Folasaga i le Moronae
Aisea e Suesue ai Lenei Tusi?
A o e suesue i le tusi a Moronae, e mafai ona e maua le malosi mai le faataitaiga mamana ma le molimau a Moronae. E le gata i lea, o aoaoga mai a Moronae ma lona tama, o Mamona, o le a e aoao ai e uiga i sauniga faavae ma gaoioiga a le Ekalesia a Iesu Keriso, i -le taua o le faia o galuega amiotonu ma le manatu tonu i ai, o le auala e faamasino ai le lelei ma le leaga, ma le fesootaiga i le va o le faatuatua, faamoemoe, ma le alofa mama. O le a e faitau foi i apoapoaiga a Moronae ia tatalo ina ia e iloa ai mo oe lava ia e moni le Tusi a Mamona ma ia “o mai ia Keriso, ma faaatoatoaina ia te ia” (Moronae 10:32).
O Ai na Tusia Lenei Tusi?
Sa tusia e Moronae lenei tusi, lea e aofia ai ana upu, o afioga a Iesu Keriso i Ona soo e toasefululua (tagai Moronae 2), ma upu a lona tama, o Mamona (tagai Moronae 7–9). Ao lei oo mai le faaumatiaga o sa Nifae, sa auauna atu Moronae o se militeli ma se taitai o le Ekalesia ia i latou (tagai Mamona 6:12; Moronae 8:1). Faapei o isi tusitala autu ma e na tuufaatasia le Tusi a Mamona, sa avea Moronae o se molimau o le Faaola. Sa ia molimau mai: “Sa ou vaai ia Iesu, ma sa ia fetalai mai ia te au faafesagai lava” (Eteru 12:39). Sa faamaoni Moronae i lana molimau ma faamamafa mai lona naunautaiga ina ia fasiotia nai lo le teena o Keriso (tagai Moronae 1:1–3).
I le 1823, pe tusa ma le 1,400 tausaga ina ua uma ona ia faamaeaina le talafaamaumau o le Tusi a Mamona, sa faaali Moronae i le Perofeta o Iosefa Samita o se tagata toetu ma tau atu ia te ia o loo tanuina le talafaamaumau i se mauga e latalata i le fale o Iosefa Samita. I lena taimi ma le aluga o le tele o tausaga na sosoo ai, sa faatonuina e Moronae Iosefa Samita “e faatatau i mea o le a faia e le Alii, ma pe faapefea ma o le a le ala e taitaia ai lona malo i aso e gata ai” (Iosefa Samita—Talafaasolopito 1:54).
O Anafea ma o Fea na Tusia ai?
Masalo sa tusia ma tuufaatasia e Moronae lenei tusi i le va o tausaga T.A. 401 ma le T.A. 421 (tagai Mamona 8:4–6; Moronae 10:1), a o ia fealualuai solo mo le puipuiga o [lona] ola (tagai Mamona 1:1–3).