Enosa

Folasaga

Ina ua mavae le tomanatu ai i upu a lona tama, na tatalo Enosa mo ma maua se faamagaloga o ana agasala. Ona ia tatalo lea mo le manuia faaleagaga o sa Nifae ma sa Lamana ma faaalu lona olaga e galue ai mo lo latou faaolataga.

Enosa 1:1–8

Ina ua mavae le tomanatu ai i upu a lona tama, ua tatalo Enosa mo ma maua se faamagaloga o ana agasala.

Faitau le Enosa 1:1, 3, ma matau le faatosinaga a Iakopo na i ai ia Enosa. E ui o Enosa o le atalii ma se atalii o le atalii o perofeta, sa manaomia lava lona maua o le mana o le Togiola a Iesu Keriso mo ia lava.

Mafaufau i se taimi na e lagonaina ai le matuai fiaai lava. Li’o ni isi o upu o loo i lalo e faamatala ai ou lagona pe a e fia ai:

gaogao
vaivai
le maona
matelaina
tiga
popole
o se mea e momoo i ai

Faailoga valivali le fasifuaitau “sa matelaina lo’u agaga” i le Enosa 1:4. O le a sou manatu i le uiga o lenei fasifuaitau?

O le fasifuaitau “sa matelaina lo’u agaga” e ono aofia ai lagona e pei o le gaogao faaleagaga po o le tiga po o se manao ia maona faaleagaga. Sa tusi Enosa e uiga i se taimi sa ia oo ai i lenei ituaiga o fiaai faaleagaga. Sa ia tusia e faapea o upu a lona tamā “sa gotouga ifo i [lona] lota” (Enosa 1:3). A o ia tomanatu i na upu, sa oo ia te ia le manao lea na taitai atu ai o ia e galue i le faatuatua. O ana faatinoga faamaoni na aumai ai suiga i lona olaga ma faamanuiaga mai le Alii.

Amata se soloaiga o galuega e fesoasoani e te malamalama ai i le aafiaga a Enosa ma faatatau ai i lou olaga e ala i le vaevaeina o se itulau atoa o lau api talaaga mo le suesueina o tusitusiga paia i ni vaega se ono ma faaigoa vaega taitasi faapenei:

O le mea na manao i ai Enosa:	O le mea ou te manao i ai:
O le mea na faia e Enosa:	O le mea e tatau ona ou faia:
O le mea na oo i ai Enosa:	O lo’u aafiaga:

Faitau le Enosa 1:2–3, ma vaai mo fasifuaitau i fuaiupu taitasi o faaalia ai le mea na manao Enosa ia i ai i lona olaga. Tusi fasifuaitau nei i le vaega ua faailogaina “O le mea na manao i ai Enosa” i le siata o loo i totonu o lau api talaaga mo le suesueina o tusitusiga paia.

O le manao o Enosa mo se faamagaloga o ana agasala e fesoasoani tatou te malamalama ai i le uiga o lana faamatalaga i le Enosa 1:4 ina ua ia tusia, “Sa matelaina lo’u agaga.” E faaopoopo atu i le matelaina mo le faamagaloga, sa manao foi Enosa i le “ola e faavavau, ma le olioli o le au paia” (Enosa 1:3). Sa ia manao ia lagona le fiafia lea e oo mai mai le agavaa ia faatasi ma le Alii ma isi o e e amiotonu.

Mafaufau pe o ia te oe nisi o ia lava foi lagona o le matelaina faaleagaga na faamatalaina e Enosa. I lau siata i le api talaaga mo le suesueina o tusitusiga paia, i le vaega ua faailogaina “O le mea ou te manao i ai,” tusi ai e uiga i nisi o manaoga faaleagaga o loo e matelaina ai i lou olaga.

O le manao o Liae na taitai atu ai o ia e faaaoga lona faatuatua ma gaoioi. I le Enosa 1:2, sue ma faailoga le upu na faaaoga e Enosa e faamatala ai le taumafaiga sa ia faia. Ia matau sa le’i fagatua Enosa ma le Atua ae o luma o le Atua i le tatalo. O se fagatuaga faapena e aofia ai se tauiviga faalemafaufau ma faaleagaga e faaali atu ai i le Tama Faalelagi le faamaoni o lo tatou manao ma lo tatou naunautai e salamo ma faia suiga talafeagai i o tatou olaga. I le Enosa 1:4, na tusia ai e Enosa nisi o faamatalaga auiliili e faamatala ai lana fagatuaga.

Faitau le Enosa 1:4, ma faailoga ia mea na fai e Enosa e faaali ai sa faamaoni o ia a o ia sailia se faamagaloga o ana agasala. Lisi mea e te maua i lalo o le “O le mea na fai e Enosa” i le siata o loo i lau api talaaga mo le suesueina o tusitusiga paia.

O le upu faatauanau i le Enosa 1:4 o lona uiga o le ole atu ma le faamaualalo ma le manao tele. O a tatou tatalo atonu e le tau uumi e pei o le tatalo a Enosa, ae e tatau ona faamaoni.

I le siata o loo i lau api talaaga mo le suesueina o tusitusiga paia, i lalo “O le mea e tatau ona ou faia,” tusi ai ou manatu e uiga i le ala e mafai ona e faaali atu ai i le Alii lou faamaoni a o e tatalo ma saili Ana faamanuiaga faaleagaga.
O taumafaiga faatuatua ma faamaoni a Enosa na taitai atu ai i faamanuiaga silisili i lona olaga. Faitau le Enosa 1:5–8, ma faailoga le mea na oo ia Enosa. Lisi ia mea i le vaega “O le mea na tupu ia Enosa” o le siata i lau api talaaga mo le suesueina o tusitusiga paia. A o e faitau i fuaiupu e 5 ma le 6, ia matau le ala na iloa ai e Enosa ua faamagaloina o ia. O le leo na ta’ua i le fuaiupu e 5 sa o se leo na sau mai le mafaufau o Enosa (tagai Enosa 1:10).

Enosa 1:7–8 ua aoao mai e faapea a o faaalia lo tatou faatuatua ia Iesu Keriso, e mafai ona faamagaloina a tatou agasala ma faaatoatoaina i tatou. O lo tatou manao e alualu i luma, o a tatou tatalo faamaoni, ma a tatou taumafaiga ia salamo o auala ia e mafai ona faaali atu ai lo tatou faatuatua ia Iesu Keriso.

Na faamalamalama mai e Peresitene Dieter F. Uchtdorf o le Au Peresitene Sili le ala e mafai ona tafiesea ai lo tatou nofosala a o faaali atu lo tatou faatuatua ia Iesu Keriso ma salamo i a tatou agasala:

“O le taimi lava tatou te salamo moni ai, o le a aveese e Keriso le avega o le tausalaga ona o a tatou agasala. E mafai ona tatou iloa mo i tatou lava ua faamagaloina i tatou ma ua faamamaina. O le a faamaonia mai ia i tatou e le Agaga Paia lena mea; O Ia o Le Faapaiaina. E leai se isi molimau o le faamagaloga e mafai ona sili atu. …

“[Ua fetalai mai le Alii], ‘Faauta, o le ua salamo i ana agasala e faamagaloina o ia, ma o au le Alii, ou te le toe manatua lava’ (MF&F 58:42).

“O le a taumafai Satani e faatalitonu i tatou e le faamagaloina a tatou agasala ona e mafai ona tatou manatua i latou. O Satani e pepelo; e taumafai e faanenefu la tatou vaai ma taitai ese i tatou mai le ala o le salamo ma le faamagaloga. E le’i folafola mai le Atua e faapea o le a tatou le manatua a tatou agasala. O le manatuaina o le a fesoasoani ia i tatou e aloese ai mai le toe faia o ia lava mea sese. Ae afai tatou te tumau i le amio sa’o ma le faamaoni, o le manatuaina o a tatou agasala o le a faamāmāina i le aluga o taimi. O lenei mea o le a avea ma se vaega manaomia o le faagasologa o le faamalologa ma le faapaiaga” Ensign po o le Liahona, Me 2007, 101).

Ina ia fesoasoani ia te oe e faaaoga upu a Peresitene Uchtdorf, manatunatu i fesili nei: O le a se taimi na e lagona ai na faamagalo oe e le Alii i au agasala? Na faapefea ona e iloa ua faamagaloina oe? Pe na e lagonaina ea le faamagaloga a le Alii talu ai nei?

A uma ona mafaufau loloto i fesili o loo i luga, tusi i le vaega “O lo’u aafiaga” i le siata o loo i lau api talaaga mo le suesueina o tusitusiga paia lou aafiaga ma lagona o le faamagaloina. Pe e mafai foi ona e tusi e uiga i le mea e te faamoemoe e tupu a o faaali lou faatuatua ia Iesu Keriso.

Enosa 1:9–27

Ua tatalo Enosa mo sa Nifae ma sa Lamana ma galulue faatasi ma isi mo lo latou faaolataga

O le ata lenei ua faaalia ai le tatalo a Enosa. Sa muamua tatalo ia mo ia lava ona faalautele atu ai lea o ana tatalo ia aofia ai isi. Faitau le Enosa 1:9–10, ma faailoga i au tusitusiga paia pe mo ai na tatalo ai Enosa mo le taimi lona lua. Faitau le Enosa 1:11–14, ma faailoga pe mo ai na tatalo ai Enosa mo le taimi lona tolu.

Tali i fesili nei i lau api talaaga mo le suesueina o tusitusiga paia: E faavae i le faamatalaga a Enosa e uiga i faamoemoega o sa Lamana i le Enosa 1:14, o le a le mea e faagaeetia ai oe e uiga i lana tatalo mo i latou?

Tatou te aoao mai le faataitaiga a Enosa a o tatou maua faamanuiaga o le Togiola a Iesu Keriso, o le a tatou taumafai e fesoasoani atu i isi ia maua le faaolataga. Ina ia fesoasoani ia e manatua lenei upumoni, atonu e te manao e tusi uma po o ni vaega foi o le faamatalaga lenei mai ia Peresitene Howard W. Hunter i autafa o au tusitusiga paia:

“O soo se taimi lava tatou te mauaina ai faamanuiaga o le Togiola i o tatou olaga, o le a faigata ona taofia le i ai o so tatou popolega mo le manuia o o tatou uso. …

“O se faailoga sili lava o le liuaina o se tagata lava ia, o le popolega e faasoa atu le talalelei i isi” (The Teachings of Howard W. Hunter, ed. Clyde J. Williams [1997], 248–49).

Faitau le Enosa 1:19–20, 26, ma faailoga upu po o fasifuaitau e faaalia ai le faamaoni o le manao o Enosa mo sa Nifae ma sa Lamana ina ua uma ona tatalo mo i latou.

Faitau le Enosa 1:27, ma vaai mo faamaoniga o le olioli na oo i ai Enosa ona o ana taumafaiga ma le faamautinoaga na ia maua o le ola e faavavau.

Ina ia fesoasoani ia te oe e faaaoga mea ua e aoaoina i lenei lesona, ia filifili ma le agaga tatalo se auala se tasi pe sili atu e mafai ona e mulimuli ai i le faataitaiga a Enosa. Filifili se faamatalaga o loo i lalo, ma ona faatumu lea i lau api talaaga mo le suesueina o tusitusiga paia:
1. E pei o Enosa, ou te manao e maua se faamagaloga o a’u agasala. O le a ou faaali atu i le Alii ou te faamaoni i lenei manao e ala i le …
2. E pei o Enosa, ou te manao e fesoasoani i tagata o lo’u aiga ma uo ia o mai ia Iesu Keriso. O le tagata e toatasi o le a ou taumafai e fesoasoani i ai o (igoa o le tagata). O le a ou taumafai e fesoasoani i lenei tagata e ala i le …
3. Sa tatalo Enosa mo sa Lamana, o e e mafai ona faapea o ona fili. E pei o Enosa, ou te manao e faaali atu le alofa o le Alii ia i latou o e e agaleaga mai ia te a’u. O se auala o le a ou faia ai lenei mea o le …

Taumafai ia ausia mea ua e tusia i lau api talaaga mo le suesueina o tusitusiga paia. A o faaali lou faatuatua i le Togiola a Iesu Keriso ma salamo, e mafai ona e maua le faamagaloga, olioli, ma se manao faateleina e fesoasoani atu i isi.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Enosa 1 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: