Iunite 17: Aso 1

Alema 17–18

Folasaga

Alema 17–18 o loo i ai mea na tusia e Mamona e faatatau i misiona a atalii o Mosaea i sa Lamana. O nei tusitusiga ua aumai ai se faataitaiga o le ala e saunia ai ma auauna atu faifeautala’i o aso nei. Sa saili e atalii o Mosaea le taitaiga a le Alii a o saunia i latou e talai le talalelei i sa Lamana. A o latou o atu i o latou ala eseese, sa faamafanafanaina i latou e le Alii ma folafola atu o le a latou aumaia agaga ia te Ia. Sa alu atu Amona i le nuu o Isamaeli ma amata ona aoao atu e ala i le auauna atu i se tupu o sa Lamana e igoa ia Lamonae. Sa maofa le tupu o Lamonae i le mana o Amona ina ua ia faasao le lafu a le tupu. O lenei auaunaga sa faamaluluina ai le loto o le tupu ma ona tagata e faalogo i aoaoga a Amona e uiga i le Atua ma le ata o le faaolataga. Na talitonu le tupu o Lamonae i mea sa aoao atu e Amona, ua ia iloa lona manaomia o se Faaola, valaau atu i le Alii mo le alofa mutimutivale, ma sa lofituina e le Agaga.

Alema 17:1–18

Ua saunia atalii o Mosaea e talai atu le talalelei i sa Lamana

Mafaufau i le umi o le taimi o loo auauna atu ai alii ma tamaitai i le misiona i aso nei. Faitau le Alema 17:4, ma vase lalo o le aofaiga o tausaga sa aoao atu ai e atalii o Mosaea le talalelei i tagata o sa Lamana.

A o malaga atu Alema i le nuu o Maneti, sa ia feiloai i atalii o Mosaea ina ua foi mai i latou mai a latou misiona faaumiumi, ma e sa fiafia i latou uma. Faitau le Alema 17:2–4, ma faailoga upu ma fasifuaitau o loo faamatala ai ituaiga faifeautalai sa i ai atalii o Mosaea.

1. Toe iloilo le Alema 17:2–4. I lau api talaaga mo le suesueina o tusitusiga paia, ia fai mea nei:

   1. Lisi mea na fai e atalii o Mosaea e saunia ai e avea o ni faifeautalai maoae, ma faamatala faaiuga o a latou sauniuniga.

   2. Filifili se mea na fai e nei faifeautalai e te manao ia sili atu le faaleleia i lou olaga, po o se uiga e te manao e atinae atoatoa. Tusi se palakalafa i le auala e te faia ai lenei mea.

Manatunatu loloto pe faafia ona e tatalo ma sailiili i tusitusiga paia e oe lava ma i lou aiga, ma mafaufau i avanoa e te anapogi ai. O auala na fesoasoani ai nei faiga ia te oe e “malosi ai i le malamalama o le upumoni” (Alema 17:2)?

Mai le faataitaiga a atalii o Mosaea, ua tatou aoao ai i lenei mataupu faavae: E ala i le suesue i tusitusiga paia, tatalo, ma anapogi, e mafia ai ona tatou maua le Agaga Paia ma aoao atu i le mana. I le maua ai o le Agaga Paia, e mafai ai ona tatou saunia lelei e faasoa atu le talalelei ma isi.

Faitau le saunoaga lenei mai ia Elder David A. Bednar o le Korama a Aposetolo e Toasefululua, lea na ia aoao ai le autalavou i auala e mafai ai ona latou saunia e avea o ni faifeautalai. Vaavaai mo auala patino e mafai ai ona e saunia oe lava e faasoa atu le talalelei e faapei ona faia e atalii o Mosaea.

“E mafai ona e faateleina lou manao e auauna atu i le Atua (tagai MF&F 4:3), ma e te mafai ona amata ona mafaufau e pei o faifeautalai, ia lagona mea e pei ona lagonaina e faifeautalai, tatalo e pei o faifeautalai, ia lagona mea e pei ona lagonaina e faifeautalai. E mafai ona e aloese mai aafiaga faalelalolagi lea e mafua ai ona alu ese le Agaga Paia, ma e mafai ona tupu a’e lou lagona mautinoa i le iloaina lea ma le tali atu i uunaiga faaleagaga. O lea upu ma lea upu ma lea mataupu ma lea mataupu, o se ma itiiti iinei ma si mea itiiti iina, e mafai ai ona e faasolosolo atu ai lava ina avea ma faifeautalai o loo e faamoemoe i ai ma le faifeautalai o loo faamoemoe i ai le Faaola. …

“O le folafola atu o le talalelei…. e le na o se gaoioiga lea tatou te aafia ai mo taimi faatapulaaina po o se tofiga e tatau ona tatou faamaeaina i le avea ai ma tagata O Le Ekalesia a Iesu Keriso o le Au Paia o Aso e Gata Ai. Ae, o le galuega faafaifeautalai o se faaaliga lea o lo tatou tofi ma lo tatou faasinomaga faaleagaga” (“Avea ma se Faifeautalai,” Ensign po o le Liahona, Nov. 2005, 46–47).

talavou o loo faitau le tamai tusi e uiga ia Iosefa Samita

Faitau Alema 17:9, ma vase lalo o mea na tatalo i ai atalii o Mosaea ao latou sauniuni e auauna atu. Faitau le Alema 17:11, ma mafaufau i mea na fetalai atu ai le Alii ia i latou e uiga i le ala e avea ai ma meafaigaluega i Ona aao. O nei fuaiupu ua aoao mai le mataupu faavae: I le avea ai o se faataitaiga lelei, aemaise lava pe a puapuagatia, e mafai e le Alii ona fai i tatou ma meafaigaluega i Ona aao.

2. I lau api talaaga mo le suesueina o tusitusiga paia, tusi e uiga i se tulaga ua e lagona ai e mafai ona fai oe ma faataitaiga lelei. Mafaufau i le tulaga o le aoga, aafiaga i le aiga ma lou aiga po o le aiga potopoto, ma aafiaga faaleagafesootai e feiloai ai le tagata i le tagata po o i luga o le initoneti. Faamatala pe faapefea ona e faaali atu se faataitaiga lelei i lena tulaga.

E sili atu ona faigata ona avea o se faataitaiga lelei i nisi o tulaga nai lo isi. Tagai i le auala o loo faamatala ai sa Lamana i le Alema 17:12–16, ma mafaufau e uiga i le mafuaaga e ono faigata ai i atalii o Mosaea ona aoao atu i lenei tulaga.

Aisea e te manatu ai o atalii o Mosaea sa naunau e talia puapuaga ina ia fesoasoani i tagata sa inoino ia sa Nifae? Ina ia fesoasoani ia te oe e malamalama ai i mea na faamoemoe atalii o Mosaea ina ia faataunuuina, faatumu avanoa i se upu mai le Alema 17:16: Na mananao atalii o Mosaea ia sa Lamana ina ia aumaia , aua sa latou mananao ia sa Lamana e iloa le fuafuaga o le togiola.

Ina ia fesoasoani ia te oe e malamalama i le auala e avea ai ma faataitaiga lelei mo isi, faamaea lenei galuega atofaina i ni nai aso e sosoo ai: Fai atu i se tasi o le aiga po o se uo e faamatala ia te oe pe faapefea e se faataitaiga faaKeriso a se tasi ona faia se eseesega i lona olaga.

Alema 17:19–39

Na avea Amona ma auauna i le Tupu o Lamonae ma faasaoina lana lafu

A o e faitau i leAlema 17:19–39, vaavaai mo pe na faapefea e Amona ona auauna atu i le Tupu o Lamonae ma auauna a le tupu. Mafaufau i le auala na fesoasoani ai le auaunaga a Amona e saunia ai sa Lamana e talia le talalelei. Fuafua e faasoa le tala ia Amona o loo faasaoina le lafu a le tupu ma se uso po o se uo a le aiga. Faamamafa atu lenei upumoni a o e faasoa atu le tala: E ala i le auauna atu, e mafai ona tatou fesoasoani e saunia isi e talia le talalelei. Talanoa ma lena tagata i se tasi e te manao e fesoasoani i ai e faamalosia lona faaleagaga. Mafaufau pe faapefea ona e auauna atu i lenei tagata, ma filifili pe faapefea ona e tuuina atu lena auaunaga.

Alema 18

O le faatuatua o Amona ua fiafia ai le Tupu o Lamonae, ma ua aoao atu e Amona le talalelei i le tupu

Sa ta’u atu e auauna a le Tupu o Lamonae ia te ia mea sa faia e Amona e puipuia ai le lafu a le tupu. Faitau le Alema 18:4–6, ma vaavaai mo le tali atu a le tupu i mea sa faia e Amona.

Ina ua fesili le tupu i ana auauna po o fea o i ai Amona, sa latou fai atu ia te ia o loo faataunuuina e Amona se manaoga muamua mai le tupu ina ia saunia ana solofanua mo se malaga i le nuu o Nifae, lea sa soifua ai le tama o le tupu. Faitau le Alema 18:12–15, ma vaavaai mo aafiaga o le auaunaga a Amona i le Tupu o Lamonae.

O Amona o loo Puipuia le Lafu a le Tupu o Lamonae

Faitau le Alema 18:16–21, ma vaavaai mo faamaoniga sa taitaiina e le Alii Amona a o ia aoao atu i le Tupu o Lamonae. I le avanoa o loo i ai, tusi pe faapefea e le Agaga o le Atua ona fesoasoani ia Amona i lenei tulaga.

A o e faitau i le Alema 18:22–32, vaavaai mo upumoni patino o le talalelei sa aoao atu e Amona ia Lamonae. Atonu e te manao e faailoga [upumoni] i au tusitusiga paia pe tusi foi i lau api talaaga mo le suesueina o tusitusiga paia. A o aoao atu Amona, sa ia atiae i luga o talitonuga na la faasoaina ma Lamonae. Na talitonu Lamonae i se atua—na ia taua o le Agaga Tele—ae na te le i malamalama i le natura moni o le Atua.

Faitau le Alema 18:33–35}, ma vaavaai pe faapefea ona tali atu Amona ina ua fesili le tupu ia te ia pe na auina mai o ia mai le Atua.

3. Mai lau sailiiliga o le Alema 17–18, tusi se palakalafa puupuu i lau api talaaga mo le suesueina o tusitusiga paia e otooto ai mea sa mafai ona fai e Amona i sa Lamana ona o le fesoasoani a le Atua.

Atonu e te manao e tusi le mataupu faavae lenei i au tusitusiga paia i talaane o Alema 18:35: A o tatou auauna atu i le Tama Faalelagi ma Iesu Keriso, o le a Laua faateleina lo tatou tomai e faia ai la La’ua galuega.

4. I lau api talaaga mo le suesueina o tusitusiga paia, tali atu i se tasi po o fesili uma e lua nei:

   1. E faapefea e le mataupu faavae o loo taua i luga ona fesoasoani ia te oe i ou tiute o le taimi nei ma le lumanai i le Ekalesia?

   2. E faapefea ona sili atu ona e auauna ma le faamaoni i le Alii ina ia mafai ona Ia faateleina lou tomai e faia ai Lana galuega?

Ona o le faataitaiga faamaoni ma galuega a Amona, sa mafai ona ia aoao atu Lamonae e uiga i le fuafuaga o le togiola a le Tama Faalelagi. Ia manatua foi sa lagona e Lamonae le tausalaina mo le fasioti tagata sa ia faia (tagai i le Alema 18:4–6). Faitau le Alema 18:36–43, ma vaavaai mo le auala na aoao atu ai e Amona le fuafuaga o le togiola ia Lamonae ma le auala na tali ai Lamonae i nei aoaoga.

5. Tali fesili nei i lau api talaaga mo le suesueina o tusitusiga paia: Aisea e te manatu ai o le Togioa a Iesu Keriso o le a faapitoa lona taua mo le Tupu o Lamonae e malamalama i ai?

Mafaufau pe faapefea e le aoaoina o aoaoga faavae o le Foafoaga, o le Pau, ma le Togiola ona fesoasoani e iloa ai e Lamonae lona manaomia mo se Faaola. Na aoao mai e Elder Bruce R. McConkie o le Korama a Aposetolo e Toasefululua e uiga i le taua o le Foafoaga, le Pau, ma le Togiola:

“O nei gaoioiga paia e tolu—o pou e tolu o le faavavau —ua lalaga faatasi i le tulaga maualuga o le fuafuaga e faavavau o le faaolataga. Tatou te vaavaai i le Togiola a le Alii o Iesu Keriso o le ogatotonu ma le fatu o le ekalesia ua toe faaalia. Na te aumaia le tino ola pea ma le ola e faavavau o le tagata. O le faaolataga o loo ia Keriso.

“Ae, pe ana leai le pau, po ua le mafai ona i ai se togiola. O le pau o Atamu ua oo mai ai le oti faaletino ma le faaleagaga i le lalolagi, ma e mai nei oti o le a toe faaolaina ai le tagata ma isi meaola uma e ala i le togiola a le Alii o Iesu Keriso. Na aumai e Atamu le ola faaletino; na aumai e Keriso tino ola pea. E oo mai le faaolataga ona o le pau ma le togiola.

“Ae ana faapea o le lalolagi ma le tagata ma meaola uma e le i fausiaina i o latou tulaga faaletino, ma le tulaga e le oo mai ai le oti, semanu ua leai se pau. …O lea ua alagatatau ai le faaolataga ona o le foafoaga o lagi ma le lalolagi ma mea uma o i ai. Ua oo mai le faaolataga ona o le foafoaga, le pau, ma le togiola; o nei mea e tolu o vaega taitasi o le fuafuaga paia e tasi” (A New Witness for the Articles of Faith [1985], 81–82).

Mai aafiaga a Lamonae ua mafai ai ona tatou aoao i lenei upumoni: Pe a tatou malamalama i lo tatou manaomia o le Faaola, o le a tatou naunau e salamo.

Ia faaiu le lesona o le aso lenei e ala lea i le mafaufau loloto i mea e mafai ona e faia ina ia fesoasoani ia te oe e manatua ai lou manaomia o le Faaola.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Alema 17–18 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: