Iunite 22: Aso 1
Helamana 1–2
Folasaga
I le mavae ai o le maliu o le faamasino sili o Paorana, na i ai se fefinauaiga matautia i sa Nifae e uiga po o ai o ona atalii—o Paorana, Paanati, ma Pakumenae e tatau ona avea ma faamasino sili fou. Na filifilia Paorana e tagata e avea ma faamasino sili fou. O se tasi o tagata na mulimuli ia Paanati, o se alii e igoa ia Kisakumena o lē sa galue mo se vaega faalilolilo, na fasiotia Paorana, ona tofia ai lea o Pakumenae o se faamasino sili. O le faaaogaina o le avanoa lenei o fefinauaiga ma fevaevaeaiga, na mafai ai e sa Lamana ona faatoilalo laumua o sa Nifae o Saraemila ma fasiotia Pakumenae. O le taitai sa Nifae o Moronaea na toe mauaina mai le aai o Saraemila, ma sa tofia ai Helamana e avea ma faamasino sili. Sa fasiotia Kisakumena ao lamalama e fasioti Helamana, ma sa avea Katianetona ma taitai o le vaega faalilolilo
Helamana 1
O fefinauaiga po o ai e tatau ona avea ma faamasino sili ua faatagaina ai sa Lamana e faoa Saraemila, o le laumua o sa Nifae
Mafaufau i le taimi mulimuli na lua misa ai ma se tasi pe na e molimauina ai nisi o femisaai. O a ni faafitauli e tutupu mai i na fefinauaiga? A o e suesue le Helamana 1, vaavaai mo faafitauli na aumaia e fefinauaiga i luga o sa Nifae ma manatunatu loloto i mea e mafai ona e aoao mai i o latou aafiaga.
Faitau le fuaitau o mau nei, ma tusi au tali i fesili i avanoa ua tuuina atu:
-
Helamana 1–4. O le a le mea na mafua ai fefinauaiga ma fevaevaeaiga i tagata sa Nifae?
-
Helamana 1:5–8. O ai sa filifilia e avea ma faamasino sili? Na faapefea ona tali atu uso e toalua o le faamasino sili fou?
-
Helamana 1:9–12. O le a le mea na faia e Kisakumena, ma o le a le feagaiga na faia e Kisakumena ma ana vaega faalilolilo i le tasi ma le isi?
I le taimi lenei o fefinauaiga i sa Nifae, na taitaia ai e se tagata e igoa ia Korianetuma ia sa Lamana e tau ma le aai o Saraemila. Faitau le Helamana 1:18–22, ma faailoa mai mea na mafai ona faia e sa Lamana o se taunuuga o fefinauaiga a sa Nifae.
O se tasi o upumoni e mafai ona tatou aoao mai lenei tala o le: O fefinauaiga e faavaevaeai ai ma faavaivaia i tatou i uunaiga a le fili. Atonu e te manao e tusi lenei mataupu faavae i lau tusitusiga paia i talaane o Helamana 1:18.
-
Ina ia fesoasoani ia e malamalama lelei i lenei mataupu faavae, tali fesili nei i lau api o talaaga mo le suesueina o tusitusiga paia:
-
Na finau se tamaitai talavou ma ona matua e uiga i ana uo. E mafai faapefea e lenei fefinauaiga ona aafia ai ona uiga faaalia i le faalogo atu i fautuaga a ona matua e uiga i isi vaega o lona olaga?
-
O se alii talavou o loo i ai lagona ita i se tasi o lana korama perisitua. E mafai faapefea e lenei fefinauaiga ona aafia ai le auala e amioai ai i le lotu?
-
Mafaufau i se vaega o lou olaga lea e te lagona o loo i ai se fefinauaiga i le va o oe ma isi tagata. O le a se mea patino e tasi e mafai ona e faia e aveesea ai lenei fefinauaiga mai lou olaga? E mafai faapefea ona e faataunuuina lenei mea?
-
Helamana 1:22–30 ua faamaumau ai faapea i le mavae ai o le manumalo o sa Lamana i Saraemila, na amata i le taimi lava lena ona savavali atu i le aai o Nuumau ina ia mauaina foi. Na mafai e au tau a sa Nifae ona siomia le au sa Lamana ma faatoilalo i latou. Sa fasiotia le toatele o sa Lamana, ae o i latou o e na sisii o latou lima na faatagaina e toe foi atu i o latou lava laueleele.
Helamana 2
Ua avea Helamana ma faamasino sili, ma sa puipuia o ia e ana auauna mai se vaega faalilolilo mai le fasiotia o ia
Ae e te lei suesue i le Helamana 2, mafaufau e uiga i le auala o le a taumafai ai se tamaitai po o se alii talavou faamaoni e foia se mea sese po o se agasala. Mata e na te taumafai e nanaina pe saili le faamagaloga mai le Alii ma mai ia i latou o e na tiga ai?
Ina ua uma ona fasioti e Kisakumena ia Paorana, sa tauto o ia ma isi tagata o lana vaega faalilolilo i le tasi ma le isi o le a latou le tauina lava i se tasi le tagata na faia le fasioti tagata. Faitau le Helamana 2:3–4, ma gauai atu i le fasifuaitau “ulu i se feagaiga ia leai se tasi ia ona iloa lona amioleaga.” Ona faitau lea o le Mataupu Faavae ma Feagaiga 58:43, ma vaavaai mo auala ua finagalo le Alii ia tatou faia pe a o tatou faia se mea sese.
-
Na avea Helamana ma faamasino sili fou i le mavae ai o le maliu o Paorana, ona tonu lea ia Kisakumena ma lana vaega faalilolilo e fasioti foi Helamana. O se tagata e igoa ia Katianetona na avea ma taitai o le vaega faalilolilo i lea taimi. Faitau le Helamana 2:2–9, ma tusi i le avanoa o loo i lalo le auala na fasiotia ai Kisakumena:
Faitau le Helamana 2:10–14, ma vaavaai mo le mea na tupu i le vaega o le au faomea a Katianetona. Na lapatai mai Mamona o vaega faalilolilo e pei o le au faomea a Katianetona, lea na ta’ua o “pulepulega faalilolilo” (tagai, mo se faataitaiga, Helamana 3:23), o le a iu ina mafua ai ona oo le faatamaiaga i tagata sa Nifae. O perofeta ua tuanai o le Tusi a Mamona na lapatai mai foi e faasaga i le faia o faapotopotoga faalilolilo (tagai 2 Nifae 26:22; Alema 1:12). Ua aoao atu e le Tusi a Mamona lenei mataupu faavae: E mafai e faapotopotoga faalilolilo ona taitai atu i le faatamaiaina o tagata.
Na lapatai mai Elder M. Russell Ballard o le Korama a Aposetolo e Toasefululua e uiga i tulaga lamatia o faapotopotoga faalilolilo i aso nei. Ao e faitau i lana lapataiga, faailoga mea e mafai ona tatou faia e tetee atu ai i faalapotopotoga faalilolilo.
“Ua aoao mai e le Tusi a Mamona o pulega faalilolilo o faiga faasolitulafono e tulai mai ai se luitau matautia, e le gata i tagata taitoatasi ma aiga ae faapea i le lalolagi atoa. O loo i ai i pulega faalilolilo o nei aso ni talavou ua fai kegi, o faalapotopotoga ua gaosia fualaau faasaina, ma vaega toatele o tagata latou te faia faiga faasolitulafono. O pulega faalilolilo i o tatou vaitaimi, e faagaoioia e pei lava o le au faomea a Katianetona i le taimi o le Tusi a Mamona. … O o latou faamoemoega e aofia ai le ‘fasioti tagata, o le vete, ma le gaoi, ma le faitaaga, ma fai amioleaga eseese uma ua le tusa ai ma tulafono a lo latou nuu, atoa ma tulafono a lo latou Atua’ [Helamana 6:23].
“Afai tatou te le faaeteete, o pulega faalilolilo o ona po nei, e mafai ona vave mauaina le mana ma le faatosinaga e pei lava o le vave ma le mae’ae’a na latou faia i le taimi o le Tusi a Mamona. …
“Ua aoao mai le Tusi a Mamona o le tiapolo o le ‘pogai o agasala uma’ ma o le tufuga o nei pulega faalilolilo uma [Helamana 6:30]. … O lona faamoemoega o le faatamaiaina lea o tagata taitoatasi, o aiga, o nuu ma atunuu [tagai 2 Nifae 9:9]. Sa i ai se taimi, na faamanuiaina ai ana taumafaiga i le Tusi a Mamona. Ma o loo faapea foi ona tele ona manumalo i ona po nei. O le ala lea, e matua taua ai lava mo i tatou … ona tutu atu ma le atoatoa mo le upumoni ma le amiotonu e ala i le faia o mea tatou te mafaia, e fesoasoani ai ia saogalemu o tatou alaalafaga.
“… [E mafai ona tatou] ‘tutu o ni molimau a le Atua’ e ala i le faia o ni faataitaiga, tausisia tulaga o le Ekalesia, ma faasafua atu a tatou molimau ia i latou o loo siomia ai i tatou [tagai Mosaea 18:9]” (”Tutu Atu Mo Le Upumoni ma le Amiotonu,” Liahona, Ian. 1998, 43).
Mafaufau i se auala se tasi pe sili atu e mafai ona e faaaogaina ai aoaoga a Elder Ballard ia tu mo le upumoni ma le amiotonu i lou alalafaga ma i lou atunuu.
-
Ua ou suesueina le Helamana 1–2 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: