Folasaga i le Mamona
Aisea e Suesue ai Lenei Tusi?
Ao e suesue i le tusi a Mamona, o le a e aoaoina ni lesona taua mai ia Mamona, o le sa ola faamaoni o se soo o Iesu Keriso e ui lava sa siomia lona olaga atoa e “se vaaiga faaauau pea o le amioleaga ma mea inosia” (Mamona 2:18). O le a faamanuiaina foi oe i le suesueina o upu a Moronae, le atalii o Mamona, o le na molimau mai i tagata faitau o aso e gata ai faapea, “Ua faaali mai outou ia te au e Iesu Keriso, ma ua ou iloa a outou mea o fai” (Mamona 8:35).O le suesueina o nei tusitusiga e mafai ona e aoao ai i le taua o le filifili e ola e tusa ai ma poloaiga ma feagaiga o le talalelei a Iesu Keriso.
O Ai na Tusia Lenei Tusi?
Na tusia e Mamona ia mataupu muamua e fitu o lenei tusi o se faamatalaga puupuu o le amioleaga ma taua i totonu o sa Nifae ma sa Lamana i ona aso.Sa ia faia foi “se tala atoa” o mea na tutupu i lona olaga atoa i papatusi lapopoa a Nifae. (Tagai Mamona 2:18; 5:9.) Ina ua “pe a ma le sefulu tausaga o” Mamona, na fai atu ai le tusi talafaamaumau o Amorona o le a iu lava ina ia te ia le tiutetauave e faamaumau “mea uma na [ia] vaaia e faatatau i lenei nuu” (Mamona 1:2, 4). Pe tusa o le 24 o ona tausaga, sa ia maua ai le vaaiga o papatusi a Nifae ma faia ai “se talafaamaumau e tusa ma upu a Amorona” (Mamona 2:17). Mulimuli ane, na amata ona tuufaatasia e Mamona ia papatusi lapopoa a Nifae, lea na i ai tusitusiga mai perofeta ma tusi talafaamaumau mai ia Liae e oo ia Amorona. Ina ua lata i le faaiuga o lona olaga, sa “natia [e Mamona]…i le maupuepue o Kumora talafaamaumau uma na tuuina mai ia te [ia] e le aao o le Alii,” vagana ai nai papatusi itiiti lea sa ia tuuina atu i lona atalii o Moronae (Mamona 6:6). Ona ia taitaiina lea o sa Nifae i la latou taua matautia mulimuli ma sa Lamana.A o le’i maliu Mamona, na ia faatonuina Moronae e faamae’a lana talafaamaumau.Na faaopoopo e Moronae tusitusiga ia o loo i ai i mataupu e 8–9 o lenei tusi.
O Anafea ma o Fea na Tusia ai?
E foliga mai na tusia e Mamona le Mamona 1–7 i le va o le T.A. 345 ma le T.A. 401 (tagai Mamona 2:15–17; 8:5–6). Na ia faaiuina ana tusitusiga ina ua mavae le taua mulimuli i le va o sa Nifae ma sa Lamana i Kumora (tagai Mamona 6:10–11).Atonu na tusia e Moronae le Mamona 8–9 i le va o tausaga T.A. 401 ma le T.A. 421, a o ia fealualuai solo mo le puipuia o [lona] ola (tagai Mamona 8:4–6; Moronae 1:1–3).