Folasaga i le Polokalama o Suesuega e Fai i le Aiga a le Seminare
Ua mamanuina le polokalama o suesuega e fai i le fale a le seminare e fesoasoani ai e faamalosia lou malamalama o le talalelei a Iesu Keriso ma faaaoga ona aoaoga i lou olaga i aso uma e ala i le suesueina o tusitusiga paia. Mo au suesuega i lenei tausaga faaleaoaoga, o le a muamua ona e faamaeaina ni galuega atofaina faitau mai le tusiga o tusitusiga paia mo lenei kosi—o le Tusi a Mamona—ona e faamaeaina lea o lesona taitasi. E faatasi i le vaiaso e te lua feiloai ai ma se faiaoga o le seminare e auina atu lau galuega ma e auai i se lesona se tasi o le vaiaso.
O le seminare o se polokalama o aoaoga faalelotu i aso taitasi. O le suesueina ma le agaga tatalo o au tusitusiga paia e tatau ona avea ma se masani o aso uma. O le a manaomia ona e galue i au galuega atofaina o le seminare i aso taitasi faaleaoaoga, e ui lava o le a e le auai i se vasega seminare i aso taitasi. E 32 iunite e ao ona faamaeaina i le kosi atoa. O le siata o le faitauga i le itulau viii ua faaalia ai mea e tatau ona e suesueina mo iunite taitasi. O le a fesoasoani lou faiaoga ia te oe ia e malamalama i le taimi e faagata ai iunite taitasi. O lesona taitasi i totonu o lenei taiala suesue e tatau ona alu ai le 30 minute e faamaea ai, e faaopoopo atu i au suesuega faaleaso o tusitusiga paia.
E tatau ona lua ni au api talaaga mo le suesueina o tusitusiga paia (pe lua foi api o tusigamanatu), e ese mai lau oe lava ia api talaaga patino, ia o le a e tusia ai galuega atofaina mai gaoioiga o le taiala suesue. O vaiaso taitasi ia e te lua feiloai ai ma lou faiaoga, e tatau ona e avatua i ai le api talaaga mo le suesueina o tusitusiga paia o loo i ai galuega atofaina ua maea mai gaoioiga o le taiala suesue ua e faamaeaina mo lena vaiaso. O le a faitau e lou faiaoga ma tali atu i galuega atofaina ma toe faafoi atu lena api talaaga mo le suesueina o tusitusiga paia ia te oe i le vaiaso e sosoo ai. E mafai foi ona e tusia au tali i luga o pepa i se faila faamau o pepa taape ma faafoi atu itulau na e faia i lena vaiaso. A oo la ina toe faafoi atu e lou faiaoga ia itulau, e mafai ona e toe tuuina i totonu o le api o tusigamanatu.
Faaaogaina o Lenei Tusi Lesona i se Polokalama Faaleaso a le Seminare
E mafai ona faaaogaina lenei tusi lesona e faiaoga ma tamaiti aoga i se polokalama faaleaso a le seminare e faaleleia ai lesona pe avea ma se galuega toe faaatoa. Peitai, ua le o faamoemoeina ina ia tuuina atu i tamaiti aoga uma o le seminare faaleaso. Afai e manaomia e se tamaitiiti aoga ona faia se galuega faaatoa mo se togi, e mafai e le faiaoga ona atofa atu ia te ia e faamaea mai se lesona o suesuega e fai i le aiga lea e tutusa ma le lesona sa misi.
Faaaogaina o le Tusi Lesona a le Tamaitiiti Aoga o Suesuega e Fai i le Aiga
Siata Faitau o le Tusi a Mamona
Susu Maia i le Tusi a Mamona
O Le A le Tusi a Mamona?
O le Tusi a Mamona o se tasi molimau ia Iesu Keriso.O loo i ai tusitusiga a perofeta anamua, ua maua mai ai se tala o feutagaiga a le Atua ma se tasi o lala o le aiga o Isaraelu i le konetineta o Amerika. Mo le Au Paia o Aso e Gata Ai o le Tusi a Mamona o loo tutu faatasi ma le Tusi Paia, le Mataupu Faavae ma Feagaiga, ma le Penina Tautele o se tusitusiga paia. O Le Tusi a Mamona o se faamaumauga o malo ma tagata anamua Amerika.
Talu mai lona uluai lomiga i le FaaPeretania i le 1830, ua faaliliuina le Tusi a Mamona i le tele o gagana, ma ua atoa ai le aofai o kopi ua lolomiina e silia ma le 150 miliona. Ua faamatalaina e perofeta a le Atua o le “maa’au’au” o Le Ekalesia a Iesu Keriso o le Au Paia o Aso e Gata Ai.
Aisea E Taua ai le Suesueina o le Tusi a Mamona ia te Au?
Na aoao mai Peresitene Ezra Taft Benson o faamanuiaga o le latalata atili atu i le Atua o loo faatalitali mai ia te oe pe a e suesueina le Tusi a Mamona ma se loto faamaoni:
“Pe le o i ai ea se mea i le taele o o tatou loto o loo faananau atu ia latalata atili i le Atua, ia avea atili e faapei o Ia i a tatou savaliga i aso taitasi, ia lagonaina Lona faatasi mai i taimi uma ia i tatou? Afai o lea, o le Tusi a Mamona la, o le a fesoasoani sili atu ia i tatou i lo se isi lava tusi.
“Ua le na o le faapea o loo aoao mai e le Tusi a Mamona ia i tatou upumoni, e ui e moni lena mea. E le na o le faapea ua molimau mai le Tusi a Mamona ia Keriso, e ui e moni lena mea. Ae o loo i ai se isi mea e sili atu. O loo i ai se mana i lea tusi o le a amata ona oo mai i o outou olaga i le taimi lava tou te amatalia ai se suesuega anoa o le tusi. O le a outou maua ai le mana sili atu ona malosi e tetee atu ai i faaosoosoga. O le a outou maua ai le mana e aloese ai mai mea taufaasese. O le a outou maua ai le mana e tumau ai le ala lauitiiti ma le vaapiapi. O tusitusiga paia ua ta’ua o ‘afioga o le ola’ (tagai MF&F 84:85), ma e leai se isi mea e sili atu ai ona moni lena faaupuga nai lo o le Tusi a Mamona. A amata ona e matelaina ma galala i le fia maua o ia upu, o le a faateleina ma saga faateleina ona e maua le ola” (“O Le Tusi a Mamona—O Le Maa’au’au o La Tatou Tapuaiga,” Liahona, Oke. 2011, 7).
O Le Tusi a Mamona sa tusia mo i tatou i aso nei. O Mamona, le perofeta anamua lea e faaigoa ai le tusi, ma lona atalii o Moronae na aotelea faapuupuu ia seneturi o faamaumauga a o tuufaatasia ia papatusi auro ia na faaliliu mai ai e le Perofeta o Iosefa Samita le Tusi a Mamona. O le Atua, o le na te silafiaina le faaiuga mai le amataga, na musuiaina Ana perofeta i mea e faaaofia i totonu o le aotelega puupuu o mea o le a tatou manaomiaina mo o tatou aso. O Moronae, le perofeta mulimuli o auga perofeta na tusitusi i totonu o le Tusi a Mamona, sa muaivaaia o tatou vaitaimi: “Faauta, ou te tautala atu ia te outou e peiseai o outou faatasi mai i le taimi nei, peitai ua outou le o i ai. Ae faauta, ua faaali mai outou ia te au e Iesu Keriso, ma ua ou iloa a outou mea o fai” (Mamona 8:35).
Sa aoao mai foi Peresitene Benson e faapea, o le suesueina o le Tusi a Mamona o le a fesoasoani ia te outou e iloatino ai le eseesega i le va o le lelei ma le leaga.
“O le Tusi a Mamona ua ia aumaia tagata ia Keriso e ala i tulaga faavae e lua. Muamua, ua ia faaali manino e uiga ia Keriso ma lana talalelei.O loo molimau mai e uiga i lona paia atoa ai ma le manaomia o se Togiola faapea ai ma le manaomia o lo tatou faalagolago atu ia te ia. O loo molimau mai e uiga i le Pa’ū ma le Togiola ma uluai mataupu faavae o le talalelei, e aofia ai lo tatou manaomiaina o le loto momomo ma se agaga salamo ma se toefanauina faaleagaga. O loo folafola mai ai e tatau ona tatou tumau i le amiotonu e oo i le iuga ma ola i se olaga mama o se Tagata Paia.
“O lona lua, o loo faailoa mai i le Tusi a Mamona ia fili o Keriso. Ua ia tausese ai mataupu sese ma tuu ai i lalo finauga. (Tagai 2 Ni. 3:12.) Na te faamalosia soo agamalu o Keriso e tetee atu i togafiti leaga, o taupulepulega leaga, atoa ma mataupu a le tiapolo i o tatou aso. O ituaiga o tagata faatautee o loo i le Tusi a Mamona e tutusa lava ma ituaiga o tagata o loo i ai i ona po nei. O le Atua, faatasi ai ma lona muaimalamalama le mafuatiaina, na fatufatuina le Tusi a Mamona ina ia mafai ona tatou vaaia le mea sese ma iloa le auala e faasagatau atu ai i manatu sese faaleaoaoga, faaupufai, faalelotu, ma faalefilisofia o o tatou aso” (“O Le Tusi a Mamona O Le Afioga Lea a le Atua,” Liahona, Aokuso 1975, 22).
E Uiga i le Tusi a Mamona
O Le Tusi a Mamona ua fau mai i tamaitusi laiti e 15. O le valu o nei tusi e amata i se ulutala na tusia i luga o uluai papatusi auro ia na faaliliuina e le Perofeta o Iosefa Samita: 1 Nifae, 2 Nifae, Iakopo, Alema, Helamana, 3 Nifae, 4 Nifae, ma Eteru. O nisi o mataupu i totonu o le Tusi a Mamona o loo faatomua foi i se ulutala sa faaaofia ai i luga o uluai papatusi auro (sei vagana ai fuaiupu e uiga i mataupu o loo i ai i totonu): Mosaea 9, Mosaea 23, Alema 5, Alema 7, Alema 9, Alema 17, Alema 21, Alema 36, Alema 38, Alema 39, Alema 45, Helamana 7, Helamana 13, 3 Nifae 11, ma le Moronae 9.
I le amataga o mataupu taitasi i le Tusi a Mamona o loo i ai se aotelega puupuu o le mataupu o loo lolomiina i le faatusilima. O aotelega o nei mataupu sa tusiaina ma faaopoopoina i lalo o le taitaiga a le Au Peresitene Sili ma sa lei avea ma se vaega o le anotusi o le uluai Tusi a Mamona mai papatusi auro.