Ina ua tuanai le molimauina o le auala liliuese o tapuaiga a sa Sorama, sa talai atu e Alema ma ona soa le afioga a le Atua ia i latou. Na amata ona latou iloa ni faamanuiaga i tagata o e na matitiva ma lafoaiiina i fafo o sunako o sa Sorama. E faaaoga ai le faatusa o le totoina ma le faafaileleina se fatu laau, sa aoao atu e Alema mea latou te faia ina ia maua ma tausia ai le faatuatua i le afioga a le Atua. Na valaaulia i latou e Alema (ma i tatou) e tofotofo i le upu ma faafailele lo latou faatuatua ma le molimau i aso uma.
Na aoao e Alema sa Sorama o e sa lotomaualalo ona o lo latou matitiva
Vaai faalemafaufau faapea ua fesili atu se uo ia te oe pe faapefea ona iloa e se tagata e moni le Ekalesia. I lau api talaaga mo le suesueina o tusitusiga paia, tusi lau tali e faatatau i le auala e maua ai se molimau. Ona tusi lea O le auala e maua ma faamalosia ai se molimau i le laina o loo sosoo ai o lau api talaaga. A o e suesue i le Alema 32, fai se lisi i lalo o lenei ulutala o malamalamaaga ua e maua e tusa ai ma auala e maua ma faamalosia ai se molimau. O le a e faaauau ona faaopoopo i lenei lisi i le taualumaga o le lesona; o le ala lea, e mafai ona fesoasoani le tuu o sina avanoa i le va o lenei galuega atofaina muamua o le api talaaga mo le suesueina o tusitusiga paia ma le galuega atofaina 2.
I le lesona ua tuanai (Alema 31), sa e faitau ai e uiga i le ala na maitau ai e Alema ma ona uso tapuaiga sese a sa Sorama, o se vaega o sa Nifae ua pauu ese mai le upumoni. Mulimuli ai i le tatalo o le faatuatua a Alema, sa amata ona talai atu e ia ma ona uso le talalelei i nei tagata. Faitau le Alema 32:1–3, ma vaavaai po o fea le vaega o sa Sorama na faaali atu lo latou fiafia i le savali a faifeautalai.
Faitau le Alema 32:4–6, ma faailoa mai pe faapefea e aafiaga o lo latou matitiva ona avea o se faamanuiaga.
O se tasi o mataupu faavae o loo faaali mai i nei fuaiupu o le: E saunia e le lotomaualalo i tatou e talia le afioga a le Atua. Tusi ia lotomaualalo i totonu o lau api talaaga mo le suesueina o tusitusiga paia i lalo o le ulutala “O le auala e maua ma faamalosia ai se molimau.”
I lau api talaaga mo le suesueina o tusitusiga paia, tusi pe aisea ua e manatu ai o le lotomaualalo e taua mo le mauaina ma le faamalosia o se molimau.
Faitau le Alema 32:13–16, ma vaavaai mo auala eseese e mafai ai e tagata ona lotomaualalo. E faavae i mea sa aoao atu e Alema, pe e te manao e filifili e lotomaualalo pe faamalosia ia lotomaualalo? Aisea?
Mafaufau po o le a sou manatu i le uiga o le faalotomaualaloina o oe lava “ona o le afioga” (Alema 32:14). E faapefea ona faatatau i ai ou uiga faaalia i gaoioiga a le Ekalesia, seminare, po o afiafi faaleaiga?
Filifili ia lotomaualalo e ala i le faaaogaina o soo se musumusuga ua e maua e tusa ai ma lou lava lotomaualalo.
Ua aoao atu e Alema ia sa Sorama i le ala e faatupulaia ai lo latou faatuatua
A o aoao atu ia sa Sorama, sa faailoa mai e Alema se manatu sese se tasi sa i ai i le toatele o tagata e uiga i le mauaina o se molimau. Faitau le Alema 32:17–18, ma faailoa mai lenei manatu sese.
Mafaufau mo se taimi pe faapefea ona avea le faamoemoe mo se faailoga e mafai ona avea ma faalavefau mo mo le atiaeina o le faatuatua ma le molimau. (Atonu e te manao e tusi leMF&F 63:9–11 i le itu o lau tusitusiga paia i talaane o le Alema 32:17–18 ma faitau i ai mo nisi malamalamaaga.)
Faitau le Alema 32:21, o se fuaitau o mau tauloto, ma vaavaai mo le faauigaga a Alema e uiga i le faatuatua ma le e le o se faatuatua. (Atonu e te manao e faailoga lenei mea i se auala e iloa gofie ai ma mafai ona e maua i le lumanai.)
Faitau le Alema 32:22. Manatunatu loloto i ni mea e te mafai ona faia e atiaeina ai le faatuatua sili ma le molimau patino.
Faaopoopo ia manatua le alofa mutimutivale o le Atua ma filifili e talitonu i lau lisi i le api talaaga mo le suesueina o tusitusiga paia “O le auala e maua ma faamalosia ai se molimau.”
Sa aoao e Alema ia sa Sorama i le ala latou te amata ai ona talitonu i afioga a le Atua e ala i le faia o se suesuega faatino. Mafaufau i nisi o suesuega faatino sa e faia i le vasega o le saienisi po o isi vasega ma sitepu na e mulimuli i ai. Ia matau o le suesuega faatino e manaomia ai le faatinoga i le vaega o le tagata suesue. E faapena foi, o le faagasologa o le mauaina po o le faamalosia o se molimau e manaomia ai se faatinoga i lau vaega. Faitau le Alema 32:27, ma vaavaai mo suesuega faatino na valaaulia e Alema le au sa Sorama ia faataitaia.
Atonu e mafai ona fesoasoani le iloaina o le upu mafaufau o lona uiga o le mana po o le tomai ua faamanuiaina ai i tatou e iloa ma malamalama ai i le lalolagi o loo siomia i tatou. E latou te faaaofia ai mea e faapei o o tatou faalogona o le faalogo, vaai, ma le pa’i, mafaufau lelei, ma le manatua o mea.
Faaopoopo le suesuega faatino (po o le gaoioiga) i luga o le upu i lau lisi i le api talaaga mo le suesueina o tusitusiga paia o le “O le auala e maua ma faamalosia ai se molimau.”
A o e faitau i le Alema 32:28, atonu e te manao e faailoga i au tusitusiga paia fasifuaitau e pei o le “amata ona malena ae,” “faalauteleina ai lou agaga,” “faamalamalama ai lou malamalamaaga,” ma “e suamalie ia te au.” O Elder Bruce R. McConkie o le Korama a Aposetolo e Toasefululua na aoao mai le auala e tuputupu ae ai lo tatou faatuatua:
“Tatou te tuputupu ae i le faatuatua; tatou te malaga i lea sitepu i lea sitepu mai se tikeri maualalo e agai atu i se tikeri maualuga. Tatou te faaopoopo le alofa tunoa i le alofa tunoa seia mulimuli ane ua tatou oo i se tulaga ua faaatoatoa ai lo tatou faatuatua, e oo lava i le lautele o le amiotonu, e mafai e tagata ola, ona tatou i ai lea i le nofoaga e oo atu ai i le faavavau i se faasologa faifaipea e le uma. …
“Galue i galuega faatino o lo o i luma ma afai ua e laa i se sitepu se tasi i le mauaina o le faatuatua, o le a aumaia ia te oe le faamaoniga i lou agaga e mafai ai ona e agai atu i luma ma laa i le isi sitepu, ma i le tikeri o le a faateleina ai lou mana po o aafiaga” (Lord, Increase Our Faith, Brigham Young University Speeches of the Year [Oct. 31, 1967], 9, 11).
A maea ona faitau le Alema 32:28, faamaea le lua pe sili atu o galuega atofaina nei i lau api talaaga mo le suesueina o tusitusiga paia:
O a gaoioiga e tatau ona tatou faia pe le faia a o tatou galulue i lenei suesuega faatino i le upu? (O se lisi o nisi o tali o lo o tuuina atu o loo aofia i le faaiuga o le lesona.)
O le a sou manatu i le uiga o le “tuu ane se avanoa, ina ia mafai ona totoina [ le afioga a le Atua] i lou fatu”?
O anafea na e lagonaina ai le afioga a le Atua ua faateleina lou loto ma faapupulaina lou malamalama? Faamatala i au lava upu pe faapefea lena lagona.
Faitau le Alema 32:29–34, ma faailoga upu ma fasifuaitau o loo faamatala ai mea e aoaoina e le tagata e uiga i le afioga a le Atua ao ia faia le suesuega faatino. O le upu faafailele o lona uiga o le fafaga, vaavaai, po o le tausia.
Ata
fatu i le eleele
Mafaufau mo se taimi pe faapefea e le faagasologa ona fesoasoani i se laau ina ia ola e tali tutusa ma le fesoasoaniga i lau molimau ina ia ola. Mafaufau foi pe aisea e le atoatoa ai se faatuatua ma se molimau a se tasi ina ua maea ona faia le suesuega faatino i le afioga a le Atua. O a nisi mea e te manatu e manaomia ona fai ina ia tumau ai pea le molimau o le talalelei?
Faitau le Alema 32:35–40, ma vaavaai totoa i mea na fai mai Alema e tatau ona tatou faia ina ia faamaea ai le suesuega faatino. Manatunatu loloto i mea e ao ona e faia mo le laau, po o lau molimau, ina ia ola. O le a le mea e tupu pe a e le faia nei mea?
Ata
Tree Small
Tapuni au tusitusiga paia, ma vaavaai pe fia o nei fesili e mafai ona e talia:
O le a se mea e tatau ona tatou faia ina ia ola ai lo tatou faatuatua i le afioga a leAtua e faapei o se laau ua fua mai?
O le a sou manatu i le faatusa o le fua?
O le a le mea e tupu pe a tatou faatuatuanai le laau pe faatamala e faafaileleina?
E faapefea ona e manatu o le mea lena e tupu pe a tatou faatuatuanai pe le faafaileleina a tatou molimau?
Afai e tatau ai, tatala au tusitusiga paia ma toe iloilo le Alema 32:35–40 e fesoasoani ia te oe e tali ai fesili. Faaopoopo le faafailele ma le maelega i lau lisi o le “O le auala e maua ma faamalosia ai se molimau” i lau api talaaga mo le suesueina o tusitusiga paia.
Otooto i se fuaiupu se tasi mea sa e aoaoina mai le Alema 32 e uiga i mea e manaomia ona maua pe faamalosia ai se molimau, ma tusi lenei mataupu faavae i lau tusitusiga paia i tafatafa o le Alema 32:37–43.
Atonu sa e tusia se mea e pei: Afai tatou te faafailele ma le maelega lo tatou faatuatua i le afioga a le Atua i o tatou loto, o le a tuputupu ae lo tatou faatuatua ma la tatou molimau ia Iesu Keriso ma Lana talalelei.
Faitau le Alema 32:41–43, ma vaavaai pe sa faapefea ona faamatala e Alema le fua e oo mai ia i latou o loo faafailele ma le faamaoni a latou molimau. Alema 32:42 o loo taua ai le maelega ma le onosai. Aisea e te manatu ai e manaomia le maelega ma le onosai mo le laau—po o lau — molimau ina ia ola?
Ata
Large Small
Tali le fesili e tasi po o fesili uma e lua i lau api talaaga mo le suesueina o tusitusiga paia:
O a ni taunuuga ua e vaaia i lou olaga a o e mulimuli ai i le suesuega faatino ua faamatalaina e Alema i le Alema 32?
E faafefea ona e faaaogaina le suesuega faatino o loo faamatalaina e Alema i le Alema 32 i lou olaga?
Toe faitau le Alema 32:21. Taumafai e tauloto le fuaiupu lenei, ona taulotoina lea i se uo po o se tagata o le aiga. Tusi ni nai fuaiupu i lau api talaaga mo le suesueina o tusitusiga paia e faamatala ai mea e aoao atu e lenei fuaiupu ia te oe e uiga i le faatuatua.
O tali talafeagai mo le galuega atofaina 3a: (a) tuu ane se avanoa mo le upu (po o le fatu) e toto i lou fatu, (e) aua nei lafoaiina le fatu ona o lou le talitonu, ma le (i) iloa le ola o le fatu.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Alema 32 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: