Mamona 3–6

Folasaga

Ina ua uma ona latou toe maua mai o latou fanua mai ia sa Lamana, na toe saunia sa Nifae mo le taua.Na aioi atu Mamona ia sa Nifae ina ia salamo; ae, sa latou faamaualuluga i lo latou lava malosi ma tauto o le a latou tauia o latou uso o e na fasiotia. Ona sa faasaina e le Alii Lona nuu ona saili atu i le tauimasui, o lea na musu ai Mamona e taitai le latou autau ma na faatoilaloina i latou.A o fai pea le amioleaga a sa Nifae, na liligi ifo e le Atua Ana faamasinoga i luga ia i latou, ma na amata ona tafiesea i latou e sa Lamana mai le fogaeleele.Mulimuli ane, na toe foi Mamona e taitaia le autau a sa Nifae, ae ona o lo latou mumusu e salamo, sa faaumatia i latou e sa Lamana. Sa faanoanoa Mamona i lo latou pau ma lo latou le naunau e toe foi ia Iesu Keriso. Sa ia valoia o le a oo mai talafaamaumau a le nuu i aso e gata ai, ma sa ia uunaia i latou o e o le a faitau i ai ina ia salamo ma saunia mo lo latou lava faamasinoga i luma o le Atua.

Mamona 3–4

Ona o le faateleina o le amioleaga o sa Nifae, sa teena e Mamona le taitaiina o lo latou autau, ma sa amata ona tafiesea e sa Lamana sa Nifae mai luga o le fogaeleele.

Na i ai se taimi na e lagona ai na finagalo le Alii ina ia suia se mea i lou olaga? E te manatu na Ia uunaia pe na fesoasoani ia te oe ina ia suia se mea i lou olaga e aunoa ma lou iloaina?

I le vaitaimi o Mamona, sa tele lava ina le iloaina pe amanaiaina e sa Nifae le auala na uunaia ai e le Alii a latou taua ma sa Lamana. Ina ua uma ona osia e sa Nifae se feagaiga ma sa Lamana ma le aufaomea a Katianetona, sa tuuina mai e le Alii le 10 tausaga latou te nonofo ai e aunoa ma ni taua. I le vaitaimi o na tausaga sa latou sauniuni ai faaletino mo ni osofaiga e oo mai (tagai Mamona 2:28; 3:1).

Faitau le Mamona 3:2–3, ma tagai mo se auala sili ona taua lea sa finagalo le Alii e saunia ai e sa Nifae i latou lava mo osofaiga a sa Lamana. Na faapefea ona tali atu sa Nifae? E tusa ai ma le Mamona 3:3, aisea na faasaoina ai e le Alii sa Nifae ia latou taua talu ai e ui lava i lo latou amioleaga?

E pei ona faamaumauina i le Mamona 3:4–8, sa faalua ona toe puipuia e le Alii sa Nifae i le taua. O se tasi o aoaoga faavae moni e mafai ona tatou aoaoina mai fesootaiga a le Alii ma le malo amioleaga o sa Nifae e faapea i Lona alofa mutimutivale, ua tuuina mai ai e le Alii le tele o avanoa ia i tatou e salamo ai ia tatou agasala. O nei avanoa o se faamaoniga lea o le onosai ma le agalelei o le Atua ma Lona naunau ina ia ola Ana fanau uma i se auala e agavaa ai mo faamanuiaga atoatoa o le Togiola.

Tali fesili nei i totonu o lau api talaaga mo le suesueina o tusitusiga paia (e mafai ona e taliina i totonu o lau api talaaga patino pe afai e paia pe e le faalauaiteleina ia tali):
1. Na faapefea ona uunaia oe e le Alii ina ia salamo ma tuuina atu ia te oe avanoa e faatino ai? O le a se mea o aoao atu ia te oe e uiga i Lona tagata?
2. O le a se mea e mafai ona e faia e aluese ai mai le le amanaiaina po o le faamaaaina o lou loto i lenei faamalosiauga, e pei ona faia e sa Nifae i le Mamona 3:3?

O avanoa ma valaaulia mai le Alii e faia ni suiga i lou olaga e ono oo mai soo nai lo lou iloaina. Mo se faataitaiga, e mafai ona oo mai pe a e ‘ai ma inu i le faamanatuga pe afai foi e te lagona se uunaiga mai le Agaga Paia e faaleleia oe lava po o le auauna atu i isi. Ao e tagatagai atu mo na avanoa ma tali atu e ala i le faia i le taimi lava lena o ni suiga, o le a e valaauina le mana faaola a le Alii i totonu o lou olaga. Ina ia fesoasoani ia te oe ina ia malamalama i le tetee o sa Nifae i taumafaiga a le Alii e aapa atu ia i latou, faitau le Mamona 3:9–10 ma tagai mo le auala sa latou tali atu ai ia latou manumalo e tele ia sa Lamana. (A o e faitau, atonu o le a fesoasoani le iloaina o le upu tauia i le fuaiupu e 9 o lona uiga o le taui atu mo se manua.)

Na faapefea ona tali atu sa Nifae ina ua mavae o latou manumalo ia sa Lamana?Faitau le Mamona 3:11–13, ma saili le tali atu a Mamona i le tautoga a le autau ina ia tauimasui (taui atu).

Na taitaia e Mamona autau a sa Nifae mo le silia ma le 30 tausaga, e ui lava i lo latou amioleaga.O le a se mea na aoao mai ia i tatou i le musu o Mamona e taitaia le autau i lena taimi e uiga i le matautia o le saili e tauimasui?

Faitau le Mamona 3:14–16, ma faailoga fuaitau ia e faaalia mai ai mea na aoao mai e le Alii e uiga i le tauimasui (po o le sailia o le taui atu). O se tasi o upumoni e mafai ona tatou aoao mai nei mau e faapea e faasa e le Alii ona tatou saili e tauimasui.

Tali fesili nei i lau api talaaga mo le suesueina o tusitusiga paia:
1. Na i ai se taimi sa e manao ai e taui atu pe tauimasui i se tagata mo se mea sa faia e lena tagata ia te oe? Aisea e te manatu ai o se tali matautia pe le lelei lenei mea? O ai e te manatu o le a sili atu ona afaina i lou saili e tauimasui?
2. Aisea e tatau ai ona tatou tuuina atu ia faamasinoga ma le tauimasui i aao o le Alii nai lo le tauaveina i o tatou lava luga?

E ui ua tatou iloa e tatau ona tatou faataatia ese ia lagona o le tauimasui ma ia maua le naunautaiga e faia ai, ae e mafai ona faigata le faatoilaloina o nei lagona pe a tulai mai. Ao e faitau i le fautuaga lenei mai ia Peresitene James E. Faust o le Au Peresitene Sili, vase lalo o fuaitau ia na fesoasoani ia te oe ia iloa mea e mafai ona e faia e foia ai lagona o le tauimasui pe a e fetaiai ma i latou:

“E manaomia ona tatou iloa ma faailoa lagona ita.E manaomia ai le lotomaualalo e faia ai, peitai afai tatou te o ifo i o tatou tulivae ma ole atu i le Tama Faalelagi mo se lagona o le faamagaloga, o le a fesoasoani mai o Ia ia te i tatou.E manaomia i tatou e le Alii ‘ia faamagalo atu i tagata uma’ [MF&F 64:10] mo lo tatou lava lelei aua o le ‘ita e faatuai ai le tuputupu ae faaleagaga’ [Orson F. Whitney, Gospel Themes (1914), 144]. Sei iloga ua tatou faamamaina i tatou lava mai le inoino ma le ita ona mafai lea e le Alii ona tuu le mafanafana lelei i o tatou loto. …

“… A tulai mai mala, e le tatau ona tatou tali atu i ai e ala i le saili atu e tauimasui, ae ia tau lava ina tuu atu le faamasinoga tonu i lona ala, ona faagalo ai lea.E le faigofie ona faagalo ma faamama o tatou loto mai le faateleina o le ita.Ua uma ona ofoina mai e le Faaola ia i tatou uma se filemu taua e ala i Lana Togiola, peitai ua na o lo tatou naunau e lafoai lagona le lelei o le ita, lotovale, po o le tauimasui e mafai ai ona oo mai. Mo i tatou uma lava o e faamagalo atu ‘i e ua agaleaga mai ia te i tatou’ [Faaliliuga a Iosefa Samita, Mataio 6:13], e oo lava ia i latou sa faia ni solitulafono matuia, o le Togiola e aumaia ai se fuataga o le filemu ma le mafanafana” (“O Le Mana Faamalolo o le Faamagaloga,” Ensign po o le Liahona, Me 2007, 69).

Mafaufau loloto pe faapefea ona e faaaogaina lenei fautuaga e aveese atu ai soo se le fiafia, ita, po o ni ou lagona le lelei o i ai i isi.

Ina ua uma ona musu e taitaia autau a sa Nifae, na taulai atu le vaaiga a Mamona i le tusitusi mo i latou o e o le a faitauina ana upu i aso e gata ai. Sa ia manao ina ia tatou salamo uma ma saunia e “tutu uma i luma o le nofoa-faamasino o Keriso” (tagai Mamona 3:18–22).

Faitau le Mamona 4:1–2, ma tagai i le mea na tupu i le autau a sa Nifae ao latou saili e tauimasui ia sa Lamana. Faitau le Mamona 4:4, ma tagai pe aisea na le manumalo ai autau a sa Nifae (manumalo). Faitau le Mamona 4:5, ma faailoa mai soo se upumoni e uiga i taunuuga o le faaauau pea o le amioleaga. O le a se mea sa e mauaina?

O se tasi o upu moni atonu na e vaaia e faapea o faamasinoga a le Atua o le a manumalo i e amioleaga. E masani lava “o e amioleaga e faasalaina e e amioleaga” (Mamona 4:5). E teena e e amioleaga le fesoasoani a le Atua ma mumusu e saili Lana puipuiga faalelagi. Faitau le Mamona 4:11–14, 18, ma tagai pe na faapefea ona liligi atu ia faamasinoga a le Atua i luga o sa Nifae.

Tali fesili nei i lau api talaaga mo le suesueina o tusitusiga paia:
1. I ou manatu, o le a le vaega sili ona faanoanoa i tulaga o sa Nifae i le Mamona 3–4?
2. E faapefea e aoaoga faavae po o upumoni ua oo i ai lau suesuega i le taimi nei ona fesootai le tasi ma le isi? (Mafaufau i le fesootaiga i le va o le salamo, tauimasui, ma faamasinoga a le Atua.)

Mafaufau loloto po o le a le mea e finagalo le Alii e te faia e faaaoga ai nei upumoni.

Mamona 5–6

Ua filifili Mamona e toe taitaia le autau a sa Nifae, peitai sa manumalo sa Lamana; sa faanoanoa Mamona i le faaumatiaga o lona nuu

E i ai se eseesega i le va o le faanoanoa lea atonu e o faatasi ma le maliu o se tasi sa ola i se olaga amiotonu ma se tasi o le na maliu ao ola amioleaga? O le a sou manatu po o le a le eseesega?

Ina ua mavae le silia ma le 13 tausaga o musu e taitaiina ia autau a sa Nifae, na toe taitaiina e Mamona. Ae peitai, sa ia taitaiina i latou e aunoa ma se faamoemoe aua sa mumusu tagata e salamo ma sa valaau atu i le Alii mo Lana fesoasoani. Ina ua mavae le aloese mai i nai galu o osofaiga a sa Lamana, sa sosolaese ia sa Nifae. O i latou sa le mafai ona sosolaese vave na faaumatia. Sa tusia e Mamona se tusi i le tupu o sa Lamana e talosagaina ai lona tuuina mai o se taimi e faapotopoto ai sa Nifae mo se taua faaiu e tasi (tagai Mamona 5:1–7; 6:1–6).

Faitau le Mamona 6:7–11, ma taumafai ina ia malamalama i le faanoanoa o Mamona ao ia molimauina le faaumatiaina o lona nuu. Aisea e te manatu ai e mafai ona taufaafefe le oti ia i latou o e o ola amioleaga?

Faitau le Mamona 6:16–22, ma tali fesili nei i totonu o lau api talaaga mo le suesueina o tusitusiga paia:
1. Aisea ua fautuaina ai i tatou ma le maelega e perofeta, taitai, ma matua ina ia salamo?
2. E faapefea e le faamoemoe i le opo a le Alii ona fesoasoani ia te oe ia salamo?(tagai Mamona 6:17).

Mafaufau loloto pe i ai se mea e finagalo le Alii e te salamo ai i le taimi lava lenei o lou olaga. Atonu e te manao e tusi le mea lenei i totonu o lau lava api talaaga ma seti ni sini e faataunuu ai.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mamona 3–6 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: