2 Nifae 1–1

Folasaga

A o e suesue i le 2 Nifae 1, ia matau o loo i ai upu a se matua alofa ma se taitai perisitua o lē o le a maliu. Sa augani atu Tama Liae i lona aiga ina ia usitai i poloaiga a le Atua (tagai 2 Nifae 1:16). Sa vavalo o ia, afai o le a latou usitai i poloaiga a le Atua, o le a latou manuia i le nuu o le folafolaga. Sa ia apoapoai atu foi i lana fanau ma i latou sa o mai ma i latou mai Ierusalema e mulimuli i le taitaiga faaperofeta a Nifae. A o e suesue i le mataupu lenei, ia iloilo lou usiusitai patino i poloaiga a le Alii. O le a le lelei o lou mulimuli i fautuaga a taitai o le Ekalesia?

2 Nifae 1:1–23

Ua apoapoai atu Liae i lona nuu ina ia ola amiotonu

A faapea la ua faafuasei ona tatau ona e tuua lou aiga ma e te le toe vaai lava ia i latou. O loo i ai lou avanoa mulimuli e tasi e talanoa atu ai ia i latou. O le a sau tala e fai atu ia i latou i le tulaga lenei?

O le 2 Nifae 1–4, sa tusi ai e Nifae ia fautuaga mulimuli a lona tamā i lona aiga. A o e suesue i nei mataupu, mafaufau i auala e te faaaogaina ai fautuaga mulimuli ua faamaumauina a Liae.

Faitau le 2 Nifae 1:1–4, ma faailoa ia “mea tetele na faia e le Alii” mo le aiga o Liae.

Tusi ni tali pupuu i fesili nei, i lau api talaaga mo le suesueina o tusitusiga paia:
1. O a ni auala na faaali ai e le Alii lona alofa mutimutivale i le aiga o Liae?
2. O a ni “mea tetele” ua faia e le Alii mo oe ma lou aiga? O a ni ou lagona e uiga i le Alii pe a e mafaufau i Lona alofa mutimutivale ia te oe ma lou aiga?

Sa aoao e Liae lona aiga e faapea, o le filifili e tausi poloaiga a le Atua o le a iloa ai pe o le a faaauau pea pe leai foi ona maua “mea tetele” ma le “alofa mutimutivale o le Atua” i o latou olaga.

Ina ia fesoasoani ia e iloa e faamanuia i tatou e le Alii pe a tatou tausia Ana poloaiga, ae Na te taofia faamanuiaga pe afai tatou te le tausia Ana poloaiga, ia tusi se ata e pei o le ata o loo i lalo i totonu o lau api o talaaga. Faitau le 2 Nifae 1:7–11, ma faailoa ia faatinoga (“afai”) lea na fai mai Liae o le a oo mai ai ni taunuuga faapitoa (“ona”). Tusi mea e te maua i lalo o le koluma talafeagai o le ata o loo i lau api o talaaga o suesuega.

Afai (gaoioiga)	Ona (taunuuga)

Sa faapitoa le popole o Liae i tulaga faaleagaga o Lamana ma Lemuelu ma iloa ai e tatau ona la salamo. A o ia apoapoai atu ia i laua, sa ia faaaogaina nisi o faailoga e fesoasoani ia la malamalama ai i le agasala ma le salamo. Sue i le 2 Nifae 1:13–14 mo faailoga sa faaaoga e Liae e uunaia ai ona atalii e salamo, ma tusi au tali i avanoa o loo i lalo:

“ mai i le to ”

“ foi mai ai ”

“ mai ai ”

Tali fesili le fesili lenei i totonu o lau api o talaaga mo le suesueina o tusitusiga paia: E faapefea ona avea le salamo e pei o fasifuaitau taitasi i le gaoioiga o loo i luga?

Faitau le 2 Nifae 1:15, ma faailoga i au tusitusiga paia ia fasifuaitau e tolu na faaaoga e Liae e faamatala ai faamanuiaga sa ia maua ona o lona usiusitai i poloaiga a le Atua. Ia faatusa nei faamanuiaga i taunuuga le lelei o loo i le 2 Nifae 1:17–18, 22 lea na fai mai Liae o le a oo mai i luga o i latou o e e le tausia poloaiga a le Atua.

Faailoga le fautuaga a Liae i le 2 Nifae 1:23, ma mafaufau loloto i mea e tatau ona e faia i lou olaga ina ia mafai ona e “ala mai” po o le “lulu ese” po o le “tutulai” ina ia mafai ona e maua faamanuiaga sa talanoa mai ai Liae i le mataupu lenei.

2 Nifae 1:24–32

Sa apoapoai atu Liae i ona atalii ia mulimuli i le taitaiga faaperofeta a Nifae

O le is mea na sosoo ai, sa faamanatu atu e Liae i lona aiga ma isi e uiga i se isi punavai o taitaiga ma musumusuga na faamanuiaina ai i latou e fesoasoani ia i latou e fai filifiliga amiotonu i o latou olaga. Faitau le 2 Nifae 1:24, ma faailoa mai lenei punavai.

A o e faitau i le 2 Nifae 1:24–27, vaavaai mo auala na uunaia ai e Liae ona tagata ia mulimuli ia Nifae. Mafaufau i au tali i fesili nei:

O a uiga sa faamamafa e Liae o le a faapea ona fesoasoani ia te oe e faatuatuaina ai Nifae o se taitai?
Aisea o le a e faatuatuaina ai se taitai e i ai nei uiga?
O a auala o loo e vaaia ai i taitai o le Ekalesia i aso nei le faaalia o nei lava foi uiga?

Faitau le 2 Nifae 1:28–32, ma faailoga i au tusitusiga paia ia folafolaga na tuuina atu e Liae ia i latou o e mulimuli i le taitaiga a Nifae. O nei folafolaga ua faaalia ai a o tatou mulimuli ia i latou ua valaauina e le Atua e taitai i tatou, e faamanuiaina i tatou i le manuia ma le saogalemu faaleagaga. Mafaufau loloto i mea na aoaoina ai oe lata mai nei e taitai o le Ekalesia e uiga i le auala e mafai ai e le usiusitai i fautuaga musuia ona taitai atu ai i lou manuia ma le saogalemu faaleagaga.

Faitau le upusii lenei mai ia Peresitene Wilford Woodruff, ma vase lalo o folafolaga sa ia faia pe afai o le a tatou mulimuli i fautuaga a auauna a le Alii: “Ou te faamoemoe o le a tatou mulimuli uma lava i le ala ua faataatia mai e auauna a le Alii mo i tatou, aua afai tatou te faia lea ou te iloa o le a saogalemu i tatou i lenei lalolagi, ma faamautuina le fiafia ma le faaeaina i le lalolagi a sau. … Afai tatou te faatuatua o le a taitaiina i tatou i le ala o le ola, ma afai lava tatou te faatuatua e talitonu i a latou faatonuga, i aoaoga a le Agaga Paia e ala mai ia i latou, o le a tatou i ai pea i le ala saogalemu, ma o le a tatou mautinoa lo tatou taui” (Aoaoga a Peresitene o le Ekalesia: Wilford Woodruff [2004], 207).

Tusi i lau api o talaaga mo le suesueina o tusitusiga paia le mafuaaga e te manatu ai o le usiusitai i poloaiga a le Alii ma fautuaga a Ana auauna e taua le faia i lou olaga atoa.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 2 Nifae 1 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: