E pei ona faamaumauina i le Moronae 7:20–48, sa faaauau e Mamona lana saunoaga i le sunako e ala i le aoao atu o e na faalogo ia te ia ina ia “taofi mau i mea lelei uma” (Moronae 7:20–21, 25). Sa ia faamatala mai le taua o le faatuatua, faamoemoe, ma le alofa mama. Sa faaiu lana saunoaga ma se aioi ia i latou na faalogologo ia te ia ina ia tatalo i le Tama ma o latou malosi i o latou loto mo le meaalofa o le alofa mama—lea na faauigaina e Mamona o le “alofa le pona lea o Keriso” (Moronae 7:47).
Ua aoao atu Mamona e uiga i le faatuatua ia Iesu Keriso
Toe iloilo le Moronae 7:12–13, ma mafaufau i le mea sa e aoaoina i le lesona ua tea e uiga i le auala e iloa ai mea lelei mai mea leaga. I le avanoa ua saunia, lisi ni faataitaiga o mea lelei (mea e mai le Atua ma faatauanauina i tatou ia talitonu ia Keriso) ma mea leaga (mea e faatauanauina i tatou e aua nei talitonu ia Keriso ma aua nei auauna atu i le Atua):
Mea Lelei
Mea Leaga
Matau sa uunaia i tatou e Mamona ina ia “taofi mau i mea lelei uma” (Moronae 7:19). Mafaufau loloto po o le a sou manatu i le uiga o le taofi mau i mea lelei uma.
Sa fesili atu Mamona i e na faalogologo ia te ia i se fesili taua, lea sa ia taliina. Faitau le Moronae 7:20, ma sue le fesili lea na fuafua Mamona e talanoa i ai. Ona suesue lea o le Moronae 7:21–26, ma vaavaai mo le tali i lenei fesili.
A o e tagai i le Moronae 7:21, 25, faailoga ia upu po o fuaitau ia e aoao atu ai lenei mataupu faavae: A o tatou faatino le faatuatua ia Iesu Keriso, e mafai ona tatou taofi mau i mea lelei uma.
I lau api talaaga mo le suesueina o tusitusiga paia, tali ia fesili nei:
E tusa ai ma le Moronae 7:22–26, o a ni auala e saili ai le Tama Faalelagi e fesoasoani ia i tatou e fausia le faatuatua ia Iesu Keriso?
O anafea na fesoasoani ai lou faatuatua ia Iesu Keriso e taofi mau i mea lelei pe na fesoasoani ia te oe e aveese se mea leaga?
Sa faaauau le faamatala mai e Mamona o nisi o mea lelei ia e oo mai ia i latou o e e faatino le faatuatua ia Iesu Keriso. Faitau le Moronae 7:32–34, ma faailoga ia le itiiti ifo ma le tasi se faamanuiaga i mau taitasi nei ia na mafua mai i le i ai o le faatuatua ia Iesu Keriso.
Mafaufau ma tatalo e uiga i se mea e mafai ona e faia e faatino atili ai le faatuatua ia Iesu Keriso. A i ai sau sini i le mafaufau, tusi i lalo i lau api talaaga mo le suesueina o tusitusiga paia. O lenei sini e mafai ona avea ma se mea patino lea o le a fesoasoani ia te oe ia mulimuli i upu a perofeta (tagai Moronae 7:23), tatalo ma le faatuatua sili atu (tagai Moronae 7:26), pe salamo mai se agasala (tagai Moronae 7:34). A o e tusiina lau sini, ia aofia ai ni faamatalaga auiliili i le auala o le a e faataunuuina ai. Tusi ai foi pe faapefea ona aumai e lenei sini ni mea lelei i lou olaga.
I le lauga lea na faamaumauina i le Moronae 7, sa faailoa mai ai e Mamona ni mataupu faavae paia se tolu e manaomia mo le ola e faavavau. Sa aoao mai e Elder M. Russell Ballard o le Korama a Aposetolo e Toasefululua faapea o nei “mataupu faavae paia e tolu e fatuina se faavae lea e mafai ona tatou fausia le faatulagaga mo o tatou olaga.” Fai mai o ia o nei mataupu faavae e tolu “e aumaia faatasi e nei mea ia i tatou se faavae lagolago e pei o vae o se nofoa maualuga vaetolu” (“O Le Olioli o Se Faamoemoe ua Faataunuuina,” Ensign, Ian. 1993, 38).
Ata
nofoa e 3 vae
O anomea nei o le a fesoasoani ia te oe ia maua ai mataupu faavae e tolu ia sa faailoa mai e Mamona. O le mataupu faavae muamua o le faatuatua, lea na faatoa e aoaoina i le Mamona 7:20–39. Faailoga se tasi o vae o le nofoa o i luga Faatuatua ia Iesu Keriso. Sue po o le a le mea e suitulaga ai le vae lona lua e ala i le faitau o le Moronae 7:40. Tusi le mataupu faavae lena i autafa o le isi vae o le nofoa.
Faitau le Moronae 7:41–42, ma faailoa mai mea sa aoao atu e Mamona e tatau ona tatou faamoemoe i ai. (Moronae 7:41 o se fuaitau o se mau tauloto.) Atonu e te manao e faaopoopo i ai “mo le ola e faavavau” i le faailoga sa e tuuina i luga o le vae o le nofoa lona lua lea e faitauina “Faamoemoe mo le ola e faavavau.”
Sa saunoa mai Peresitene Dieter F. Uchtdorf o le Au Peresitene Sili e uiga i le faamoemoe lea na faatatau i ai Mamona:
“O le faamoemoe o se meaalofa o le Agaga. O se faamoemoe lea e ala i le Togiola o Iesu Keriso ma le mana o Lona Toetu, o le a siitia i tatou i le ola faavavau ma e mafai ona o lo tatou faatuatua i le Faaola. …
“O le faamoemoe e le o le malamalama lea, ae, o le faatuatua tumau o le a faataunuuina e le Alii Ana folafolaga ia i tatou . O le mautinoa lea afai o le a tatou ola e tusa ai ma tulafono a le Atua ma upu a Ana perofeta, o le a tatou maua faamanuiaga manaomia i le lumanai. O le talitonu ma le faamaoemoe o le a taliina a tatou talosaga. E faaali mai i le talitonu [ia te oe lava], lagona o le lelei mea uma, naunautai, ma le faapalepale ma le onosai ” (“O Le Mana e Le Iu o le Faamoemoe,” Ensign po o Liahona, Nov. 2008, 21–22).
O le mataupu faavae e tasi ua tatou aoao mai le Moronae 7:40–42 o le: Afai tatou te faatino le faatuatua ia Iesu Keriso, e mafai ona tatou maua le faamoemoe e ala i le Togiola a Iesu Keriso ina ia sii ae i le ola e faavavau.
Faitau le Moronae 7:43, ma faailoa mai uiga faaalia ia e manaomia ina ia mafai ai e se tagata ona maua le faatuatua ma le faamoemoe lea na tautala i ai Mamona.
O le “agamalu, ma le maualalo i le loto” o lona uiga o le matua faamaulalo, filemu, ma gauai atu i le finagalo o le Alii. Aisea e te manatu ai o le agamalu ma le maualalo o le loto e manaomia ina ia maua ai le faatuatua ma le faamoemoe i le Togiola a Iesu Keriso?
I lau api talaaga mo le suesueina o tusitusiga paia, faamatala mai pe na faapefea e lou faatuatua ia Iesu Keriso ma Lana Togiola ona avatu ia te oe le faamoemoe.
Toe faasino i tua i le ata o le nofoa i le amataga o le lesona. Faitau le Moronae 7:44, ma faailoa mai le mataupu faavae lona tolu na aoao atu e Mamona. Faailoga le vae mulimuli o le nofoa ma le mataupu faavae mulimuli lenei.
E pei ona faamaumauina i le Moronae 7:44–48, sa tuuina atu e Mamona se faamalamalamaga malosi e uiga i le alofa mama. Faitau le Moronae 7:45–47, ma faailoga upu ma fuaitau ia sa faaaoga e Mamona e tau mai ai le uiga o le alofa mama. (Moronae 7:45, 47–48 o se fuaitau o se mau tauloto.) Ina ia fesoasoania ia te oe ina ia malamalama atili i le mea sa aoao atu e Mamona, atonu e te manao e tusi nisi o faauigaga nei i au tusitusiga paia: “tali-tiga” o lona uiga o le tumau ma le onosai, “e le losilosivale” o longa uiga ia aua nei lotoleaga, “e le faafefeteina” o lona uiga ina ia lotomaulalo ma agamalu, “e le sailia e ia ana lava” o lona uiga ia faamuamua le Atua ma isi, “e le faaitagofie” o lona uiga aua nei itagofie, ma le “e talia mea uma” o lona uiga ia talia upu moni uma.
Tali se fesili se tasi po o le sili atu o fesili nei, i lau api talaaga mo le suesueina o tusitusiga paia:
E tusa ai ma le faauigaga i le Moronae 7:45–47, aisea e te manatu ai o le alofa mama o le meaalofa faaleagaga sili lea e mafai ona tatou maua?
O le a sou manatu i le uiga e le uma le alofa?
Aisea e te manatu ai o i tatou o ni meanoa pe afai e leai so tatou alofa?
Ina ua uma ona ta’ua i le aoaoga a le Aposetolo o Paulo le alofa mama i le 1 Korinito 13, sa saunoa mai Elder Dallin H. Oaks o le Korama a Aposetolo e Toasefululua: “O le mafuaaga e le uma ai le alofa mama ma le mafuaaga e sili atu ai le alofa mama nai lo gaoioiga lelei e sili le taua na ia vaaia ona o le alofa mama, ‘le alofa mama o Keriso’ (Moro. 7:47), e le o se gaoioiga ae o se tulaga po o le uiga o le tagata. E maua le alofa mama e ala i se faagasologa o gaoioiga lea e taunuu i se liua. O le alofa mama o se mea e avea ai se tasi. O le mea lea, e pei ona folafola mai e Moronae, ‘vagana ai ua i ai i tagata le alofa mama e le mafai ona latou mautofi’ i nofoaga ua saunia mo i latou i maota o le Tama (Eteru 12:34; faaopoopo le faamamafa)” (“The Challenge to Become,” Ensign, Nov. 2000, 34.)
Faitau tulaga nei ma mafaufau pe faapefea ona e tali atu pe afai e te le maua le meaalofa o le alofa mama ma le auala atonu o le a e tali atu ai pe afai ua faatumulia oe i le alofa mama:
E ulagia oe po o se isi tagata i le aoga e tamaiti aoga.
E i ai sou uso po o se tuafafine e masani ona faatiga ia te oe.
E te le fiafia i se tasi o lau korama fou po o faufautua o le vasega e le pei o le taitai lea sa i ai muamua.
A uma ona faamatala le auala e taua ai lo tatou atiae o le alofa mama i o tatou olaga, sa faamatala mai e Mamona le auala e mafai ona tatou maua ai lenei uiga mama taua. Faitau le Moronae 7:48,, ma faailoga ia upu po o fuaitau ia e aoao atu ai lenei mataupu faavae: Afai tatou te tatalo atu i le Tama ma le malosi atoa o le loto ma ola e pei o ni soo moni o Iesu Keriso, e mafai ona faatumulia i tatou i le alofa mama. Mafaufau loloto pe aisea e taua ai le tatalo mo le meaalofa o le alofa mama ma le malosi atoa o lou loto nai lo le tatalo faamasamasamanoa mo lenei meaalofa.
I lau api talaaga mo le suesueina o tusitusiga paia, tusi e uiga i se taimi sa e lagona ai le fesoasoani a le Alii ia te oe ina ia maua le alofa mama. Pe tusi e uiga i se taimi sa e vaai ai i se isi tagata o faaalia le alofa mama. E le gata i lea, seti se sini faapitoa mo le auala o le a e faaleleia ai se tasi o uiga o le alofa mama o loo lisiina i le Moronae 7:45. Tatalo mo le meaalofa o le alofa mama ao e taumafai e ausia lau sini.
Tusi le mau atoa i luga o se fasi pepa. Tauloto faatele le mau. Tape (pe kolosi) upu po o fuaitau seia mafai ona e taulotoina atoa le mau i le mafaufau.
Tusi le mataitusi muamua o upu uma o mau nei e tolu i luga o se fasi pepa. Tagai i le pepa ina ia fesoasoani ia te oe i le taulotoina o mau. A uma ona e taulotoina faatele ia mau, tape pe kolosi ni mataitusi seia mafai ona e taulotoina ia mau mai le mafaufau. Ona filifili lea o se tasi o vaega nei o tagata ia e te manao ina ia maua atili le alofa mama: aiga, tagata o le korama po o vasega o le Ekalesia, uo i le aoga, uo, po o tuaoi. Mafaufau e uiga i le tagata sa e filifiliina ao e faitau i le Moronae 7:45, ma mafaufau i auala o le a e faaali atili atu ai i nei tagata le alofa faaKeriso.
Tusi i lau api talaaga mo le suesueina o tusitusiga paia se auala se tasi pe lua o le a e faaali atili atu ai le alofa mama mo nei tagata. I le aluga o le vaiaso a sau, tatalo mo le fesoasoani a le Alii i le atiaeina atili o le alofa mama mo i latou. I le faaiuga o le vaiaso, faasoa atu lou aafiaga ma se uo po o se tagata o le aiga.
Tusi le mea lenei i lalo o galuega atofaina o le aso i lau api talaaga mo le suesueina o tusitusiga paia:
Ua ou suesueina le Moronae 7:20 48 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: