pue Amoleka i totonu o le mailei i le Alema 11:21–25. Ina ua iloa e Amoleka le faamoemoe o Seseroma ma tali atu i ai, sa tulai Alema e lauga atu ia Seseroma ma le motu o tagata sa auai (tagai Alema 12:1–2). Tagai i le Alema 12:3–6 mo upu ma fasifuaitau na faaaoga e Alema e faamatala ai metotia a Seseroma, lea na faapea mai Alema e sau mai le tiapolo (tagai Alema 12:5).

E tusa ai ma Alema 12:3, na faapefea ona iloa e Alema fuafuaga a Seseroma?

O le a le tala a Alema i faamoemoega o le tiapolo i le Alema 12:6?

Na aoao mai e Alema faapea o le Agaga Paia e mafai ona fesoasoani ia i tatou ina ia iloa faaosoosoga a le fili. I le lesona ia Alema 11, na outou aoao ai pe afai tatou te faalagolago i le Agaga Paia, e mafai ona tatou manumalo i faaosoosoga. O se vaega taua o le manumalo mai faaosoosoga o le maua lea o le Agaga e fesoasoani ia i tatou ina ia iloa faaosoosoga ma le leaga e mafai ona oo mai ia i tatou. Ona mafai ai lea ona tatou filifili e tumau i le mama ma le faamaoni e ala i le aloese mai faaosoosoga. Na i ai sou aafiaga na fesoasoani ai le Agaga Paia ia te oe e iloa ai ma aloese mai ai i se tasi o faaosoosoga a le tiapolo?

I totonu o lau api talaaga mo le suesueina o tusitusiga paia, tusi mea e mafai ma o le a e faia ina ia faatupulaia ai lou tomai e iloa ai ma tali atu ai i musumusuga o le Agaga Paia ina ia mafai ona e iloa ma aloese mai “mailei” a le fili.

Alema 12:7–18

Ua aoao atu Alema e uiga i le faamasinoga mulimuli o tagata uma

Mafaufau i se galuega ua e fiafia e fai. Fuafua le tau e te ono totogiina mo pili (tupe e totogi mo se aoaoga) i se aoga po o se polokalama faaleaoaoga e maua ai le poto e manaomia ina ia faamanuiaina i lena galuega.

Faitau le upu sii lenei, ma vaavaai mo le “pili” na saunoa ai Elder David A. Bednar o le Kolama a Aposetolo e Toasefululua e tatau ona totogi ina ia maua le poto faaleagaga: “O le malamalama faaleagaga ua faamanuiaina ai oe ma au e maua, ma ua faamautuina ai e moni i o totonu loto, e le mafai ona tuuina atu i [isi]. O le pili o le maelega ma le aoao e ala i le suesue ma le faatuatua foi, e tatau ona totogi ina ia maua ai ma ‘umia’ ai e le tagata lava ia lena silafia. E na o le pau lea o le auala e mafai ai ona lagonaina i le loto le mea ua iloa i le mafaufau” (“Ia Mataala Pea ma le Maelega Atoatoa,” Ensign po o le Liahona, Me 2010, 43).

Vaavaai mo ni faamaoniga i le Alema 12:7–8 ua amata e Seseroma ona naunau e totogi ai le “pili” faaleagaga e moomia ina ia maua ai le malamalama faaleagaga O le a le mea ua e vaai i ai e faailoa mai ai ua amata e Seseroma ona suia lona loto ina ia mafai ona aoao upumoni faaleagaga?

Vaavaai mo mea na aoao atu e Alema ia Seseroma e faatatau i le mauaina o le malamalama faaleagaga a o e faitau i le Alema 12:9–11. Atonu e fesoasoani ona iloa o “o mealilo a le Atua o upumoni faaleagaga ia e na’o faaaliga e mafai ai ona malamalama i ai. E faaali mai e le Atua ana mealilo ia te i latou o e ua usiusitai i le talalelei” (Taiala i Tusitusiga Paia, “Mealilo a le Atua,” scriptures.lds.org). Atonu e te manao e tusi lenei faamatalaga i totonu o lau tusitusiga paia i talaane o le Alema 12:9. I le Alema 12:9, sa faamatala e Alema o le a tuuina atu e le Atua se vaega o Lona afioga i tagata e faatatau i le a?

E tusa ai ma Alema 12:10–11, o le a le faiā i le va o le tulaga o o tatou loto ma le maua o upumoni faaleagaga?

O le a le uiga o le “fa’ama’a’a” o o outou loto (tagai Alema 12:10–11), ma e faapefea ona e manatu o lenei tulaga o loo faaalia i se olaga o se tasi

O le savali a Alema ia Seseroma o loo aoao atu ai le mataupu faavae lenei: Ua faaali e le Alii upumoni faaleagaga ia i tatou e tusa ai ma le gauai ma le maelega ua tatou tuuina atu i Ana afioga.

I lau api talaaga mo le suesueina o tusitusiga paia, tusi e uiga i se poloaiga po o se apoapoaiga mai le Alii na e taumafai e mulimuli ai e ala lea i le “gauai ma le maelega.” O a auala ua faamanuia ai oe e le Alii i le taitaiga faaopoopo, malamalama, po o le musumusuga a Lona Agaga aua sa e faatinoina e tusa ai ma mea sa Ia aoaoina ai oe?

Ina ua maea ona faamatala e Alema le ala tatou te iloa ai le upumoni faaleagaga, na ia faaauau pea ona tali i le fesili na fesiligia e Seseroma i le Alema 12:8 e uiga i le ala o le a faamasinoina ai i tatou. Vaavaai mo mea na aoao atu e Alema ia Seseroma i le Alema 12:12–15 e uiga i le toetu ma le faamasinoga. Faatumu avanoa nei: O le a tatou tali atu i le Atua mo a tatou , ,ma.

Manatunatu loloto i fesili nei: O le a le eseesega o le a i ai i au filifiliga i aso taitasi pe a e manatua o le a e tali atu mo au upu, galuega, ma mafaufauga?

Faailoga mau fesoasoani i le vaefaamatalaga 14a i le vaega o fuaitau o mau tauloto Mosaea 4:30, ona faitau lea pe tauloto Mosaea 4:30.

Toe tagai i mea sa e tusia i lau api talaaga mo le suesueina o tusitusiga paia mo galuega atofaina 1 i le lesona o le aso—e uiga i auala e sili ai ona e iloa gofie le Agaga Paia. Faaopoopo ni ou manatu e uiga i le malamalama i lou tali patino atu i le Atua e mafai ai ona faalauteleina lou naunautaiga e iloa ma aloese mai faaosoosoga.

Alema 12:19–37

Ua faamatala e Alema le ala e mafai ai e tagata ona manumalo mai aafiaga o le Pau e ala i le fuafuaga o le togiola

O se tasi o pule sili i Amonaea e igoa ia Anetiona sa le talitonu e mafai ona avea le tagata ma tino ola pea, ma faapea mai o le Pau na faigata ai (tagai Alema 12:20–21). Suesue fuaiupu mai le Alema 12 o loo lisiina i le siata lenei, ma tusi mea na aoao atu e Alema i koluma o i lalo ifo o ulutala:

Aafiaga o le Pau (Alema 12:22, 24)	O mea na faia e le Atua e aumaia ai lo tatou togiola (Alema 12:24–25, 28–33)	O mea tatou te faia ina ia togiolaina ai i tatou (Alema 12:24, 30,34, 37)

Ata

Tu’ua le Faatoaga o Etena

A maea ona e faatumu le siata, tali fesili nei i lau api talaaga mo le suesueina o tusitusiga paia:
1. E faapefea e le Togiola a Iesu Keriso ona fesoasoani ia i tatou e manumalo ai mai aafiaga o le Pau?
2. E tusa ai ma Alema 12:24, o a mea na aoao atu e Alema o faamoemoega o le olaga ona o le Faaola ua mafai ai ona manumalo mai aafiaga o le Pau?

O le faaupuga “tulaga nofovaavaai” i le Alema 12:24 o se fasifuaitau e na o Alema na te faaaogaina i le Tusi a Mamona (tagai foi Alema 42:4, 10, 13). Na faamatalaina e Elder L. Tom Perry o le Korama a Aposetolo e Toasefululua lenei taimi nofovaavaaia: “O le faamoemoega autu o le olaga i le lalolagi, ina ia mafai e o tatou agaga ia sa ola a o lei i ai le lalolagi, ona tuu faatasi ma o tatou tino mo se vaitaimi o avanoa maoae i le olaga faaletino. O le tuu faatasia o ia mea e lua ua tatou maua ai le avanoa e tuputupu ae ai, atiina ae ma matutua ai faalemafaufau, lea e na o le tuufaatasia lava o le agaga ma le tino e mafai ai e i tatou. E o’o o tatou tino i se vaitaimi faapitoa e tofotofoina ai, lea e ta’u o se vaitaimi faataitai o o tatou olaga. O le taimi lea e aoao ma tofotofoina ai ia faamaonia atu ai i tatou lava ia agavaa mo avanoa e faavavau. O se vaega atoa lea o le fuafuaga paia e faavavau a lo tatou Tama mo Ana fanau” (“Folafola Atu le Talalelei Mai Lea Nuu i Lea Nuu,” Liahona, Iulai 1989, 15).

Na molimau Alema o le olaga faaletino o se taimi lea e tatou te sauniuni ai e feiloai ma le Atua. Atonu e te manao e faailoga fasifuaitau o loo aoao ai lenei aoaoga faavae i le Alema 12:24. Faitau le Alema 34:32, ma faafetaui ma le Alema 12:24.

Ina ia faaaoga mea ua e aoaoina, tali le tasi po o fesili uma e lua nei i lau api talaaga mo le suesueina o tusitusiga paia:
1. E faapefea e le iloa o le faamoemoega o le olaga faaletino ona fesoasoani e taitaiina oe i lou olaga?
2. E faapefea e lou faatuatua i le Togiola a Iesu Keriso ona fesoasoani ia te oe i lou olaga nofovaavaaia?

Faitau le Alema 12:33–35, ma iloa le eseesega i mea o le a tutupu ia i latou o e salamo ma i latou o e le salamo. Atonu e mafai ona fesoasoani e te malamalama atili ai i nei fuaiupu le iloa o le ulufale atu i le malologa o le Alii e aofia ai le maua o le faamagaloga o a tatou agasala ma mulimuli ane ulufale atu i le mamalu o le afioaga o le Alii (tagai MF&F 84:24).

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 12 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: