1 Nifae 7

Folasaga

Ua faaalia le tuuto atoatoa o Nifae i le Alii i le 1 Nifae 7. Faatasi ai ma ona uso, na ia usitaia le poloaiga a le Alii e toe foi i Ierusalema ma aumai Isamaeli ma lona aiga faatasi ma i latou i le vao. I le malaga toe foi i le vao, na tetee ai Lamana, Lemuelu, ma nisi o le aiga o Isamaeli ia Nifae ma mananao e toe foi i Ierusalema. Ina ua latou saisaia ma saili e fasioti Nifae, na ia tatalo i le faatuatua, na laveaiina e le Alii, ma faamagaloina ma le faamaoni e na faasaua ia te ia. A o e suesueina lenei lesona, mafaufau loloto i lau tali faamaoni i poloaiga ma faigata e pei o Nifae.

1 Nifae 7:1–5

Ua poloaiina e le Alii atalii o Liae ia toe foi i Ierusalema mo Isamaeli ma lona aiga

Mafaufau i lou aiga, ma manatunatu loloto pe aisea e taua ai aiga i le fuafuaga a le Atua.

Faitau 1 Nifae 7:1–2, ma saili le mea na poloaiina ai e le Alii ia Liae ia faia e ona atalii ma pe aisea na finagalo ai o Ia ia i latou e fai. (Atonu e fesoasoani le iloa o le upu fanau i le 1 Nifae 7:1 e faatatau i fanau ma tupuaga.)

O se tasi o upu moni tatou te aoao mai nei fuaiupu o le e poloaiina i tatou e le Alii ia faaipoipo ma tausia ni fanau mo Ia.Ao faaauau lau suesuega o le 1 Nifae 7, fesili ia te oe lava ia pe aisea e taua tele ai le faaipoipoga ma aiga lena ua poloaiina ai e le Alii Nifae ma ona uso e onosai i aso e tele o le malaga fita i le vao ia toe foi i Ierusalema.

Faitau le fuaitau lenei mai “O Le Aiga: O se Folafolaga i le Lalolagi,” ma faailoa mai folafolaga a perofeta o ona po nei e uiga i le taua o le faaipoipoga: “O i matou o le Au Peresitene Sili ma le Aufono a Aposetolo e Toasefululua o Le Ekalesia a Iesu Keriso o le Au Paia o Aso e Gata Ai, matou te tautino atu ma le faamaoni o le faaipoipoga i le va o se alii ma se tamaitai ua faauuina e le Atua ma o le aiga o le totonugalemu lea o fuafuaga a le Foafoa mo le taunuuga e faavavau o Lana fanau” (Ensign po o le Liahona, Nov. 2010, 129).

Atonu e te manao e lio le fuaitau “mo le Alii” i le 1 Nifae 7:1. Mafaufau i le uiga o lena fuaitau i o tatou aso.

Vaavaai mo nisi manatu i le tausia o fanau mo le Alii ao e faitau i lenei aoaoga mai le “O Le Aiga: O Se Folafolaga i le Lalolagi”:

“Matou te ta’utino atu o le poloaiga a le Atua i Lana fanau ia fanafanau ma uluola ma ia tumu ai le lalolagi, ua faamalosia ma faatumauina. …

“… Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia faaletino ma le faaleagaga, ma ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea latou te nonofo ai.O tane ma ava—tina ma tama—o le a latou tali atu i le Atua mo le faataunuuina o nei mea e ao ona faia” (Ensign po o le Liahona, Nov. 2010, 129).

Aiga o Isamaeli — Nifae ma ona uso o loo talanoa i le aiga o Isamaeli

Faitau 1 Nifae 7:3–5 e saili pe na faapefea ona fesoasoani le Alii i atalii o Liae e faataunuu Ana poloaiga. Na faapefea ona fesoasoani le Alii ia Isamaeli ma lona aiga e talia le valaaulia e faatasi atu ma le aiga o Liae i le vao?

Fesili i ou matua, se taitai o le Ekalesia, po o se faiaoga e fautua mai ni ala se tolu e mafai ai e talavou o nei aso ona saunia mo le faaipoipoga ma le tausia o fanau “mo le Alii.” Faamaumau a latou fautuaga i lau api talaaga mo le suesueina o tusitusiga paia.

1 Nifae 7:6–15

Ua taumafai Nifae e faatauanau ona uso e faaauau le latou malaga i le vao

Faitau 1 Nifae 7:6–7, ma saili pe aisea na tetee ai Lamana, Lemuelu, ma nisi o le aiga o Isamaeli i le latou malaga i le vao. Vaai faalemafaufau pe faapei le avea pei o Nifae i lenei tulaga. Mafaufau i le tala o le a e fai atu ia Lamana ma Lemuelu ma le aiga o Isamaeli ina ia faatauanau i latou e faaauau le latou malaga i le nuu folafolaina.

Faitau 1 Nifae 7:8–12, ma faailoa mai fesili na fai e Nifae i ona uso e faatauanau ai i latou e aua le toe foi i Ierusalema. O a upu moni e tolu na fai mai Nifae ua galo i ona uso?

Tali le fesili lenei, i lau api o talaaga mo le suesueina o tusitusiga paia:

E faapefea ona fesoasoani nei upu moni e tolu ia Lamana ma Lemuelu e faatuatua i le Alii pe ana la manatua?
Lisi ni faamanuiaga se 4–5 ua e maua mai le Alii. E faapefea ona fesoasoani le manatuaina o mea na fai e le Alii mo oe e te faatuatua ai ma filifili e mulimuli ia te Ia?

Faitau le 1 Nifae 7:13–15, ma faailoa mai le mea na fai mai Nifae o le a tupu ia Lamana, Lemuelu, ma ē tetee o le aiga o Isamaeli pe afai latou te toe foi i Ierusalema.

Tusi se parakalafa i lau api talaaga mo le suesueina o tusitusiga paia pe aisea e taua ai le manatua o mea na fai e le Alii mo oe ma mulimuli i Ana taitaiga.

1 Nifae 7:16–22

Ua laveaiina Nifae e le Alii

Faaauau ona vaai faalemafaufau pe faapei le i ai i le tulaga o Nifae ao e faitau i le 1 Nifae 7:16. O le a lau mea o le a fai?

Na tatalo Nifae. Faitau lana tatalo i le 1 Nifae 7:17–18, ma faailoa mai mea na tatalo ai Nifae.

Matau na fesili atu Nifae ina ia laveaiina “e tusa ma [lona]faatuatua.” O se tasi o lesona tatou te aoaoina mai nei fuaiupu o le Atua e tali i tatalo e tusa ma lo tatou faatuatua.O le tatalo i le faatuatua o le tatalo lea ma le talitonu i le Alii ma e aofia ai ma se naunau e fai loa.

Suesue le fuaitau lenei mai ia Elder David A.Bednar o le Korama a Aposetolo e Toasefululua e uiga i le tatalo a Nifae i le 1 Nifae 7:17 ma le mana o le Togiola e suia o tatou loto. Vase lalo o soo se fuaitau e fesoasoani e te malamalama ai i le taua o le naunau e usitai ao tatou tatalo i le faatuatua.

“Pe tou te iloa le mea semanu ou te tatalo ai pe ana saisai au e ou uso? Se manu o lau tatalo e aofia ai se manaoga mo se mea leaga e tupu i ou uso ma faaiuina i se fuaitau ‘pe mafai ona e laveaiina au mai lima o ou uso’ po o le, i nisi upu, ‘Faamolemole aveese au mai lenei mala, i le taimi nei lava!’ E faapitoa lava le uigaese ia te au, o Nifae e lei tatalo, e pei ou te ono tatalo ai, ina ia suia lona tulaga. Nai lo lena, na ia tatalo mo le malosi e sui ai ona tulaga. Ma pe mafai ona ou fautua atu na ia tatalo tonu lava faapenei ona sa ia iloa ma malamalama ma na ia iloa le mana galue o le Togiola a le Faaola. …

“Uso e ma tuafafine, o le taunuuga o lenei tala mo i tatou taitoatasi e tuusao lava. Ao faasolo ina malamalama oe ma au ma faagalue le mana galue o le Togiola i o tatou olaga patino, o le a tatou tatalo ma saili mo le malosi e sui ai o tatou tulaga nai lo o le tatalo mo o tatou tulaga ia suia. O le a avea i tatou ma tagata e ‘gaoioi’ nai lo o ni mea e ‘tau faagaoioi’ (2 Nifae 2:14)” (“‘In the Strength of the Lord’ (Upu a Mamona 1:14; Mosaea 9:17; Mosaea 10:10; Alema 20:4),” in Brigham Young University 2001–2002 Speeches [2002], 124).

Tali se tasi o fesili nei, i lau api talaaga mo le suesueina o tusitusiga paia:
1. O le a se taimi i lou olaga na e tatalo ai i le faatuatua ma iloaina le tali a le Alii i lau tatalo?
2. E faapefea ona e mulimuli i le faataitaiga a Nifae e tatalo ma saili le malosi e sui ai ou tulaga nai lo o le tatalo mo ou tulaga ia suia?

Ina ua laveaiina Nifae mai ona noataga, na toe mananao ona uso e osofaia o ia. Faitau 1 Nifae 7:19–21, ma faailoa le mea e faagaeetia ai oe i uiga faaalia o Nifae. Mafaufau i se tulaga i lou lava aiga e manaomia ai le faamagaloga. Mafaufau pe aisea e matua taua ai i tagata o le aiga ona naunau e faamagalo e le tasi le isi.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina 1 Nifae 7 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: