Folasaga i le Enosa
Aisea e Suesue ai Lenei Tusi?
O le tusi a Enosa o loo faaalia ai le mana o le Togiola a Iesu Keriso e faamama ai tagata mai le agasala ma faaatoatoa ai i latou. Sa fagatua Enosa i luma o le Atua i le tatalo malosi a o le’i faamagaloina ana agasala. Ona ia tatalo ai lea mo le manuia faaleagaga o sa Nifae ma sa Lamana. Sa ia faaaluina le taimi na totoe o lona olaga e galue ai mo lo latou faaolataga. A o e suesue i le tusi a Enosa, e mafai ona e iloa ai lesona taua e uiga i le tatalo, salamo, ma faaaliga. E mafai foi ona e aoao a o maua e tagata taitoatasi faamanuiaga o le Togiola, o le a latou mananao e faasoa atu na faamanuiaga i isi.
O Ai na Tusia Lenei Tusi?
O Enosa, o le atalii o Iakopo ma o le atalii o le atalii o Liae ma Sarai, na tusia le tusi lenei. Sa tusia e Enosa e faapea na aoaoina o ia e lona tamā “i le aoaoga male apoapoaiga foi a le Alii” (Enosa 1:1). E lata i le iuga o lona olaga, sa tusi ai Enosa e faapea na ia folafola atu “le afioga e tusa ma le upumoni ua ia Keriso” (Enosa 1:26) i ona aso uma. A o le’i maliu o Ia, sa tuufaasolo atu e Enosa ia papatusi laiti a Nifae i lona atalii o Iaroma. Sa faaiuina e Enosa ana faamaumauga i le olioli i le aso o le a tulai ai o ia i luma o lona Togiola. Sa ia folafola mai, “Ona ou vaai ai lea i ona fofoga ma le fiafia, ma o le a fetalai mai o ia ia te a’u: Sau ia ia te a’u, oe ua faamanuiaina, ua i ai se nofoaga ua saunia mo oe i maota o lo’u Tama” (Enosa 1:27).
O Anafea ma o Fea na Tusia ai?
Sa faaumaina e Enosa ana tusitusiga i le tautino mai ua 179 tausaga ua mavae talu ona tuua e Liae Ierusalema (tagai Enosa 1:25). O lena mea ua tuu ai le aso o ana tusitusiga i le va e tusa o le 544 T.L. M. (le taimi na tapunia ai e Iakopo ana faamaumauga) ma le 420 T.L. M. Sa tusi e Enosa ana faamaumauga a o nofo i le laueleele o Nifae.