Mosaea 18

Folasaga

O Alema, o le sa avea ma se faitaulaga a le Tupu o Noa amioleaga, sa talitonu i upu a le perofeta o Apinati ma salamo ai i ana agasala. Ina ua mavae le maliu o Apinati, sa aoao nanā ai e Alema ia isi e uiga ia Iesu Keriso. O e na talitonu ia Alema sa mananao e o mai i le lafu a le Atua. Sa latou ulu atu i se feagaiga o le papatisoga i se nofoaga e ta’u o Vai o Mamona. A o e suesue i le Mosaea 18, vaai mo le mea na aoao mai e Alema e uiga i folafolaga e te faia pe a e papatiso, ma le mea o le a fai e le Alii mo oe pe a e tausia na folafolaga.

Mosaea 18:1–16

Ua aoao ma papatiso e Alema ia tagata

Ua Papatiso e Alema [Tagata] i le Vai o Mamona

Mafaufau i lou papatisoga. O a ni mea e te manatua e uiga i le aafiaga? Na faapefea ona e saunia mo lou papatisoga? O a ni lagona e te manatua e uiga i lou papatisoga? Mafaufau loloto i mea e te ono talisapaia atili e uiga i lou papatisoga i le taimi nei nai lo o le taimi na e papatiso ai.

Mosiaea 18 e fesoasoani tatou te malamalama ai i feagaiga tatou te faia ma le Atua i le papatisoga. O se feagaiga “o se maliliega e faia i le va o le Atua ma tagata, ae peitai latou te le faatinoa e tulaga tutusa i le maliliega. O le Atua e tuu maia tulaga mo le feagaiga, ae o tagata e malilie ia fai mea ua na ia poloaiina ai i latou e fai. Ona folafola lea e le Atua i tagata faamanuiaga mautinoa mo lo latou usiusitai” (Guide to the Scriptures, “Covenant,” scriptures.lds.org).

Ina ia iloa pe faapefea ona fesoasoani le Mosaea 18 ia tatou malamalama i feagaiga o le papatisoga, matau le otootoga lea o le mataupu lenei: Mosaea 18:1–7, Sauniuni mo le Feagaiga; Mosaea 18:8–16, Osia o le Feagaiga; ma le Mosaea 18:17–30, Ola i le Feagaiga. Atonu e te manao e tusi autu taitasi (mo se faataitaiga, Sauniuni mo le Feagaiga) i talane o fuaiupu e faatatau i ai i totonu o au tusitusiga paia.

Faitau le Mosaea 18:1–2, 6–7, vaavaai mo aoaoga ma mataupu faavae na aoao atu e Alema i tagata e fesoasoani latou te sauniuni ai mo le papatisoga. I le avanoa o loo i lalo, tusi ai pe faapefea ona fesoasoani i se tagata i aso nei, se malamalamaaga o le mea na aoao atu e Alema i ona tagata, e sauniuni ai mo le papatisoga:

Mosaea 18:8–11 o loo tusia ai le ala na fesoasoani ai Alema i ona tagata ia malamalama i folafolaga o le a latou faia ma maua e ala i le feagaiga o le papatisoga.

Tusi le ata o loo i lalo i totonu o lau api talaaga mo le suesueina o tusitusiga paia. Sue i le Mosaea 18:8–11 mo le mea na aoao atu e Alema e uiga i folafolaga tatou te faia i le Atua (mea tatou te “naunau” e fai) ma folafolaga e fai e le Atua ia i tatou pe a tatou papatiso. Tusi mea e te maua i koluma talafeagai o lau ata.

Ou te Folafola Atu	E Folafola Mai le Atua

O se tasi o mataupu faavae o le talalelei o loo manino lelei i le Mosaea 18:8–11 o le: Tatou te maua le Agaga o le Alii ma folafolaga o le ola e faavavau e ala i le faia ma le tausia o feagaiga o le papatisoga.

I le pito i lalo o le ata i lau api talaaga mo le suesueina o tusitusiga paai, tusi ai se otootoga o mea ua e aoaoina e uiga i le taua o le faia ma le tausia o feagaiga o le papatisoga.

Faitau le faamatalaga lenei mai ia Elder Joseph B. Wirthlin o le Korama a Aposetolo e Toasefululua ma vase lalo o faamanuiaga e oo mai ia i tatou a o tatou malamalama i folafolaga tatou te faia ma maua i le papatisoga: “Ua ou matauina i lo’u olaga atoa, a malamalama lelei tagata i faamanuiaga ma le mana o o latou feagaiga o le papatisoga, e tusa pe o ni tagata fou liliu mai po o ni tagata na ola i le Ekalesia, e oo mai le olioli tele i o latou olaga ma latou te agai atu i o latou tiute i le malo ma le naunautai e pepesi” (“Alma the Elder: A Role Model for Today,” i le Heroes from the Book of Mormon [1995], 84).

Tusi i lau api talaaga mo le suesueina o tusitusiga paia, e faatatau i le ala e mafai ai e lau feagaiga o le papatisoga ona aafia ai le ala e te ola ai i aso taitasi. (Mo se faataitaiga, mafaufau i lau folafolaga e “tu atu o se molimau a le Atua i taimi uma” a o faatatau i le auala o loo e fegalegalea’i ai ma isi, e aofia ai le ala e te faia ai tagata o lou aiga, ma mea tou te talanoaina ma au uo ma e masani, o le gagana e te faaaogaina, o ituaiga tifaga po o ata o le televise e te matamata ai, o musika e te faalogologo i ai, fegalegaleaiga faaagafesootai ma tafaoga faamasani, ma le ala e tali atu ai ia i latou e faitioina ou talitonuga.)

Ia suesue ma le totoa le Mosaea 18:12–16, ma faailoa ni faataitaiga o le ala na faataunuu ai e le Alii ia Lana vaega o le feagaiga ma Alema ma ona tagata ina ua uma o latou papatisoga. Atonu e te manao e faailoga mea e te maua.

Tusi i lau api talaaga mo le suesueina o tusitusiga paia, e uiga i se taimi na e lagona ai le faamanuiaina o oe e le Alii i Lona Agaga Paia a o e tausia le folafolaga na e faia i le papatisoga e auauna atu ia te Ia.

Mosaea 18:17–30

Ua faatu e Alema le Ekalesia a Iesu Keriso i le nuu

E faafia ona e mafaufau i feagaiga na e faia i le papatisoga ma toe faafou pe a e tagofia le faamanatuga? E tatau ona faafia ona e mafaufau i ai? O le a le taimi e masani ona e faaaluina e mafaufau ai i nei feagaiga?

Na aoao mai e Peresitene Henry B. Eyring o le Au Peresitene Sili le taua o le tausia o a tatou feagaiga faatasi ma le Alii: “O le Au Paia o Aso e Gata Ai o se tagata o le feagaiga. Mai le aso o le papatisoga e oo atu i faatumutumuga faaleagaga o o tatou olaga, tatou te faia ai ni folafolaga i le Atua ae Ona faia ni folafolaga ia i tatou. Na te tausia i taimi uma Ana folafolaga e tuuina mai e ala mai i Ana auauna faatagaina, ae o le suega taua o o tatou olaga o le vaai lea pe o le a tatou faia ma tausia a tatou feagaiga ma Ia” (”Witnesses for God,” Ensign, Nov. 1996, 30).

Faitau le Mosaea 18:17–18, 20–23, 27–29, ma vaai pe o a auala na tausia ai e tagata o le Ekalesia i aso o Alema a latou feagaiga o le papatisoga. Atonu e te manao e faailoga upu ma fasifuaitau faapitoa i le Mosaea 18:22, 26, 30 o loo faailoa mai ai e oo mai faamanuiaga silisili ia i latou o e tausia a latou feagaiga o le papatisoga.

Tali fesili nei i lau api talaaga mo le suesueina o tusitusiga paia: O le a se mea e tasi o le a e faia e tausi lelei atili ai feagaiga na e faia i le papatisoga? O le a faapefea ona e tausia lenei tautinoga?

Mosaea 18:31–35

O i latou e auai i le Ekalesia ua sosola ese mai sauaga a le Tupu o Noa

Suesue i le Mosaea 18:31–33 e iloa ai le mea na fai e le Tupu o Noa i le aai o Liae-Nifae a o olioli Alema ma lona nuu i faamanuiaga e tele i talaane o le Vaitafe o Mamona. Faitau le Mosaea 18:34 sosoo ai ma le Mosaea 23:1–2 e iloa ai pe na faapefea ona “logoina” Alema e uiga i le matautia na feagai ma lona nuu.

Fuafua e tusi lenei upumoni i talane o le Mosaea 18:34: E mafai e le Alii ona lapataia e e amiotonu pe a latou i ai i mea matautia.

Faitau le aafiaga lenei na faasoa mai e Elder Neil L. Andersen o le Korama a Aposetolo e Toasefululua e faamanino ai lenei upumoni:

“A o faigaluega o ia o se leoleo faapitoa mo Leoleo Nana [FBI], na suesueina e la’u uo se vaega solitulafono sa fela’ua’ia fualaau faasaina i totonu o le Iunaite Setete.

“I se tasi aso, sa la o atu ai ma se isi leoleo i se fale sa la talitonu sa i ai se alii sa tufatufaina atu fualaau faasaina o le kokeini. Na faamatalaina e la’u uo le mea na tupu:

“Sa ma tu’itu’i i le faitotoa o le alii ua masalomia i fualaau faasaina. Sa tatala mai e le alii ua masalomia le faitotoa, ma ina ua ia vaai mai ia i ma’ua, sa taumafai loa ia pupuni i ma’ua ina ia aua nei o ma iloa atu totonu o le potu. Ae sa tuai; sa mafai ona ma iloaina atu kokeini i luga o lana laulau.

“‘Sa faatopetope ona tapena ese e se alii ma se tamaitai sa i ai i le laulau ia kokeini. E tatau ona ma taofia mai i la’ua mai le faaleagaina o faamaoniga, o lea sa vave ai ona ou tuleieseina le alii na masalomia lea sa taofiofia le faitotoa. A o ou tuleia o ia, sa maua lelei e ona mata la’u vaai. O le mea uiga ese sa i ai, sa leai sona foliga ita pe fefe foi. Sa ia ataata mai ia te au.

“‘O ona mata ma lana ataata e faaleano i ai, na ou maua ai se lagona e le leaga o ia, o lea na ou tuua ai o ia ae ou savali atu i le laulau. O le taimi lea ua tu ai le alii solitulafono i o’u tua. Ma o le taimi lava lena, na oo mai ai se lagona mautinoa ma le malosi i lo’u mafaufau: “Faaeteete i le tiapolo o loo i tua o mata ataata.”

“‘Sa vave ona ou toe faliu atu i le alii solitulafono. O lona lima o loo i totonu o lana taga pito i luma. Na vave ona ou mau i lona lima ma toso mai i fafo o lana taga. O le taimi lena na faatoa ou vaai ai, o uu i lona lima se tamai fana otometi ua saunia o le a faapa. Na sosoo ai ma ni gaoioiga faavavave lea na ou aveesea mai ai le fana i le alii.” …

“… Sa lapatai e le Agaga Paia la’u o e uiga i le matautia faaletino; o le a lapatai foi oe e le Agaga Paia e uiga i matautia faaleagaga” (“Beware of the Evil behind the Smiling Eyes,” Ensign po o le Liahona, Me 2005, 46–47).

Tusi i lau api talaaga mo le suesueina o tusitusiga paia, e uiga i ni lagona e maua mai le Agaga Paia po o ni aafiaga e te manatuaina lea na lapataia ai oe pe puipuia ai oe mai mea matautia faaletino pe faaleagaga, pe tusi e uiga i aafiaga o se tasi e te iloa pe na e faitau, pe faalogo i ai.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mosaea 18 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: