Alema 5:1–36

Folasaga

Ina ua taufaamatau e le amioleaga ma le finauga le Ekalesia (tagai Alema 4:9–11), sa iloa e Alema o le toe faatuina moni e mafai ona oo mai e ala i le suiga tele o le loto o tagata o le Ekalesia. Ao avea o se faitaulaga sili o le Ekalesia, sa amatalia le talaiga a Alema ina ia toe faafoi mai tagata o Sara’emila e ala i le molimau atu ia Iesu Keriso ma valaau atu i tagata e salamo. Sa ia uunaia i latou e saunia mo le faamasinoga a le Alii e ala lea i le faatuatua i le afioga o le Atua ma iloiloina le tulaga faaleagaga o o latou loto. A o e suesue i le afa muamua o le Alema 5, mafaufau e uiga i auala e mafai ai ona e faaaogaina mea ua e aoaoina ina ia mafai ona e aafia ai pe faaauau ona e aafia ai i le liua tele o le loto o loo talanoaina i le mataupu.

Alema 5:1–13

Na faamatala e Alema le liua o lona tama ma i latou sa mulimuli ia te ia

O le a le tele o lou suiga talu mai le 8 o ou tausaga? O le a le tele o lou suiga talu mai le 12 o ou tausaga? Mafaufau i auala eseese e suia ai tagata, e pei o o latou foliga, amioga, po o uiga. Manatunatu loloto i ni mea e ono taitai atu ai pe oo mai ai nisi o nei suiga i tagata. Ona faitau lea o le Alema 5:12, ma vaavaai mo mea na suia ai Alema le Matua. A o e suesue i le Alema 5:1–13, mafaufau pe faapefea ona suia le loto o se tagata.

O Elder Gerald N. Lund, o le na mulimuli ane galue o se tasi o le Fitugafulu, sa aoao mai a faapea o le upu fatu o lo o faaaoga i tusitusiga paia, e masani ona faatatau i “le tagata moni mai totonu” (“Understanding Scriptural Symbols,” Ensign, Oct. 1986, 25). Mafaufau mo sina taimi pe faapefea e le “liua tele o le loto” ona ese mai isi auala e suia ai tagata —e aofia ai ma auala na e mafaufau i ai a o e amata lenei lesona.

Toe tomanatu o tagata o le Tupu o Peniamina na latou maua le “liuga tele” i o latou loto, na mafua ai ona “le toe iai se manao e fai mea leaga, ae ia faia mea lelei e le aunoa” (Mosaea 5:2). Atonu e te manao e tusi le faamaninoga mai ia Elder Lund ma le mau faasino Mosaea 5:2 i le itu o lau tusitusiga paia e sosoo ma Alema 5:11–13.

Na faamatala mai e Elder D. Todd Christofferson o le Korama a Aposetolo e Toasefululua: “Atonu tou te fesili, Aisea e le vave ai ona tupu lenei suiga tele ia te au? E tatau ona e manatua ia faataitaiga ofoofogia a le nuu o le Tupu o Peniamina, Alema, ma isi i tusitusiga paia e—matua ofoofogia ae e le o se mea e masani ai. O le toatele lava o i tatou, e faifai malie suiga ma e umi se taimi e tulai mai ai. O le toefanaufouina, e le pei o lo tatou fananau mai i la le tino, o se faasologa ae le o se mea ua fuafua e tupu. Ma o le galue ai i lena faasologa, o le faamoemoega tutotonu lea o le olaga nei” (“Toe Fanauina,” Ensign po o le Liahona, Me 2008, 76).

Faitau Alema 5:3–7, ma vaavaai mo mea sa tau atu e Alema i tagata o Saraemila e fesoasoani e saunia ai o latou loto ia suia.

Tali fesili nei o loo i lenei tusi lesona: Na tau atu e Alema i tagata o Saraemila e uiga i le liliu mai o lona tama ma isi, e faatasi ai ma le faasaoina mai o i latou mai le faatagataotauaina. O le a sou manatu e faapefea e nei mea ua tutupu ona fesoasoani i tagata e saunia ai mo le lagonaina o se suiga o le loto?

Faitau Alema 5:10, ma lio faailoga fesili i le faaiuga o fesili e tolu na fesili atu ai Alema i tagata. Ona suesue lea o le Alema 5:11–13, o i na amata ai e Alema ona tali atu i nei fesili, ina ia maua le fesoasoani mo lenei faamatalaga: Afai tatou te talitonu i le afioga a le Atua ma faatino le faatuatua ia Iesu Keriso, e mafai ona tatou maua se suiga tele o le loto.

O le faatuatua i le afioga a le Atua e taitai atu i le suiga tele o le loto aua o le afioga a le Atua e na te aoao i tatou e uiga i le Faaola. Na talitonu tagata o Alema i le afioga a le Atua, na tuuina atu ia i latou e perofeta paia. Sa latou aoao e uiga i le mana faaola o le Togiola a Iesu Keriso, ma sa suia o latou loto a o faatupulaia lo latou faatuatua i le Faaola.

I lau api talaaga mo le suesueina o tusitusiga paia, faamatala i au lava upu pe faapefea e le talitonu i le Togiola a Iesu Keriso ona taitai atu i se suiga tele o le loto.
Tusi i lau api talaaga mo le suesueina o tusitusiga paia pe na faapefea ona suia lou loto. Afai ua e iloa se suiga o lou loto a o e suesue i le Tusi a Mamona i lenei tausaga i le seminare, e mafai ona e faamatala ou aafiaga o se vaega o lau tali.

Alema 5:14–36

Na aoao atu e Alema o le suiga tele o le loto e manaomia ina ia ulufale atu ai i le malo o le lagi

Ina ua tuanai ona aoao atu e Alema o le faatuatua i le afioga a le Atua e fesoasoani ia i tatou e amata ai le faagasologa o le mauaina o se suiga tele o le loto, na ia fai atu i tagata ina latou mafaufau i ni fesili se tele. O nei fesili e mafai ona fesoasoani ia i tatou e iloilo ai le tulaga a o tatou loto faaleagaga —o manaoga ma lagona o le tagata i totonu.

Faitau Alema 5:14, ma faailoga fesili e tolu na fesili ai Alema i tagata e mafaufau i ai e uiga ia i latou lava. O nei fesili e tolu ua faamatala ai le suiga e tatou te maua pe a tatou faatuatua i le faaolataga ua ofoina mai e ala ia Iesu Keriso. Ia manatua mai lesona ua tuanai (tagai Mosaea 5 ma Mosaea 27) o le “toe fanauina” e faatatau lea i le suiga e oo mai i se tagata pe a ia talia Iesu Keriso ma amata se olaga fou e le gata e avea ma Ona soo ae faapea foi ma Ona atalii po o se afafine faaleagaga (tagai Mosaea 27:25).

I lau api talaaga mo le suesueina o tusitusiga paia, tusi pe faapefea e se suiga o le loto ona atagia i mata o se tagata. I lenei faauigaga, o le upu mata o lona uiga o foliga vaaia o se tagata, e atagia ai lana amio, lagona, po o le tulaga faaleagaga. Faamatala se tasi e te iloa ua ia te ia foliga o le Faaola i ona mata.

I galuega faafomai o le katiokalama [suesuega o ma’i] o se siata lea e faaaoga e fomai e iloilo ai le tulaga o o tatou fatu faaletino. E fesoasoani e iloa ai le tulaga e manaomia ona togafitia. Suesue fuaiupu mai le Alema 5 o lo o lisiina atu i lalo o le katiokalama [suesuega o ma’i] faaleagaga o lo’o i lalo. A o e suesue i fuaiupu taitasi, faailoga le pusa o le siata o lo o sili ona faamatala ai lau tali i le fesili po o fesili i fuaiupu taitasi. (Afai e te manao e tausia au tali ia na o oe lava, e mafai ona e kopiina lenei siata i se isi fasipepa po o i totonu o lau api talaaga patino ona faamaea lea.)

Alema 5 Katiokalama [suesuega o ma’i] Faaleagaga
Taimi uma
Toeitiiti o taimi uma
E masani lava
O nisi taimi
E seasea, pe afai e mafai
Fuaiupu mai Alema 5	15	16	19	26	27	28	29	30–31

Afai e maea ona faatumu lau katiokalama [suesuega o ma’i] faaleagaga, faitau le Alema 5:21–25. Vaavaai mo mea na aoao e Alema e faatatau i lenei upumoni: E ala i le ola ai i le suia o le loto, ua saunia i tatou lava e maua se nofoaga i le malo i le lagi (o le malo selesitila).

Fai mea nei i lau api talaaga mo le suesueina o tusitusiga paia:
1. Fai se lisi o upu ma fasifuaitau sa faaaoga e Alema i le Alema 5:21−25 e faamatala ai le tulaga e te manao e te iai i le taimi nei.
2. Faamatala po o le a sou manatu pe faapefea e le suia o le loto ona saunia i tatou e maua se nofoaga i le malo i le lagi.

Faitau Alema 5:33–36, ma mafaufau po o le a sou lagona e uiga i le savali a Alema. Vaavaai mo upu ma fasifuaitau e fesoasoani ia te oe e tali ai i fesili nei:

O le a le mea o loo valaaulia au e le Alii ia fai?
O a ni taui mo le taliaina o lenei valaaulia?
O a ni mea o loo aoao mai e nei fuaiupu ia te au e uiga i le Faaola?

Faitau le faamatalaga lenei a Peresitene Ezra Taft Benson o loo faaalia ai pe faapefea e tagata ua suia o latou loto ona mananao e ola:

“Afai ua e filifili e mulimuli ia Keriso, ua e filifili ina ia suia oe. …

“E galue le Alii mai totonu i fafo. E galue le lalolagi mai fafo i totonu. E aveese e le lalolagi ia tagata mai tulaga eleelea. E aveese e Keriso ia tulaga eleelea mai tagata, ona latou aveesea lea o i latou lava mai tulaga eleelea. E suia e le lalolagi ia tagata e ala i le suia o le tulaga o loo siomia ai i latou. E suia e Keriso ia tagata, ona latou suia lea o tulaga o loo siomia ai i latou. E sui e le lalolagi amioga faaletagata, ae e mafai e Keriso ona suia uiga faaletagata. … E suia e le lalolagi amioga faaletagata, ae e mafai e Keriso ona suia uiga faaletagata. …

“E liua tagata aua o Keriso o le taitai. E pei i latou o Paulo o le a latou fesili, ‘Le Alii e, se a le mea e te finagalo i ai ou te faia?’ (Galuega 9:6.) …

“O lo latou loto e tusa lea ma Lona finagalo. (Tagai i le Ioane 5:30.)

“Latou te faia pea lava o mea e fiafia i ai le Alii. (Tagai i le Ioane 8:29.)

“E le gata ina oti i latou mo le Alii, ae o le mea pito taua e latou te fia ola foi mo Ia.

“E te ulu atu i o latou fale, e faailoa mai i ata e i puipui o o latou fale, tusi i a latou fatatusi, a latou musika e faalogoina, a latou upu ma galuega, o i latou o ni Kerisiano.

“Latou te laulaututu e fai ma molimau a le Atua i aso uma, ma mea uma, atoa ma nuu uma. (Tagai Mosaea 18:9.)

“E i ai Keriso i o latou mafaufau, a o latou vaai atu ia te Ia i manatunatuga uma (Tagai MF&F 6:36.)

“E i ai Keriso i o latou loto a o tuuina lo latou alofa ia te Ia e faavavau.(Tagai Alema 37:36).

“E toetoe o vaiaso uma lava latou te taumamafa ai i le faamanatuga ma toe faafouina la latou molimau i lo latou Tama e Faavavau, ua latou loto ina ia ave i o latou luga le suafa o Lona Alo, ma manatua pea o Ia, ma tausi i Ana poloaiga. (Tagai Moronae. 4:3.)” (“Fanauina i la le Atua,” Liahona, Ian. 1986, 2–3).

Ina ia faaiuina lenei lesona, vase se manatu se tasi mai le saunoaga a Peresitene Benson e fesoasoani ia te oe e mafaufau ai i le ala ua e manao e te ola ai o se tagata o lo ua maua le suiga o le loto. Faatu se sini e fesoasoani ia te oe e ola ai i mea sa e lagonaina a o e suesue i aoaoga a Alema e faatatau i le maua o le suiga o le loto (atonu e te manao e tusi i totonu o lau api talaaga patino po o i se isi fasipepa). A o faaauau ona e saili e toe fanau i la le Atua ma iloa le suiga o le loto, o le a e saunia e ulufale atu i le malo o le Atua.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 5:1–36 ma faamaeaina lenei lesona i le (aso).

O fesili, mafaufauga, ma manatu faaopoopo ou te fia faasoa ma lau faiaoga: