Sa apoapoai atu Moronae ia sa Lamana, faapea ma isi tagata uma o e o le a faitau i lana molimau, ina ia latou aoao mo i latou lava le moni o ana upu e ala i le ole atu i le Atua. Sa ia aoao atu faapea o se molimau i le Tusi a Mamona ma e uiga ia Iesu Keriso o le a oo mai e ala i le mana o le Agaga Paia. Sa tautino atu ma le toa e Moronae o le a ia feiloai i ana au faitau ao lei oo i le faamasinoga a le Atua, lea o le a faamaonia ai e le Atua le moni o ana afioga.
Sa apoapoai mai Moronae ia i tatou ina ia maua se molimau i le Tusi a Mamona ma ia Iesu Keriso.
Toe iloilo ia lesona amata i le Tusi a Mamona i le iunite 1 i le tusi lesona lenei. E mafai ona e manatua le faamoemoega o le maaauau i se faitotoa faaloulou ma le auala e faatatau ai le maaauau i le Tusi a Mamona? Sue i le faatomuaga o le Tusi a Mamona (o loo maua i le amataga o le tusi), ma faitau le faamatalaga mai le Perofeta o Iosefa Samita i le parakalafa lona ono.
Ata
faitotoa faaloulou ma le maaauau
Sa faamatala mai e le Perofeta o Iosefa Samita o le Tusi a Mamona o se “maaauau” o la tatou tapuaiga, o lona uiga o la tatou molimau i le Tusi a Mamona o loo uuina i luga ma faamalosia la tatou molimau e uiga i upumoni uma o le talalelei toefuataiina. Faitau le parakalafa mulimuli o le faatomuaga i le Tusi a Mamona, ma tagai mo upumoni e mafai na iloaina e se tagata e ala i le mauaina o se molimau i le Tusi a Mamona. E pei lava ona taofia i luga e le maaauau se faitotoa faaloulou, e faapefea ona taofia faatasi ma faamalosia e le Tusi a Mamona lau molimau?
Pe tusa ma le 1,400 tausaga ao lei mauaina e Iosefa Samita ia papatusi auro, sa faaiu e Moronae ia talafaamaumau a lona tama i le tusiaina o lana apoapoaiga mulimuli ia i latou o e o le a maua le Tusi a Mamona i aso mulimuli (tagai Moronae 10:1–2). O le upu apoapoai o lona uiga o le uunaia faamalosi o se tagata. E faavalu ona faaaogaina e Moronae le upu lenei i le mataupu faaiu o le Tusi a Mamona. Sa ia apoapoai atu i tagata uma o e o le a maua le Tusi a Mamona ina ia salili se molimau e uiga i lona moni ma le paia.
Faitau le Moronae 10:3–4, ma faailoa mai mea na fai mai Moronae e tatau ona tatou faia ia maua ai se molimau i le Tusi a Mamona. Atonu e te manao e faaailoga nei mea i totonu o au tusitusiga paia. Suesue ia faamatalaga nei e uiga i mea taitasi sa fai mai Moronae e tatau ona tatou faia:
“Faitau i nei mea”
O le laasaga muamua i le mauaina o se molimau e moni le Tusi a Mamona o le faitau i ai. Sa faasoa mai e Elder Tad R. Callister o le Au Peresitene o Fitugafulu le auala na faamanuiaina ai se tamaitai talavou e toatasi i le faitauina atoa o le Tusi a Mamona:
“O se tamaitai e 14-tausaga…sa fai mai o ia sa la talanoa ma se tasi o ana uo i le aoga e uiga i mea tau lotu. Sa fai atu lana uo ia te ia, O le a le lotu e te auai ai?’
Sa talu atu o ia, ‘O Le Ekalesia a Iesu Keriso o le Au Paia o Aso e Gata Ai, po o le Mamona.’
“Sa tali ane lana uo, ‘Ou te iloa le ekalesia lena, ma ou te iloa e le moni.’
“‘E faapefea ona e iloa?’ na tali atu ai.
“‘Aua,’ o le tala lea a lana uo, ‘sa ou sailiili i ai.’
“‘Na e faitauina le Tusi a Mamona?’
“‘leai,’ o le tali mai lea. ‘Ou te lei faitaua.’
“Ona tali atu lea o lenei tamaitai talavou lelei, ‘O lona uiga la e te lei sailiili i lau ekalesia, aua ua ou faitauina itulau uma o le Tusi a Mamona ma ua ou iloa ai e moni.’” (“O Le Tusi a Mamona—o se Tusi mai le Atua,” Ensign po o le Liahona, Nov. 2011, 76).
Aisea e te manatu ai o le faitauina o le Tusi a Mamona e manaomia ina ia maua ai se molimau i lona moni?
“Manatua le alofa mutimutivale o le Alii”
O le isi laasaga i le faagasologa o le “ia manatua le alofa mutimutivale a le Alii.” O le manatuaina o le alofa mutimutivale o le Alii i o tatou olaga e mafai ona faamaluluina o tatou loto ma saunia i tatou ina ia maua le Agaga Paia. Mafaufau loloto i taimi pe a e lagona ai le alofa mutimutivale o le Alii i lou olaga.
I le amataga o le Tusi a Mamona, sa folafola mai ai e Nifae e ala i ana tusitusiga o le a ia faaali mai ia i tatou ni faataitaiga o le alofa mutimutivale agamalu o le Alii (tagai 1 Nifae 1:20). I le faaiuga o le Tusi a Mamona, sa talosaga mai ai Moronae ia i tatou ina ia manatua le alofa mutimutivale o le Alii ia i tatou (tagai Moronae 10:3). Atonu e te manao e tusi ia mau faasino i le 1 Nifae 1:20 i talaane o le Moronae 10:3.
Tali fesili nei i lau api talaaga mo le suesueina o tusitusiga paia:
O le a se faamaoniga o le alofa mutimutivale o le Alii na e vaaia i lou olaga?
O le a sou manatu e faapefea e le manatuaina o le alofa mutimutivale o le Alii ona fesoasoani i se tasi ia maua se molimau i le Tusi a Mamona?
O le manatuaina o le alofa mutimutivale o le Alii i isi faapea ma i tatou lava e mafai ona saunia ai i tatou ia mafaufau loloto i le savali a le Tusi a Mamona mo i tatou.
“Mafaufau loloto i ai i totonu o lou loto”
O le isi laasaga sa aoao atu e Moronae o le “mafaufau loloto i ai i totonu o lou loto.” Sa faamatala mai e Elder Marvin J. Ashton o le Korama a Aposetolo e Toasefululua le auala e mafai ai e le mafaufau loloto ona fesoasoani ia i tatou ia maua le Agaga Paia i o tatou olaga:
“A o ou suesueina tusitusiga paia, na luia au ma faagaeetia i le upumafaufau loloto lea o loo faaaoga soo i le Tusi a Mamona. Ua fai mai lomifefiloi, o le mafaufau loloto o lona uiga o le manatunatu mamafa, manatunatu loloto,ma le mauai ma le loto i ai. … sa faaaoga e Moronae lenei faaupuga ina ua ia faaiuina lana talafaamaumau [tagai Moronae 10:3].
“O le mafaufau, e tuu atu ai e i tatou i le agaga le avanoa e faagaeetia ai ma taitai. O le mafaufau, o se sootaga malosi lea i le va o le loto ma le mafaufau. Ao tatou faitauina tusitusiga paia, e ootia o tatou loto ma mafaufau. Afai tatou te faaaoga le meaalofa e mafaufau ai, e mafai ona tatou faaaoga upumoni ia e faavavau ma iloa ai le auala e mafai ona tatou faaaogaina ai i a tatou mea e fai i aso taitasi. …
“O le mafaufau, o se gaoioiga alualu i luma faalemafaufau. O se meaalofa sili ia i latou ua latou aoao e faaaoga. Tatou te maua le poto, malamalama, ma le mea aoga pe afai tatou te faaaoga le meaalofa o le mafaufau” (“E Tele Meaalofa,” Liahona, Ian. 1988, 19 20).
Tali le fesili e tasi po o fesili uma e lua nei, i lau api talaaga mo le suesueina o tusitusiga paia:
Na faapefea ona fesoasoani le mafaufau loloto ia te oe ia lagona le Agaga Paia ao e suesue i le Tusi a Mamona?
O le a se mea e mafai ona e faia ina ia mafaufau loloto ai pea ma lelei ao e suesue i tusitusiga paia?
Ata
alii talavou o loo faitau
“Ole atu ma se loto faamaoni, manatu tonu, ma le faatuatua ia Keriso”
A “tatalo faamaoni [tagata] ma le manatu tonu i ai,” o lona uiga ia latou “faamoemoe e galulue e tusa ai ma le tali na latou maua mai le Atua” (Talai Lau Talalelei [2004], 117).
Sa aoao e se tagata e igoa ia Rodolfo Armando Pérez Bonilla le taua o le tatalo ma le manatu tonu i ai. Sa papatisoina o ia i le iva tausaga ae sa lei malosi lona aiga i le Lotu. Ina ua talavou o ia, sa amata ona ia mafaufau e uiga i le talalelei ma maua se aafiaga lenei:
“Sa i ai taimi na ou tatalo ai ia ou iloa le mea moni, ae sa pei lava ua na o se manatu faapasi ae le o se fesili faamaoni. O se tasi la po, na ou filifili ai loa e tatalo ma le ‘manatu tonu i ai.’
“Sa ou ta’u atu i le Tama Faalelagi sa ou fia iloa o Ia ma ia avea ma se vaega o Lana Ekalesia moni. Sa ou folafola atu: ‘Afai o le a ta’u mai e Lau Afio ia te au pe o Iosefa Samita o se perofeta moni ma pe moni le Tusi a Mamona, o le a ou faia soo se mea e finagalo Lau Afio ou te faia. Afai o Le Ekalesia a Iesu Keriso o le Au Paia o Aso e Gata Ai o le Ekalesia moni lea, o le a ou mulimuli i ai ma o le a lē faafitia lava.’
“Ou te lei maua se faaaliga tulaga ese, ae sa ou lagonaina le filemu ma sa ou moe loa. O ni nai itula mulimuli ane, sa ou ala ae ai ma se manatu manino lelei: ‘O Iosefa Samita o se perofeta moni, ma e moni le Tusi a Mamona.’ Sa o mai faatasi lea manatu ma se filemu e le mafaamatalaina. Sa ou toe moe, ae na ou toe ala ae mulimuli ane ma lena lava manatu ma le faalogoga lava e tasi.
“Talu mai lena taimi, ou te lei toe masalosalo lava o Iosefa Samita o se perofeta moni. Ou te iloa o le galuega lenei a le Faaola ma o le a tali mai le Tama Faalelagi ia tatou olega faamaoni” (“O Le a E Iloaina,” Liahona, Oke. 2011, 64).
Mafaufau po o le a le tele o lou manao ia maua se molimau malosi i le moni o le Tusi a Mamona. Tusi i lau api talaaga mo le suesueina o tusitusiga paia nisi o mea ua uma ona e faia e maua ai se molimau i le Tusi a Mamona. Ona tusi lea o le mea e mafai ona e faia ia maua ai se molimau malosi atili i le Tusi a Mamona.
Ata
tamaitai talavou o loo tatalo
Suesue i leMoronae 10:4, ma faailoa mai le mea na molimau mai Moronae e fai e le Atua mo i latou o e mulimuli i lenei faagasologa o le faitautusi, manatuaina, mafaufau loloto, ma le ole atu. Atonu e te manao e faailoga le folafolaga lenei i totonu o au tusitusiga paia. (Moronae 10:4–5 o se fuaitau o se mau tauloto.)
Faitau le Moronae 10:5–7, ma tagai mo le isi mea sa folafola mai Moronae e mafai ona tatou iloa e ala i le Agaga Paia.
O le mataupu faavae e tasi ua tatou aoao mai le Moronae 10:3–7 o le: Afai tatou te saili i le faatuatua, e mafai ona tatou maua se molimau i le Tusi a Mamona ma Iesu Keriso e alai le Agaga Paia. Atonu e te manao e tusi lenei mea i totonu o au tusitusiga paia i talaane o mau nei.
Fai mai nei i totonu o lau api talaaga mo le suesueina o tusitusiga paia:
Tusi le auala na faamalosia ai e le faitautusi, manatuaina, mafaufau loloto, ma le tatalo i lenei tausaga lau molimau i le Tusi a Mamona ma upumoni o loo aoao mai pe na fesoasoani ia te oe ia maua se molimau e uiga i ai.
Mafaufau e uiga i le taimi sa e lagona ai le molimau mai o le Agaga Paia ia te oe i le moni o le Tusi a Mamona po o se isi upumoni o le talalelei. E taua le manatua o le tele o faaaliga e le oo mai i se auala ofoofogia. O le toatele o tagata o le a lagona ia musumusuga filemu ma maaleale mai le Agaga Paia, e pei o se lagona mafanafana ma le filemu po o se faamautinoaga o le upumoni. O le a molimau mai foi le Agaga e uiga i le moni o le talalelei i lea mataupu i luga o lea mataupu, e fesoasoani ia i tatou ia aoao faasolosolo ai i upumoni i le aluga o taimi. Tusi e uiga i se taimi sa e lagona ai le molimau faamautinoa mai o le Agaga Paia.
Sa molimau mai Moronae o le a ia feiloai ma i tatou i le taimi o le faamasinoga a le Atua
Faitau le Moronae 10:27–29, ma mafaufau pe faapefea ona aoao e nei mau le mataupu faavae lenei: O i latou o e ua maua le Tusi a Mamona o le a tali atu i le Atua mo le latou tali i ai. Mafaufau ua e maua le avanoa e feiloai ai ma Moronae i le faamasinoga a le Atua. Mafaufau loloto i le mea o le a e tau atu ia te ia e uiga i le Tusi a Mamona ma le auala na aafia ai lou olaga.
O le taulotoina o le Moronae 10:4–5 e mafai ona fesoasoani tele ia te oe i le faasoaina atu o le savali a le Tusi a Mamona ma isi. Mafaufau e faaaoga sina taimi i le taimi nei e tauloto ai i le upu i le upu. O se tasi o auala e faia ai lenei mea o le faitau soo leotele o le fuaitau. Ona tusi auauai lea o upu faatolu i luga o se fasi pepa pe i totonu o lau api talaaga mo le suesueina o tusitusiga paia. A uma, vaai pe mafai ona e taulotoina nei mau mai lou mafaufau.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: