Iunite 15: Aso 2
Alema 5:37–62
Folasaga
A o faaauau ona talai Alema i Saraemila, sa ia lapataia tagata e faapea o a latou faaiuga e usiusitai pe teena ana upu o loo i ai ni faamanuiaga faapitoa po o ni taunuuga. Sa ia fautuaina i latou e tali atu i le siufofoga o le Leoleo Mamoe Lelei, o le Alii o Iesu Keriso, o le ua valaau atu ia te i latou ma finagalo ina ia toe aumaia i latou i Lana lafu. A o e suesue i lenei lesona, mafaufau pe faapefea e le mulimuli i le siufofoga o le Leoleo Mamoe Lelei ona fesoasoani ia te oe e aloese ai mai mea eleelea o le lalolagi ma toe foi atu e faatasi ma le Atua.
Alema 5:37–42, 53–62
Ua valaaulia e Alema tagata uma e mulimuli i le Leoleo Mamoe Lelei, o le Faaola lea.
I tusitusiga paia, o Iesu Keriso e taua i nisi o taimi o le “Leoleo Mamoe Lelei” (tagai Ioane 10:11–15). Aisea e te manatu ai o le leoleo mamoe lelei o se faatusa lelei lea o le Faaola? Sa tuuina mai e Peresitene Ezra Taft Benson le faamatalaga lenei i leoleo mamoe anamua:
“I le vaitaimi o Iesu, sa lauiloa le leoleo mamoe Palesitina i lana puipuiga o ana mamoe. E le pei o leoleo mamoe i ona po nei, ae e masani lava muamua i luma le leoleo mamoe i lana lafu mamoe. Na te taitai i latou. E silafia e le leoleo mamoe mamoe taitasi o lana lafu, ma e tofu lava le mamoe ma lona igoa. E iloa foi e mamoe lona leo ma faatuatuaina o ia, ma e le mulimuli lava i se tagata ese. O lea, pe a valaauina, ona mulimuli lea o i latou ia te ia. (Tagai i le Ioane 10:14–16.)
“Pe a pogisa, ona taitai lea e leoleo mamoe a latou mamoe i le mea e tuu ai le lafu mamoe. E siomia i ni pa maualuluga le mea o i ai le lafu, ma tuu ai ni laau matuitui i luga o ia pa puipui e puipuia ai manu feai ma tagata gaoi mai le feaei mai luga.
“Ae ui i lea, o nisi taimi, a fia aai tele nei manu feai, ona feosofai mai lea i luga o pa ma faamatau i mamoe. O se tulaga faapea e tuu eseese ai le leoleo moni—o le ua alofa i ana mamoe—mai le auauna—o le ua na ona galue mo le taui.
“O le leoleo mamoe moni, na ia naunau e ofoina atu lona ola e sui ai ana mamoe. E alu atu o ia i le mea o i ai mamoe ma tau mo lo latou saogalemu. Peitai, pe a fai i se isi itu, o le auauna, ua taua ia te ia lona lava saogalemu nai lo o mamoe, ma sola ese.
“Sa faaaogaina e Iesu lea faataitaiga o ona aso e tau atu ai o Ia lava o se Leoleo Mamoe Lelei, o le Leoleo Mamoe moni. Ona o Lona alofa mo Ona uso ma tuafafine, ua Ia ofoina atu ai Lona ola mo i latou. (Tagai i le Ioane 10:17–18.)” (“O Se Valaauga i le Perisitua: ‘Ia Fafaga I Au Mamoe,’” Liahona, Iulai 1983, 74).
Tusi ni tali pupuu mo fesili nei o loo i lenei lesona:
-
O le a se mea e ono tupu i mamoe pe afai e latou le faalogo i le leoleo mamoe?
-
E faapefea ona avea i tatou e faapei o mamoe, ma e faapefea ona avea le Faaola e faapei o lo tatou leoleo mamoe?
-
O le a le uiga o le aumai i Lana lafu? (tagai Alema 5:60).
I le Alema 5:37, na faamatala e Alema tagata o Saraemila o ni mamoe ua “o ese.” Faitau Alema 5:37–42, ma vaavaai mo mea na aoao atu e Alema e uiga i le faalogo i le siufofoga o le Faaola.
-
Tusi tali i fesili o loo mulimuli mai, i lau api talaaga mo le suesueina o tusitusiga paia:
-
Suesue le Alema 5:37–38, ma faamatala ia oe lava upu mea na aoao atu e Alema e uiga i taumafaiga a le Faaola e valaau mai ia i tatou e mulimuli atu ia te Ia.
-
I le Alema 5:41, o a mea sa aoao atu e Alema e uiga i le ala e mafai ai ona tatou iloa po o tatou faalogo i le siufofoga o le Leoleo Mamoe Lelei? O a nisi o “galuega lelei” e ono iloa ai o se talavou o le Au Paia o Aso e Gata Ai o loo mulimuli i le Leoleo Mamoe Lelei?
-
O le iloa ma le mulimuli i le siufofoga o le Faaola e le faigofie i taimi uma. Manatunatu loloto i le faamatalaga a Elder Dallin H. Oaks o le Korama a Aposetolo e Toasefululua: “Mai leo e tele tatou te faalogo ai le olaga faaletino, e tatau ona tatou maitaua le siufofoga o le Leoleo Mamoe Lelei, o le valaau mai ia tatou e mulimuli atu ia te ia agai i lo tatou aiga faalelagi” (“O Isi Leo,” Liahona, Iulai 1989, 35).
Faitau Alema 5:53–56, ma faailoga uiga ma amioga atonu e faafaigata ai mo se tasi ona faalogo atu i le siufofoga o le Faaola.
Ia mafaufau i nisi o uiga po o amioga i le lalolagi i nei ona po ua faafaigata ai i tagata ona faalogo i le siufofoga o le Faaola. Faamatala puupuu pe aisea ua e manatu ai o nei uiga ma amioga ua faafaigata ai mo se tasi ona faalogo i le siufofoga o le Faaola:
I le Alema 5:57, faailoga le fasifuaitau “outou uma o e e fia mulimuli i le siufofoga o le leoleo mamoe lelei.” Ona faailoga lea o isi fasifuaitau e tolu i le fuaiupu 57 o lo o tau atu ia te oe mea e mafai ona e faia e mulimuli ai i le siufofoga o le Faaola.
-
E pei ona faamaumauina i le Alema 5:58–60, sa aoao atu e Alema lenei upumoni: Afai tatou te mulimuli i le siufofoga o le Alii (le Leoleo Mamoe Lelei), o le a faapotopotoina i tatou i Lona malo. Faailoga ia folafolaga po o faamanuiaga i le Alema 5:58–60 o i latou e mauaina se tofi i le itu taumatau o le Atua o le a maua.
-
Ao e mulimuli i le siufofoga o le Faaola, o le a e maua nei faamanuiaga ma mulimuli ane maua faamanuiaga o le faaeaga.
Alema 5:43–52
Ua faamatala e Alema le ala na ia maua ai se molimau ma aoao atu e uiga i le salamo
Mafaufau i se mea sa e aoaoina e ala i ou faalogona faaletino taitasi e lima: vaai, faalogo, tago, sogisogi, ma le tofo. E i ai se auala e mafai ai ona e iloa se mea e aunoa ma le faaaogaina o se tasi o ou faalogona faaletino? Faitau le Alema 5:45–48, ma vaavaai mo mea na tautala i ai Alema na ia iloa ma le auala sa ia iloa ai.
Faailoga i le Alema 5:48 mea na aoao atu e Alema e uiga ia Iesu Keriso. O le savali o le Alema 5:45–48 e mafai ona aotele faapenei: E mafai ona tatou iloa mo i tatou lava, e ala i le Agaga Paia, o Iesu Keriso o le Togiola o tagata.
E feagai tagata uma ma luitau i lo latou faatuatua ma le molimau. O le i ai o lau oe lava molimau o le moni o le talalelei e ala i le mana o le Agaga Paia e mafai ai ona faamalosia oe i le aluga o na taimi luitauina. O le manatua o lau lava molimau i le Agaga Paia, e pei ona sa faia e Alema, e mafai ona fesoasoani ia te oe e te tu mausali ai i le taimi o se luitau. E mai le faataitaiga a Alema, e mafai foi ona tatou aoao ai o le anapogi ma le tatalo e mafai ona fesoasoani ia i tatou e lagona le Agaga ua toe faamautu mai le upumoni ma lagolagoina a tatou molimau pe a manaomia ona faamalosia.
Manatunatu loloto i la oe lava molimau a o e faitau i le upu sii lenei ma ia Elder M. Russell Ballard o le Korama a Aposetolo e Toasefululua o loo fautuaina i tatou e saili ia tatou lava molimau ia Iesu Keriso: O molimau taitoatasi, ma faaletagata lava ia o le moni o le talalelei, aemaise le soifua paia ma le galuega a le Alii o Iesu Keriso, e taua mo lo tatou ola faavavau. “Ma o le ola e faavavau foi lenei,’ sa fetalai mai ai le Faaola, ‘ia latou iloa oe le Atua moni e toatasi, atoa ma le ua e auina mai, o Iesu Keriso lea’ [ Ioane 17:3]. I nisi faaupuga, o le ola faavavau ua tautino mai i lo tatou malamalama taitoatasi e uiga i lo tatou Tama oi le Lagi ma Lona Alo Paia. E le lava le na o le iloa o i la’ua. E tatau ona i ai se tomai faaleagaga o le tagata lava ia tatou te taula ai ” (“Talisua i le Laoai A Le Alii,” Liahona, Iulai 1996, 80).
-
-
Tusi e faatatau i se taimi na e faalogo ai i se tasi o faasoa atu se molimau malosi, e ala i le mana o le Agaga Paia, o Iesu Keriso o le Togiola o tagata. Tusi ou lagona a o e faalogo i lenei molimau.
-
Faitau le Alema 5:46, ona tusi lea i au lava upu pe na faapefea ona maua e Alema lana molimau ia Iesu Keriso. Mafaufau pe mafai faapefea ona e mulimuli i le faataitaiga a Alema e fesoasoani e faamalosia ai lau molimau i le Faaola, ma tusi ou manatu.
-
Ia tusi e uiga i se taimi sa e lagona ai le Agaga Paia ua molimau ia te oe o Iesu Keriso o le Togiola o le lalolagi. Tusi se sini faapitoa o le a fesoasoani ia te oe e maua pe faamalosia ai lau molimau i le Faaola, e pei o le anapogi po o le tatalo ma le faatauanau po o le suesue i tusitusiga paia ma le agaga atoa. Galue ina ia faataunuuina lenei sini, e tusa lava pe faia i le “tele o aso” (Alema 5:46). (O le faamaeaina o lenei gaoioiga e mafai foi ona fesoasoani ia te oe e faataunuu ai se mea e manaomia o le Alualu i Luma o le Tagata Lava Ia po o le Tiute i le Atua.)
-
Faitau le Alema 5:49–52, ma vaavaai mo mea na aoao atu e Alema i tagata e uiga i le salamo. I totonu o avanoa o lo o tuuina atu, faamatala pe aisea ua e manatu ai e tatau i tagata uma ona salamo ina ia mafai ona nonofo e faavavau ma le Tama Faalelagi ma Iesu Keriso:
Ua valaauina i tatou e Elder Dallin H. Oaks ina ia mafaufau i ni fesili e mafai ona fesoasoani ia i tatou e faaaoga ai mea na aoao atu e Alema e uiga i le salamo ma saunia ai e ulufale atu i le malo o le Atua:
“E faapefea pe afai o taeao e afio mai ai o Ia? Afai sa tatou iloa o taeao le aso tatou te faafetaia’i ai i le Alii —e ala i lo tatou oti faafuasei, po o Lona toetu faafuase’i mai foi —o le a sa tatou mea e fai i le aso? O a ni mea o le a tatou tautau atu? O a ni mea o tatou faia o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?
“Afai o le a tatou faia na mea i lena taimi, aisea e le fai ai nei loa? Aisea e le sailia ai le filemu a o mafai ona maua? Afai ua lata ina uma a tatou lamepa o sauniuniga, ia tatou amata nei loa ona toe utu? (“Sauniuniga mo le Afio Mai Faalua,” Ensign po o le Liahona, Me 2004, 9).
-
Mafaufau ma le tatalo pe faapea ona e ola ai i mea ua e aoaoina i lenei aso ina ia mafai ona saunia ai oe e feiloai ma le Faaola ma ulufale atu ai i Lona malo.
-
Ua ou suesueina le Alema 5:37–62 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: